Episode 1

Kum 2012 February ni 3 zing 7:30 a ni a, ka room kawngka kik ri chuan min ti harh a, ka nu chuan, "Chaw ei ka siam tawh a nia, a dai zo dawn, rawn chhuk thuai rawh", a rawn ti sek a. Ngaihsak lem lo chuan muthilh leh mai ka tum nain ka nu bawk chuan, "Sikul ṭan ni a ni lo'm ni, rawn chhuk thuai rawh, in tlai ang e", a rawn ti leh a, thil ka hre chhuak thut, rang zet hian ka tho chhuak nghal, ka room calendar ka en a, vawiin hi sikul ṭan ni a lo ni ta reng mai.Tukverh ka hawng a, Laltetea ka ko, min chhang mai lo. Ka nu bawk chuan, "Hei Te-a'n sikul kal turin a rawn sawm che a nia", a rawn ti leh a, rang zet hian in hnuai lam ka pan nghal. Kumin school luh hi eng vanga phur em em nge ka nih pawh ka inhre bik lo.

Kanu chuan ka chawhmeh duh ber leh ka huat ber a lo siam ve ve a, ka duh ber chu Alu a ni. Ka huat ber chu Sangha a ni. Sangha a siam tel chhan chu ka thianpa Tete-a duh ber a nih vang a ni. Tete-a hi ka tet te aṭanga ka kawm tawh a ni a, kan in bul lawk a awm an ni, nitin kan inkawm ṭhin a, mipa ni mah se ka anpui ang mai hian ka kawm a, ka inveng ngai lo, a ni pawh chuan a anpui chei hian min chei a ni ber mai, bialnu a neih chang te hian min hmuhpui rawh a ti ṭhin a, ka peih lo ziah zui, a chhan pakhat chu a bialnu te'n min thik ka duh loh vang a ni.

Chaw kan ei kham chu sikul lam kan pan nghal a, sikul kan thleng ṭep tihah Tete-a chu a bialnuin a rawn ko hrang daih a, chutia a bialnu vanga kei, a ṭhian ṭha ber min kalsan chu ka thinrim ru hle a, mahse ka ti lang duh chuang lo va, kan haw hunah ka chhuahchhal ang ka ti rilru tawp a. Phur vak lo chuan class-ah ka lut a, Kimkimi chuan, "ka bulah lo ṭhu rawh", tiin min rawn sawm a, Kimkimi nen hian nikum aṭang khan kan inhria a, nikum pawh khan kan ṭhu dun a, sual lo mah se a titi tui thei lutuk kha ka beng a ti kham ṭhin. Ka ngaihsak loh paw'n min zui reng a, ka biak miah loh paw'n min be lui ngar ngar ṭhin, eng emaw ti zawng tak hian ani hi ka ngaina ṭan ve a, a chhan chu ani hian min dawh theih em vang a ni.

Kumin atan ka ṭhutpui tur atan ani hi a ṭhat leh ber ka ring a, a bulah chuan ka ṭhu leh ta tawp a, ka thu fel chiah tih chuan a rawn tawng nghal buan buan a, eng ber nge a sawi pawh a hriat theih loh, full stop leh comma pawh dah hman lo hian a ṭawng tui em em mai a, ka beng a ti kham lutuk chu tukverh lam ka hawisan hmak a, chuta ka thil hmuh chuan ka mit min lak sawn tir thei ta reng reng lo. Ka vawikhat hmuhna mah ni se midang ang lo tak hian mi hip theihna riau a nei a, kei ang thinlung sak tak nei pawh min luanliam tir thei a nia, ka en tlawk tlawk mai a ni. Kimkimi chuan min rawn koh chhen avangin a lam chu ka hawi zuai a, chu pa lam ka va hawi leh chuan a lo bo hman, chutah Kimkimi bawk chuan, "Ti nge kha lam i hawi reng, min chhang ve ta che", a rawn ti leh pek a, ka ning ru lutuk insum thei lo chuan, "Lalṭhakim min be sek suh, i ngawi ve hle hle thei lo em ni, nichin aṭang ila tawng char char, i tawng ka rui", vin deuh hlek hian ka ti a, chutah pawh thinrim hmel pu miah lo hian, "Misualnu, keimah leh Tete-a tih loh ṭhian i neih loh hi, kei tal hi chu min vin reng zel suh", a ti sep ringawt a, a thil sawi chu huat chi pawh a ni lo, thu dik a ni miau a.

Laltete chuan kan inhnial a hmuh chuan kan ṭhutnaah an rawn ṭhu ve a, "Kimkim, he nu bula ṭhut hi i ning em? Lo dawh hram hram rawh aw, a biak duh loh che pawn be lui zel mai rawh, a haw chuang lo che a nia, dik tak chuan keini pahnih tih loh chuan a ṭawng thei tih tuma'n an hrelo a nia, ṭawng tlem viau mah se a rilru a ṭha a nia, ngai neih la, be lui char char rawh. Kan sikul-ah hian mipa leh hmeichhia ṭhut dun phal se chuan ka bulah a ṭhu thei tur a nia", tiin Kimkimi chu an hrilh sep sep a, kei chuan, "Ngawi mai mai teh, i bialnu bulah va kal leh rawh", ka tih chuan ka sam chul pah chuan, "Ilo thik vel em ni, mipa i nih kha, mahni anpui ka ngaizawng duh lo a nia", min tih chuan ka nuih a za ru lutuk, mahse ka nui duh chuang lo. "Ka thik lo va, mahse, bialnu neih tak vang maia kei min hlamchhiah kha ka thin a rim", ka ti ve nghal a, min chhan a han tum leh na chu kan zirtirtupa a rawn lut a, Tete-a pawh a ṭhutna lamah a tlan phei nghal a.

Sikul ṭan ni a nih vang chuan eng vak mah kan zir lo, ka rilru chuan nichin deuh lawka ka hmuh pa ngawt kha ka ngaihtuah a, hmuh leh ka chak zek zek a ni ber mai. Tiang hian ka la awm ngai lo, vawikhat chiah ka hmu a, mahse, vawi tam ka ngaihtuah si, a hming tal hria ila chuan. Hria an awm mial awm sia tih te ka ngaihtuah a. Amah ka tawn dawn vang hi a ni mahna sikul kal ka phur em em chhan kha tih te ka ngaihtuah a. A hmel hmu lova haw chu ka huphurh hle a, haw hmain vawikhat tal hmuh leh ka chak a, hmuh leh tumin ka mit ka len ru reng a, mahse ka hmu thei si lo, hnual zet hian haw ka tum a. Laltete-a lah a bialnu a thlah kawi a, keimahin ka haw a ngai a, ka mood chu off tak hi a ni ringawt.

Zanin hi bawh kan theih ni se, naktuk thlengin sikul kal leh vat ka chak ber a ni, ka vei ruk deuh pa hmuh hlan mawlh chu nghakhlel a ni. In ka thlen hnu paw'n ka inthlak peih lo va, ka mu tawp a, Nu Chhuani a rawn lut thut. Nu Chhuani hi Laltetea nu a ni a, ka ruala a rawn hawh loh chhan min zawt a, kei chuan thinrim zet hian, "A bialnu a thlah nih kha, chhun chawlh lai paw'n ka bulah a awm lo, a bialnu bulah thir angin a bet char char a nih kha", tiin pangchang deuh hian ka han sawi a, nuih za tih hriat tak hian, "Ngaihzawng nei ve tawh la, bialnu a neihsan ziah che a, ka ngaih dan a pel tawh. Bialpa neihsan ve la a hre thiam ve mai ang", nui chung hian a ti a. Ka thinrim pawh a zia deuh, bialpa a sawi takah chuan ka phur ru ang reng a, "Nu Chhuante, lo ṭhu rawh, thil te te ka hrilh ang che", tiin ka kut chuan ka va hui a, a ni pawh chu a rawn ṭhu ve nghal mai a. Vawiin-a ka hmuh pa, ka vei ruk deuh te kha zep miah lo chuan ka hrilh malh malh a, Nu Chhuani chuan, "Tak tak maw! I nang mah lo e, dawt min hrilh chu ka ring si lo, chu pa chu Te-a i hmuhtir ve lo em ni? A hre mial maithei asin", a sawi zawh rual chuan kei chuan, "Hre awm lo, Laltete-a ṭhiante zingah a mah anga ṭha kha an awm lo hrim hrim, bakah kan class a mi a ni lo, bakah kan sikul-a lo lut thar a ni ang, a hmel kha ka la hmu ngai lo kum dang ah", ka ti nghal a. Kan titi tui lai tak chuan kanu leh Laltetea an rawn inzui lut, ka nu chawhmeh lei vel chu Laltetea chuan a rawn khai pui chu lo niin.

Ka nu ka hmu chiah tih chuan phur zet hian, "Nu, bialpa ka nei ve duh tawh, ka nei ve tawh dawn, Tete-a paw'n bialnu a nei ṭeuh tawh", ka'n ti chu Laltetea chuan, "I bialpa tur chu hmeichhia em ni? mipa i hmu tai ngai si lo, mipa i ngaizawng ve te a nih chuan Vawk kan talh dawn nia", nui vur vur chung hian a rawn ti a, ka nu pawh chuan awih lo zet hian, "Mi dang ngaihzawn a ngai hleinem, hei, Laltete-a hi ngaizawng tawp rawh", a tih rual chuan Nu Chhuani pawh chuan a lo tuihnih ve nghal a, "Ni e, mi dang ngaizawng suh u, in pahnih hian inngaizawng mai rawh u", a rawn ti ve leh bawk a. Laltetea nen kan inen a, kan nuih a za dun kher mai, kan inngaihsak tawn vuai na chu, mipa leh hmeichhia enin kan inen lo ve sia, inngaihzawn chu kan tih ngai loh turah kan dah tawp.

Episode 2

Zan dar 12 ni tawh mah se ka muhil thei hauh lo, chhun lama ka thil hmuh khan suangtuahna ramah min hruai a ni ber mai, chu ka suangtuahna ramah chuan ka thinlung lal fapa nen chuan kut inkai rial hian kan lo leng dun vel a, pangpar tam tak awmna hmun kiangah chuan thingkung lian tawk ve tak pakhat hi ding se, chu thing hnuaiah chuan suangtuahna rama ka lal fapa dar ngheng ila tih te ka suangtuah vel a. Ka thil ngaihtuah laklawh lai chuan ka lu chu ka'n thing nawk nawk a, ka thil suangtuah hi a Vai style tlat tiin ka nui leh hnuhnawh a. Tu nge maw a niha tiang em ema ka ngaihtuah ni, vawikhat chauh ka hmu a, mahse, vawi tam ka ngaihtuah si, a ni khan hmangaih dang lo nei ta se engtin nge ka awm ang, a kut pawh vuan loin ka theihnghilh a ngai mai dawn em ni? Zan a tlai zel, zinglam dar 2 a rik thleng paw'n muthilh zai ka rel thei lo. Mahse, he tia lo ngaihtuah chiam hian kawng ro a su dawn hleinem, muhil phawt mai teh ang, naktuk khua a var ang a, ka hmu leh em em ang chu, tiin muthilh zai ka rel ta a.

Khua a var chang chang tihah hian ka harh a, mumang ka nei tih ka hre chhuak nghal, chu ka mumang chu mu mang lo va ka suangtuah, vawikhat ka hmuhna aṭanga ka thinlung neitu ngei kha a ni ka hmuh chu. Phur zet hian ka tho va, ka nu kai tho miah lo chuan keimah chuan rawng ka bawl ve hmiah hmiah a, a tui dawn nge dawn lo phei chu ka hre hauh lo, mahse, a hmin a nih phawt chuan tawk rawh se ka ti rilru a, zing danga kaih thawh chawp ngai ṭhin kha kaih thawh chu sawi loh, rawng te hial ka'n bawl ve chu a nia. Ka nu a lo harh huna a hmel awm dan tur ka ngaihtuah a, a lawm ve ngawt ang ka tih nak laiin ka nu chu a lo tho, choka lam a rawn pan nghal, "Rawng i bawl alaw!", tih leh ka thil siam vel en a rual a, ka maian bai chu a han sawisel ṭan phawt a, "Hei hi Maian a ni lo'm ni? Ti nge a tui leh a hnah hi a hrana a awm theih! Chawh kawi vek tur a lawm", a chawk mawlh mawlh a, rei vak loah ka chaw chhum a en, chaw erawh ka chhum hmin thlap, mahse, i chhum rum lutuk min la ti tho. Chu tia in chhung sek rek vel ka khawihpui chu a lawm hle dawn emaw ka tih laiin, lawm a hnekin min hau hrep zawk a. "Eirawng ka bawl leh tawh ngai lo ang", tiin ka ti tau der a, han tih tauh tak tak pawh ka duh viau nain ka mood tih off loh hram ka tum a, chaw kan ei lai chuan ka nu hmel ka en char char a, ka thil siam tui loh hmel zet a ei lai chuan thinrim tak tak hmel a pu lo, a tui lo ve bawk em a, kei a siamtu mah hian ei luih ka tum lo, ka nu-in a ei lai chu ka lo thlir tawp a ni. Nui vur vur chung chuan, "Nu, chaw khawrh belh i duh em? I duh chuan lo inkhawrh belh mai rawh aw, school ka kal dawn a nia", tiin chaw ei dawhkan chu thawhsan mai ka'n tum a, kanu chuan, "A siamtu pawn i ei luih theih loh chuan ka ei duh bik i ring em ni? Min lo nghak lawk rawh, pawisa ka pe che ang a, dawrah thil va ei mai r'u, Laltetea va sawm la, va ei dun r'u", a pawisa bag aṭang chuan cheng 500 hi a rawn phawrh a, min pe a, "ka lawm e", tih leh ka chhuah a rual a.

Kan sikul bula restaurant nuam ve deuhah chuan thil ei tur chuan kan lut a, Laltetea duh zawng kan order a, kei paw'n ka ei tui ve tho, ka thil siam ai kha chuan tui tak hi a ni ringawt, ka ei zo dawn tihah chuan sikul ṭan dar ri kan hria a, hmanhmawh zet hian school lam kan pan, class tinte school tualah an lo in-line ṭhup, kei pawh hmanhmawh zet hian ka tlan a, Laltetea ka hnungah a lo tlan ve bawk a, ka hmanhmawh luatah ka tlu palh. Sikul naupang min hmu ho zawng zawngin min nuih vek a, ka zak kher mai, Laltetea chuan nui vur vur chung hian, "Che sual reng", tiin min lo kai tho nghal a, zak chung chung chuan ka va in-line ve a, min nuih ru fe fe an tam, mahse ka hmu lo lui tlat a, ka han hawi kual chu ka star deuh pa kha ka hmu thut, min lo nuih vur vur, ka tluk lai kha a lo hmu ve ni awm tak a ni. Ka zak kher mai, kan hotute'n thu an puan zawh hnu chuan mahni class ṭheuhah luh kan tum a, Kimkimi bulah chuan, "Kimkim, saw pa saw i hmelhriat a ni em?", ka tih chuan Kimkimi chuan, a hriat ngai zawng a nih loh thu in min chhang a, Kimkimi nen kan inbiak hlan chuan ka star deuhpa chu a lo bo hman a, class 11, Science subject la a ni tih zawng chu ka hriat chhun chu a ni mai a,mahse ka beidawng mai mai dawn lo.

Ka thil hriat duh zawng chu ka hre chak bawk a ni ang ka star pa hming chu Reuben a lo ni a. A ṭhiante chuan Bena tiin an ko ṭhin. Bena chu ka rin ang ngei chuan kan school a lo lut thar a ni a, kei class 9 chauh ka la ni si a, hmuh a harsa ang reng, mahse ka ral khat duh ve tawp a ni ber mai. Amah vang chuan sikul kal pawh nuam ka tih phah a, class kan neih lai te hian tukverh lam ka hawi ngei ngei zel, a chhan chu ka thinlung lalpa hmuh leh ka duh vang a ni. Ka duh ang ngei chuan Bena chu ka hmu bawk a, ka en ning thei lo a ni ber mai, amahah chuan ka luangliam chu a lo ni reng mai si. Hun hi chelh din theih ni se ka ti ngawih ngawih, a chhan chu Bena ka hmuh reng theih phah dawn a lawm.

Reubena hming chu theihnghilh mai ka hlauh a vang chuan, "Reuben, Reuben", tiin zawi deuh hian ka sawi nawn ka sawi nawn a, kan hnunga ṭhu Kimkimi thiannu Zovi chuan, "Reuben i tia mi, ka hria asin, class 11 Science a mi kha a ni em? Chhelo deuh kha, ka thiannu Peki nen an nia lawm. Peki'n min hrilh a", a tih chuan tha reng ka nei ta lo, ka zawi hnap mai, Zovi khan ka duh zia hria se ti khan a sawi ka ring hauh lo, mahse ka rilru chu ka ti pau khauh lui a, Sava thlawk lai hi tu ta mah a ni lo, a perhtu ta pawh a ni hek lo, a chhar tu ta ta a ni mai, ka ti tlat a ni.

Reubena ka tawn hnu hian ka inthlak danglam chak khawp mai, kei tak pawh hian danglam ka inti, Kimkimi leh Tetea chauh kawm ṭhin kha ka nia, tunah zawng Kimkimi thiante, Zovi, Eli, Jenny, Puipuii leh Chhani te, hmeichhia hlir chu ka kawm ve ta, Reubena ka duh zia chu ka sawi kher ngai lo hian an hre vek a ni, a chanchin min sawipui ringawt pawh chuan nuam ka ti a, an bulah chuan ka mi khual lo telh telh a, ka tawng tam ve ta deuh. Reubena chanchin pawh ka hriat belh zel bawk a, a mak ka ti, a hma chuan keimah hian dan ka nei hrang thlap a, chu ka dan siam chu inhriat chianna tel lo chuan mi a induh theih loh tih te, tu vang mahin ka inthlak danglam lo ang tih te a ni, Reubena ka duhna hian chu ka dan siamte chu min sawh sawntir nitin hi a ang ber, a ni tel hian ka duh telh telh a, ka duhna a zual leh ka inthlak danglam nasa, ka ṭhian tha ber Laltetea leh ka nu te chuan mak ti hian min lo thlir ve reng bawk a, a chhan min zawh paw'n ka nula ṭep tawh alawm tiin ka fiamthu daih zel a.

Hun a liam zel a, April thla kan lo thleng ta reng mai, Reuben-a pawh a rukin ka la duh reng a, mahse, a mah chuan a hre hauh lo ang. Ni dang ang bawkin sikul kan kal leh a, chhun chawlh lai chuan Reuben-a leh Sanga te chu kan class-ah an rawn lut a, Reubena ṭhianpa Sanga chuan kan thiannu Zovi chu a duh a, a rawn bem a, an inbiak rukna a rei deuh tawh a ni ngei ang, Zovi pawh chuan a yes ve nghal a, an innel tawh khawp mai, a ruk tak chuan kan ṭhian ho chu kan lawm khawp mai, a chhan chu Reuben-a ṭhianpa a lo ni leh zel bawk nen, ka tan pawh a ṭha dawn tlata an hriat vang a ni.

Sanga leh Zovi te an titi mawlh mawlh lai chuan Ben-a chu ka bulah a lo ṭhu a, ka zam kher mai, ka ṭhiante ka en, an lo nui vur vur, thil a hriat thiam ka hlauh avangin ka nui lo der hram hram a, Bena chuan, "Merry, in class-ah hian i thiam ber an tia a dik em?", Min tih chuan mak ka ti leh zual, ka hming a lo hriat bakah kan class zinga ti ṭha ber ka nih thu te a lo hre leh zel a, mak ka ti hle a, ka chhan lawk loh vang chuan a mah bawk chuan, "Ka hriat dan i ngaihtuah em ni? Sikul bangah sawn a intar alawm, i thlalak leh sikul tana i lawmman lak zatte nen", a tih chuan ka hnual deuh. Mi lo duh ru vein ka chanchin a lo chhui ru ve emaw ka ti hman ṭep a nia, ka lo beisei sang deuh a ni. Chhan vak dan pawh ka hre chuang lo, ka nuih sen sen ringawt a, Sanga chuan a sana bun lai chu a en a, "Dar a ri dawn, class lamah phei ang", a tih rual chuan an inzui chhuak a, a chhuah pah chuan min lo nuih zeuh a, ka lawm lutuk hi ka thlawk ni ber hian ka inhria, rei vak loah chuan Sanga chu a rawn lut leh a, Zovi hnenah chuan, "Zovi i ṭhiannu Merry number hi Ben-a'n min va dil sak rawh a ti", a rawn tih chuan ka ṭhiante ho chu an lawm lutuk chu dawhkan an beng a, an zuang thul, ka lawm lo emaw in lo ti palh ang nge, ka thinlung tak chuan an ni ai nasain ka lawm zawk, mahse lan tir chiam a mawi love ka ti mai zawk a ni, phone ka neih loh vang chuan ka nu phone number ka pe a, "Ka nu number a nia, mahse a pawi lo ka biak theih tho", ka'n ti chu ka ṭhiante ho chuan, "Iss, biak loh a hlau lutuk, lo be ngei ngei rawh se, a haw ve leh a nu phone a bih char char dawn nia", an han ti rual ngei a.

Episode 3

Mahni pual a phone nei ve lo ta chu ka nu phone chu ka ta neih ve hle a, Reuben-a kha ka nu number ka hrilh si a, min lo biak ringin phone chu ka en sek a, sms emaw phone call emaw a awm thei si lo, phone chu dawhkanah ka dah tawp a, a lo call ka ring si, ka ring ngam leh chiah si lo, a khat tawk chuan phone chu ka va melh leh zeuh ṭhin a, ngawi renga min lo thlirtu ka nu chuan mak a lo ti ru ang reng hle a, mahse engmah chu a sawi chuang lo, phone chu a lo ri ta, ka nu chuan rang zet hian a chhang a, Reuben-a a nih ngei ka ring ta a, ka nu chuan, "Aw, ni e, a nu ka nia", a ṭawng a ngaithla ni awm fahran hian ka nu chu a ngawi leh deuh vung vung a, "Hei, ka bulah a awm a, lo be rawh", tiin phone chu min pe a. Ka aw chu ka'n thian nawk nawk a (khuh lui vak vak) inla no ve zet hian, "Hello", ka'n ti chu company call lek hi a lo ni a, ka nu'n min lo tih der lek chu lo niin. Mahni lo maha lo hlim ve tawh teh reng nen, a mah a lo ni tawp si lo, ka nu nuih za lutuk chuan, "Tu phone nge maw i chan ni", min ti a, chhan pawh chhang lo chuan ka room lamah ka chhohsan ta a, rei vak loah chuan ka nu'n phone min lo pe a, "I ṭhianpain kha a be duh che", "ka awih tawh lo, dawt i sawi leh pek ang", tiin phone chu ka chhang duh lo tlat a, ka nu bawk chuan, "Tu nge i hming", a tih chuan, "Reuben-a ka nia", a rawn ti ni awm tak a ni, "Reubena maw, hei a awm a lawm, lo vuan lawk rawh, ka lo pe ang", a ti chiah chu rang zet hian phone chu ka la a, kanu chuan min chhuahsan ve nghal bawk a, a chhuah hma chuan, "Ehemm", an ti deuh ngei ah.

Reuben-a chuan zawhna min zawh tur hi a hre thei em em a, kei chuan han zawh let ve pawh chak mah ila zawh tur ka hre tam lo hle, darkar 2 zet kan inbiak hnu chuan chaw ei tui tiin kan inbiakna chu kan khar ta a. Kan inbiak lai khan ṭawng sual ka hlau lutuk kha ka lei hi a tawt vek a, sawi tur lah ka haihchham bawk si, ka ṭawng ve chhunah pawh ka chil ka lem khalh khalh a, dang a ro duh hle, mahse nuam ka ti viau si, tu lawm loh hian ka nui a, amah ka ngaihtuah let hian ka sawi fiah thiam loh hlimna hian min tuam ni ber hian ka hria. Mahse, thil ka hre chhuak thut, ka ṭhiannu Zovi'n a hmaa min hrilh, Reuben-a leh a ṭhiannu Peki a ti tain ka hria, an inngaizawng ni awm khan a sawi sia, thu dik nge dawt ni ang tiin ka ngaihtuahna ka seng leh ta char char a, mut mu ka tuah thei lo, tlaivar meuhin ka ngaihtuah a, Reuben-a zawh tum ni awm tak hian phone chu ka hmet eng ṭhin, mahse ka ngam si lo.

Zing chaw ei lo chuan Laltetea nen chuan sikul kal tur chuan kan inzui leh ta a, tunlai ka danglam zia vel kawng tluan chuan a sawi a, kei chuan, "Nakkinah a chhan ka hrilh ang che", tiin ka ṭhian thar te, Zovi, Chhani, Puipuii, Eli leh Kimkimi te chu ka va fin a, an lo phur tawh khawp mai, nizan lama Reuben-a nen kan inbiak dan vel chu min zawt ta sup sup a, kei tak pawh hian min zawh loh kha ka hlau mah zawk a, kan inbiak dan vel an bula sawi bakah, eng rilru nge Reuben-a hian ka chungah a put min hrilh theih ka rin vang a ni. Zovi lam chu ka hawi a, "Zo, a hma khan Reuben-a'n bialnu a nei i ti khan ka hria, a dik em?", tiin ka zawt ta tawp a, Zovi chuan, "Eeee...kha kha maw, Peki khan a lo star lek a lo nia, an ni lo, Reuben-a'n a duh ve lo, Sanga'n min hrilh a", a tih chuan ka thaw a veng deuh hawk a, nui sen sen chung chuan, "Chu chu maw nizan mut loh phah nan ka lo hman, ka lo ngaihtuah zui vak vak a", ka'n ti chu an nuih a za tlang kher mai. He tia Hmeichhia hlir ka kawm ve takah chuan make-up leh eng eng emaw min ti lang nalh tur thil inbel ka ching ve ṭan ta a, thawmhnawah na na na chuan kan ṭhian ho zingah chuan a nei ṭha ber ka ni fo, a chhan chu ka nu-in thawmhnaw dawr a nei a, ka duh zawng a awm phawt chuan ka inlak hmiah mai zel a, ka nu paw'n a phal lo ngai lo, a chhan chu ka nu leh pa te hi Kum 4 mi ka nihin an inṭhen a, kei hi ka nu bula khawsa awm chhun ka ni a, sum leh paiah na na na chuan keimah chauh hi chu ka nu chuan min vur hneh hle nain, a hunah erawh min pe tlem thei hle thung. Kan inah keimah chauhin ka awm loh leh kan ṭhenawma ka ṭhianpa Laltetea te in-ah khan ka awm ni leng ṭhin kha a nia. Mahse, tunah chuan hei Laltete tih loh ṭhian ka nei belh ta ṭeuh a, ka hmeichhiat pui kawm chu a dan a dang, kan period dawna kan kawng nat dan vel te pawh kan sawi tlang thei a, a zia viau. Laltetea bulah chuan ka sawi ngai lo.

