Kan inkârah engmah a thleng lo va;
Lâwmna leh lungngaihna mittui
Kan inṭâwm zawng zawng te kha
Puarpawlêng, engmah lo mai a lo ni,
Han tih theih hi ka nuam mang e!
Mahse, thinlung chhungril takah
Ka tan awmze thûk tak an nei si.
Nang nena kan nuih lai ni leh
Kan ngui lai zan te khân
Thâm ral lo sulhnu min bân a,
Nghilh rual loh hniakhnu min chhiah si.
Engah nge i hming an lam rîk hlek pawha
Ka thinlung hi a phi buai a,
Awm dan thiam lova ka vân ruai a,
Nun hlui liam hnu-a ka kir leh thuai ṭhin ni?
Tuna hei ang tisa leh thlarauva
Tawrhna namên lo ka tawh chang hian,
Ka lo ngaihzia che hi
Ka hre chhuak thar leh ṭhin.
Ziaktu: Mawii_KHT
Post a Comment