Hun a liam zel a, Reuben-a leh keipawh kan inbe tam tial tial a, kan innel ṭan ta viau mai. Mahse, ka ṭhian tha ber Laltetea nen kan inkar chu a hla telh telh hi a ni ber mai. Sikul kan kal dawn paw'n min rawn sawm ta ngai meuh lo, ka va sawm changte hian a nu chuan a kal tawh tiin min lo chhang ṭhin a, a bialnu a hmuh duh vang emaw tiin ka lo ngaihsak lem lo va, mahse chu zawng a ni hauh lo. Class-ah te hian kan mit leh mit a intawh palh chang pawh hian rang zet hian a mit a la sawn nghal a, min biak chu sawi loh ka biak hlau hian min hel char char zel a, ka ngaih a ṭha ta hauh lo. Ka lakah thinrimna a nei niin ka ring a, a chhan awm tur ka ngaihtuah a, ka hre thei mai si lo, thil awmzia zawh tuma ka biak luih chang te pawh hian min hel a min kalsan hmak zel. A bialnuin min kawm a phal lo a ni mahna tiin biak emaw kawm emaw ka tum tawh lo law law a.

Laltetea nen kan kar khi chu a ni tel hian a zau telh telh hian ka hria, mahse Reuben-a nen erawh kan inhnaih telh telh a, ka duhna a ni tel hian a zual a ni ber mai. Mahse, Laltetea vang chuan ka awm a nuam ngai lo, eng vanga danglam thut nge a nih tiin ka ngaihtuahna ka seng fo va, mahse a chhan tur reng reng ka hre thei si lo. Naktuk hi class picnic a ni dawn si a, Laltetea a kal ve dawn leh dawn loh zawh tumin an in-ah ka va kal a, Laltetea chuan computer ah eng games emaw hi a lo khel a, kawngka kik lem lo chuan ka va lut a, "Te-a, i nu te an awm na nge?", Min chhang rang kher mai, "I nu-in puan a lo thleng dawna min lo pui rawh a tia, in dawrah a kalin ka hria", tiin min chhang a. Sawi tur tam tak ka nei, mahse, sawi mai tur ka hre lo, "Eng games nge i khelh?", tiin ka zawt tawp a, Laltetea chuan, "Tunlai games lar deuh hi mawle, COC a nia, i hre leh pek lo ang", ka awm chu a nuam deuh, a hma ang khan kan inbe leh ta bawrh bawrh a, min biak loh chhan vel zawh ka duh a, mahse a sawi duh lo palh ang tiin ka zawt duh lem lova, Picnic-naa kal chu kan ti thlu ta a.

Zing lam 10:45 vel a ni a, Bus-ah chuan class 9 section "A" zawng kan chuang a, section "B " ho chu a hranin an rawn kal ve leh dawn bawk a. Kan ṭhutna tur hmunah kan ṭhu kim ta maw tihah chuan kan class master chuan, "Lui-a picnic kha in duh si a, chuvangin fimkhur a ngai leh zual dawn a, kan phal chin bakah tui chen luih tum ṭalh loh tur a nia aw, kan thlen ve leh games pakhat section "B " ho nen inkawp vekin kan khel dawn a, tah pawh chuan thu zawm lo fal kan awm tur a ni lo", a sawi tur a sawi zawh hnu chuan kan tlan tan ta a.

Zovi bulah ka ṭhu a, Laltetea chuan motor ka rui ṭhin tih a lo la hre reng ni awm tak a ni, "Lo insawn rawh, tukverh lamah i ṭhu dawn nia, in tawt si i rui hrim hrim ti kha chuan", kei pawh chuan eng mah sawi buai lo chuan ka va insawn ve mai a, Laltetea chuan a bag aṭang chuan phone leh earphone a rawn phawrh a, "Hla ngaithla ang aw, muthilh tum la, i rui lo mai ang, nizan khan i hla duh zawng tur ka lo dah ṭeuh a, ngaithla rawh aw", ka bengah earphone a vuah zawh chuan a dar min nghen tir a, hla chu a play a, a hla play chu J&J-te'n an sak, min ṭhen lo'ng tih kha a nia, feel a awl khawp mai, Laltetea dar ngheng mah ila ka ngaihtuah chu Reuben-a a ni daih, awm ve se a nawm dan a famkim tur tiin ka ngaithuah neuh neuh a.

Ka hla ngaihthlak vang pawh a ni mahna ka lo muhil a, Laltetea chuan min sawi nawk nawk pah chuan, "I va'n mu tui em em! Hei kan thleng tawh a nia, tho tawh rawh le", ka han hawi kual, a tam zawk chuan motor an lo chhuahsan tawh chu lo niin, rang zet hian ka ding a, "Hawh chhuk ve nghal ang", ka ti a. Kan chhuk kim tawh maw tih hnu rei lo teah chuan section "B" ho pawh chu an lo thleng ve nghal bawk a, rei vak lo kan chawl a, kan ṭhutnaah chuan miss Mapuii chuan lehkha min rawn pawh tir zel a, tah chuan number hi an ziak a, number inang pawt fuh chu inkawp tur an ni a, kan teacher-te'n ramhnuaiah thil an thuk ru a, chu chu kan zawng dawn a ni, kan thil zawn tur chu min hrilh sa vek a, a hmu hmasa apiangin 500 ve ve an dawng dawn tihna a nih chu. Laltetea chuan number 9 a pawt a kei chuan number 2, Laltetea chuan, "En teh i kawppui tur pa saw, Go home-a nih saw", tiin min nuih vak vak a, Go home-a, a hming tak chu Mahlutea a ni a, Go home-a kan tih chhan chu sikul tlan bo a hrat em vang a ni. A bialnu Pupuii, kan ṭhiannuin a hming lem ah Go home-a tiin a phuah a, kan zirtirtu-te paw'n Go home tih hlirin an ko. A ni nena inkawp chu ka hreh ru ang reng, Laltetea ka en a, ka tum khum bur a, a ni pawh chuan midang kawp chu a duh bik lo, a number ang pawt fuh a zawng a, kan class a mi Remi chuan a lo pawt fuh hlauh mai a, kan lehkha min thlaksak a, Laltetea nen chuan kan inkawp thei dawn ta a, ka mood pawh a pangai leh ta, Go home-a leh Puipuii pawh chuan phakar an chhuah ve bawk a ni ang chu an inkawp ve leh thei ta. Kan thil tih ruk dan chu kan teacher-te'n hre hek lo, min tir chhuak ta a, kan thil zawn tur chu Sangha ṭin leh Tel pack hnih, chuan Sir Rpa kawrlum, kan kalna tur hmun a sawiah chuan kan kal ṭan ta ṭheuh a.

Laltetea chuan hma a hruai a, kawng bumboh a awm lem lo, a hnim hran lo bawk, rei lo teah chuan Sir Rpa kawr chu thing zara inkhaiin kan va hmu a, Laltetea chu a va lawn a, kei pawh chu ka lo awm mai mai lo, hnah ro karah te chuan kan thil zawn lai chu a awm tak mialin tiin hmawlh sei ve deuh hian ka hai ka hai ve tho va, mahse ka hmu thei chuang lo. Laltetea a lo chhuk hnu chuan kan zawng dun leh ta a, kan hmu lawk lo, leiah an thukru maw tiin hnim buk kar te chu kan han en ṭhin, a lo awm mai si lo. Kan chau dun tawh hle a, Laltetea chuan, "Chawl ang, i ke a kham tawh ang, lo ṭhu la keima'n ka va zawng mai dawn em ni", a ti a, kei lahin mahni a awm duh hek lo, "Ka zui ve zel ang che", ti a thawh ka'n tum chu, "La ṭhu rih ang, zial zu phawt ang", a ti a, kei pawh chuan ka zu ve bawk a, kan ṭhutna hmun chu a nuam ang reng, a dai nuam kher mai, chunglam ka han dak chu, tel, polythene-a inkhai hi ka hmu a, phur zet hian Laltetea chu ka hrilh a, a va la leh nghal a, kan thil zawn dan chu kan thlak a, thingkung ngawt chu kan en ta a, rei pawh kan zawng hman lo tihah chuan Sangha ṭin chu kan hmu leh ta a, ti hi chuan kan thil zawn kan hmu kim ta, tiin phur zet hian kan let leh ta a, kawng kan bo mai loh nan tiin kan teacher-te'n thingkungah paper belin number an ziak a, let leh pawh a awlsam hle.

Sir Rpa hnenah kan thil hmuhte chu kan va dah a, fiamthu tih hriat zet hian, "Merry, ka kawr hi i ti bal vek a nia", Laltetea chuan, "Sir, leiah a phah zel a nih kha", a lo ti ve leh bawk a, "Laltete, daw lutuk suh, nangma'n i thlan hruk nan i hmang a nih kha, ṭhut ila chuan lei a kai hrim hrim, hei lei kai emaw pawh a awm lo, thlan rim a nam", ka'n ti chu Sir Rpa chuan tak tak emaw tiin Laltetea chu, "Kha, ka kawr te thlan hruk nana ilo hman chu, va su rawh", tiin a kawr chu a pe a, Sir Rpa nen chuan Laltetea chu kan nuih vur vur a, Laltetea chuan lei min chhuah pah chuan, "I hre dawn alawm, i chak lo ve ngawt ang aw, dawt dawtin min puh a", ka nuih a za laklawh, suk pawh ka suk pui ve lo, ka ṭhiante, Kimkimi leh Zovi te nen tui kan cheng a, nuam kan ti tlang hle. Laltetea pawh chuan min lo zawm vat a, tui kan inhleuh siak hlawm a, ka hleuh muang ber, a chhan chu tui chen ka thiam vak lo a, ka kawng hnuaiah bak chuan ka cheng ngam lo hrim hrim. Laltetea chuan tui chhungah chuang lung mawi deuh hi a chhar a, min pe nghal a, ka ṭhiante ka en tir hlawm a, an ni paw'n mawi an ti tlang kher mai, ka hawn dawn tiin ka kekawr ipteah ka dah a, ka thlauh leh thlauh loh ka check zeuh zeuh bawk a. Tui chen ka la kham loh nen Miss Mapuii chuan, "Lo kal tawh r'u, chaw ei a hun tawh a nia, in dam lo palh ang, in thawmhnaw lo thlak tawh r'u", tiin a rawn au a, thu awih tak chuan inthlak chu kan tum a, Bus-ah kan inthlak a, ka kekawrte ka hmu mai lo, ka keng ngei si a, ka hmu mai si lo, Laltetea chu a lo lut, "I va inthlak rei e, inphelh pawp pawp mai rawh, en tham pawh i neih ve loh kha", rum zeta melh chung hian, "Ka kekawrte kha nizan khan bag-ah ka thun reng tiraw? Hei ka hmu miah lo a nia!", Zovi chuan, "A huh khan ha mai rawh, a sexy daih zawk", a lo ti ve bawk a, "Ka khung ngei khan ka hre sia", tiin ka phun sep sep a, chutah Laltetea chu nui vur vur chung chuan, "Hei hi a ni em i kekawrte chu?", tiin a ipte aṭang chuan a lo phawrh a. Ka ṭhiante nuih lah a lo za ngang mai, rang zet hian ka la a, "Laltete, min harh, i ninhlei zet zawt lutuk, chhuak rawh ka inthlak duh", tiin ka nam a, mahse chhuah a tum reng reng lo, nui vur vur chung hian, "I kekawrte rawng ka hria tih tumah ka hrilh lo ang, lehlam ka hawi tlat dawn alawm, puan a awm reng kha, inthlak mai mai teh, keimahin chaw ka dawh duh hleinem", a ti tlat a, hmanhmawh zet hian ka inthlak a, min en ruk leh ruk loh ka en leh zeuh zeuh a. Chutah nui vur vur chung hian, "Inthlak hle hle mai teh, hmuh tham pawh i neih loh kha", a'n ti leh hram pek a, kei chuan, "Mi nghal, ka inthlak zo aw, kan haw hunah ka nu hnenah ka sawi dawn", ka'n ti ringawt a.

Chaw kan ei zawh hnu chuan kan eina hnawk vel chu hmeichhe lamin kan thian fai a, haw hnaih kan tum ta a, haw lam pang chu Laltetea bulah ka ṭhu tawh awm lo ka lo tih rilruk laiin, bus ka han lawn chu Laltetea bulah tih loh chuan ṭhutna a lo awm tawh lo va, tum bur chung chuan ka va ṭhu leh hram a. A khat tawk chuan, "Kekawrte sen i ha", min tih loh leh, "I kekawrte rawng ka hria", min ti sek a, kawng tluanin kan inhnial a, ka beng thul, min fiam kawng tluan a ni ber mai. In kan thleng, "Ka nu bulah ka sawi dawn", ka ti a, Laltetea chuan, "Min hau awm lo", tiin min nuih leh vur vur a, an in kawngka a thleng chiah tihah chuan min rawng ko vak a, ka va hawi let, "I kekawrte rawng ka hria", a rawn ti leh a, tih ngaihna pawh ka hre lo ka nui ve tawp ringawt a.

Tui ka chen reng vang pawh a ni mahna ka rawl khawp mai, lehkha zir pawh rilruah a awm thei mawlh lo, mahse zirlaibu keu miah lova muthilh chu ka ngaih a ṭha zan si lo, peih lo tak chuan Science text book chu ka la chhuak a, kan zir tak si-ah chuan ka zir tui laklawh, mut pawh a chhuak tawh lo, ka nu chuan cake leh bawnghnute min lo ken a, rei lo te a ṭhu a, ka biak loh avangin a chhuak leh nghal a, ka nu a kal ta maw tih chuan ka room kawngkhar chu ka kalh hmak a, a chhan chu mei zuk ka duh vang a ni. Meizial khu ka room-a a cham loh nan tukverh ka hawng a, chutia tukverh ka'n hawng chu Laltetea ka hmu nghal a, a ni pawh chuan mei a lo zu ru a, kan inphawk dun chiang kher mai. Kan innuih vur vur a, kan nu te ve vein kan thawm an hriat kan hlauh dun avang chuan kan inko ngam lo va. Laltetea chuan min lo bia a, a sawi chu ka hre thei lo, mahse a hmui phun dan aṭang chuan, "I kekawrte a sen", a ti hian ka hria a, ngaihsak lem lo chuan mei chu ka zu vat vat a, ka zuk zawh chuan tukverh ka khar hmak a, ka zirlai chu ka zir chhunzawm leh nghal a, ka room kawngkhar kik ri ka hria, ka va hawng chu Laltetea lo niin, "A tlai tawh, lehkha zir ka duh, haw rawh", tiin ka room kawngkhar chu khar leh nghal ka tum a, Laltetea chuan, "I va'n hawihhawm lo tak, lehkha zir dun ang", a tih chuan, nih leh rawn lut rawh, mahse bengchheng hlek suk ang che, dar 10-ah i haw ang", ka ti hmak a. Vin deuh hlek hian, "I thu lo, i va'n thu lo chiang, ka duh duh hunah ka haw ang", chhan let ka'n tum zet a, mahse ka chhan let zel chuan min hnial reng dawn a, ka zirlaiah rilru ka pek theih loh ka hlau a, ka ngawihsan ta zawk a.

Laltetea chuan, "Merry hei hi min lo hrilh teh, ka hrethiam miah lo a nia", a tih chuan a zirlaiah hriatthiam loh a nei a ni ang tiin ka va ensak a, lehkhaah chuan, "Vawiin-ah khan ti nge kekawrte sen kher i hak?", tih hi a lo ziak a, ka chhiar zo chu dawhkan-a science text book chu ka la a, Laltetea vuak nan chuan ka hmang a, a rem lai laiah chuan ka vua a, ka nu chuan kan thawm a hria ni ngei tur a ni, "Nang ni pahnih kha, insual reng s'u, lehkha kha ṭha deuhin zir hle hle r'u", a rawn ti a. "Nu Laltetea hian min chhaih vak vak a nia, kekawrte sen i ha te min ti a nia", tiin ka va hek zawt zawt a, ka nu lah chuan Laltetea hauh ahnekin min nuih vur vur a, "I ha a ni ang chu, ha lo la i ha a ti dawn che em ni? Chu ringawt in hauhna tham a tling lo, ṭha tak khan lehkha zir leh r'u", min ti hmak a, room ka va lut chiah chu Laltetea chuan min lo nuih vur vur a, "Nuih pawh nui suh, ka mu dawn", tiin ka mutsan hmak a. Ka muhil der ka ti chu ka lo muhil tak tak a, Laltetea haw lai pawh ka hre lo.

Episode 4

Zing dar 7:55 vel a ni tawh ang tihah chuan ka nu-in min lo kai tho a, ka nu chuan min sawi nawk nawk pah chuan, "Thawh hre lo lutuk mai, hei i ṭhianpa Reuben-a'n sikul kalpui turin a rawn sawm che nia", Reuben-a hming ka hriat ve leh chuan ka tho chhuak nghal a, darthlalangah ka inen nghal a, ka sam chu a lo hnawk ang reng. Samkhuih chuan ka han khuih thuak thuak a, ka chhuk nghal a, min hmuh ve leh chuan nui sang hian, "I va'n chau awm em em", nui vur vur chung hian, "Nia, ka chau deuh a niang", ka nu a lo inrawlh nghal, "Merry te chu thawh a hre lo hrim hrim, kaih thawh ngai reng mai", ka nu chu ka sik neuh neuh a, ka nu chuan, "A dik lo em ni?", ring lenglawng hian a ti leh a, ka zak ru ang reng. Ben-a chuan ka zah a hlauh vang a ni ang, "Keipawh ka tho tlai thei lutuk, ka pi hian min lo kai tho ṭhin a", ka thaw a veng huai mai. Ka insiam sawk sawk a, sikul kal chu ka'n tum nghal ringawt a, ka nu chuan, "Chaw ei lo hian kal ziah suh, i pumpui a lawng ang a sin, keichuan, "Zing chaw ka ei peih lo chhun chawlh hunah restaurant-ah ka inhnawh puar mai ang", ka nu chuan sana a en a, in tlai tawh hrim hrim a nih hi. A nih chuan va hmanhmawh r'u, hei in tlai dawn", keini pawh hmanhmawh zet hian sikul lam kan pan a.

Sikul kan thlen chuan class an lo ṭan tawh tih kan hre thei a, Ben-a chuan, "Hawh thil ei ila, vawin chu class kan chawl mai dawn nia", a sawi zawh rual chuan ka kutah vuanin min kalpui a, hnial lem lo chuan ka zui ve mai a, thil ka ei zawh hnu chuan Reuben-a chuan, "Haw nghal mai ang aw, kan teacher-te'n min hmuh palh a hlauhawm, thlah pah chein ka lo leng kawi dawn nia", a tih avang chuan leng kawi lo chuan kan in lam kan pan a, in kan thleng ṭep tihah chuan Laltetea nu kan tawk a, Laltetea a dam ṭhat vak loh vangin sikul a kal thei lo tih min hrilh pah chuan, tlawh kawi turin min ti nghal a, Reuben-a bulah chuan, "Kawi zuai ang aw", ka ti a. Ben-a pawh chuan min hnial lem lo va, Laltetea te in kan va thlen chuan Laltetea chuan games a lo khel mai mai a, a nu sawi dan kha chuan a nat hmel nen, a sikul kal peih loh chhuanlamah a na der lek lo niin, vin deuh hlek hian, "Laltete, i dam lo ve chu games ilo khel mai mai maw", rang zet hian a games khelh lai chu a off a, "Ka zia deuh tawh a nih hi", a sawi zawh hma hmain ka chhang let vat a, "Daw lutuk suh, i class peih loh chhuanlam bak va ni suh, i dam reng kha, ti khan lo awm mai rawh aw", tiin Reuben-a chu kan in lamah ka kalpui a, Laltetea chuan min rawn zui ve nghal a.

Kan pathum chuan Mimi bawl kan ei ho a, Laltetea chuan min inti tatu hle a, ka bulah a ṭhu tlat a, Ben-a ti el ni awm tak hian min kuah lui sek bawk a, Ben-a mit a kham deuh a ni ang, "Ka va haw tawh mai ang e, class ka kal si lo va, in lamah tal zir loh chu", a ti na chu a lawm lo tih a hmelah a hriat ngawih ngawih a, a haw hnu chuan Laltetea chu ka lehkhabu ken lai chuan ka vaw pawp pawp a, "Kha a thinrim a ni hrim hrim, nge ti vak khan min kuah, a ngai kawi hrim hrim", ka ti a, Laltetea chuan, "Duh leh thinrim se, nang pawh chhunah i nu a awm lo tih i hre ve reng a tinge ilo inthlahtir, ka rawn veng che a nih kha, a hmel aṭang khan ka mil chi a ni lo, ze thup thiam deuh a nih hmel", awlsam zet hian a han ti a, chutia ka mipa duh ve em em min sawisel sak chu ka thinrim ang reng, mahse min ngaihtuah vang a ni tih ka hriat tel avangin, ka chhang lem lo va, an in lamah kan phei a, COC khelh dan chu min zirtir a, mahse ka thiam ve thei lo reng reng, a ni neih nuaih lutuk a, a phone-ah chuan Temple run games hi a dah a, chu chu kei chuan ka khel a, a niin COC a khel a. Nilengin games kan khel ngar ngar a nih chu. Dar 4 velah ka nu a rawn haw a, kei pawh kan in lamah ka phei nghal a, ka nu phone aṭang Ben-a biak ka tum a, Ben-a message ka hmu nghal, "I ṭhianpa hnenah khan kan nih thu lo hrilh la aw, i ṭhianpa mah ni se ka thik ve tho a nia", a message ka chhiar zawh chuan ka thin hi a phu dut dut a, reply mai dan ka thiam lo, mahse reply loh tawp ai chuan tiin, "Ben, kan la ni lo a ni lo'm ni, kan in-bem lo ve ve sia, inngaizawng ti a sawi tur chu kan la ni hleinem", tiin ka va reply a, rei vak loah chuan a message a rawn thleng nghal a, "Ka duh che tih i hria, nang paw'n min haw bik lo a ni lom ni? Vawiina i ṭhianpa in a kuah che khan ka duh zia che ka inhre chiang leh zual", chutia ka duh ber maiin ka duh che min tih takah chuan chhan loh chu a harsa tak zet, ngaihzawng nei turin ka la naupang si, ka hnawl phal si lo, rilru a buai tak zet, ka nu bulah chuan, "Kimkimi te inah ka va kal lawk dawn a nia aw, vawiina an zir ho ka va copy ve ang", tiin chhuanlam ka siam ta tawp a, ka nu pawh chuan min phalsak ve mai bawk a, hmanhmawh zet hian Kimkimi te in lam chu ka pan ta nghal a.

Kimkimi te in ka thlen chuan an chhungkua an lo kim ṭhap a, Kimkimi chuan, "Hawh, ka room-ah i copy dawn nia", min ti a, a room lamah chuan kan inzui lut nghal a, ka nu phone aṭanga Ben-a nena kan inbiak dan vel chu Kimkimi chu ka chhiartir ta vek a, "Chhan dan tur min hrilh teh", tiin Kimkimi thurawn chu ka ngai chang reng a. Kimkimi chuan, "Awi a va'n lawmawm, i duh em kha, yes tawp rawh, a ho lutuk, tun ang laiah kan rualpui ngaihzawng nei lo an awm tak tak lo, yes lo ta la, midang ngaizawng daih se i inchhir mai mai, yes tawp rawh. Sanga leh Zovi an ni a, nang leh Ben-a in nih ve phei chuan a nuam ngawt ang", a han ti a. Kimkimi sawi chu thudik a ni, hnawl ta ngawt ila, a inchhir leh tur chu keimah tho ka ni si a, ngaihzawng neih la inpeih chiah lo mah ila, duh ber te chan ai chuan tiin Reuben-a hnenah ka duh ve thu chu ka sawi chhuak ta nge nge a. Kimkimi chuan, "Nang hi ngawi chawi e ti lo hian a rukin ilo zei viau ang a, hei kan sikul-a mipa luck ber bialnu i han ni ta chu a nia", tiin min nuih vur vur a.

Kimkimi chuan kan in thleng min thlah a, kan in kan thleng chiah tihah current a thim a, Kimkimi haw ngam tawh lo chu kan in-ah a riak a, lehkha kan zir kan ti na chu kan ti ti a ni mah zawk, Kimkimi chuan, "En teh Merry, Ben-a nen in ni tawh sia, hei star-tu a ngah sia, rel chhetu tur che an tam ngawt ang, a bikin Zovi ṭhiannu Peki kha, an ni lo pui pawh kan ni a ti ngam a nia, i fimkhur deuh chu a ngai dawn a nih hi", ka chhang vat a, "Duh leh min lo rel mai mai teh se, an ni min sawi chhiat ka pawisa lo, ka duh berin min duh phawt a hnu, a pawi lo sawmsarih", ka ti ve tlat a.

Kimkimi nen chuan kan ti ti tui ang reng, zankhua deuh thaw chuan Reuben-a nen kan awm dan tur velte kan sawi a, a chang leh kan nui vak vak a, a chang leh kan inbeng thul, he tia Kimkimi ka kawm aṭang hian hmeichhia ṭhian neih lo nawm theihzia ka hre ve chauh a ni.

Zing hma takah kan tho a, Kimkimi te in aṭanga sikul kal chu ka tum a, zing chaw kan ei lo leh pek, ka nu thawh hma chuan Kimkimi te in ah kan kal a, ka nu a harh tawh ang maw tihin Kimkimi nu phone-in ka nu chu sikul ka kal nghal ang tih ka hrilh phawt a. Kimkimi a insiam zawh chuan sikul lam kan pan nghal a, kan la hma tho tiin restaurant-ah thil kan ei phawt a, kan thil ei lai pawh chuan Reuben-a a lo thlen tawh leh tawh loh hriat nan ka mit ka len ru reng a, mahse ka hmu lo, sikul ṭan dar a ri tawh si, Reuben-a hmel hmuh tur awm si lo, sikul a lo kal lo a ni ang ka ti rilru tawp a, kan class kan thlen chuan Laltetea chuan min hmuh ve leh, "Eng vangin nge min sawm lo hian i kal tak ziah a, ka lo nghak ve em em che a, ka tlai phah ṭep, naktuk aṭang chuan min sawm loin kal tawh reng reng suh", a rawn ti nghal a.

Kimkimi lam hawi chung chuan, "Hei, Kimkimi hi a lo riak a, ka nu thawh hmain lawm kan lo kal, nang phei chu ila harh lo hrim hrim", Laltetea chuan, "Nizana i thil sawi tur pawh ka hre vek, eng han ti teh", keichuan a sawi ang chuan, "eng nge sawi la, i hre awm lo", tlanchhe pah chuan, "Vawiina i kekawrte hak tur in inrawn chiang", a han ti a, ka note bu a awl lai chu ka pawt thler a, ka hlum ka hlum a, "Laltete, ti khan min chhaih ziah suh", tiin ka lehkha hlum chuan ka va vawm a, chumi rual chiah chuan miss Muanpuii a lo lut a, "Merry, tinge ti hian bawlhhlawh i paih mai mai, lo chhar nghal rawh", min ti a, ka zak ngei mai.

Laltetea ṭhutna hnuai a ka lehkha hlum ka va chhar pah chuan Laltetea chu rum zet hian ka melh a, a ni lah chuan min lo nuih vur vur a, a ngeiawm kher mai. Zanah ka mu ṭha si lo va, class lak lai te chuan ka lo muthlu ka lo muthlu a, tukverh-ah ka lu ka tauh chawrh a, ka harh chiang kher mai, Laltetea'n min lo hmu fuh lutuk, min lo nuih vur vur chu niin. Ka kut tum chu ka va hmuh a, a engah mah a thawk chuang lo, min nuih ringawt a, intih harh hram ka tum na chu ka harh thei thlawt lo, ka mit hmul a chung leh hnuai te insik chak ni awm fahran hian ka meng thei mawlh lo, ka chhing ta nge nge a.

Ka mut tui lai tak chuan mi tu emaw hian min en reng a hriatna ka neih vang chuan ka ṭhangharh a, ka mit ka men rual a ka hmuh chu ka duh em em Reuben-a a lo ni a, ka lo mu nghet deuh ni awm tak a ni, chhun chawlh a lo ni der mai, Miss Muanpuii a chhuah lai pawh ka hre si lo va, ka lo muhil rei deuh ni awm tak a ni. Reuben-a chuan, "I va'n chau awm em em, thawm ri nuai nuai karah i muhil thei a nia, i taksa a chak lo hle a nih kha", lu thak lo pui hiat neuh neuh pah chuan, "Aaaa...ka chau pawh a ni hran lo, nizan khan Kimkimi a lo riak a, kan ti ti char char alawm", ka han ti a. Fiamthu tih hriat tak hian, "Nizan khan ka hnar a lo za lutuk a, min rel a ni hrim hrim", Reuben-a chuan a rawn ti a, chu veleh a ṭhianpa Sanga chuan, "An rel lo che, i hnar kaw balh vang bak a ni lo", tiin a rawn perh a, kan nuih a za tlang kher mai, Reuben-a nen kan mit leh kan mit a intawh a piang chuan kan lai dun kher mai, a nuih pah chuan a hmui a pet zeuh zeuh a, cute si, pa si, hmel ṭha bawk si, sawiselbo hi a awm theih loh tih ka hre tho na chu, Reuben-a erawh ka tan chuan sawiselbo a ni ringawt, a hmingah te chuan Ṭhafamkima ti se a awm hliah hliah.

Kan inbiak ve deuh a piang chuan kan ṭhiante ho chuan min lo chhaih vak vak a, Reubena ai mah chuan ka lo lai zawk a, ka hmui chu ka seh thi lo chauh a ni, Zovi lah chuan, "Merry, i hmui kha i seh kak vek dawn a nia, seh vak vak suh", min la ti zui. Nuam deuh reuh, nuam chiah si lo ang khan ka awm a ni deuh ber mai. Kan class hmeichhia ho chuan min lo en reng chu niin, eng eng emaw hi an sawi a, ka va hawi chiah tih chuan thil dang an intihtir zaih a, an hmui phun leh an chet dan aṭang chuan ka chungchang an sawi tih ka hre thei mai, engtin pawh min lo sawi se ka pawi ti lo, induh ve ve kan inngaizawng a ni ve mai a, an ni min lo sawi chhiat theihna tur thu a awm tlat lo.

Laltetea lam ka va hawi a, kan mit leh kan mit a intawk, a hmel aṭang chuan a hlim lo tih ka hre thei nghal a. Reuben-a min duhpui loh vang a ni tih pawh ka hre tho na chu ka hai der lui a, ka nui lui hram hram a, min nuih let a hnek in fuck you sign hi min hmuh ringawt a, a ngeiawm thiam khawp mai, chhun chawlh hun chu a tawp a, Ben-a te ṭhian ho pawh chuan an class lam chu an pan ta dial dial a. An chhuak chiah tih chuan ka ṭhiante ho chuan, "Issss, i va'n lai chhe em em", min ti sup sup a, kei chuan, "Min lo chhaih vak vak hlawm a nih kha, tu pawh tiangah kha chuan an lai vek ang, Zovi leh Sanga hi inkawp awm reng an ni, mi tih laih dan an thiam dun si", ka'n tih chuan, Kimkimi chuan a lo tuihnih ve nghal a, "Dik chiah, Zovi hi kan chhass te bulah min ti lai ziah, Puipuii hnenah pawh Mahlutea awm laiin tuibur ka lo hmuam ve a ti ziah, a hmuam tawp si lo va", Puipuii chuan, "Kha mi ṭuma ka zahzia kha, tuibur i hmuam a nih chuan kan inṭhen nghal ang, a nih loh paw'n ka kiss tawh ngai lo ang che min tia, ka zah zia", a rawn ti ve nghal bawk a. Kan ṭhian ho chuan kan bialpa te nen a hu ho a lendun kan tum hlawm a, a ni tur leh a hmun tur vel class lak lai chuan kan sawi nak nak a, miss-in min khak deuh mah se kan duh tawk phah chuang lo va, lehkhaa ziakin kan inpe chhawng zel hlawm a, Mizo class a ni bawk a, kan inla free ang reng.

Zan 9:30 ni tawh mah se mut mai ka la tum lo, lehkha ka zir ka ti na chu rilru-ah a lut mawh khawp mai, ka chungah Laltetea a thinrim ka hlau bawk si, Bena ka thlah phal bawk si lo. Ngaihtuah ka ngah em vang pawh a ni mahna lu a rit duh hle, tukverh ka hawnga, thifim ka han dawng chu tlem chuan ka zia deuh, Laltetea a mut tawh ka rin tehreng nen, a lo la meng reng a, min hmuh ve chuan, "Lo chhuk rawh a ti a", a lungawi lo sa bawk nen hnial leh chu ka hreh vuai na chu, "A tlai tawh si a, naktukah inbe mai ang", ka ti tawp a, a tukverh chu a khar hmak a, a thinrim leh tawh a niang ka ti rilru a, mahse kan in lam pana alo kal hi ka hmu a, chu veleh khum lam ka pan a, ka muhil der tawp a, ka nu chuan Laltetea chu a lo chhawn a, ka muthilh der lai chuan ka nu chuan min lo sawi vak vak a, "Laltetea saw damdawi dawrah va zui lawk rawh, ka kal ngam lo min zui rawh se a rawn tia va zui lawk rawh", kei chuan, "Te- a chu a eng nge na a", ka nu chuan, "A ma tan a ti lo, ka nu a pum a na a rawn tia lawm, va zui mai teh, damdawi dawr chu tlai tawh mah se a la inhawng tho ang".

Phur lo zet hian ka zui a, damdawi dawr hnai ber kan thleng, a lo inkhar tawh a, dawr dang an lo la hawn tak mialin tiin kan kal zel a, in aṭang kan chhuah dawn khan ka chapal thar zawk bun loin, a hlui zawk, a hrui chat ṭep tawh ka lo bun chhuak chu niin, kan kal laklawh lai chuan ka chapal hrui chu a rawn chat ta nge nge a, Laltetea chuan, "I che khir thei si, ti chung hian bialpa ka nei e i han ti ve ngam a nia", chhang let vatin, "I zak em, min tur hmanhmawh em a nih kha", inthiam lo hmel pawh pu lem lo chuan, "I che khir thei hrim hrim", a ṭhu hniam a, "Kha ka paw mai ang che", kei chuan, "Ka rit tawh asin, min paw zo tawh lo ang", tiin ka hnial a, khawlai a ke lawng a kal zawng a him lo e, tiin min paw lui a, ka kg zat ka hre ve kar sia, ka inthlahrung ang reng, "Ka rit em? I chauh chuan sawi la, kan chawl dawn nia", min chhang let vat a, "Chauh chu chau hran lo e, hei i awmin min do ve tawh nia, ilo upa ve deuh ta nih dawn hi", a sawi zawng chuan a nui deuh seih bawk a, "I lerh lutuk", tiin a samah chuan ka kek a, a ding thut, "Ti khan min han kek leh na teh, kawng thlangah ka theh thla nghal ang che, ka hair style i ti chhe vek, ka uluk ve nen", a sawi zawh hma hma chuan, "Min theh thla phal lo", tiin a sam chu a ka ti thur chiam a, leiah min nghat tawp a, "Thil ka zawt che ang a, diktakin min chhang rawh aw", a han ti a, ka lu ka bu nghat a, Laltetea chuan, "Reuben-a khan a kiss tawh che em?", Ka phu chiang kher mai, "I mawl em mai", tiin kal sawn mai ka tum a, ka kuta chelhin min zawt nawn leh a, kei chuan, " Kiss lo kiss lo rapthlak", vin deuh ti tih, nui deuh chung si hian ka han ti a. Laltetea chuan, "A ṭhat hlauh chu", tiin min min rawn kiss thut a, ka phu chiang kher mai, mak ka ti lutuk kha ṭawng ngaihna pawh ka hre lo, ka ding khawng tawp a, Laltetea chuan, "Min haw kher suh aw, i ṭhian ṭha ber ka nih angin first kiss chu ka phu", a ti ringawt a, thinrim tur nge nuih tur pawh ka hre lo, a thu tak hmel ropui sia, min puak a tum leh pawh chuan ka duh tawh lo va, ke lawng chuan damdawi dawr thleng chu ka kal a, kan let leh lamah chuan eng eng emaw hi a sawi a, mahse ka chhang lo.

Kan kalna tur kawngah chuan Ui lian ve deuh mai hi a lo bawk a, kal tlang kan ngai si, chu ui lah chuan min lo bauh ve chhen bawk nen, Laltetea chuan, "Hlau niawm ang deuh khan awm lo la, tlan lo la a um lo ang che, ui bauh ching reng reng mi seh an ching hran lo a nia", kei chuan, "A nih kal hmasa la ka lo zui ang che".

Min zui rawh tiin ka kut a vuan a, chu ui zawn kan thlen chuan a hma ai nasa khan min rawn bauh a, ka hlau ka tlan chhia chu min rawn um a, min rawn um pha, Laltetea chuan, "Tlan suh tih mawlh mawlh pawh a", tiin ui chu rawn hnawh kian a tum a, mahse a kal sawn nghal mai lo, min la bauh char char, tih ngaihna ka hre lo ka ṭap ringawt a, Laltetea chuan ui chu lung-in a vawm a, a kal sawn ve thei hram a, chutia ui hlau a ka ṭap chu Laltetea chuan min nuih chiam mai a, "Tlan suh ka ti mawlh mawlh che a ni lo'm ni, ṭah belh ropui si, a awm tawh loh hi, ṭap tawh suh, nula pui khawlaia ṭah vak vak a mawi lo, ka vel che emaw an lo ti palh ang e, bang rawh", min tih chuan ṭap pûr chung chuan, "Ka ṭap tui laklawh a nih hi, ka bang thei hleinem, min thlem pawh i tum lo, min nuih mai mai a nih kha, ka nu hnenah ka sawi vek dawn", ka tih chuan nui vur vur chung chuan, "Ka thlem reng che alawm, ka paw haw tawh mai ang che, darthlalang keh them te i rap palh ang", tiin a han ṭhu hniam deuh a, ke-a kal chu ka peih tawh bik lo, "Nih leh min thlauh miah suh ang che", tiin ka inpuaktir ve leh mai bawk a, "I mittui emaw, i hnap emaw, min tat miah suh ang che", min han ti kher a, ṭap mek e ti lo chuan ka nui huk a, "Hmelchhepa, ka tat nghal palh ang che, ka hnap a tawlh reng reng lo", a ding thut a, "Kha maw, tih nuih dan che ka thiam asin, ila naupang chhia ve sia, ti hian Ben-a bulah awm la chuan a ṭhen nghal ang che", min tih chuan chhan let tumin ka kâ ka han ang zet a, mahse sawi tur theihnghilh thut ang mai hian ka ngawi leh ta zawk a.

Kan in kan thleng ṭep tihah chuan Laltetea chuan, "Hei, in thleng ka puak manah che i kekawr te hak rawng min hrilh thei", a ti leh ringawt pek a, a sama keh pah chuan, "Tunlai i awm dan hi i nghal lutuk, min chhaih ziah mai", chau tawh tih hriat tak hian a thaw halh halh a, ka inthlahrung, ke-in ka kal tawh mai ang ka tih lahin a duh tlat si lo, kan thleng ṭep a ti tlat bawk si. An in zawn kan thleng, min chhuk tir a, ka ipte aṭang chuan damdawi chu ka han phawrh a, "Kha le damdawi chu", tiin ka pe a, nui vur vur chung chuan, "Lo kawl mai rawh, i pum a nat thut hunah a ṭangkai ang", mak ka ti ang reng, "I nu a pum a na a ni lo'm ni", Laltetea chuan tlan chhe pah chuan, "Ka tih der che a nih kha", tiin an in-ah min luhsan daih a, tih vak ngaihna pawh ka hre lo, ka thin a rim ru ang reng hle, min ti hah lutuk, ui-in min um bawk, ka chapal a chat bawk, chutah ka first kiss min laksak bawk nen, ka ngei ru ang reng, in ka lut, ka nu chuan, "In va'n rei ve", min lo ti a, ka chhang lo, ka room-ah ka lut nghal. Zan khua chuan Laltetea awm dan vel chu ka ngaihtuah a, ka ngaih a ti ṭha thei mawlh lo.

Episode 5

Nizan lam boruak vang khan Laltetea hmel hmuh ka hreh deuh avang chuan sikul kal tur chuan hma tak ah ka tho a, Laltetea tel lo chuan sikul ka kal a, class ka thleng, Kimkimi nen eng eng emaw kan sawi nak nak a, kan class lam pana Reuben-a lo phei ka hmuh chuan rang zet hian, "Ka biru dawn a nia, ka awmna lo sawi s'u", tiin ka biru daih a, Reuben-a pawh chu a beidawng ni ngei tur a ni, a kal sawn ve nghal mai a, ka hmuh hreh chhan ka ṭhiante'n min zawh pawh chuan chhan ngaihna ka hre chuang lo, mahse ka hmu hreh tlat si a ni, Laltetea vang khan ka inthiam lo pawh a ni mah na.

Class kan ṭan ṭep tihah chuan Laltetea pawh chu a rawn thleng ve a, min hau leh dawn emaw tih laiin min hauh a hnekin sam ṭawnna dum hi min lo pe a, "Kha, hei hi hmang tawh rawh, a dum hlang a ni bawk a, miss-te'n an hau lo ang che", min pek zawh chuan a ṭhutna lam a pan nghal a, ka lawm e tih na chang pawh ka lo hre lo a, Kimkimi chuan, "Nangni pahnih hi ni dang in ang lo, ti nge in inzah ṭut tak a?", kei chuan, "Engtin vak nge kan awm a, ni zanah min bum a, ui-in min um phaha ka thinrim a", Zovi chuan, "Ui-in a um che maw, i tlanchhe hmel ka hmu chak e, i che chhe thei sia, Ben-a lokal hunah ka hrilh dawn", min nuih vur vur a, "A ṭul kher kher lo Zovawk, mi chet chhiatna lai sawi peih lutuk mai", ka ti let ve vat a, kan inhnial laklawh lai chuan miss Rc-i leh Sir Jonny-a te an rawn lut a, Teachers' day lawm dan tur vel an rawn sawi a, Miss Rc-i thu sawi lai chuan Laltetea lam ka va hawi, kan mit a intawk thut, Teacher-te'n an hmuh loh nan a lehkhabu chuan a hmai a hliah a, min nuih vur vur chung chuan a hmui chu a han khawih ngei a, ka kut tum ka va hmu ve na chu min lo nuih mai mai a, a mit min siai thul, kan zirtirtu-te'n min hmuh hlau tak chung siin kan inchhaih char char a ni deuh ber mai.

Laltetea nui hmel chu ka vawi khat hmuhna a ni hauh lo, mahse, vawiina a nui hmel ka hmuh dan erawh a dang daih a ni, a hmel chu ni dang zawnga ka hmuh ai khan a ṭha zawk emaw tih theih khawp hian ka hmu ṭha a ni. A khat tawk chuan kan inen leh ṭhin, kan innuih tawn sek a, Sir Jonny-a chuan Laltetea rawn hawi zing lutuk chu a kam khat deuh hlek a, ka nuih a lo za kher mai.

Laltetea chu a hma ang ngawt chuan ka en tawh bik lo, kan pahnih-a inngaizawng tur anga ka inngaihtuahin ka ngaihtuah thui ngam lo, ka ṭhian ṭha ber a ni si a, kan chhungte leh kan ṭhiante, kan zirtirtu-te'n unau ang maiin min en si a, engtin nge min ngaih ang tiin ka ngaihtuah a, a theih hian ka hre bawk si lo. Ani paw'n min duh tak tak ka ring ngam bik lo, ṭhian ang chauhin min en a, tunlai hi a mizia danglam deuh mah se min duh erawh ka ring chuang lo.

Chhun chawlh laiin Ben-a chu kan class-ah a rawn kal a, ka bulah a rawn ṭhu a, "Restaurant-ah thil ei ang u a ti a", ka hnial deuh na chu ka ṭhiante'n, "Kal ho ang u, kan ril a ṭam", an tih avang chuan ka zui ve ta hlawm a, Laltetea leh Mapuia an rawn lut ve a, kan thil ei lai te chuan Laltetea lam ka hawi leh zeuh ṭhin, a hmelah chuan Ben-a thik hmel reng a lang lo, min nuih tho, mahse ka thin a lo rim ang reng, thik se ka tih vang pawh a ni maithei. Thil kan ei zawh chuan thu khawmuang lo chuan class lam kan pan nghal a, class kan neih lai pawh chuan Laltetea lam ka hawi duh lo lui tlat a, haw dawn paw'n ka sawm lo va,pumpelh kawngah ka hawsan ta daih a.

Zanin ka awm dan hi ka hre thiam lo, ka zir laiah rilru ka pe thei lo va, ka ngaihtuah ngai ka ngaihtuah tlut tlut bawk si, Laltetea ka hmaah a ding lo, mahse chiang tak mai hian ka ngaihruatnain a hmel ka hmu thei, a nui hmel leh a chet dan vel kha, Ben-a ngaihtuah luih ka tum paw'n ka thei lo, eng vanga hetia awm nge ka nih pawh ka ka inhre lo, kei in Laltetea chu lo duh ve tehreng pawh ni ila, ani'n engtin nge min ngaih ang?! Min lo duh ve ta lo a nih phei chuan kan inṭhian ṭhatna a chhe dawn bawk si, lo inngaizawng ta pawh ni ila rei daih loin lo inṭhen leh ta si ila, kan in ṭhian ṭhatnain a tuar dawn tho si a. Zan rei tak thleng ka ngaihtuah hnuah chuan ka rilru ka siam fel ta, eng thil pawh thleng dawn se, Laltetea chu ka ngaizawng lo ang tiin ka rilru ka siam fel ta a, mahse, ngaihtuah loh erawh a har, ka inhre thiam bik lo, ka rilru hi hmu thei se min hua ang em le, tiin ka ngaihtuah leh zel a, mutmu tuah a har, chhin khat pawh ka chhing lo, sikul kal phurna reng ka nei lo. Ben-a emaw, Tetea pawh ni se ka hmu duh rih lo ve ve a ni.

Phur lo tak chung chuan class chu ka thleng ve hram a, ka ṭhiante'n min biak paw'n ka chhang lo, awm ve lo ang mai hian ka lo ngawi kar a, an titi laklawh lai te chuan min lo en leh ṭhin, a chhan min zawh chuan ka dam ṭhat loh thuin ka chhang a, an awih lo hran lo, ka zawi ve bawk em a ni.

Teachers' day atan items kan class paw'n kan nei ve ṭeuh a, tel lo tur chiang saa ka inngaih laiin miss Tepuii chuan kan class drama chan tur chu lo ziak turin min ti a, chu chu harsa ka ti hran lo, mahse, kan ṭhianho bik lam tura min han ti kher kha chu harsa ka ti ngang mai, ka la lam ngai miah si lo va, thiam pawh ka thiam a ring nge mawni min telh ve kher kher ni tiin ka vui ru ang reng, mahse, ka koa tla tawh tih hlawhtlin loh chu ka duh bawk si lo, chu mi tlai aṭang chuan lam chu zir ṭan nghal ka tum a, mi fate pawh an lam thiam chuan, kei paw'n ka thei tur a ni ka ti rilru ve tlat a.

Episode 6

Chhunchawlh lai chuan Reuben-a leh Laltetea, an pahnih chuan pumpelh hram ka tum a, mahse, Reuben-a zawk chu ka pumpelh thei ngang lo a ni. Ka kalna apiangah min zui a, "Tih sual ka nei em ni? Ka neih chuan min hrilh rawh, ti nge hetia min hel char char a, i bialpa ka ni a ni lo'm ni, a chhan chu min hrilh teh", tiin min zawt sek a, kei chuan, "Ka thinrim lo va, i lakah lungawi lohna pawh ka nei lo, ka damsam vak lo va, ka mood a off lutuk, chuvang mai chauh a ni e", tiin ka chhang ta ringawt a, Reuben-a chuan, "Mood off leh natna tih kian dan ka thiam asin, min lo zui rawh office ah", tiin ka kutah vuanin min kalpui a, Teacher-te office kan thlen chuan Sir Rp-a chauh a lo awm a, Ben-a chuan thing phun tur leh a phunna tur hmanrua vel a dil a, Sir Rp-a chuan a lo pe ve nghal mai a, ti chuan sikul thlang lamah chuan kan inzui a, Reuben-a chuan lei chu a han lai phawt a, a laih zawh hnu chuan thing chu keimah min phuntir a, leiin kan chhilh dun leh bawk a, ka rin aiin thing phun chu a lo hlimawm a, "Nitin endun ang aw, thingkung te chu an ṭhang chak lutuk, nakkinah chuan he thing hi kan pahnih ai paw'n a la sang ang a, chu mi thleng pawh chuan inṭhen lo ang aw", Reuben-a chuan a ti a, chhan mai a harsa, "Zirlai naupang mai kan la nih hi, nakkin hun lo sawi lawk chiam rual pawh kan la ni lo", tiin ka chhang ve tawp a.

Reuben-a chuan phone thar a nei a, a phone hlui zawk chu a la ṭha em em tho a, ka nu phone aṭang ringawt a inbiak chu tawk lo a tih avang chuan, a phone lei thar chu keimah zawk min hman tir tum a tun a, mahse, ka duh loh tlat avangin a hlui zawk tal tiin Kimkimi a rawn kentir leh a, Kimkimi chuan, "Pe let duh tawh suh, in inhauh phah zawk ang, chu ai chuan zanin ka lo riak ang a, fb-ah kan pic vel kan post ve dawn nia, Eli leh Zovi te paw'n an khawih vek alawm, kan pahnih chiah khawih lo kan awm a nia", Kimkimi zana ka bulah a awm chuan ka khua a har lo deuh ang tiin lo riak tur chuan ka ti a. Class kan ban hnu pawh chuan Laltetea pum pelh ka duh vang chuan Kimkimi te in-ah ka kawi phawt a, an in a thlen hun velah ka haw ve chauh a ni.

Kimkimi pawh chuan fb a luh chu a nghakhlel ni ngei tur a ni, chaw an ei kham ve leh a rawn kal nghal a, keini pawh kan lo ei fel diam tawh a, Kimkimi lo thlen ve leh phone chu kan khawih ṭan nghal a, Fb-a luh tum chuan password leh email chu kan han chhu ve ngei a, mahse, kan lut thei tlat lo, internet pack a awm lo a niang tiin 50 man kan va thun, kan lut thei chuang si lo, Kimkimi chuan Laltetea mei zu lai chu tukverh aṭang a hmu fuh a, a ko a, rang tak hian a lo chho nghal a, "Kan lut thei lo, eng nge a awmzia", tiin Kimkimi chuan Laltetea chu a zawt a, Laltetea chuan, "Khawimaw, net a chhia a ni lo maw", a khawih neuh neuh, "Net chu a ṭha reng si a, a va'n mak, ti nge in luh theih loh a, Kimkim i email leh password lo sawi teh", Kimkimi chu a ngawi vung vung a, "[email protected], chuan password-ah Ruatpuia", a han ti ve ngei a.

Mahse, Laltetea chuan, "Hei a incorrect zel, i password hi a dik a maw?", Kimkimi chuan, "Kha mi khan a theih loh chuan kimkimi ti mai ang", Laltetea chuan, "Chutiang in a theih ngawt loh, in password hlui khan a ngai alawm", Kimkimi chuan, "Kan vawi khat luhna tur chiah alawm le, Kimkimi tih chu password-ah ka duh alawm", Laltetea chuan Kimkimi melh deuh chung chuan, "I va'n a tak, chutiangin a luh theih loh, change password phawt te a ngai alawm", kei lah chuan engmah hre lem lo chuan ka nuih chu a lo za ve em em tho a. Laltetea bawk chuan, "Friend in ngah tawh em, min lo add ve r'u aw, Fapa mal duatlai Te-a tiin ka indah", a han tih chuan Kimkimi chuan, "Eee...ka pro name-ah khan Ralte fanu duatlai ka ti ve duh", nin hmel zet hian Laltetea chuan, "Pro name hi duh duh hunah a thlak theih hleihnem, account inhawnna a rei tawh em?", Kei chuan, "Hei kan lut ve dawn chiah a nih hi, a theih awm e", ka'n ti ve ngawt a, Laltetea chuan, "Nangni pahnih hi fb account create miah loin login in lo tum te hi a ni lo maw?", Kimkimi chuan, "Create hmasak phawt tur tih na mi?", a han tih chuan Laltetea nuih za bawk si, thinrim deuh reuh si chuan, "Mi mawl pahnih, min va'n ti buai tak, fb-ah reng reng account hawn ve phawt a ngai lom, in â a mawni le aw, a hnuaiah hei create account tih a inziah mawlh mawlh hi, "Kei chuan, "Pawisa eng zah vel nge ngai ang", Laltetea nuih za lutuk chu a kut a beng vak vak a, "Pawisa 500 vel a ngai ang, mahse ka siamsak ang che u, vawi khat ve ve min kiss ula a tawk mai ang", nui vur vur chung chuan a han ti a, Kimkimi chuan, "Naaa pawisa ka nei lo asin, Eli kha chuan password vel a ngai tih chiah kha a sawi sia".

Laltetea nuih bawm kan hawng hi a ni ringawt, a pum dawm meuhin min nuih a, "[email protected], [email protected] te in han ti ve bawk a, mi â.com ti ru in email-ah", nuih za em em hian a han ti a, a mah bawk chuan, "Tak takin engmah a ngai lo, hei ka siam mek aw", tiin eng eng maw, a pawimawh tur ang vel chu min zawt a, kan pian ni leh thla te, kan awmna vel te, Kimkimi nen kan inen a, kan nuih chu a za ve ta ngang mai, "Hetiang hi engmah ti loin luh ve tawp kan tum a nia", tiin kan innuih vur vur a. Laltetea chuan a khat tawk chuan, "[email protected] a tih loh leh [email protected]", tiin a nui leh vur vur ṭhin a, thinrim ahnekin kan nuih chu a lo za mah zawk a.

Kimkimi nen chuan Facebook kalhmang chu kan man lo hle a, Laltetea chuan nuih za chung chung hian min hrilh fiah mawlh mawlh lai chuan, "Ngawi teh u, video in la ila, YouTube velah dah ila, in lar ngawt ang, he ti em em a ât hi, in âtzia hi hausak pui tham a tling a nia, mi chuan in â der a maw an ti ngei awm sia, camera lo keng ila ṭha tur, nichina Kimkimi nen login in lo tum dan vel kha maw, a common lo tawp, mi â.com", a han nui leh uar uar a, Kimkimi nen chuan kan melh rem rawm a, "Mi bulah i sawi vaih chuan i chak lo ngawt ang", Kimkimi chuan a han ti a, Laltetea chuan, "Aaaa...sawi mah ila dawt ka sawi maw an ti ang, ti em em hian mihring fanu hi a lo chhawih theih a ni maw, lu chu in nei ve bawk sia, a ṭangkai lo e", a nui leh vur vur a, kei chuan, "Mi hre ve lo te, nge min nuih vak vak, tumah thiam sa an awm lo, nang paw'n a tirah i hre vek bik em ni?", Laltetea chuan, "Ngawi teh, mihring thluak nei pha chin chuan kan hre nghal mai, en reng reng paw'n hriat ve awm, Ui thluak i nei a ni hrim hrim. Kimkimi lah hi nang ai a la chhah ve leh chhawng a, ani hian bawng thluak a nei bawk a, ti khan mi chhawih.com in ni mai", a thu sawi dan vel chu ka ngei reuh lutuk, "Laltete, ui ka nia mi, ui chauh in ui thluak an nei aw, i ngeiawm lutuk, min khawihpui pawh kan ngai tawh lo bawk", vin zet hian ka ti a, a ni lah chuan, "Bauh bauh lo khan thingpui va siam rawh, ka ril a ṭam a nia, hei account a thlawnin ka hawnsak che u a nia, nang ni chuan hawng dawn ula 500 ve ve in inseng awm si a", Kimkimi nen chuan an nui vur vur.

Thingpui chu Laltetea sawi vang kher pawh ni lem lo chuan ka va lum a, kan pathum daih ang tur vel ka va chhuang a, thil dang ka tihsan daih a, Laltetea chuan choka lam a rawn pan, "Thil kang rim a va'n nam", a han tih chuan ka thingpui chhuan lai kha ka hrechhuak thut, ka va en chu a lo so kang vek a, Laltetea chuan, "Thingpui ringawt pawh i chhuang ut thei a nia, mihring thluak chu i nei lo tih a hriat ta khawp mai", Laltetea min tih dan chu ka la na lutuk a, mittui parawl ṭeuh chung hian, "Ka nu hnenah ka sawi dawn", tiin ka nu room lam chu pan ka han tum a. Laltetea chuan, "Hey, nang hi i ṭap alaw, ka fiam che a nih kha, i va han ṭahbelh tak", ka lu a chul heuh heuh pah chuan, "Aw, mihring thluak nei i ni, ṭap tawh suh le", nuih za insum tak chung si hian min han ti a, kei chuan, "Min nuih vak vak a nih kha, ka sawi tho ang", Laltetea bawk chuan, "Aaaaa...a lo nuih hrep zawk ang che tih ka hlau, hrilh duh suh", tiin Kimkimi nen min nuih leh vak a.

Zan dar 12 ri tawh mah se kan pathum chuan fb khawih dan vel kan la bih char char a, kan inhau leh thut ṭhin, Laltetea inla hre bik lutuk chu kan ei lo hle na chu kan mamawh bawk si. Kimkimi nen kan mut a chhuah tawh vang chuan Laltetea chuan, "Naktukah in profile picture vel chu ka dahsak dawn che u a nia", tiin min hawsan ta a.

Ka harh hma viau emaw ka tih laiin Kimkimi thawhna a lo rei tawh a, fb lama a P.P tur thla a lo inla chu niin, ka nuih a ti za kher mai, kan in-ah chaw kan ei a, kan ei zawh chuan Kimkimi te in aṭang sikul kal nghal mai kan tum a, Laltetea'n min nghak r'u a tih tlat avangin kan nghak leh te te phawt a, Kimkimi te in-ah kan kawi leh meuh chuan sikul ṭan dar a lo ri der tawh a, mahse line up an neih vang chuan kan va in-line ve leh hmiah a, Laltetea lam ka hawi piang chuan ri chhuak si lo hian, "mi â.com", a tih loh leh, "[email protected]", nui vur vur chung hian a ti sek a,Teacher-te'n hmu fuh se hrem se ka ti rilru tak zet a ni.

Chhun chawlh lai chuan kan class-ah chuan class 12 hmeichhe-ho an lo lut a, Laltetea chu lehkha hi an lo pe a, Laltetea chuan chhiar lem lo chuan peih a han tum a, Kimkimi chuan a chhuh vat a, Seni tih hming pu chuan Laltetea chu a lo bem chu niin, Laltetea lah chuan a lo ngaihsak lo nasa mai si, Laltetea chuan, "Kei chu ka hmeichhe duh zawng a mak lutuk, Bawng thluak nei ang te, ui thluak nei ang te ka duh miah lo", kei chuan, "Min sawi chhan lo mai rawh, keini pawn vawk thluak nei kan duh bik lo", ka kâ chuan ka duh lo ti mah se, ka rilru chuan ka duh reng si a tiin ka lu ka hiat ka hiat ringawt a.

Reubena ka hmuh chuan ka inthiam lo ru ang reng, eng tin nge ka tih ang tiin ka rilru ka seng fo a, ṭhen erawh ka tum lo, Laltetea chu ka ṭhian angin ka en tlat tur a ni, ka kawppui tur atan chuan Reuben-a a ṭha ber e, tiin rilru pu mah ila, Laltetea'n hmeichhe dang a kalpui ka hmuh chang ringawt pawh hian ka lo thik ru hle ṭhin, Reuben-a kut vuan mah ila Laltetea kut ka thlah thei si lo.

Episode 7

School kan ban hnu chuan kan class-ah lam kan zir a, ka thiam lo fal hle. Reuben-a te pawh an class lamah an lo practice ve bawk a, Laltetea chuan ka zei lo lutuk chu min lo nuih vur vur ṭhin a, Laltetea chuan miss hnenah chuan, "Miss, an zei lo hlawm si, hetia pangngai deuha lam ai chuan, hla hlui deuhah lam ta zawk se, fiamthu ang deuh reuh in ti ila, zei lo mah se a nuihzatthlak dawn em a, lawm an hlawh zawk ang", miss pawh chuan Laltetea thurawn chu zawmin chutiang hla chu min zawnsak a.

"Zaninah ka lo zawng ang a, naktuk tlai aṭangin in zir dawn nia, vawiin tlai chu haw phawt mai r'u", min tih avang chuan engvak mah zir lo chuan kan haw ta hlawm a, kan in thleng Reuben-a chuan min thlah a, rei lo te ka lo lut kawi ang a tih kha Laltetea'n alo ngaimawh ni awm tak a ni, an in lam pan hmasa lo chuan kan in-ah a lo lut ve phawt a, Reuben-a chuan, "Nga ti nge i ṭhianpa hian a ven em em che le, a ta neih tlat che a, ka ngaih dan a ni hauh lo", Laltetea hriat phak si loh hian a ti a, kei chuan, "Ka la naupang si a, ka nu-in ṭhian inleng neih a phal vak lo va, Laltetea hnenah min veng deuh turin a hrilha mawle", ka ti zaih a, a chhan chu an inhuat ka duh loh vang a ni, mahse an pahnih chuan an inmil hauh lo, thil eng emaw ni sawi ila, pakhat-in a lo hnial reng a, an thu a inhmu thei hauh lo.

Reuben-a chuan nuam lo a ti deuh ni ngei tur a ni, rei pawh awm lo chuan a haw nghal a, Reuben-a haw hnu chuan Laltetea hnenah chuan, "Ti nge Ben-a lo len ve a piang hian ilo luh ve chhen a, ni dangah tiang hian i awm ngai tawp si lo", Laltetea chuan, "I awm dan hian zir hek lo, khatiang mipa, zia thup lutuk kha i duh a nia", a zia a thup leh thup loh chu engtin nge i hriat tia ka zawh chuan, "Mipa ve tho ka nih hi, ka la naupang a ni maithei, mahse, mipa rilru ka pu tho, ka hre tlang vek. A awm dan leh a hawi her hrim hrim kha a rukin a lerh dawn tih a hriat vek", a thik vanga sawi chhia chu ni se ka lawm zawk tur, mahse a thik vang pawh ni loa chutiang taka Ben-a a sawi chhia chu ka ngaithei bik lo.

WaiWai hi a va lei a, chhum rawh min tih vang pawh ni lem lo chuan ka ril a ṭam ve avang chuan ka chhum a, Reuben-a a sawi chhiat man pek kha ka duh a, hmarcha a ei ngam lo tih hre reng chung chuan ka ei tur siamah chuan hmarcha tlem telh ka tum a, mahse ka duh aiin ka lo pawlh tam a, ka tan chuan a tawk viau, mahse, Laltetea tan chuan a tam mah mah a ni. Thleng-a suakin ka va pe a, a han ei chu a thin a rim kher mai, "Hmarcha ka ei duh lo tih i hre reng a, ti nge he ti em ema thak hian i siam", kei chuan, "Ka tum reng vang pawh a nia mi, ka pawlh sual a nih kha", ka tih paw'n a awih duh tlat lo, ka thil ei lai chuan a tlan chhuak thut a, a haw tau emaw ka tih laiin a lo lut leh vat a, ka thil ei laiah chuan Bekang hi a rawn thlak ringawt a, ka thil ei lai chu dawhkanah ka dah tawp a, "Laltete rilru chhe pa, bekang ka ei duh lo tih i hre reng a i va'n sual ve", a nui vur vur a, "Miin kan duhsak ve em em che a, hah deuhin ka va la ve em em a, ei zo vek rawh", tiin min nuih hrep a, ka thinrim chuan ka thleng leh a chhunga wai wai awmte nen chuan thleng silnaah ka paih tawp a, thleng pawh chu a keh nghe nghe a, chutia kan thleng tih keh a hmuh chuan Laltetea chuan, "Tu emaw sawisak tur ka nei aleeee, thleng te a ti keh vel a, a nu lo haw hunah ka sawisak dawn a, chawh ang chu aw", kut beng pah si, ke per pah chuan min han ti a, ka thinrimna a zual, "Haw rawh", tiin ka room-ah ka luhsan hmak a.

Ka thinrim viau na chu ka ril a tam bawk si, cheng 100 kengin kan in hnaih ber thingpui dawrah thil ei turin ka kal a, thingpui dawr chhung ka va lut chu Laltetea rice ei lai ka va hmu fuh a, kan pahnih chuan kan innuih leh ringawt a, thil chu kan ei dun leh ta tho a ni. In melh deuh tho mah se innuih ru deuh chung chuan kan thil ei lai chu kan ei mawlh mawlh a, ka thil ei man chu Laltetea chuan min peksak a, kan haw kawngah chuan Laltetea chu a chimawm leh ṭan a, "Merry, teachers' day-ah hmunphiah nen ka lam tir thei che asin", kei chuan, "Chutiang chuan ka va han lam awm lo, i theih phawt chuan i uite ka ni ang". Chutia ka tih chuan Laltetea chuan, "Chiah maw, ka uite i ni tak tak ang, ka theih leh theih loh chu lo en ang che", tham lo zet hian, "Kan hria ang chu", ka ti ve mai bawk a.

Zan dar 11 ni tawh mah se lehkha zirin ka la meng reng a, tukverh ka hawng a, Laltetea mei zu lai ka hmuh chuan a meizial chu min lo pe ve turin ka ti a, zo zial asin, ti mah se ka duh tho ka tih a vang chuan min pe tur chuan a lo kal a. A meizial min rawn pek ka han zu chu a mak kher mai, hrawk hi a thip vek, a rim lah a mak si, a ruk chuan a nui a nui a, ka ngaih ṭha lo lutuk chu zial min lo pek chu ka han en dik a, a meizial min lo pek chu Vaihlo ni loin, anthur rep a lo zial lek chu niin, a tlanchhe nghal a, an in a thlen chuan a room-ah lut tlang nghalin, a chhunglam aṭang a kalh tlat avangin ka kut a tuar thei ta lo va, "Naktukah i hre khawp ang", tiin ka hawsan a, engtin nge ka thung rulh ang tiin ka ngaihtuahna ka seng ngat ngat a, eng vak mah ngaihtuah chhuak lem lo chuan ka lo muhil daih chu niin.

Zing hma takah ka tho a, sikul kal turin ka insiam nghal a, Kimkimi sawm tum chuan Kimkimi te in lam ka pan a, Sir Rp-a nen chuan kan intawk a. A ṭhianpa te in-ah lehkha pawimawh va pe tur chuan min tir nghal, peih lo ru chung chung chuan a ṭhianpa te in a sawinaah chuan ka va kal a, kawngka ka kik a, rei lo teah an lo hawng nghal a, mak deuh mai chu kawngka lo hawng tu chu Reuben-a lo niin, mak kan ti dun kher mai.

Reuben-a chuan class kal turin ka sawm a maw a ti hman a, mahse Sir Rp-a'n lehkha min kentir chu ka pe a, "Ee, hei chu ka paliana ta tur a nih hi, nimin khan an khua aṭang a lo zin a", khawvel hi chu a zim a ni tiin kan innuih dun ringawt a, kal leh nghal mai ka tum a, mahse Reuben-a chuan min nghak rawh a tih tlat a vang chuan ka nghak ta a, in-ah chuan a mah chauhin a lo awm chu niin, kan pahnih chauhin kan awm tih ka hriat chuan ka hlauthawng ru ang reng. Laltetea'n a mizia tur ang a sawi te kha ka ngaihtuah chhuak a, rilru a nuam lo duh hle, mahse a insiam zo chu, "Kal ang", a ti nghal a, ka lawm kher mai.

Reuben-a chu Laltetea sawi ang mi chu a nih loh tawp hi ka ti rilru nak nak a. Sikul kan thlen chuan kan class thleng min thlah a, chhun chawlh laiin kan inhmu dawn nia tiin an class lam a pan ve nghal a. Class ka lut chiah chu Laltetea chuan, "I kal hma tehreng nen enge i tih? i bialpa nen khan eng tin nge in lo kal rual theih?", tiin min zawt a, kei chuan, "Saw tah kan inhmu fuh palh a", a awi ve mai dawn emaw tih laiin, "Merry, saw mihring vang sawn dawt min hrilh maw! Ka mit-ah pawh min en ngam miah loh kha", nui vur vur chung chuan, "I ngai dik lo ang ka tih vang alawm ka hrilh duh loh che", tiin an in-a ka va kal dan vel te ka hrilh hnu chuan, "Reuben-a chuan i hmui pawh a si lo maw?", rang zet hian, "A teuh lo mai, i ngai mak thei em mai", a mit-a en chung ngei chuan ka han ti a, Laltetea chu a rawn kun hniam a, mi dangin an rawn hriat ve hlau tih hriat tak hian, "A nih chuan i hmui situ awmchhun ka la ni i tihna em ni?", a sawi zawh ve leh ben tumin ka kut ka han phar chhuak a, nui vur vur chung hian a rang thei ang berin a ṭhutna lam a pan nghal a, a ṭhutna a thlen hnu pawh chuan a rawn hawi let a, nui vur vur chung chuan a hmui chu a khawih sek a, mi dangin an lo hre thiam ang tih ka lo hlau lutuk a, mahse tuma'n an hrethiam lo hlauh, ka lawm ngei mai.

Teachers' day a hnaih tawh em vang chuan class pawh mumal takin kan kal lem lo a, Miss Muanpuii a lo lut a, Laltetea chu a be te te phawt a, an sawi chu ka hre pha lo, mahse, miss chuan hla chungchangah a bia niin ka ring, a chhan chu miss chuan earphone in eng emaw hi a ngaihthlaktir a, chumi zawh ve leh Laltetea chuan a lu a lo bu nghat a. Miss chuan, "Hei item nei lo tur kha chu in haw thei ang, Merry te ṭhianho pawh kha in hla tur ka thlang fel tawh a nia, Mighty M Junior-hoin an sak 'Lei hringnun' tih hla hmang khan in lam ang", min ti a, kan class-a awm zawng zawng chu an nui vek a. Laltetea leh a ṭhianteho lah chuan kut an lo beng ri dur dur a, Kimkimi bulah chuan, "Ka va han lam awm lo, miss hrilh ṭhat a ngai a ni", ka ti neuh neuh a.

Miss chuan kan awm dan tur min rem dik mawlh mawlh lai chuan, "Miss kei chu min telh ve lo mai la, ka zei lo si, miin min nuih mai mai ang a ka zak", ka han ti a, miss chuan, "Mi ti nui tura ti na na na che u, min nuih ang han tih tlat mai chu, a awlsam zawngin ka hrilh ang che, mi tih nuih kha in hna chu a ni mai", a ti tlat bawk si a, chuta chhapah Laltetea chuan miss hnenah, "Miss, hmunphiah keng se, chu chu Guitar angin perh tel se, an hmai vel hi chei rang bawk ila, chuan kawr ṭhing ve deuh hi ha vek bawk se a fuh ngawt lo ang maw", a rawn ti leh zel a, Miss Muanpuii lah chuan, "Laltetea hi rem i va hre reuh ve, tiang chuan kan ti ang, a ṭha dawn e, kawr hmanlai deuh lo ha ṭheuh se tiraw", a lo ti leh zel bawk a, kei chuan ka hnial leh na chu miss chuan ka tih duh loh chuan Principal hnenah i kal a ngai ang a ti tlat bawk si a, a chhan chu kum dangah item ka nei ngai lo va, min phut ve hrim hrim, rual ka pawl ve deuh nan min phut lui tlat bawk si.

Laltetea chuan, "A lam thiam lo tak tak emaw in ti a nge, a thiam lutuk, zing a tho chiah te hi a lam nghal ṭhin alawm, a ha a nawh pah te hian a lam a lam zel alawm", min nuih vur vur chung chuan a rawn ti leh a, kei chuan, "Lam te chu nangma min zirtir alawm, i thiam em kha, miss, Laltetea hi lo tel ve se a ṭha ngawt ang, a zei sia, a mawl bawk si, mi chu a ti nui nasa khawp ang", ka ti ve bawk a, miss chu a ngawi vung vung a, a inngaihtuah phawt ni tur a ni, chutah a rawn ṭawng chhuak ta a, "Dik chiah, Laltetea hian ngaih dan a nei ṭha thei bawk a, a ni pawh hi tel ve rawh se", a han ti chu Laltetea'n a duh lo lutuk chu a zei loh thu leh hmeichhe bula lam a duh lo zia sawi nawn sek a, mahse miss chuan a phal lo ta tlat a, "Kan va chawh tlang tak em", tiin Laltetea chu ka ṭawng el vel chiam a, "Haw hunah i hre dawn alawm, ka uite i ni tawh tho tho", a han ti a, kei chuan, "I uite ka ni awkawng lo", thil ka hre chhuak thut a, Teachers' day-a hmunphiah nen min lamtir theih chuan i uite ka ni ang ka tih kha ka hre chhuak thut a. Laltetea lah chuan ui an chhawmchhaih dan chuan min ko ta sek mai a, miss awm lo se chuan kut ka thawh tawh hrim hrim ang mawle.

"Lei hringnun" tih hla hmang chuan lam chu kan han zir ṭan ta a, mahse kan han ti tak tak chu a thiam lo pawl chu ka ni bik hauh lo, lam kan zir lai chuan class pawn lam aṭang Reuben-a hian min lo en reng chu niin, ka hmu thut chu ka tim vek, ka bialpa kha a ni ve miau alawm, ka lai deuh te pawh a ni ang ka ti ṭha thei ta reng reng lo va, mahse miss chuan dawh thei takin min zirtir ve ta ngar ngar tho a, han tih tak tak chuan rin aiin a har lo. A hmaa miss hla thlan leh style ang kha chuan ka lam thiam dawn lo tih a hriat ngawih ngawih a ni. Tlai dar 4:30 vel a ri ta maw tih chuan miss Muanpuii chuan haw min phalsak hlawm a, Reuben-a nen kan inhmu thei ta lo, a chhan chu a ni pawh a practice ve tho vang a ni.

Episode 8

Sikul aṭang ka haw chu ka room-ah ka lut tlang nghal a, inthlak pawh ka peih lo, ka chau ngawih a, khumah ka zal mai mai emaw ka tih laiin ka han harh chu zan 9 a lo pel der tawh mai, ka nu'n min lo kai tho a, "Chaw ei phawt la i pa i be dawn nia, a rawn call a, i mu tui si a, i khua a sik deuh bawk nen ka kai tho duh lo che a nih kha", ka pa a sawi chu ka phu zawk a, "Ka pa'n alo call maw?!, nih chuan chaw ei hmain ka be phawt ang", tiin ka nu phone aṭang chuan ka pa chu ka va phone a, ka pa chuan min lo chhang a, ka pa chu rei tak ka hmu tawh lo va, ka ngai tak zet a ni.

Chutia a aw ka han hria chu ka naupan zia a lo lang a, ka mittui a parawl vek a, ka nu tih lungngaih ka duh loh avang chuan pawnah ka chhuak daih a, ka pa chuan, "Tun ṭum exam-a pakhatna i nih leh chuan ka lo zin ngei ngei ang, in chawlh chhung chu ka bulah i rawn zin ve dawn nia, i u paw'n a ngai tawh lutuk che nia", min ti a, inngaihtuah buai lem lo chuan, "Pa pakhatna ka ni dawn alawm, min lo hruai rawh aw, ka ngai tawh lutuk che, ka u pawh ka ngai tawh", tiin ka ṭap zawih zawih a, ka pa chu a rilru a nuam lo ngawt ang le, insum hram hram ka tum pawn ka pa bulah hi chuan ka lo pangchang ve mah mah ṭhin a ni mahna. Rei pawh ka be thei lo, a rilru ka tih hah ka hlau si a, phone chu ka dah a, in chhungah pawh lut lo chuan Laltetea hmuh tum chuan an in-ah ka va lut a, a nu chuan a room-ah a awm tih min hrilh a, ka va lut chu a lo muhil tawh a, mahse a bulah chuan ka ṭhu a, ka ṭap tawp ringawt a. Laltetea chu a lo harh thut a, mak ti tak chung hian a chhan min zawt a, ka sawi thei lo, a nu a rawn lut vat a, Laltetea hnungzanga beng chung chuan, "Eng tin nge i tih?", a rawn ti a. Laltetea chuan, "Nu, eng tin mah ka ti lo, a lo ṭap ringawt mawle. Ti nge Merry, i nu'n a hau che em ni", min ti a, "Laltetea hrilh hai hmel lutuk ka hmuh chuan ka nuih a za leh deuh bawk si, ka nui huk a, ka ṭap leh a, "Ka pa ka ngai alawm, ka nu bulah ka sawi ngam si lo va", ka han ti chu Laltetea chuan min hre thiam khawp mai, a chhan chu khang hun chhung zawng min hnem ṭhintu chu a mah a ni miau a.

"Insum duh suh, ṭap bawrh bawrh rawh", tiin min kuah hle hle a, a nu pawh chuan, "In inhmu khat ve bawk em a ni, ti khan lo awm r'u, ei tur ka va siam ang che u", tiin min chhuahsan a.

Kei, Laltetea leh a nu te chuan thil ei chungin ramhuai movie kan en a, kan en tui lutuk chu haw lawk nachang pawh ka lo hre lo va, min ko turin ka nu a rawn kal a, mahse kan thil en lai a laklawh em avang chuan a rawn ṭhu ve ta rih zawk a, a ni pawh chuan hmuhnawm a lo ti phian a, "A tawp thleng en mai ang aw", ka nu chuan a han ti a, kei chu ka nu mal chungah chuan ka mu a, ka mu rem deuh ni ngei tur a ni, ka lo mu nghil daih mai a, min ti harh duh si lo va, Laltetea room-ah min muttir a, Laltetea ka room lamah a va mu ve thung a.

Zing ka harh chu ka phu chiang kher mai, Laltetea room-ah eng tin nge ka mut theih le ka ti rilru nak nak a, Laltetea chu a rawn lut thut a, kei chuan, "Ti nge i room-ah hian ka mut daih a, nizan khan ka lo muhil daih em ni?", Laltetea chuan, "I muhil daih sia i room-ah kei ka mu daih alawm", ka inthiamlo tih a hria ni ngei tur a ni, "Ka mutui lutuk tho a nia, a pawi reng reng lo, va insiam rawh, class kan tlai ang, i nu-in chaw ka chhum hman lo, in in-ah lo ei mai rawh se a tia, va insiam la i lo phei leh dawn nia", min ti a. Hnial lem lo chuan school kal tur chuan ka va insiam a, ka hmai vel powder vel ka hnawih ang ka tih chu ka incheina chu a lo awm lo nual a, nizan kha chuan he tah ka dah reng sia tiin ka room hmun tin mai chu ka dap kual a, mahse ka hmu lo, Laltetea'n min laksak emaw ni dawn le ka ti rilru a, mahse nga tan nge atih ang tiin ka ngaihtuah leh bawk si .

Lotion chiah inhnawih chuan ka va kal a, Laltetea chuan, "Lo kal rawh, a la hma, kan ei hman ang, kan tlai lo ang", min ti a. Kei chuan, "Laltete, nang hi ka incheinaho kha i thukru tiraw?", tiin ka zawt tawp a, a lo pha nasa ngang mai, "Mipa ka nih hi, i makeup ngatan nge ka tih ang, min chhuah chhe thei lutuk mai, bakah tikhan i hmel ṭha zawk, makeup hmang ve lo mai rawh, powder pawh inhnawih i ngaih loh kha", a nu-in a hriat ka hlauh vang chuan engmah sawi tawh lo chuan chaw chu kan ei a, kan ei kham ve leh school kan pan nghal a.

Teachers' day-a kan stage tur vel siam chuan class tinte chu kan buai a, Laltetea chu a ṭangkai pawl ah a ṭang a, hah pawh a hah ngawtin ka ring. Miss Mapuii'n lam min zirtir leh a, hma kan sawn hlawm khawp mai, practice em em pawh kan ngai tawh lo, miss chuan, "In hak tur vel ngaihtuah turin va haw rawh u", tiin min haw hmatir hlawm a, kan ṭhianho leh Laltetea tiamin thawmhnaw dawrah kan lut a, a par tial nei nuaih ang chi hlir chu kan lei hlawm a, kekawr tlang arh kan lei bawk a. Kan hmai cheina tur hmanrua vel pawh ka lei nghal a, Reuben-a kan tawk thut a, min zui lawk rawh se aw tiin ka kut ah vuanin min kalpui daih a.

Eng nge kan tih dawn tih ka zawt nawn sek a, min chhang chuag miah lo va, "Vawiin chu tu mahin min ti buai suh se, kan lengdun ve dawn alawm, ka ṭhianpa nu hian pangpar dawr a nei a, tah chuan kan teacher-te present tur pangpar vel kan lei dawn nia, i ta tur pawh", chhang lem lo hian ka zui ve mai a, dawr kan han thleng chu ka duh ang chi pangpar a lo tam khawp mai a, thlan tur ber pawh ka hre lo, teacher-te pek tur kan thlan zawh hnu chuan Reuben-a chuan pangpar buk mawi zet mai hi min rawn pe a, "Hei hi nimin tlai khan ka hmu a, i tan ka lo duh lutuk a, i duhzawng a ni hrim hrim em?", "Imm...a mawi ka ti lutuk, mahse hetiang thil min tihsak vak hi a ngai lo asin", ka han ti a, Ben-a chuan, "Ka bialnu i nih hi, ka duhzia che lantirna hun pawh ka nei ngai lo va, he thil hi min pawmsak rawh", tiin chu pangpar chu min pe a, nuam lo ti ru viau chung chuan a thil min pek chu ka pawmsak a, kan inthleng min thlah a, Reuben-a'n min biak chhawm dan vel chuan min hneh ang reng, a chhan chu ka la naupang tih theihnghilh hauh loin thianghlim takin min duh niin ka hria a, bialpa tur ka lo thlang fuh hle a nih hi ka ti rilru hial a.

Zan dar 8:40 a ni a, ka room tukverh aṭang chuan Laltetea room lam ka thlir a, kan inkawm ngeih ṭhinzia te ka ngaihtuah a, Laltetea hi ka tan ṭhian ṭha ber a ni a, ka duh tur a ni lo, kan inṭhian ṭhatnain a tawrh phah mai bakah, Ben-a rilru tih nat ka duh lo bawk. Laltetea paw'n ka lakah eng rilru mah a pu lo, min chhaih peih viau mah se min duh tihna a ni kher lo, thil zep a nei ngai lo va, min duhna chhete pawh nei se min hrilh ngei ang, mahse, chutiang chuan a ti si lo. Ka tan chuan Reuben-a hi a ṭha ber a ni, naktuk aṭang chuan a hma aia nasain ka ngaihsak tawh ang a, a tan bialnu ṭha tak nih ka tum ang tiin ka rilru ka siam fel a. Thil eng eng emaw ngaihtuaha ka din reng lai chuan Laltetea chuan min lo ko a, "Naktuk hi September ni 5 a ni tawh nia aw", a rawn ti a, kei chuan, "Min lo sawm rawh aw", Laltetea chuan, "I birthday a nih kha aw, i lo theihnghilh a nge", ka birthday a ni tih ka theihnghilh ni loin, kumin chu ka birthday lawm ka phur hran lo, a chhan chu ka pa leh ka u te ka hmu thei dawn si lo va. Laltetea bawk chuan, "Mu hma rawh, thawh i hai palh a nge", ka lu ka bu nghat a, tukverh kharin ka mu nghal, ka chau deuh pawh a ni mahna ka lo muhil nghal a.

Zing 6 a la ri chiah lo, ka phone ri chuan min ti harh a, en lem lo chuan ka chhang a, Laltetea hi a lo ni a, "Merry, hei police station-ah ka awm a, ka nu nen khan lo kal ula min lo la chhuak rawh u", ka phu chiang lutuk, rang zet hian ka tho va, kan inbiak lai chuan ka thawmhnawte ka han inha ṭha mawlh mawlh bawk a, "Te-a, ti nge police chuan an man reng reng che a? Eng nge i tih sual?", Laltetea chuan, "Min man chhan maw, ihmaw ka hmel a ṭha lutuk a, hmeichhia an buai zel a", a rawn nui vak vak, "I rawn ti der mai mai a ni maw, ka hlauh hmanzia", vin zet hian ka ti a, Laltetea chuan, "Tukverh kha lo hawng lawk teh", ka va hawng nghal a, ka thil hmuh chuan ka nuih a ti za kher mai, Laltetea chuan thirbel hi a lo khum a, chu mai pawh duh tawk lo chuan chhangthawp bial chi-ah chuan nawhalh hi a lo thil fur hlawm a, birthday cake awm ang tak chuan a lo chei ve chu niin, ka nuih a za lutuk. Phone chu ka phawrh vat a, thla ka laksak a, a thirbel khum lai leh a chhangthawp ken laite nen chuan kan in lamah a rawn phei a, ka nu pawh a nuih a za ngang mai, "Birthday cake zai a hun e", tiin chemte chu min pe a, nui vur vur chung chuan ka zei a, barh ka tum chu a duh lo nasa, "Chhangthawp chu ka duh lo, nangma'n ei vek rawh", min ti a, kei pawh chuan, "Ka duh bik lo, nawhalh te i phun duah bawk si", ka han tih chuan ka nu chuan, "Cake in duh em ni? Zan a zai turin va order ula, in ṭhianteho in sawm ang a i birthday chu in lawm dawn nia", min ti a, Laltetea lo phur fal lutuk, "I ṭhiante chuan kekawrte rawng hran ṭheuh present che se a ṭha ang, i kekawrte ho hi a inang deuh fur mai, a ṭial nasa thei si", ben tum chuan ka um kual chiam a, ka nu chuan, "In tlai dawn a nia, chaw ei phawt rawh u, cake pawh chu in va order nghal dawn nia", Laltetea chuan, "Vawiin chu hmeichheho zingah hmunphiah nen ka lam dawn chu a nia, merry.com vang vek, ka ṭhiante'n min nuih hrep dawn nih hi", ka nu nen chuan kan nuih a lo za khawp mai a, kan lam dan tur velte chu ka nu hrilh pah chuan a han lam ang lawp lawp a, ka birthday ni a ka hlim ni ber a ni hial ang, kum dangah chuan ka pa leh ka u te ka ngaih vangin a rukin ka ṭap ṭhin kha a nia, mahse hei kum-in chu Laltetea vang hian ka hlim tak zet a ni.

Episode 9

Sikul lam pan pah chuan cake chu kan order a, sikul kan thleng ṭep tihah chuan Reuben-a kan tawk a, Reuben-a chuan, "Happy birthday, hei i tan", tiin rose par bawr ṭha deuh mai hi min pe a, "Ka lawm e", tiin ka la ve mai bawk a, Laltetea zui ka tum a, mahse Reuben-a chuan, "Vawiin chu ka bulah awm ve tawh rawh, in lam dawnah kan kal ve mai dawn alawm", a ti a, Laltetea lam ka hawi a, ka zawh hma hauhin, "Aw, a pawi hleinem, mahse leng hla lo ula, miss-in a zawng palh ang che", min tih chuan ka thawveng hawk, a chhan chu a hma khan a mil vak ngai si lo va.

Reuben-a nen chuan a hmaa kan thing phun bulah khan kan ṭhu dun a, kan thing phun chu a ṭhan dan vel kan teh a, chuti teh vak chuan a ṭhan belh lo, mahse, a nung tih hriat ngawt pawh chuan min ti hlim a ni. Ben-a'n min kuah lai chu miss Chhuani chuan min hmu fuh chiang kher mai, Reuben-a nen chuan kan lai dun kher mai, mahse miss chu a lo fel hlauh a, eng tin mah min hau lo, hall-ah lut tawh r'u min ti ringawt a, keini pawh chuan hnial lo chuan kan zui ve nghal a. Hall kan thleng deuh chiah tihah chuan miss chuan, "Inthlak r'u, he mi zawh hian in hun a thleng tawh a nia", hmanhmawh takin kan insiam zung zung hlawm a.

Stage-ah kan han lawn, mak an ti hlawm khawp mai, ka mizia leh awm dan vel an hre fur hlawm si a, lam tur meuha stage ka rap ve chu mak an ti pawh chu a awm ve tho, ka keimah lo em a ni. Music a rik hma chuan kan ding khawng tawp a, music a rawn ri chiah chu kan hmunphiah ken ṭheuh chu guitar-ah hmangin kan han perh der a, Joice leh Eli te an lo uar fal, Kimkimi pawh a lo zei khawp mai, thawm kan nei ṭha kher mai. Zah tawh nak a laiin min la request leh ta deuh deuh a, Reuben-a chuan video-in a lo la char char a, confi chu a har ang reng, kan zingah chuan ka zei lo ber a, mahse, lawm ka hlawh ber niin ka hria, stage-a pangpar leh pawisa min lo pe an tam khawp mai. Kan principal pawh stage-ah lo chhoin cheng 500 min lo pe ve hial a, a nuam ve phian, kum danga ka nun dan kha kan teacher-te khan a rukin min lo chik reng ṭhin ni awm tak a ni, ṭhian ka kawm ve phah nan tiin miss Muanpuii khan a nawrin min nawr lui kha a ni a, ka inchhir lem lo.

Boruak a nuam phian, mahse an bengchheng lutuk chu ka zo lo a ni ber mai, ka lu a hai deuh reuh, Kimkimi leh ka ṭhian dangte chuan ka birthday lawm dan tur vel chu an sawi khawm hlawm a, an bialpa-te ṭheuh lo hruai an tum hlawm a, Laltetea paw'n bialnu thar a lo nei a, chu chu a ai upa daih a ni. Mahse, a bialnu zawk chuan a duh em a, a zar hneh em a tin ni. Zovi chuan kan ṭhian ho kan kim lai chuan, "Merry, Ben-a nen in in-kiss tawh em?", a rawn ti thut a, "Aih", tia ka han chhang chu an awih lo viau, "In-kiss lai chuan mit chhin tur a nia", i lo hre leh lo palh a nge", tiin Joice chuan thu min han rawn ve bawk a. Laltetea'n min kiss lai kha chuan mit ka chhin awm pawh ka hre si lo va, ti nge mit chu chhin kher a ngaih le tiin ka ngaihtuah a.

Zan dar 7 vel a ni tawh ang tihah chuan ka ṭhiante an lo thleng kim tawh a, Laltetea bialnu pawh a lo kal ve bawk a, no mawi deuh mai hi min present nghe nghe a. Laltetea erawh chuan engmah min la present lo, ka ṭhian dangte pawh chuan eng eng emaw present an lo keng fur hlawm a, ka inthlahrung lek lek zawk. Reuben-a'n min lo phone a, "Min lo hmuak rawh", a rawn ti a, keimahin ka va hmuak a, Naute lem lianpui mai hi a rawn keng a, "Hei hi keimah angin i ngai dawn nia", tiin min pe a, ka lawm khawp mai, a thil min pek vang pawh ni em em lo chuan min ngaihsak dan vel chu nuam ka ti. Reuben-a chuan a kut vei lamin ka kawng a dawm a, a kut ding lamin ka hmai a khawih a, min kiss thut, ka thin phu a rang kher mai, Laltetea'n min kiss ai khan a chiang zawk leh nghal a, zam tak hi ka ni ringawt. Reuben-a chuan, "Min chhang let ve la", tiin min kiss leh a, ka chhang let chuang lo, a mit a men leh men loh ka en a, a lo meng thut a, ka nuih chu a lo za daih, ka nui thut chu mak tiin a chhan min zawt a, kei chuan ka ṭhiante thil sawi kha ka hrilh a, a nuih a za ve kher mai, Ben-a chuan, "Kan duh tak te ka fawh hi chuan a dan hi a dang a, kan feel a nih hi chuan mit kan chhing tlangpui", a ti a, ka fiah uarh mai, kan han inmelh leh ṭhin kan innuih leh vur vur ṭhin, kan inpawh sawt hian ka hria, a bulah chuan ka thla a muang ṭan hle ni hian ka hria a, amah chauh chu ngaihtuah zel pawh ka tum a ni.

Kum danga ka birthday ka lo hman ṭhin dan ngaihtuah chuan tun ṭum ka birthday hi chu nuam tih piah lam hi a ni ringawt. Ka ṭhiante an awm a, ka bialpa leh ka ṭhian ṭha ber ka kiangah an awm bawk a, ka nu chuan cake a lo la chhuak a, cake ka zai hma chuan an han zâi te te phawt a, Laltetea chuan lo uar fal in, "Happy birthday mi â.com a han ti kher a, ka nu'n a hnungzangah a beng ri chhawrh a, kan nuih vur vur a, cake ka zai a, ka nu ka barh hmasa ber, a dawtah tu nge ka barh ang, ka ṭhianpa Laltetea nge ka bialpa Reuben-a zawk chu tiin ka buai hman ṭep a, Tetea lam ka hawi a, Laltetea chuan, "I bialpa kha barh rawh, a titau palh ang", a lo ti vat a, ka thaw huai mai, Cake leh thei tui kan hmeh a, thil kan ei zawh hnu chuan games kan khel a, bottle hi kan ti vir a, a kawh fuh te apiangin thu dik nge thil tih an thlang thei a, ka hun a thleng khat khawp mai. Laltetea a kawk fuh a, Kimkimi'n a hmeichhe duh zawng a zawt a, Laltetea chuan, "Kei chu zei deuh ka duh, fing deuh ni se, che khir thei deuh chu ka duh lo hrim hrim, chuan ṭahbelh deuh ka duh lo bawk", a sawi zawh chuan Zovi chuan, "Chu, i duh loh zawng chu Merry nihna chiah chiah a nih chu", Laltetea chuan rang zet hian, "Ni chiah e, ka duh loh zawng zawng hi amahah hian a kim", Reuben-a chuan, "duh mah la i chang lo alawm hei", tiin ka thlavang a lo hauh vat a, bottle chu kan han ti vir leh a, Reuben-a zawn a thleng ve leh a, Laltetea chuan, "Merry hi i duh a, eng vang nge?", Reuben-a chu a nui sak a, "Ka duh chhan maw, a hmel hi chu sawi loha chiang sa a nia, chu ai mah chuan a nungchang hi ka duh a, a ṭawng tlem a, a ngaihtuahna leh a rilru a no em em bawk a, hei hi a duhawmna pakhat a ni bawk a, chuan thiam thil a ngah bawk si, ṭha zawng zawng hi a mahah a kim vek", Reuben-a chuan a sawi zawh chuan min kuah ngei bawk a.

Ka hun a thleng ve ta, Reuben-a'n min zawh a tum chu ka hlauthawng ang reng, thu dik aiin thil tih chu ka thlang tawp a, Zovi chuan, "Reuben-a biangah i fawp thei", a han ti ringawt a, hnial bik a theih si loh, nui vur vur chung chuan Ben-a biang chu ka hmui chuan sik ka va tum a, mahse Ben-a chuan a hmui a lo dawh daih a, kan ṭhiante chuan kut an lo beng dur dur a, ka nu awm ve se ka ngam miah lo ang mawle, a muhil tawha ka vannei. Kan ṭhiante an haw hnu chuan Laltetea chuan ṭhi hi a rawn phawrh a, "Hei hi i birthday ni-ah ka present ang che tiin a hma khan ka lo lei a, i duh ṭhin khan ka hria a, awrh rawh aw", tiin min awrhtir nghal a, chu ṭhi chu a hmain dawrah ka hmu tawh a, to deuh mai hi a nia, ka nu present atan ka lei ang pawisa ka inkhawl ngah hunah ka ti kha a nia, hei Laltetea hian min present hlawl chu a nia, diktak chuan Laltetea thil pek chu ka ngaihlu vek, eng anga man tlawm pawh ni se.

Ka lawm e, tih ṭawngkam ka hman hian a thinrim fo ṭhin, mahse lawmthu hrilh loh chu ka inthiam si lo, "Ka lawm e", nui vur vur chung chuan ka han ti a, ka chalah min pen chawrh a, "Ṭhiante bulah ka lawm e an ti zawt zawt ngai lo, lawmthu min hrilh tawh suh", ka lu ka bu nghat a, a ni pawh chuan an in lam a pan ve ta nghal a.

Nizan lam kan men rei vang emaw ni, thawh ka hai der mai, Laltetea'n sikul kal turin min lo sawm a, ka inphih fai a, kan kal nghal, vawin chu nimin lama teachers' day kan hmanna vel thenfai chauh tih tur a awm a, class pangngai kan la dawn lo bawk a tiin makeup tlem ka hmang ve a, Laltetea ngaihdan a ni lo, kawng tluanin min hau char char, mahse ka hre lo der tlat a, ka mit ka chei lo va, ka hmui lah a sen ka hnawih lo bawk a, zirlai tan a mawi tawk chauhin ka inchei a, han tim phahna tur ka nei lo ve, tiin Laltetea thu sawi chu ka benkhawn duh lo tlat a. Kimkimi ka hmuh ve leh Laltetea chu ka kalsan nghal a, kan ṭhianhoa kan ti ti nak nak lai chuan Sir Rpa hian office-a kal turin min ti a, ka va kal nghal a, ka thlen chuan Sir Rpa leh Principal te an lo awm a, Essay writing competition-ah tel turin min ti a, ka aw nghal a, a thupuiah "Zirtirna dik" tih a ni a, ka phur rualin exam kan hnaih tawh bawk si nen tlem chuan ka tim bawk, mahse higher hnuai lam a ni tho bawk a, pakhatna aṭang pathumna chu ka ni hrim hrim ang tiin ka rilru ka siam a. Eng competition-ah mah hian nihna hauh loh chu tlawmah ka la a, ka duh ngai hauh lo.

Competition atan ka inbuatsaih ṭan ngar ngar a, ka pa bula ka thutiam pawh ka theihnghilh lo, pakhatna nih ka tum ruh hle, kan exam turah chuan ka hlauthawng lem lo. Zanah ka ngaihtuah a, competition atana topic min pek hmang chuan eng tin nge essay ka ziah ang tiin. Kan inkawt velah chuan ka tei harh a, Laltetea chuan a room tukverh aṭang min lo hmu ni awm tak a ni, a lo chhuak a, "Kan Mer bawihi chu ti nge i va inngaihtuah muk awm ve kha, i bialpa i ngai em ni?", kei chuan, "Chu lam a ni lo, essay competition-a tel turin kan teacher-te'n min ti si a, a topic-ah "Zirtirna dik" a nia, eng tin nge ka ziah ṭan ang a, eng tin nge a tawp ka khar ang tih ka lo ngaihtuah a", Laltetea chu a ngawi vung vung a, ka darah a kut rawn dahin ka mit-ah tak min en a, "Merry chu'ngte zawng i theih zawng tak tur a lawm, in chhungkaw nun en la, mi dang chhungkua ngaihtuah bawk la, ka sawi tum i man thiam ang tiraw?", ka han ngaihtuah chiang a, Laltetea thu sawi chu a dik ka ti, kan chhungkua aṭang ringawt pawh hian ziah tham a lo awm reng si a.

"Tete, ka lawm lutuk aw, ka tan thil tih i rawn ti awlsam ta hle mai", tiin ka room lamah ka lut thuai a, ka dawhkana lekhapuan awmah chuan essay chu ka ziak ṭan ta a, ka ziak tui deuh a ni mahna zan 1 a lo ri der mai, ka ziak zo chu ka han chhiar nawn leh vel a, a ṭha ve viau chuan ka hria a, mi dangin ṭha an ti dawn nge dawn lo hre lo mah ila, ka nun aṭanga ka ziah a nih vang pawh a ni mahna mahni thu ziak chu ka ngai hlu hle a, ka chhiar nawn sek paw'n ṭha ka tiin thil dik tak a niin ka hria a, chhungkaw tin tan puitu a nih ka beisei a, ka beiseina erawh a thlawn mai an nih ka hlau ru leh lawi si a.

Episode 10

Sikul ka thlen ve leh Sir Rpa bula kalin ka essay ziah chu ka va theh lut a, kan class lam ka pan nghal. Kan mizo teacher a dam loh vangin a aiah Miss Lily a lo lut a, Miss Lily chuan paper hi a lo sem a, "Tah khan in duh thu sam han ziak teh u", a tih avang chuan a lekha min lo pekah chuan ka duh thu sam chu ka han ziak ve a.

Ka duh thu sam ve hi zawng mi dang tan chuan thil ho lam tak a ni maithei, mahse ka tan chuan engkim ani si, ka duh thu sam chu maw, "Chhungkaw hlim tak a ni, ka nu leh pa te hi innei leh thei se la, ka u te nen hmun khatah awm ve vek thei ila", tiin ka duh thu sam chu lehkha miss-in min pek ah chuan ka han ziak a. Kan hnung lawka ṭhu duh thu sam chu hei hi a ni, a duh a piang pe theitu Pheichham man theih a duh a ni. A duh thu sam chu ka han ngaihtuah chiang a, chutiang thil kan duh apiang kan neih phahna tur thil chu he khawvelah hian awm ve lo se tiin ka ngaihtuah a, a chhan chu mihring hian keimah ni pawh kan la inhriat theih loh mizia hi kan nei a, chu chu duh leh awh apiang kan nei thei a nih ngat chuan, tuna kan mizia kha chu kan put ka ring tawh lo a ni. Chapona tlem te kan nei phawt ang a, hun a liam zel ang a, kan lo nun ṭhin dante leh kan lo chawrchhuah dante kan theihnghilh mai lo'ng maw tiin ka han ngaihtuah zui vel a.

Mi mit hmuhah chuan chhungkaw ṭha tak aṭanga lo chawr chhuak niin min ngai a, duh apiang nei thei tur hmuh hian min hmu bawk a, keimah nih an chak ṭhin, mahse an hrelo a ni, he ka nun dan hrehawm leh natna ka tawrhte hi min hriatpui si lo. Ka thawmhnaw man tamte hian ka thinlung na an khuh zo emaw tih a awl viau, mahse, mi hmuh loh hian ka ṭap ru ve fo ṭhin. Naupang te ka nih laiin ka nu leh pa te an inṭhen a, Ka pa leh ka u te nen kan kar a hla em em a, kum khatah vawi hnih emaw chauh kan inhmu thin. Ka pa bula ka awmin ka nu ka ngai a, ka nu bula ka awm lahin ka pa ka ngai leh bawk si. Nu leh Pa-ah duh ka thlan a ngai a, harsa ka ti. Ka tet laia ka thil suangtuah ṭhin chu maw, mi fate anga chhungkaw hlim tak neih ve a, khawlai kan len chhuah changte paw'n ka nu leh ka pa kut vuan kawp thei ila, Sikul-ah pawh pa-te kal tur an tihin ka nu emaw kan awmpui nula tu emawin min zui lo hian ka pa ngeiin min telpui ve se ka ti ṭhin asin. Mihring hian harsatna chi hrang ṭheuh kan nei a, kei ka harsatna chu chhungkua tih ṭawngkam hi a ni, ka ṭhiannu Kimkimi te in-a ka kal chang apianga ka thil hriat chhuah chu, kan chhungkua pawh tiang hian awm ve thei ila engtiang khawpin nge ka hlim ang ni. Ka pa ka ngaih vangin a ruka ka ṭah a ngai tawh lo ang a tiin ka ngaihtuahna a kal thui ang reng hle a.

Miss chuan duh thu sam ho zual te chu an hming a lam chhuak a, an duh thu samte chu kan vaia hriat theih turin a chhiar a, Puipuii bialpa Mahlutea(Go home-a) chuan ti hian a ziak a, "Lehkha zir ngai lo hian pass zel thei ila", tiin, a bul lawka ṭhu lah chuan, hmalam hun hriat lawk theihna power neih a chak thu a ziak mauh mai bawk a.

Hmalam hun hre thei lo ni ta ila chuan ka hma lam hun hi ka ti chhe mai lo ang maw tiin ka han ngaihtuah leh ta a. Entir nan, class 8 ka nih lai khan class class 10 ka pass dawn tih lo hre lawk ni ta ila, class 8 leh 9 ka zir chhung khan inthlahdah takin hun ka hmang mai lo ang maw, ka pass dawn tho alawm tiin kawng sual ka zawh palh thei a ni.

Class kan bân hnu chuan kan ṭhiannu Remi te in-ah kan ṭhian hovin kan lêng kàwi a, an in-ah chuan kan neih aia ṭha thil pakhat pawh awm lo mah se chhûngkaw awh awm ber an ni hial ang. A nu leh pa te an inbiak dân ka hmuh khan ka nu leh pa te tiang hian awm ve se ka ti ngei mai. An chhûngkua chu an inpawh tlâng êm êm a, ka awh ṭhin chhûngkua ang kha an in-ah chuan ka hmu a ni. Eng tik ni-ah emaw chuan tiang ang chhûngkua hi kan la nih ve ngei ka ring a, ka ṭawngṭai ve chhun paw'n Pathian hnênah chhûngkua chauh ka dîl ṭhîn. Dîlna tihlawhtling ṭhîntu Pathian a nih angin, ka dîlna chu eng tik ni-ah emaw chuan min chhânsak ka beisei ṭhîn. Mahse, a rei ka ti, ni tin ka pa leh ka u te ngaiin hun ka hmang a, anni paw'n min ngai lo bîk si lo.

Kan in ka thlen ve leh ka nu mal chungah ka va mu tawp a. Ka nu chuan, "I va'n chau âwm ve, i ril te a ṭâm em? I bag duh deuh ang chi kha ka rawn leisak che a nia, i room-ah ka dah a, va en chhin teh," min ti a. Ṭawng pawh ka ṭawng thei lo, ka nu hian rual ka awh hlauvin theih tâwp chhuahin ka tân hna a thawk a. Dâwr nghah hi thil awlsam a ni lo, ka puih ngai lova chaw ei hman lêk lova a thawh châng lah a tam. Ka mamawh leh ka duh zâwng min pêk theih nân a theih tâwp chhuahin hlawhtling viau mah se, he ka nun khawhar ka thinlunga ka pa ka ngaihna hi chu a ti reh thei si lo. Ka pa ka ngaih châng te pawh hian a thinrim ka hlauh avângin eng mah ka sawi ngai lo. A rûka ka ṭah loh leh Laltetea bulah ka sawi chhuak ṭhîn.

Ka nu mal chunga ka mut hle hle lai chuan Laltetea hi a lo lût a, "Merry, min lo pui lawk teh, ka room tukverh saw a kalhna a chhe daih a, a dârthlalang a keh tawh tho sia siam ṭhat ka duh a, min lo pui lawk rawh," a rawn ti a. Peih lo chung chung chuan ka zui a. A room kan thleng chu perek leh dârthlalang keh nâwi hlîr hi a lo awm a, a tukverh chu a maha chhia ni lovin Laltetea lo tih chhiat lek chu lo niin, a nu te lo haw hmaa siam ṭhat a lo tum chu niin. Hmanhmawh tih hriat zet hian dârthlalang keh nâwi ho chu a han phiat fai a, a tukverh tih chhiat siam tum chuan kan buai dûn hle a. A room pâwn lam aṭang chuan perek khen a ngai a, a dinna a rem lo nên fimkhur tûrin ka ti nawn sek a. A fimkhur ve viau emaw ka tih laiin a che sual palh ta hlauh mai! In hnuai lam motor dahna hmunah tla-in a bek vêl a insawh na hle a, hmanhmawh zet chuan in hnuai lam ka pan thla ve nghâl a. Ka nu-in Laltetea tla thâwm a lo hre ve ni ngei tûr a ni, ka va thlen chuan ka nu chuan Laltetea bek thi hnuang chu puanin a thisen chhuak tûr a lo hup bet a.

Ka hamhaih lutuk chu tih tûr ber pawh hre lo chuan ka ding khawng tawp a. Ka nu chuan, "Damdawi in pan vat a ngai, motor va ko rawh," min ti a. Driver a lo awm mai si lo, Taxi ka ko tawp a, damdawi in lam chu kan pan nghâl a. Damdawi in kan thlen meuh chuan Laltetea chuan thisen a hlauh hnem tawh ang reng hle a, ka nu chuan a chhûngte pawh phone nghâlin thil awmzia a hrilh vat a. Doctor ten thisen a mamawh tâwk tûr ang vêl an pêk hnu chuan tlêm chuan a zia deuh a, hlauhthâwnawm ni lo mah se kan mangang tlâng rih hle. Laltetea nu leh kei chu awm dân tûr pawh kan thiam lo, kan ding thûl kan ṭhu thûl, a châng leh kan tei kual a. Ka nu chuan a thawmhnaw hâk thlâk leh puan sin tûr vêl la tûr chuan min hawtîr a. An in ka thlen chuan Laltetea tlâkna hmun chu ka en leh ṭhîn, a nat dân tûr ka ngaihtuah ngam lo zâwk, a inhliam chhanah ka inpuh lo thei lo. 'Kha tih lai khan ka awm ve reng a, Laltetea kha lo dang tûr ka ni asin le,' tiin mahni ka indem a; mahse, ka siam ṭhat theih thil a ni tawh si lo.

Damdawi in lama an mamawh tûr ni-a ka hriat zawng zawng chu ka keng vek a, damdawi in ka thlen chuan Laltetea chu a lo zia deuh tawh a. A pa a awm si lo va, kan nufa chuan a ṭûl ṭûl chu kan han buaipui ang lâwp lâwp a, a nu lah a la hlauthâwng ang reng. A tlâkna ngaihtuah chuan a vânnei, rin aiin a inhliam nasa lo zâwk a.

Zân dâr 8:00 vêlah a lo harh a, chaw ei luihtîr hrâm kan tum nâ-a chu a ei lui thei tlat lo. Laltetea chuan a nu chu haw tûrin a ti a, "Merry hian min riahpui mai rawh se," a ti deuh tlat bawk si a. A nu chuan, "Lo riahpui mai rawh aw," tiin ka nu nên in lam an pan nghâl a. Laltetea damlo chu a inla-pangchang thiam kher mai! Min tîr zawt zawt a, ka ke hi a nâ a tih loh leh, ka kut hi a nâ a ti deuh chhên a. Ka hmehsak apiang chuan a rûkin a nui leh ṭhîn, i ti der ka tih lahin a ai na âwm ang hian a awm leh zêl bawk si. A dam hunah ka kuk hrep ang ka ti rilru neuh neuh a. Zân dâr 11:00 vêl a ri tawh tihah chuan current a thim a, chutah mi dang ho zawng an muhil vek a. Laltetea pawh a chhîng díar dìar a, ka hlauh châng a pianga ka va koh loh leh a kut ka va vuan leh ṭhîn.

A chau deuh ni ngei tûr a ni, a muhil dêr mai. Kei lah muthilh chu khawi lam, ka hawi kual leh vung vung ṭhîn a, ka hlau ru ang reng hle. Laltetea mutna bul khum ruakah ka mu kha a ni a, Laltetea khumah ka va insawn. "Tete, muhil nghâl rawh aw," ka zahzêlah ka han ti daih a. Laltete chuan, "Min ti harh zâwk," tiin a mit a han chhîng leh nghâl a. Ka zun a chhuak bawk si, bathroom-ah keimahin ka kal ngam si lo, Laltetea tih harh lah ka hreh si. Ka insûm thei tawh lo chu bati ka chhi a, bathroom lam ka pan a. Bathroom thlen dâwnah chuan dârthlalang hi a lo awm a, ka han inen phawt a. Chutah thil hriat chhuah ka nei nghâl, ka ṭhian ten zan laia dârthlalanga inenin kan pasal tûr hmêl emaw ramhuai hmêl a lo lang ṭhîn an tih kha ka hre chhuak thut a, rang zet hian ka tlân lût leh nghâl a. Laltetea ka va sâwi nawk nawk a, "Te-a, harh teh, ka zun a chhuak lutuk ka insûm thei tawh lo, min lo zui teh, ka hlau," ka han ti tawp a. Laltetea chuan, "Damlo awmpui si hi nangmah zâwk hi vil i ngai a, kal rawh," tiin thei leh thei lo hian min zui a, bathroom pâwnah a lo ding a. Min kalsan nge san lo hriat nân ka ko deuh sék a, ka zun zawh chuan rang zet hian in chhûng lamah ka luhsan a. Laltetea chuan, "Min riahpui ta kher kher chu aw, i dâwih si engtin nge kan muthilh theih ang!" a ti a. "A rûk tak chuan ka inthlahrung ve lutuk, tûn bâk ka ti buai tawh lo vang che," tiin a khum bul khum ruakah chuan ka mu a. Ka muhil thei chuang lo, ka let ka let a. Laltetea chuan, "Ka mut pawh a chhuak tawh lo, ka khumah hian lo ṭhu rawh, tîtî mai mai zâwk ang," min ti a. Doctor an lo kal palh hlau deuh mah ila mahni-in ka mu ngam si lo, ka va ṭhu phei a. Laltetea chuan, "Mipa chauhin min riahpui thei ang kha an ti si a, engtin nge Doctor te in dîl theih?" min han ti a. Kei chuan, "I nu khan 'mipa riahpuitu tûr kan awm si lo va, a nau hian riahpui mai rawh se,' a ti a nih kha," ka ti a. Ka sawi zawh rual chuan a nui vur vur a, "Unau maw kan nih!" Ka nuih za ve tho mah se, ka nui duh lêm lo. Eng eng emaw hi a sawi a, kei ka mut a lo chhuak tawh ni ngei tûr a ni, ka lo muthilh lai rêng ka hre lo.

Rin ai takin ka mut a tui a, ka mit ka men rual chuan Laltetea'n min lo en reng tih ka hmu nghâl a. "I va'n mu tui, i ril a ṭâm em?" min ti a. Mut kham lo zet hian, "Ummh... ṭâm lo, ka mut a la chhuak," tiin Laltetea chu ka kuah a. Ani pawh chuan, "A la hma alâwm, mu rawh. Doctor chu dâr 9:00 vêlah bâk a rawn lût lo vang," a ti a, ṭawng lêm lo chuan ka mit ka chhîng leh nghâl a. Dâr 7:00 vêl a ni ang tihah chuan Laltetea nu hian min kai tho va, "Damlo awmpui ve si, tho rawh! Khaw nge Te-a hi? Dam ṭha zâwk hi i lo mu tui êm êm a, a damlo zâwk lah hmuh tûr a awm si lo." Ka han hawi kual a, Laltetea chu ka hmu mai lo, "A lêng a ni ang," ka han ti ringawt a. Laltetea nu chuan ka dârah min bêng fawk a, "Khaw nge a lên ang a, eng nge i lo tih rêng rêng? Dam lo awmpui ve si, i awmpui damlo awmna pawh i hre lo a nia!" Chutih lai chuan Laltetea chu thingpui leh chhang kengin a lo lût a, rang zet hian a nu chuan, "Ti nge i lo lâk duh, hei ka rawn ken reng che u alâwm, i ril a ṭâm te a nih chuan Merry hi tih harh mai tûr alâwm," a lo ti a. Laltetea chuan, "Nu, ka ril chu a ṭâm lêm lo, hei thingpui vêl hi chu Merry tân lâwm ka va lâk, a harh rualin a ril a ṭâm âwm si a, ka ti a." A nu nuih za bawk si, thinrim deuh reuh si, "Kan Merry hi chu a ngaihna a awm lo a ni. Kha... thingpui chu in r'u, i in zawhah va haw la, chaw min lo pe rawh aw. Vawiin chu school kal lo mai rawh," min ti a. School kal loh chu a pawi ka ti hran lo; mahse, zâninah Essay Competition ka telna kha a result an puang dâwn a, ka tel ve ngei chu a ngai dâwn si a. Laltetea nu sawi ang chuan ka haw hmasa phawt a, ka inbual fai zawh chuan ka nu chuan chaw ei a lo peih fel diam tawh a. Ka nu chuan, "I hman hunah lo ei mai rawh aw, dâwr bungrua a rawn thleng dâwn si a, vawiin chu ka buai nilêng ang. Laltetea pawh chu ka va tlawh hman kher lo ang, hei a nu nên chaw i va kensak dâwn a nia," tiin dâwr lamah min kalsan nghâl a.

Episode 11

School ka châwl ta sâ sâ chu tiin Laltetea awmpuiin nilêng hun ka hmang a. Reuben-a pawh ka hmu lo, Kimkimi ka tlawh zuai a, a chhan chu zanina Writing Competition ka telna result an puan tûrah ka tlin ve ngei ka beisei ve deuh nên, min zuitu awm lova kal tawp chu ka hreh deuh avângin Kimkimi ka sâwm a ni. Mahse, a nu te'n zâna hetiang puipunna hmuna kal hi an phal lo va; min zui duh hle mah se a rem ngang si lo. Laltetea lah a dam si lo. Reuben-a lahin min rawn be si lo va, be hmasatu zâwk nih ka duh bik si lo. Ka beidawn tâwpah ka nu ka sâwm tawp a, ka nu lahin dâwr bungrua lo thlengin a tih buai êm avângin min zui thei dâwn si lo. Ka pa emaw ka u te emaw chu awm se heti tak hian ka mal lo tûr tiin ka inkhawngaih rilru hle a; mahse, kal loh phah nâna hman erawh ka tum chuang lo. Ka kal ngei ngei ang, lâwmman la lo chuan ka haw bîk lo ang tiin mahni ka inhnêm chawp a.

Zân dâr 7:00 vêl a ni tawh ang tihah chuan Hall chu ka va thleng a. Miss Muanpuii leh Sir Johny-a te chuan min hmuh ve leh chuan min lo chhâwn vat a, ka ṭhutna hmun tûr te min kawh hmuh bâkah lâwmman la zînga ka tel ve thu te min hrilh a; mahse, eng zahna nge ka nih erawh min hrilh tel lo. An sawi loh dânah an hre chiang bîk lo a ni ang tiin zawh buai ka tum hran lo.

Kan zirtîrtute kha chuan Writing Competition an ti ringawt si a, a hmuna ka hriat chhuah chu Open Writing Competition zâwk a lo ni a, Higher hnuai lam chauh emaw ka tih kha a duh apiang tel theihna zâwk a lo ni a, ka hlauthâwng ru ang reng viau va. Ka ṭhutpuipa pawh a lo tel ve a, ani hi B.A zirlai a ni a, M.A zirlai ho pawh an tel thu min han hrilh leh ta zêl a, ka zâm ru ang reng hle. Anni ang mi inzir sáng ho zîngah chuan keia thiamna ve chu nêp tak hi a ni ringawt si a. Result puan hun a lo ni ta reng mai! Ka zâm kher mai, ka bulah Laltetea awm se ka ti ngei mai, emaw ka pa talin min kalpui thei se ka thla a muang sawt tûr. 'Pathumna kan puang hmasa ber ang,' an rawn ti ta a. Ka bula ṭhu B.A zirlai chu pathumna a ni a, ani B.A zirlai mah pathumna a nih chuan kei zawng eng ka ni pha dâwn lo a nih hi tiin ka lo hnual ru hle a. Mahse, pahnihna an han puang chu ka hming a lo ni reng mai! Ka hming ang an tel ve a ni ang tiin ka kal lawk lo va; mahse, Miss Muanpuii'n lo hawi phei chuan kal tûr chuan min lo mitmei vat a. Ka thinphu ri kha Hall-a awm zawng zawng khan an hre thei hial ang tih tûr khawp hian ka lungphu hi a rang a, a phu dut dut mai a ni. Stage-a lâwmman ka lâk lai chuan mipui thâwm a ṭha hle a, kan school ho pawh an lo awm nual hlawm a, ka hmel hriat ten ka tân uar zet hian kut an lo bêng a, min lawmpui tak zet tih ka hre thei. Hlim viau tûr ka nih tehrêng nên, ka lung a chhe tlat! Ka nu leh pa ten min telpui thei chu ni se min chhuang ve ngawtin ka ring asin. Mipui tam tak kârah chuan ka mal bîk ni hian ka inhria a, tu mah hian ka rilru put hmang leh he ka thinlunga hmun ruak awm hi min hriatthiampui ka ring lo. Hlim viau tûr leh nun nuam tak hmang tûrah min ngai fo ṭhîn, mi ṭhenkhat phei chuan keimah nih an châk thu te min hrilh ṭhîn. An hrethiam lo a ni, he khawvêla a hlu ber leh hlimna dik chu chhûngkua hi a ni tih hi. Ka hlawhtlinin min lawmpui tûrin ka chhûngte ka kiangah awm thei se, ka lungngaih mangan niin min hnêm tûrin ka tân awm reng thei se, chu bâk thlâkhlelh ka nei hauh si lo. Mahse, chu nun hlimna dik tak chu ka ṭan a ni ve lo a ni ang, hlim ni pawh ka tân ṭahna mai a lo ni, ka hlimna min ṭâwmpui tûr ka nei si lo.

Lâwmman ka dawn chu a pawisa fài phei chuan a tam tham lo; mahse, thu ziak hlu tak dam chhûng daih tûr ka hlawh chhuak a, ka tân a hlut tluk hian mi dang min hlutpuitu awm se ka tân a nuam ve deuh tûr. Kan zirtîrtute chuan min lawmpuiin min hlutpuiin min han chhuang ve viau ṭhîn mah se, ka laichînte an ni lo va. Ka duh ber chu ka chhûngkua ti-a ka chhâl ten min hlutpuiin min ṭawiâwm ve se tih hi a ni a, tichuan, hlimna ni-ah te hian mal ngawih ngawih hian ka inhre bîk lo tûr.

In-ah haw nghâl pawh ni ila, ka nu dâwrah a la awm dâwn tho si a tiin mahni-a in ruaka hâw chu ka hreh deuh avâng chuan damdawi in-ah Laltetea hmuh tumin ka kal ta zâwk a. Duty hovin an phal loh paw'n ka dîl lui mai ang ka ti rilru tawp a. Mahse, damdawi in ka thlen hma deuh chuan Laltetea nu nên kan intâwk a,"Tui lum a zo tawh si a, ka va la lawk ang, lo awmpui rawh,"min ti a. Duty-ho hnênah ṭha takin min sawisak a, an lo phal ve mai bawk a. Laltetea chuan phone-ah hla a lo ngaithla mêk a, min hmuh chuan a earphone chu a beng aṭang chuan a la thla vat a, min rawn nuih sen sen a. "Eng zahna nge i nih? I lo kal pawh ka ring tawh lo va," min lo ti nghâl a. Chhân pawh chhâng lo chuan a khum bul ṭhutna-ah chuan ka ṭhu a, a mutna khumah chuan ka lu ka va nghat tawp a. Ka sama chul pah chuan, "A pawi hleinêm, lâwmman la kher lo mah la eng mah i chân chuang hleinêm. Inzirna zêl a ni mai, hnual phah rêng rêng suh, ka telpui thei lo che a, pawi ka ti lutuk," a ti a. Ka hawi chhuak a, "Laltete, tu-in nge lâwmman ka la lo ti, pahnihna ka ni reng alâwm, ka chau lutuka ka nui peih lo a nih kha," ka ti a. Ka sawi zawh rual chuan ka chalah min pen fawk a, "Mâwli, khatiang hmêl kha pu mah ta che, i bialpa-in ti khan hmu che se la chuan 'Hmêl BPL lutuk mai,' tiin a ṭhen daih ang che maw le," min ti a. "A lo nih hle chu!" tiin ka thawhsan a. "Khaw nge i kal dâwn? Thinrim kher lo la," a rawn ti thuai a. Ka va hawi lêt a, "Ka zung dâwn," ngeiawm zet hian ka lo ti vat a.

Ka zun hlân chuan Laltetea chuan ka Certificate dawn chu a lo thlêk kual vêl nasa chu niin, ka va luh ve leh chuan a bulah chuan ka va ṭhu ve nghâl a. "Open-ah leh nghâl pahnihna te i ni thei a nia! Ka chhuang lutuk che, i nu'n a hre ve tawh em?" a ti a. A sawi zawh rual chuan ka lu ka lo thing a, ka lu kuai herin a dâr min nghentîr a, "A buai ve si a, hrethiam rawh aw. Hei kei lah ka damlo ve bawk si a, doctor ten phal se chuan ka zui mai tûr che a nia; mahse, hei kut ruakin i lo haw lo va, kan ṭawiâwm thei ta lo che pawh tlêm chuan a zia deuh ang chu ti raw..." a ti a. Chhâng lêm lo chuan ka ngawi vung vung ringawt a. Ka pum a rawn ri thut, Laltetea ka en a, a lo hre ve ni ngei tûr a ni, a nui vur vur a,"I ril a ṭâm a nih kha, zanriah i ei leh lo em ni?" tiin min zâwt a. Kei chuan, "Ka ei em le, ka ei âwm pawh ka hre lo, ka buai lutuk a," ka ti ringawt a. Laltetea chuan, "I mumal lo lutuk," tia min hau char char chung chuan ei tûr a dahna-a mi chu min pe a. Ei châkna nei lo mah ila ka ril a ṭâm si a, tlêm ka ei a, ka puar nghal. A nu pawh a rawn thleng ve nghâl a. A nu chuan, "Mahni-a haw i ngam lo ang ka ti a, driver kha lo nghâk rih tûr che-in ka tih kha, i nu pawh a haw tawh a nia, heta i awm thu pawh ka hrilh kha. Va haw tawh rawh, naktûk chu sikul kal tawh rawh, hei Te-a paw'n ṭhat lam a pan tawh a, exam a hnai tawh si," min ti a. Mahni-a haw ai chuan, Laltetea hmu kham rih lo mah ila haw mai chu a ṭha zâwk ang tiin ka mangṭha hlawm a, driver rual chuan ka haw ve nghâl a.

Episode 12

In ka thlen chuan ka nu chuan, "Khawi maw, i Certificate dawn chu ka lo en chhin," a ti a. Min lawmpui viau ka lo rin ve nên, ka nu chuan, "Hetiang lam ai chuan i zirlaiah rilru pe zâwk la, i zirlaiah chauh rilru sâwr bing rawh, hei hian i examna-ah a pui kher lo ang che," ngaih sam zeta min han tih chuan ka thin a rim ru ang reng hle. Ka Certificate a ken lai chu ka chhuhsak hmak a, ka room-ah ka lût vat a, ka room kawngkhâr chu ring zet hian ka khâr a. Min hauh emaw min rawn thlêm emaw ka beisei a; mahse, min hâu lova min thlêm hek lo. A TV en laiah chuan a mit chu a tlei hle tih hriat zet hian thawhsan rêng rêng a tum lo. Korean-ho kha maw i en duh zâwk ka ti rilru char char a, minute 10 vêl a liam hnu pawh chuan min rawn ngaihven a tum chuang lo.

Ka thinrim insûm thei lo chu ka nu TV en tui laklawh lai chu ka va off tawp a, a hnung lam hruiho chu chemtê-in ka zai chhe bawk a. Ka nu chuan, "Current-in a man che ang asin! Ti nge TV khan i eng pawi nge a sawia i rawn tih chhiat?" min han ti a. Ṭap lawm lawm chung chuan, "Korean movie aiin ka pawimawh lo zâwk em ni?" ka han ti a. Ka nu chuan, "Heti khawp hian ka duat che a, ka duat sual zo tawh che a nih hi. I essay ziah kha a ṭha lo ka tihna pawh a ni lo; mahse, i zirna a pawimawh zâwk alâwm. Competition-a mi tûr i inpuahchah a, in exam tûrah i rilru pum i sêng thei tawh lo va, ṭha ka ti lo mai chauh alâwm, ka lawmpui loh vâng lam che a ni lo a nia," a ti a. Ṭha tê tê-a min han hrilh chuan, ka thinrim a zia sawt mai; mahse, ka ṭap laklawh tawh bawk si, TV hrui lah ka ti chhe bawk si, min hauh ka hlau leh hnuhnawh a. "A tîrah tikhan min hrilh lo a nih kha, TV i ti chhia tiin min hâu leh dâwn a nih kha," ṭap chung chuan ka han ti leh hrâm a. Ka nu chu a nuih a za bawk si, thinrim ve deuh tho si sawi tûr pawh a hre lo. "A ngaihna hi kan awm lo a nih hi, hauh hma hma hian in ṭap zo vek zêl a, ka hau tawh lo mai ang che, va mu tawh rawh," min ti a. Ka thil tih chhiatho chu ka nu chuan a rem mawlh mawlh a. Ka room lamah luhsanin ka mu tawp a, mit erawh ka chhîng lo. Thil ka ngaihtuah kual mai mai a, ka pa biak hlân ka nghâkhlel hle a, zân a tlai tawh sia tih buai ka hreh deuh avâng chuan naktûk lama biak mai ṭha zâwkin ka hria a. Hrilh hlân ka nghâkhlelin mutmu pawh ka tuah thei lo. Min lawmpui ve-in ka ring a, rawn zin vat a châk ka beisei ru ang reng hle. Naktûk thleng vat se aw ka ti vawng vawng mai a ni.

Zíng hma takah ka nu chuan min rawn kai tho va, "Hei Laltetea te damdawi in aṭangin an rawn chhuak tawh dâwn a nia, a room vêl va tih faisak rawh," min rawn ti a. Mut kham lo zet hian ka tho chhuak a, hmai pawh phih lêm lo chuan Laltetea room lam ka pan nghâl a. A room ka tih fai lai chuan a thingremah chuan kan pahniha kan thlalâk hi ka hmu ṭeuh a, pakhat tê tê chuan ka han en kual a. Kan inhmeh hle nih hi ka ti rilru hial a; mahse, a bul lawkah chuan lehkhathawn ni âwm tak hi ka hmu a, ka hawng chhin a. Chutah chuan he thu hi a lo inziak a.

"Sangte, ka hmuh che apiang hian ka duh che a ni tih hi hrilh che ka châk fo va; mahse, ka ngam si lo. Min hnâwl ta la ka tân a nat mai dâwn bâkah min hmuh apiangin min hêl i tum emaw a ni ang a, ka tân tuar a har dâwn êm a, hrilh rih loh che hi a ṭha zâwk niin ka hria a. Eng tik ni-ah emaw chuan he ka lehkhathawn hi i chhiar ve ngei ka beisei."

Ka chhiar zawh chuan eng emaw záwng tak chuan ka rilru a na tlat a ni. Laltetea chuan Sangtei a lo duh reng a nih hi, Laltete hnêna amah duhna rilru ka pu a ni tih ka hrilh lo kha a lo ṭha hle mai; ni lo sela chuan min duh loh bâkah kan inṭhian ṭhatnain a tuar ngei âwm si a. Ka rilru na deuh mah se hlim luih hrâm hrâm ka tum a, a room ka tih fai zawh chuan kan in lamah ka phei nghâl a. School kal tûrin ka inbuatsaih nghâl a. Ka hman ṭêp tihah chuan ka nu chuan min rawn ko vak vak a, ka han chhuak chu Reuben-a hian min lo nghâk reng chu lo niin.

Sikul lam pan chuan Reuben-a nên chuan kan kal dûn a. Reuben-a chuan, "Ka phone kha a bo daih a, thingtlang lama kan chhûng khat ve deuh kha he lai damdawi in-ah a thi si a, ka pa'n a ruang hi nangin va zui rawh min ti bawk nên, chanchin ka rawn hrilh thei lo che a, ka rawn biak loh vang che-in i lungawi lo em?" ka kut vuan chung chuan a han ti a. Kei chuan, "Lungawi lo lo ve , i reh hmak si a, mak ka lo ti deuh mai chauh alâwm," ka ti ve bawk a. Inthiam lo tih hriat zet hian, "Kan ṭha ti raw, titâu pawh ni la a pawi lo, ka theih tâwpin thlêm lungawi che ka tum tho ang," Reuben-a chuan a han ti leh hrâm a. A kut ka vuan nghet sauh va, chhâng lêt lêm lo chuan ka nuih ringawt a, ka thin a rim lo a ni ang, tiin. "I va han fel ṭhîn tak, Essay Competition-ah khan pahnihna i ni tih ka lo hria a, ka chhuang lutuk che, bialnu bawn êm êm mai ka nei che hi ka ṭhian ten min thîk thei lutuk," tiin min fak leh nghâl a. Kei chuan, "A va han ho tak, i ṭhiante chu an â a nih chu," ka han ti leh ringawt a.

Sikul kan thleng ṭêp tihah chuan Kimkimi kan tâwk a. Reuben-a chuan, "Ka kalsan phawt ang che u," tiin an class lamah min luhsan nghâl a. Kimkimi chuan Reuben-a nên min hmuh dun chu min chhaih zui nân a hmang leh ta chiam a. Class kan thlen hnu rei lo tê-ah chuan kan Class Master a lo lût a. Kan exam hun tûr vêl leh kan ṭhut dân tûr vêl a rawn puang a, Laltetea a exam theih loh ka hlau ngei mai.

Class kan bân hnu chuan ka haw nghâl a, a chhan chu Laltetea hmuh vat ka duh vâng a ni. Ka pa biak ka duh bawk a, hmanhmawh zet chuan in lam ka pan nghâl a, Reuben-a pawh ka nghâk lo. Laltetea te in ka thlen chuan Laltetea chu a room-ah amahin a lo awm a, min hmuh chuan a lâwm hle tih a hmêl aṭangin a hriat a. "I dam var tawh maw? Khaw nge i nu hi ka va'n hmu lo?" ka han ti a. Laltetea chuan, "Ka nu chu bazar-ah chawhmeh vêl a va lei a nih kha, hei ka dam tawh lutuk ringawt," nui sáng hian a ti a. Kei chuan kan exam hun tûr chu ka hrilh nghâl vat a. "Hun a awm tawh si lo va, tûn aṭangin zir nghâl rawh," tiin a chhuak tûra ka rin te chu ka kawh hmuh nghâl bawrh bawrh a. Hriat loh kârin tlai lam dâr 5:00 a lo ni dêr mai. Ka nu chuan chaw kan ei dâwn, lo haw rawh min rawn ti a. "Zânah kan zir dûn leh dâwn nia," tiin ka hawsan ta a.

Zân dâr 7:00 vêlah chuan Laltetea chu a rawn lêng a, ka room-ah lehkha kan zir dûn a. Kan rilru kan pe dûn bawk a, kan thiam chak kher mai. Kum tîr aṭangin kan inthlahdah ngai lo ve ve a, han chhiar leh thuak thuak chuan kan thiam sa a lo ni tawh bawk nên harsa kan ti lêm lo. Laltete chuan, "Merry, Reuben-a nên in la ṭha zêl em?" tiin min zâwt a. "Umm, kan la ṭha tluang zêl e, nang hi tûnlai bialnu i nei lo em ni? I nei tih ka hre ve chiah maw tih hian in lo inṭhen hman zêl a, tûnah tak hian i nei em?" tiin ka zâwt lêt ve nghâl a. Laltetea chu a han ngawi leh rih a, a inngaihtuah lawk ni ngei tûr a ni. "Bialnu chu ka nei chiah lo a; mahse, a rûka duh deuh chu ka nei a, ka bêm ngam lo va, min duh ka ring lo va," a ti a. Rei lo tê a ngawi leh a, kei pawh ka ngawi reng a, a rûka a duh chu Sangi kha a ni ngei ang ka lo ti rilru a. Laltete bawk chuan, "Merry, kei hi i ṭhian ni lo ta ila, min duh thei ang em? Ka ngainatawm loh em ni?" a han ti leh a. Kei chuan nui vur vur chung hian, "Ka duh lo ang che, i chimawm si, i lerh si, mi tih luih dân i thiam si," ka'n ti ringawt a. Hetiang hian ka ṭawngkamin ka duh lo che ti mah ila, ka thinlung khawi laiah emaw hi chuan ka lo duh ru êm êm si a ni.

Lehkha zira ka tlaivâr zin vâng nge ka rilru hah vâng zâwk, ka zawi ngawih ngawih a. Vawiin hi exam ṭan ni a lo ni bawk nên, ka pass dâwn tih hre sa mah ila ka pa lo zin loh ka hlauh êm avângin ka hlauthawng ru ang reng hle a. Exam Hall ka thlen chuan ka hlauhthâwnna chu a zia deuh, a chhan chu kei aia 'confi' lo an tam êm vâng a ni. English kan exam hmasa ber dâwn a, ka bula ṭhu Tebawihi chuan entawn tûr a lo pai ru chu niin, ani ai mahin keiin ka lo hlauthâwng zâwk a.

Question paper ka han bih chiang chu ka thiam mi vek a lo ni a, ka lâwm kher mai. Ka chhâng nghâl char char a, ka bula ṭhu chuan a lo en ru tih ka hriat avâng chuan a hmuh fiah deuh nân ka va tawlh hnai a, a lâwm kher mai. Mahse, question number 12 ka'n chhâng tûr chu ka hamhaih ta tlat mai, a tâwp thleng ka hre lo. Chhân vek ka duh bawk nên hreh tak chungin Kimkimi ka va ko ru ṭâng ṭâng a, ani'n min hrilh theih beisei ru chungin ka ko ve êm êm a, ani lah chuan a tîr 'The' tih tê chiah hi a lo hria a nih chu! Exam lai e ti lo chuan nuih pawh a za zâwk, ka insûm thei lo a rûkin ka nui ka nui ringawt a. Hei chu hun tâwp lama chhânah dah ang tiin zawhna dangah ka pakai a, ka bula ṭhu ka entîr deuh reng avâng chuan ka duh anga hmanhmawhin ka chhâng thei lo.

Ka thiam sa pawh chhâng zo hman lo chuan hun a tâwp ta reng mai, ka ui lutuk chu ka bula ṭhu chu ka mawhpuh deuh; mahse, ka huat phah vak chuang lo. Ka ngaihtuah zâwk tak chu pakhatna ka ni lo ang tih mawlh kha ka hlau a ni. Kan ṭhian hovah chuan ka chhâng ṭha ber a; mahse, rilru a nuam zân chuang lo. Laltetea chu a chhân dân ka hriat châk avângin ka zâwt a, ani pawh chu a zir dân ngaihtuah chuan a chhâng ṭha phian a, a lâwmawm khawp mai. Naktûk chu Mizo subject a ni a, kan huphurh lo tlâng hle; mahse, inthlahdah phah nâna hman ka tum chuang lo.

Episode 13

Laltetea nên kan inbiak mawlh mawlh lai chuan Sangi a rawn kal a, Laltetea chu thil eipui tûrin a rawn sâwm a. Laltetea chuan min sâwm ve nâ a, ka zui duh ta lo va, a rûk tak chuan ka thîk hle a; mahse, ka lantîr lo. Laltetea'n a duh ber a ngaihzâwn ka duhsak a, kei chu a ṭhian chauh ka ni a, he kan inṭhian ṭhatna hi ka rilru put hmang avânga tih chhiat ka duh lo a ni. Reuben-a bulah chuan a hma ai zawngin ka inhawng a, amah chauh chu ngaihtuah luih ka tum a ni.

Kan in thleng Reuben-a chuan min thlah a, exam lai kan nih avâng chuan rawn lên duh viau mah se, ka rilru lâk pên a hlauh vâng zâwkin haw nghâl a tum ta zâwk a. Ka hriat theih chinah Reuben-a hi mi fel tak min hrethiam êm êmtu a niin ka hria, ka tân pawh a ṭha berin ka hria a, a rilru ti na zâwnga awm phei chu ka ngaihtuah chhin ngai lo.

Laltetea pawh Sangi nên an inthlah fel hnu chuan an inah pawh lût lo chuan kan in a rawn pan nghâl a. Lehkha zir nghâl ang tiin ka Mizo textbook chu a la chhuak a, ka ṭawng ngaichâng hauh lo chuan a zir nghâl malh malh a. "Ka textbook i zir daih ten, engtin nge ka zir ve ang?" ka han tih pawh chuan min chhâng chuang lo va. An inah ka va kal a, a textbook chu ka va lâksak a, "Laltete, khawi ka textbook, kha... hei i tâ hi zir rawh," tiin textbook chu thleng ka han tum a. Laltetea chuan, "Merry, ti kher kher lutuk suh, a chhûnga inziak a inang vek reng, ka textbook kha hmang hle hle mai teh, hei ka chhiar laklawh, min ti buai," a tih pawh chuan tlâwm zâwkah ṭan ka duh lo va. "Khawi maw... i lehkhabu kher kher hi ka hmang thiam lo, a hnawk nei nuai lutuk," ka la ti ṭâlh a. Laltete lah chuan min pêk a tum bîk lo, kan inhnial kan inhnial lai chuan ka nu a rawn haw a, thil awmzia min zâwt a. Laltetea chuan a hrilh a, ka nu chuan kan pahnihin min hâu ve ve a, "In naupang chhia lutuk, hmawlhte pakhat inchuh ang vêl in ni," min ti a. Kan pahnih chuan kan inen a, kan chêt dân chu a naupang zia kan ti dûn ni ngei tûr a ni, kan innuih vur vur a, inhnial chhunzawm tawh lo chuan ṭha tê tê-in kan zir dûn thei hrâm a; mahse, a khât tâwkin min chhaih reng a, rilru pêk tak tak a har.

Exam lai kan nih avâng chuan Laltetea nên chuan kan awm dûn deuh chawt a, Reuben-a nên erawh kan inhmu khât telh telh a, ngaih pawh ka ngai ve tho nâ-a chu, hmuh ka tum rih lo. Kan zirlai a inang lo va, zir dun chiam kha a rem ve lo va; mahse, Laltetea nên erawh chuan kan zir dûn thei a, kan inpui thei bawk a, kan zir sa chu kan thiam leh thiam loh kan inzâwt dûn reng a, kan bahlah deuh lai chu ennawnin kan zir leh ṭhîn a. Laltetea nêna zir dun chu a nawmna a awm rualin a nawm lohna pawh a awm, a thiam theih loh deuh hian a ninhlei a chhuah ṭhîn a, ka lehkha zir chu min tih buai phêt a tum thûl, 'tiang deuh rêng rêng chuan exam chhûng chu kan awm dûn a. Kan inpawhna pawh a ṭhat zual phah sauh hian ka hria.

Kan zir nasa bawk a, kan exam-naah kan ti ṭha hlein ka hria. Exam tâwp ni chu kan lo thleng ta reng a, kan thaw a veng huai mai. Laltetea chuan Kimkimi te ho nên exam zawh lawm nân lên a rawt a, rem kan ti tlâng hlawm a. Mahse, Sangi chuan Laltetea chu a rawn ko leh a, Laltetea ṭhianpa chuan Sangi bulah kal zâwk ang a ti a; mahse, Laltetea chuan min kalsan a duh lo va, keimah vânga a duh rûk êm êm bula a awm theih loh ai chuan tiin, "Reuben-a'n lênpuiah min sâwm a, vawiin chu lêng ho lo mai ang u," tiin ka sawi ta daih a. Laltetea ngaihdân a nih loh hmèl hle; mahse, ka hre lo der tawp a. Reuben-a ka hmuh ve leh ka kal hranpui daih a, Laltetea leh Mapuia pawh chu Sangi bulah chuan an kal ve nghâl bawk a. Thîk rûkna tlêm nei mah ila, ka lawmpui a ni.

Reuben-a nên chuan lên dun tak tak pawh ka tum lo kha a ni a; mahse, ani chuan kan lên dunna hmun tûr a lo ruahman lâwk reng lo niin. Tourist Lodge tlâng lamah kan lêng a, a hmun vêl chu a nuam khawp mai. Kan chho zêl a, helicopter ṭumna hmun kan thleng a, a zâu thaw khat hle, thli a rawn thaw heuh heuh a, a nuam phian mai. Kan han hawi kual vêl a, kan in te, kan school vêl te a hmuh theih vek a, kan school leh kan in hla tak aṭanga ka han thlír chu ka lung te a ti lêng ang reng hle. Haw vata kan in aṭanga chu tlâng chu thlîr lêt te ka châk a, ka bula ding Reuben-a chuan chîk takin min lo thlîr reng a, "Nuam i ti em?" tiin min zâwt a. "Nuam ka ti lutuk; mahse, ka sawi thiam chiah lo nâin ka lung a ti lêng," tiin a zawhna chu ka han chhâng lêt vat a. Reuben-a bawk chuan, "He tlângah hian kal dûn fo ang aw, i lung a lêng a nih paw'n ka hnêm ang che," tiin min kuah a. Kei pawh chuan, "Ni e, kan kal fo dâwn nia," ka ti ve bawk a.

Reuben-a chuan kan in thleng min lo thlah a. Kan in ka lût deuh chiah tihah chuan Laltetea chu a rawn lût ve nghâl a, "In va'n lêng rei êm êm ve, khaw nge in kal rêng rêng?" vîn deuh hian min lo ti nghâl a. "I hriat lohna hmunah kan kal, a nuam lutuk, a boruak hrim hrim kha a dai raih mai a, a nuam lutuk. Khatiang hmun nuamah te min hruaina châng a hria a, a fel reuh ngawt mai, nang chuan khatiang hmun a awm tih pawh i hre tawp nâng!" ka han tih chuan Laltetea chu a ngawi vung vung a. "Khawi hmun nge chu hmun i sawi chu?" a han ti a. Kei chuan, "Tourist Lodge chhak helicopter ṭumna hmun kha," ka'n ti chu Laltetea nuih a za kher mai. "Khatiang hmun te kha ka hriat loh i ring em ni? Hmun sang nuam i tih chuan kha aia nuam leh tlâng sangah ka lâwnpui ang che. Helicopter ṭumna hmun i hmu a, i lawm ve êm êm a, helicopter i la hmu ngai lo maw!" ngeiawm takin min han ti fiam a. "Mi bulah phei chuan sawi rêng rêng suh," tiin min nuih vur vur a, rum zeta melh chung chuan ka room-ah ka luhsan hmak a.

Lehkha zir ṭha leh ṭha lo inkâr chu a hla hle mai, a zir ṭha lo deuh chuan result chhuah hun an hreh a. Pakhatna nih tumin ka zir kha a nia, ka nih ngei pawh ka ring a, result chhuah hun ka nghâkhlel tawh hle. Ka pa khan pakhatna i nih chuan ka rawn zin ang a tih kha ka la hre reng a, phone-in ka pa chu ka bia a, "Pa, naktûk hi kan result chhuah ni a ni tawh asin, pakhatna ka nih chu ka ring, lo zin rawh aw," ka ti tawp a. Ka pa chuan, "Bawihte, hei kan hna kan zo lawk thei dâwn lo va, ka rawn zin hman rih lo ang, a rang lama lo zin ka tum ang, lo lungngai lo la," a tih chuan ka hnual ru hle a. Ka pa ka hmu thei tawh dâwn a ti-a ka lo lâwm tawh teh rêng nên, ka khuma muin ka ṭap char char a, lukham huh hnâpa ka mittui far min hrûk hulsaktu an awm lo, ka nu talin min hnêm se ka zia tûr.

Zankhuaa ka ṭah vâng pawh a ni mahnâ, ka mit chu a bui lûk a. Ka nu chuan a chhan min zâwt a, ka hrilh duh lo. Ka mit a nâ ka ti tawp a; mahse, min âwihsak chuang lo. "I pa a buai thei bawk si a, hrethiam rawh. School in chawlh ve leh nangmah zâwk i pa te khua-ah i han zin dâwn nia," tiin min hnêm a, tlêm chuan ka rilru chu a nuam deuh.

Episode 14

School kan thleng deuh chiah tihah chuan dâr a ri nghâl a, result puang tûrin kan Class Master a rawn lût a. Ka rin ang ngeiin pakhatna ka ni leh a, kan ṭhian ho chu a ti ṭha pâwl kan ni vek a, kan lâwm tlâng hle. Laltetea pawh chu pathumna a ni a, a zir hun ngaihtuah chuan a ti ṭha tak zet a ni.

Pakhatna ni mah ila, in-a haw phûr phah nân ka hmang chuang lo. Ka ṭhiannu Puipuii te inah kan ṭhian hovin lên kâwi kan tum a, Puipuii te in lamah chuan kan inzui dial dial hlawm a. Puipuii te in kan thlen chuan Puipuii nu chuan, "Puii khawi maw i PR va la teh, ka lo en ang," a ti a. Puipuii chuan, "Min lo zui r'u," a tih avâng chuan kan ṭhian ho chuan kan zui ve mai bawk a. Kan chhuk zêl a, an Âr in kan thlen chuan Puipuii chuan Âr in aṭang chuan Ârpui pakhat hi a rawn pawm chhuak a, chho ang u a tih rualin kan chho leh nghâl hlawm a. An in kan thlen ve leh Puipuii chuan, "Kha le, nu, ka pi âr chu," tiin an Ârpui chu a nu chu a han hmuh a. A nu chuan a chal a kuk fawk chung chuan, "Rohlupui, i va han mâwl reuh tak! I pi âr ka ti lo, i PR ka tih te chu in Progress Report Card alâwm ka tih, i pi Ârpui lam ka sawi rêng rêng lo," a han tih chuan kan nuih a lo za lutuk a. Keini ṭhianho pawh kan â ve hrim hrim, lo hriatpui ve âwm tak kan nih teh reng nên. Puipuii te inah chuan ei tûr te kan siam a, kan ṭhianho chuan games kan khel a, kei chu a thiam lo ber ka nih avângin tel zêl pawh nuam ka ti lo. Laltetea chuan engtin nge Puipuii te inah ka awm tih a hriat ni, a rawn kal ve a!

Laltetea chuan a pass lawm a tum thu a rawn sawi a, kan ṭhianho pawh lawmpui tûrin min sâwm nghâl bawk a. Laltetea chuan,c" Merry, haw hma ila zanin atân kan inpuahchah ang a, nang phei chu pakhatna i ni bawk si a, a hrana lawm ai chuan in inah emaw, kan inah emaw lâwm tlâng mai ila," a ti a. Kei pawh chuan, "Ni e, hei Puipui, kan haw hma mai ang, kei chu pass lawm pawh ka rilruah a awm lo; mahse, lo kal tho r'u aw. Laltetea'n a lâwm dâwn a, kan ṭhianho kan kim chuan a nuam ve deuh ang," ka ti a. Puipuii nu chuan, "Merry, pakhatna i ni bîk elaw? Kan Puipuii ve hi zawng exam dâwnah chauh hian a zir ṭan chauh a, in exam tûr subject te in exam dâwn tûkah Zovi te a va zâwt a, tihngaihna pawh hi ka hre lo, lo hrilh ve ṭhîn teh aw," tiin Puipuii chu a hâu zui a, ka inthiam lo ang reng. Kan ṭhian dangte chu Puipuii te inah la lên khaw tlai an tum a, Laltetea nên chuan kan haw dûn a. Kan dâwrah kan pêng a, ka nu chu ka result vêl chu ka hrilh a, a lo lâwm khawp mai. Dâwr kan khâr nghâl ang a, kan hâw tlâng dâwn nia, chutia Laltetea'n a pass lawm a tum tho si chuan hmun khatah lâwm tlâng mai rawh u," ka nu chuan a ti a. Laltetea lo phûr fál lutuk chuan ka nu chu cake order tûrin a ti a. Ka nu chuan cake ai chuan Âr talh a ṭha zâwk a ti a. Kan ṭhianhova kan ei tûr leh thei tui vêl te pawh chu keini ai mah chuan lei tûr a hre zâwk a. Kan pass lawmna tûr atân ka nu leh Laltetea nu chu an insêng nual a, ka lâwm viau rualin ka inthlahrung ru hle a, ka pa leh ka u te ho awm ve se ka ti tak zet a ni.

Zanriah kan ei kham tawh maw tihah chuan, ka ṭhian te ho pawh an lo kal ṭan a, Reuben-a pawh a lo kal ve a. Rei vak lovah Laltetea ṭhianpa Mapuia leh Sangi te pawh an rawn inzui lût ve a, ka lo chhâwn thuai a. Ka nu pawh chuan ka ṭhiante chu a lo lâwm thiam hle a, Laltetea leh a nu pawh an rawn kal vat a. Kan thil ei leh in tûr vêl chu kan nu te chuan kan kutah awm rawh se, an tih avâng chuan kan in kawtah mei kan tuah a, kan zai ho vêl a, rin aiin a lo nuam.

Reuben-a chuan ka pass min lawmpui nan ṭhi min pe a, a mawi reuh khawp mai. Thilpêk min pe deuh reng a, keiin engmah ka la pe ve si lo a, ka inthlahrung ru ang reng, ka duh lo e ti-a han pawm loh kha a chi bawk si lo. Kei paw'n thil eng emaw chu ka present ve ang tiin a ṭhi min pêk chu ka awrh ve mai a. Laltetea'n min en leh en loh ka en zeuh zeuh a; mahse, min hmu lo nge min hmu lo der zâwk, ka awm ve tih pawh hre lo âwm ang hian a awm a, Sangi leh Mapuia te bulah a awm deuh chawt a. Ka lâwm lo, ka thîk ti tûrin theihna ka nei si lo, a hreawm ru ṭan hle a ni.

Ka ṭhiante ho chuan kan ṭhian za hova picnic an rawt a, ka nu pawh chuan min lo phûrpui ang reng hle a. Rual ka pâwl lo lutuk kha min hau fo va, hetia ṭhian ka nei tam ve ta hi min lo lawmpui ve hle a ni mahnâ. Kan picnic-na tûr hmun te min sawipui a, kei chuan hmân ni-a kan class hova kan picnic-na hmunah tho khan kal ka rawt a; mahse, midang ho chuan lui dang kha aia thûk lo zâwka kal an rawt thung. Ka nu chuan, "A hnai apiangah kal tûr, bâkah luia in kal chuan fimkhur a ngai a, thûk lutuk kha chu a chi loh hrim hrim, in la naupang hlawm si a, ka hlauhthâwnpui che u. Chuvangin, a thûk lo ber luiah picnic tûr chuan kal mai rawh u," tiin kan picnic-na tûr hmun chu ka nu chuan min thlansak a, ka ṭhiante pawh chuan ka nu sawina hmuna picnic chu an rem ti tlâng hlawm a, naktuka picnic chu kan rêl thlu ta a.

Ka room kawngka kik rî chuan min ti harh a, ka tho chhuak peih chuang lo va. Laltetea chu rawn lûtin min rawn sâwi nawk nawk a, "Merry, kan picnic dâwn kha, i theihnghilh em ni? Tho tawh rawh, insiam ang," a rawn ti a. Ka mut a la chhuak ngang mai, thawh nghâl mai chu ka harsat hle a. "Ka mut a la chhuak lutuk, rei lo tê ka'n mu leh lawk ang a," ka'n ti chu Laltetea chuan, "Dâr 9:00 a pêl tawh, êm êm a che! Tho vat rawh, i insiam chhûng a rei thei si," tiin min kai tho tawp a. Ka thawmhnaw a hâi nawk nawk a,"Hei hi keng mai rawh aw," tiin bag-ah ka hâk thlâk tûr chu a khung nawk nawk a, ka enpui lêm lo va. Ka hâk duh zâwng chu a hriat mai ka lo rin vâng chuan ka en dik tawh lo va.

Chaw kan ei sawk sawk a, Laltetea te motor chuan picnic tûr chuan kan kal chhuak ta a, kan ṭhiante ho pawh chuan motor neiin an lo thawh chhuahpui ve bawk a. Mipa lam pawhin Bike an lo thawh ve bawk a. Keini'n hma kan hruai a, kan hnungah min lo zui ve zêl a ni.

Kan picnic-na tûr hmun kan thlen hnu chuan bûk tê kan kan khùar a. Kan inlungrual hlawm bawk a, rei lo tê-ah tih tûr ṭûl ang zawng zawng kan ti fel thei a, kan intihlim ṭan ta a. Tuiah kan chêng hlawm phawt a, nuam kan ti tlâng hle. Reuben-a chuan tui hleuh dân min zirtîr a, kan ṭhiannu Remi tân tak chuan kan picnic hi a lo nuam ber mai, a rûka a lo duh ve êm êm Dika nên chuan tui an chêng dûn a, an inpawh sâwt khawp mai. Remi lâwm chu a khi vur vur reng mai a ni. Puipuii leh Mahlutea an inkawp a, Zovi leh Laltetea, Kimkimi leh Mapuia, Sebina leh John-a te an inkawp bawk a. Eli leh Ruata pawh an inngaizâwng ve ni ngei tûr a ni, an awm dûn chawt mai.

Laltetea chuan, "Luiah hian sangha a awm an tia, mipa ho hian man ila," a ti a. Reuben-a chuan rang zet hian a chhâng nghâl a, "Awm chu a awm ang; mahse, lui thûk deuh hlekah an awm alâwm, a thûk lama hleuh kha a chi vak loh ang, chêt sualna a thleng palh thei a, fimkhur tluk a awm lo," a han tih chuan Laltetea pawh chuan tih luih a tum bîk lo.

Tui chên chu duh tâwkin ei tûr kan ken te kan siam a, mipa lamin an lo buaipui chhunzawm a. Kan thawmhnaw kan inthlâk a, ka kawr a huh vek avâng chuan inthlâk tumin ka bag chu ka han hawng a. Laltetea khan ka hâk thlâk tûr kha a dah ṭeuh emaw ka tih laiin, kawr hâk tûr pakhat pawh a lo dah lo chu niin, kekawr hlîr a lo dah a, a huh chung chuan ka ha leh ringawt a. Laltetea chuan inthiam lo zet hian a kawr ha tûrin min ti a, a T-shirt chu min rawn pe a. Reuben-a pawh chuan a T-shirt chu ha tûrin min ti bawk a, tu kawr zâwk nge ka hâk ang tih pawh ka hre mai lo. Reuben-a chuan, "I bialpa ka nih hi, ka kawr hi ha zâwk rawh," a han tih leh chuan Reuben-a kawr zâwk chu ka ha ta a.

Ramhnuaiah chuan kan thil ei hi kan ei tui bîk ni ngei tûr a ni, ei tûr kan ken zawng zawng kan ei zo vek mai a ni. Reuben-a chuan, "Min lo zui rawh, thlalâkna tûr hmun mawi deuh a awm, thla va la lawk ang," min ti a. Kei pawh chuan ka zui ve mai bawk a, Reuben-a sawina hmun chu kan thleng ta, a sawi ang ngei chuan a lo mawi hle a, thlalâk nân a rem hle a ni. Hmun mawi tak maia Reuben-a nên kan han awm dûn chu a nuam lo hran lo. Thla kan lâk zawh hnu chuan kan ṭhiante bula lêtpui ka'n tum chuan Reuben-a chuan, "La awm rih ang, kan pahnih chauha awm hi a nuam alâwm," tiin min kuah a. Thâwm ka hria a, a lo rîkna lam ka hawi vat a, Laltetea leh Zovi hi an lo kal ve chu niin. Reuben-a chuan, "Eng nge in lo tih ve, min lo enthla em ni?" fiamthu tih hriat tak hian a han ti a. Laltetea pawh chuan, "Aww... hmun mawi deuh kha i ti si a, keini paw'n thlalâk kan duh ve tho alâwm," tiin nui vur vur chung chuan a rawn chhâng lêt ve bawk a. Kan pali chuan thla kan la ho leh phawt a, kan ṭhian dangte awmna lam kan pan leh hlawm a. Kimkimi chuan a nu-in haw hma tûra a tih thu a sawi a, keini paw'n haw hma chu ṭha kan ti tlâng a. Hâw lam chu Reuben-a bulah hâw ka tum a, Laltetea ngaih dân a ni vak lo tih pawh ka hre tho; mahse, ka bialpa chu Reuben-a zâwk a ni si a, a lung tih âwi ve pawh a ngai si a, haw lam chu Reuben-a'n min phur a. Laltetea ten hma an hruai a, keini'n kan dawt a. Bike chuan boruak a dâiin thlifîm dawn a hahdamthlâk ngei mai. Reuben-a chuan, "Nghet takin min kuah rawh aw," a ti deuh sek a, kei pawh chuan ka kuah ve mai bawk a.

Kan kalna a hlat lutuk loh vâng leh kan tlân chak vâng pawh chu a ni mahnâ, khaw chhûng kan lût vat a. Laltetea chuan Kimkimi leh Zovi a thlah kàwi a, kei chu Reuben-a'n kan inah min thlah tlang a. In ka thleng chu ka rin loh lam daih a ni, ka û a lo thleng chu niin, ka u Parte-i ka han hmu chu ka lâwm tak zet a ni, ani pawh chuan min lo ngai tawh hle a ni tih a hmêl aṭangin ka hmu thei. Ka û chuan ei rawng a lo bâwl mial mial a, "Naktûkah ka rualin kan khua-ah lo kal ve rawh, ka nu pawh ka hrilh tawh, a phal thlap tawh," a han ti a. "Mahse, school chawlh a ni si lo va," tiin ka hnial deuh a. Ka û chuan, "School lam kha chu ka nu-in a lo ching fel mai ang, lo zin tawp mai rawh, kan ngai tawh lutuk che alâwm, a bîkin ka pa phei chu i lo phone apiang hian a rilru a hah hmêl thei lutuk, nang lah hian pa te an rilru a hah ang em tih pawh ngaihtuah lo hian i duh duh i sawi tawp zêl a, ka pa lung i tih lên bâkah a rilru i ti hah," tiin min hâu deuh ti tih a; mahse, hauh tak tak erawh chuan min hâu phal chuang lo.

Episode 15

Zanriah kan ei laiin ka nu chuan, "Hei i û rawn hruai tûr che-in a rawn kal bawk si a, school in chawlh lai ni lo mah se, i va zin lawk mai dâwn a nia, in Miss ka lo dîlsak dâwn che nia, naktukah in va chho ang a, Thawhṭanni-ah i lo hâw dâwn nia," min ti a. Ka û chuan, "Ni li chauh chu a rei lo lulái êm mai, rawn zin ve tâk si-ah chuan kâr khat tal châm se," tiin ka nu chu a dîl leh a; mahse, ka nu chuan school chawlh lai a nih loh vâng chuan châm rei lo tûrin min ti a, ka û pawh chuan a hnial duh ta lo va.

Chaw kan ei kham hnuah chuan Laltetea hmu tûrin an inah ka va kal a. A nu chu a lo inkhâwm a, Laltetea TV en tui lai tak chu va tih phut tumin thâwm nei miah lo chuan ka va pan a. A bul ka thlen chuan va barakhaih thut ka tum nên, amah zâwk chu a rawn râk thut a, ka phu chiang kher mai! Ka va bawh tawp a, "Laltete hmêlchhepa, ti nge i rawn râk thut a, min ti phu lutuk," ka ti a. Laltetea chuan, "Nangmah zâwk i nih kha, mi awm hle hle lai min ṭhâwn tum chu, ka hmakhalh che a nih kha," tiin min nuih chiam a. "Engtin nge barakhaih che ka tum tih i hriat? Thâwm nei lovin ka lo lût ve êm êm a," ka'n ti chu Laltetea chuan, "I mâwl êm alâwm, saw en la dârthlalang aṭangin ka lo hmu reng che alâwm. Kan kawngkapuia i ding reng lai pawh kha ka lo hmu reng che alâwm," a han ti chu kei pawh ka nuih a za kher mai. Tih hlauh ka tum ve êm êm a, a hlauthâwng zâwkah bawk ka ṭang leh chu a nia, ka che fuh lo tluang zêl chu a nih hi.

Laltetea bulah chuan naktûka ka pa te khuaa ka zin tûr thu ka hrilh a. Ani chuan, "Ka lo zin ve duh," a ti a. Ka nu kan hrilh a, ka nu chuan Laltetea nu dîl tûrin min ti a. Laltetea nu inkhâwm bâng har lutuk chu kan lo phun kan lo phun tawh a, dâr 8:30 vêl a ni ang tihah chuan Laltetea nu pawh a rawn hâw ve ta a. Laltetea chuan ka bula zin chu a dîl a, a nu chuan a lo phalsak ve nghâl mai a. Kan pahnih chuan zin tûr chuan kan insiam ṭan a, ka phûr lutuk chu zân hi bawhkân mai te ka duh rum rum a ni!

Ka pa hmuh hlân ka nghâkhlel tawh hle a, chuvâng pawh chu a ni mahnâ ka mangah ka pa ka lo hmu a, ka harh ve leh ka insiam leh nghâl char char a, ka phûr tawh tak zet a ni. Ka û ka va kai tho va, ka û chuan, "Thawh ka hai em ni?" ti-a sana a han en chu, zîng dâr 3:00 chauh a lo la ni si, a chapal a la lawk a,"Vuak i duh em? Va mu leh rawh," min ti a. Kei chuan, "Ka mu thei tawh lo alâwm, eirawng te bâwl lâwk ila, chaw kan ei hmá dâwn alâwm," ka han ti leh hrâm a. Ka û chuan, "I âtzia hi aw, zîng dâr 7:00-ah kan kalna tur Motor-in kan inah min lo hruai mai ang, chaw pawh kalkawngah kan ei dâwn lâwm, i phûr zawk zawk lutuk a nih kha, va mu teh, ka mu duh," tiin min nam sawn sek a. Tlânchhiat pah chuan a blanket sin lai chu pawtin chhuatah ka paihsak a, ka û-in min lo ûm. Ka tlânchhe hneh bawk a, min ûmna lamah a harh fîm phah a, mut leh chu a tum nawn tawh bîk lo va.

Ka u nên rawng kan bâwl dûn a, kan zin tûr chu ka phûr tawh bawk a, ka û thu ka âwih khawp mai. 'Lo ti rawh,' a tih apiang chu hnial lo chuan ka lo ti thuai thuai a, tirh ka nawm ber ṭum a ni hial ang. Khua a vâr ṭan tawh tihah chuan Laltetea kai tho tûrin an inah ka kal a, kawngka kik rî an hre lo a ni ngei ang, min lo hawn mai lo va. Rei fê ka kik hnu pawh chuan an thâwm rêng rêng hriat tûr a awm lo va, motor-in min kalsan ka hlau bawk si tih ngaihna hre lo chuan Laltetea room bang chu lungin ka vawm tawp a, ka vawm fuh mai theih loh avâng chuan lung lian deuh hlekin ka vawm leh a! Chutah le, Laltetea room bang a rangva lai vawm tum khan tukverh dârthlalang ka vawm fuh ta tlat mai! Ka vawm fuhna dârthlalang chu a keh chuai a, ka hlau lutuk chu tlânchhiat ka tum a; mahse, ka û-in min lo hmu fuh bawk si tihngaihna hre lo chuan ka ding khawng tawp a. Ka û chuan, "I va han hlei e aw!" tiin ka bengah min pawt a. Chutah Laltetea chuan a room tukverh keh rî hriain a lo tho chhuak a, tukverh aṭanga rawn dâkin, "Tu nge lunga lo vawm?" vîn zet hian a rawn ti a. Laltetea chuan naupang ninhlei hovin an chhaih emaw tiin rawn hauh hrep kha a tum dân a ni a. Mahse, ka û chuan, "Khawi lam naupang mahin i tukverh an rawn vawm lo, kan mi hlei Merry hian lungin a rawn kai tho che a nih kha," a han ti a.

Laltetea chu a lo chhuk thla vat a, a nu chuan a lo hre lo hlauh a, inthiam lo zet hian, "Te-a, khatia in dârthlalang rawn tih keh pawh ka tum chiah lo, kawngka ka rawn kik char char a, in hre thei si lo va, khi lai rangva khi rawn vawm fuh ka tum a; mahse, i tukverh dârthlalang zâwk ka vawm fuh palh a, ka tih palh lutuk, motor-in min kalsan ka hlau si a," ka han ti a. Laltetea chu a thinrim hle dâwn emaw ka tih laiin a nuih a za hle zâwk a, "I lungngaihin i ninawm a, i hlim paw'n i ninawm tho, Over Thangi i ni mai, i lo phûr fál bîk ziah mai, thawh hun te chu kan hre ve tho alâwm," Laltetea chuan min han ti a. Chutah ka u chuan, "Sawi teh suh! Zîng dâr 3 vêlah min kai tho a, ka tho peih lo kha ka blanket te min paihsak vêl alâwm. A hlei si he nau hi, motor a lo kal hunah a rûkin kan kalsan daih dâwn nia," tiin Laltetea nên chuan min chhaih chiam a. "Ka pa bulah ka hêk dâwn khawp che u," tiin kan inah ka luhsan daih a. Ka dârthlalang tih keh them nâwi zawng zawng chu ka û leh Laltete-a te chuan an thian fai a.

Laltetea chuan a ken tûr bag vêl te chu kan in lamah a rawn dah a, a nu chuan lo thlah tumin a rawn zui ve a. Laltetea nu ka han hmu chu ka hlau ru ang reng a, an dârthlalang ka tih keh avâng khan min hauh hrep ka lo ring a; mahse, Laltetea chuan a lo hrilh lo a ni ngei ang, min hau lo hlauh. Ka nu pawh kan thâwm vêlah a mu thei lo ni ngei tûr a ni, a lo tho a. Ka u chuan, "Rawng kan bâwl zo tawh tho si a, chaw ei phawt mai ang u," a ti a. Kan vai chuan chaw chu kan ei ta a, kei tak phei chu ka ei lo ang a ni, motor a rawn kal leh kal loh ka en sek ringawt a. Ka û mit ka ti kham hle a ni ang, a fian chuan ka chalah min rawn khâwng fawk a, a na reuh lutuk chu ka mittui a parawl vek a. Ka nu chuan, "Tinge i nau awm hle hle lai i rawn vûak tawp chu le, khawn ve i duh em?" tiin a fian hman lai chu a han lek kang a. Ka û chuan, "A ninawm êm alâwm, a phûr zawk zawk lutuk a nih kha, zîng dâr 3-ah min kai tho bawk, ka blanket min paihsak bawk. Chu mai pawh a la duh tâwk lo, Laltetea room tukverh dârthlalang pawh a vawm keh saw," a han ti chu ka nu chuan min hauh tum ni âwm tak hian a kâ a han âng zet a, mahse rang zetin ka tlânchhe nghâl a. Motor pawh a lo thleng ve chiah bawk a, min hauh duh viau mah se a hunin a zir si lo va, min hâu lo chuan kan bag vêl chu min hlân kaipui ta zâwk a.

Motor chhûng aṭang chuan ka nu leh Laltetea nu chu kan "bye bye' a, han zin dâwn tak takah chuan ka nu chu ka khawngaih leh si a, ka lung te pawh chu a lêng ngawih ngawih nghâl hian ka hria. Ka nu chu ka la kalsan ngai si lo va, a khua a lo har ve ngawt ang le. Ka û chu Sumo driver bulah chuan a ṭhu a, kei leh Laltetea chu a hnung berah kan ṭhu a. Driver-in motor a han ti nung chiah chu Laltetea nên chuan kan nute ve ve chu kan khawngaih ang reng. Kan châm rei dâwn lo tih hre mah ila, eng emaw záwng tak hian rilru an ti nuam lo a ni. Kan tlân ṭan ta a, Laltetea chuan a hla play chu min ngaihthlâktîr ve a, zân ka mut loh vâng pawh chu a ni mahnâ ka muthlu nghâl bawrh bawrh a.

Mahni khua han thlen meuh chuan rilru hi a hahdam veng veng mai a. Ka pa chuan min hmuh ve leh min lo kuah nghâl a, unau zinga naupang ber tih takah ka pa bulah chuan nautê ang mai hian ka awm a, min duat bîk ṭhîn mah se ka û ten min thîk ngai lo, ka û te pawh chuan min duat êm êm vek a ni. Ka û te chuan Laltetea chu an hre vek a; mahse, ka pa chuan a lo hre chiang vak lo niin a lang. Mahse, ka ṭhian ṭha ber a ni tih a hrilh avâng chuan lâwm takin a ni pawh chu a lo dawngsawng a.

Laltetea chuan kan khua chu nuam a ti ang reng, ka paliana fate ho nên chuan an inmil nghâl a. Naktûkah ram vah an tum a, Laltetea pawh an sâwm a, Laltetea lah a phûr ber berah a ṭang leh ta nghâl a. Laltetea hnênah chuan, "Ram vahna hmuna kal tûr chuan i la naupang lutuk, i nu paw'n a phal lo ang, eng emaw palh awm ta se i chhûng ten keimah min dem vek dawn asin," tiin kal ve lo mai tûrin ka hrilh a; mahse, ka thu a zâwm duh hauh lo. Ka u Rama chuan, "In lo zin ve chhunah a kal ve bawk lohin rawn zin man a awm nâng, lo khap duh suh, kan awm a, chêt sualna pawi tham a awm lo ang, ka lo vêng dâwn alâwm," tiin ka û chuan an ruala kal tûr chuan a sâwm lui tlat a.

Inthiam loh hmèl tak chung hian Laltetea chuan, "Ka kal ve châk si a, phal ve mai rawh, kan fimkhur dâwn alâwm, kan che sual lo ang," tiin a ngen hian min ngên a. Kei pawh chuan ka hnial duh ta lo va. Ka û te leh Laltetea te an chhuak dâwn chiah tihah chuan ka ni a rawn kal a. Ka ni chuan, "Nangni chhûng chu mipa in tam deuh bawk a, kan lovah thlai thar ho min va lâkpui ula," tiin kan mipa ho a sâwm a. Ka ni vêk chuan, "Merry, nang pawh rawn kal ve rawh, lo lamah i la kal ngai si lo va, nuam i ti ngawt ang," tiin min sâwm a. Ka ni-in chutia min sâwm ve tâk si-ah chuan ka kal ve châk tlat mai a. Ka û te ram vah tum pawh ka ni thu an hnial ngam loh avâng chuan ram vah ṭhulhin ka ni te lova kal chu an tum leh ta zâwk a. Ka kal ve dâwn tih ka pa'n a hriat chuan ke-a ka ni te lo ka thlen theih a ring lo va. Laltetea nên kan chuanna tûr Sakawr min va ngaihtuahsak ta a.

Ka ni te leh ka û te ke-a an kal nak nak laiin Laltetea nên Sakawr chungah kan chuang bîk a, Laltetea chuan ka ni chu a ai chuang tûr chuan a kian ve nâ-in ka ni chuan a duh lo va. Kawng chanve kan thleng tawh tihah chuan ka ni a châu tawh tih kan hrethiam a, Laltetea nên chuan kan chhuk vat a, ka ni chu Sakawra chuang tûr chuan kan ti ta a, a châu tawh ngang a ni ang chu, a tlâwmngai thei tawh bîk lo. Laltetea nên a hnung berah kan kal dûn a, boruak a thianghlimin hawi vêl a nuam khawp mai, kawng sîrah chuan dî lo intlar duah ka hmuh chuan buh emaw tiin ka zût a, min ât chiang kher mai, ka kut a thi nasa viau mai. Ka û chuan, "Tu nge di hnah te zût ngai, i âtzia hi aw..." tiin a kawr chu a pawt thlêr vat a, ka kut chu min tuamsak nghâl a. Laltetea chuan fiamthu thawh nân tak min hmang zui a,"Di hnah pawh buh hmunah ngaiin a zût phei char char a nia, a pà ve chiang alâwm. Savawm kan hmu fuh a nih paw'n Merry chuan a hlau miah lo vang, a lemah a ngai ang a, a va chibai leh mai ang," tiin min perh chiam a, ka û te pawh an nuih a za ngang mai. Ka ni chuan, "Merry chu a pui thei lutuk, a têt laiin a pa Aizawl-ah a zin dâwn a, a nu-in 'I pa tluang taka a zin theih nân leh dam taka a lo haw leh theih nân ṭawngṭaipui rawh u,' a ti a. Merry chuan a pa lo haw tawh hnu pawh chuan 'Ka pa tluang taka a zin theih nân leh dam taka a lo haw leh nân, Amen,' a la ti char char maw le!" a rawn la ti zui. Laltetea chuan, "Chu... fing tûr hi chu i lo ni lo ve hrim hrim a nih hi," tiin kawng tluan chuan min nuih a.

Ka ni te thlâm kan thleng ta, a lo nuam reuh khawp mai. Ka û chuan, "In ril a ṭam tawh âwm si a," tiin thlâm hnung lama bahra chu a va la a, mei a tuah a, a ṭhen a chhûm a, a ṭhen min rawhsak a. A rawh hmin hmasak apiang chu Laltetea nên kan lo ei nghâl zêl a, tui ti taka bahra kan ei lai chu hmuh nuam an ti hlawm khawp mai. Laltetea chuan, "Ka nu awm ve se nuam a ti ve ngawt ang," a han ti ringawt a. Kan inhnawh puar zawh chuan ka ni chuan kan tih tûr ṭheuh min hrilh ta a. Kei leh Laltetea chu hmarcha lo tûrin min tîr a. Êm pakhat ve ve min pêk pahin, "Tu èm nge khat hmasa sa inel r'u aw..." a han ti a. Laltetea chuan min cho ang reng hle a, ka tlâwm âwm lo tiin ka èm nên ka chhuak tûr chu ka inpal tlu palh a, min kaih thawh ahnêkin Laltetea leh ka ni chuan min nuih vak vak ringawt a, tûm bûr chuan hmarcha hmun lamah chuan ka phei a. Laltetea pawh chuan min rawn ûm zui vat a, min biak paw'n ka chhâng lo. Ka èm chanve hmarcha ka mal tawh tihah chuan Laltetea èm chu ka va en a, a lo khat ṭêp tawh chu lo niin. Ka chak lo dâwna ka hriat avângin phakar ka chhuah ta a, Laltetea chu ka va be der a, "Tete, ka tui a hâl, tui i nei em?" tih pah chuan ka tlu der ta a, ka tlûk pah chuan a ém chu ka kuai tlu pah a, a hmarcha zawng zawng chu a baw ta vek a. Chu ve leh ka èm awmna lam panin ka tlân nghâl a, hmarcha chu ka va mal vat vat a. Laltetea chuan, "I va phakhar êm êm!" tih pahin ka èm chu min tih tlûksak ve a, ka hmarcha mal sa pawh chu a baw ve ta vek a. "Laltete misualpa, chhar vek rawh," tiin ka ṭap ta chiam a. Chutia mittui luang zawih zawiha ka ṭah tâk si-ah chuan Laltetea chuan min khawngaih leh si a, "Aw, ka chhar vek mai ang, ṭap tawh lo la, i chak zâwk ni rawh se, i ṭahbelh êm mai, i phakar tel bawk si, ka tlâwm ni mai rawh se," tih pah chuan hmarcha chu a rût khâwm mawlh mawlh a.

Thlâm kan thlen chuan ka ni chuan, "Tu nge êm khat hmasa zâwk che u?" min lo ti a. Rang zet hian Laltetea chuan, "Hna thawh lama ka nau, ṭawng lama ka û Merry a chak zâwk a nih kha," a han ti kher a. "Ka chak zâwk hrim hrim alâwm," tiin ka'n chhâng lêt vat a. Ka ni chuan, "In fel ve ve in pahnihin, pakhatna ve ve in ni ni mai rawh se, haw kan hnaih hlawm ang, thim hmain in kan thlen a ngai," a tih avângin hâw tûr chuan kan insiam nghâl hlawm a. Kawngah chuan Laltetea chuan phakar ka chhuah dân vêl chu ka ni te a hrilh fai vek a, ka ni te chuan min nuih vak vak a.

In kan thlen chuan ka pa chuan, "Bawihte, in châu em? Ram lamah in kal ngai mang si lo va, in châu ngawtin ka ring. Hei tui in inbualna tûr kan lo lum sa diam tawh a nia, tui lum hian inbual ula in harh sawt sawt mai ang, in inbual zawhah chaw kan ei dawn nia," a ti a. Ka pa chhân ka tum lai tak chuan Laltetea chuan min lo chhân khalh a, "Chau lo ve, a nuam lutuk, boruak thar te kan han hîp a, a hahdamthlâk khawp mai, thingtlâng nun hi a lo hahdamthlâk êm a nih hi, ka nu lo kal ve se nuam a ti ngawt ang," tiin hmêl nung sar hian ka pa chu a han chhâng a.

Episode 16

Ka inbualna tûr ka siam fel bathroom ka lut tûr chu Laltetea chuan, "Ka lo inbual hmasa zâwk ang, mikhual zâwk ka nih hi, mi te hi kian ve ṭhîn la, nang chu in neitu zâwk i nih kha," min tih chuan kei chuan, "Mikhual ang paw'n i awm em ni? Keimah zâwk hi min mikhual chei zâwkin ka hria," ka lo ti ve vat a. Laltetea'n inbual hmasa tûr zâwk lungtê thlan fuh a tih avâng chuan ka lo aw ve mai a. Pâwnah lungtê pakhat hi a va chhar a, "I mit chhîng rawh, lungtê ka humna i hriat fuh chat chuan i inbual hmasa zâwk d5awn nia," min ti a. Kei chuan, "Aw le," tiin ka mit ka'n chhîng zuai a. Tichuan, Laltetea chuan, "Kha le, khawi zâwkah nge lung ka dah i rin?" tiin a kut a hûm chu min thlantîr a, kei chuan a kut vei lamah chuan a hûm ka ring a, a vei lam zâwk chu ka pharhsak a; mahse, lungtê a awm miah lo! Laltetea chuan, "Ka chak zâwk, ka inbual hmasa thei," tih leh bathroom luh a rual a. Bathroom kawngkhar khar pah chuan, "Merry, ka kut ding lamah hian lungtê ka hûm i ring ti raw?" a han ti a. Kei chuan, "Ding lamah a awm lohin vei lamah a awm loh kha," ka ti a. Nui vur vur chung chuan, "Hei eng mah ka hûm tawp si lo ahh..." tiin kawngkhar chu a khar hmak a. "Laltete, i va phakar ve, rawn hawng nghâl rawh, 'nge min bum!" tiin kawngkhar chu ka chúm vak vak a. Ka Pa chuan, "In naupang chhia dûn êm mai, tikhan inbualtîr mai mai teh," a lo ti a. Kei pawh chuan ngawi rengin ka nghâk ve ta mai a. Laltetea inbual zo lo chhuak chu a lo khi vur vur a, "Bum lah hi i nuam si a maw..." ngeiawm deuh hian min han ti a. Kei chuan, "Nia, kei te chu dâwt sawi te hi ka chîng ve lo a, mi dang hi keimah anga dikna nunpui vek tûra ka ngaih vâng alâwm," tiin ngeiawm deuh chuan ka'n chhâng lêt ve vat a.

Zanriah kan ei kham chiah tih chuan ka û chuan Laltetea chu a nula rimna-ah hruai ve a tum a. "Va lêng mai rawh, inah ka lo awm mai ang," tiin Laltetea chuan a han hnial deuh nâ chu, ka û chuan a sâwm luih deuh tlat avâng chuan a zui ve ta a. TV kan en hle hle lai chuan ka nu-in a lo phone a. Ka pa chuan, "Kha le, i nu a nih hi, a ngai tawh che a ni ang," tiin min biaktîr a. Ka nu ka han bia chu a lunglênzia hlîr min lo hrilh a, ka ngaih a ti ṭha lo lek lek zâwk a. Ka nu chuan, "Naktûk tûk lehah lo hâw tawh mai rawh u," a tih chu ka lo 'aw' ve hmiah a. Ka pa pawh chuan, "Ni e, sikul kal lai in ni bawk si a, rei châm thei in ni hleinêm. Sikul in chawlh lai chuan dâwr lamah i nu pui ve ṭhîn la a ṭha ang, i nu a chau thei si a, ṭangkai tum ve tawh rawh aw," tiin ka pa chuan aw nêm deuh hian min lo ti sep a, Laltetea nên kan haw hunah chuan ka pa chu a lung a lêng ve ngawt ang le. Zân dâr 8 a ni tawh a, thingtlângah chuan mut hun a ni tawh si a, Laltetea leh ka û lêng lah an lo la haw si lo. An lo hâw hun chu ka nghâk ka ti ve nâ chu, ka muthilh lai pawh ka lo inhre lo.

Tui tak a ka muthilh lai chuan Laltetea chuan "Harh teh Harh teh Rosemerry thawh hre lo lutuk,khel mual ah volleyball va beng ang." Tiin min lo kai tho chhen a, phur lo zet chuan ka tho a sana ka han en chu zing dar 5 vel chauh a lo la ni a,"Laltete hei dar 5 chauh a nih hi mi mut kham loh loh nen ka mu leh dawn" tiin khum lam pan leh mai chu ka han tum a mahse Laltetea chuan ka kut ah chelh in min tlanpui tawp a, keichuan "hei ka chapal hi a in khing lo a nia,nge min tlanpui ve ringawt " kan tih chuan Laltetea chuan "A pawi loh kha kan kal hla dawn Chuang hleinem,saw volleyball beng tur ho saw ka hmelhriat an awm ve silo a,ka beng ve chak alawm min lo kalpui teh,I duh leh I haw leh mai dawn nia" a tih vang chuan ka va kalpui zuai ang a ka haw leh nghal ang ka tih ruk laiin a hmun kan va thleng chu,ka hmelhriat hmeichhia ho chuan in kawi bah ah chuan min lo sawm ve a, ka tel ve chak thut ni ngei tur a ni an bulah chuan ka in kawi bah ve nghal a.

Inkâwibah chu a lo nuam phian a, ka lo thiam phian leh nghâl a. Laltetea pawh chuan Volleyball ben chu nuam a ti ngang a ni ang, ka u chuan chaw ei tûrin min rawn ko a; mahse, Laltetea chuan, "Kei chu ka ei peih lo mai, hei a nuam êm mai, ka ril pawh a ṭâm lo," tiin ka û chu mawi hnai tak chuan a lo chhâwn vat a. Ka û chuan ka lam a rawn hawi chiah tih chuan, "A û, eng nge kan hmeh dâwn?" ka lo ti vat a. Ka û chuan, "Sangha chhum leh Alu leh Bawngsa kan," tiin min chhâng a. Chu veleh, "Sangha a hling tam tam nên ka ei duh lo tih in hre ve reng a, lo siam kher, min va eisan mai r'u," tiin pangchang deuh hian ka û chu ka han ti a. Ka û chuan, "Sangha te chu Laltetea tân lâwm kan tih, nang te chu Bawngsa a awm reng alâwm, chaw ei khamah in infiam leh zâwk dâwn nia, lo kal r'u, haw phawt ang u," a han tih chuan Laltetea chuan ka û thu chu a hnial ngam lo va, zui ve mai a tum a. Ka bânah chelhin, "Hawh, chaw chu ei phawt mai ang," Laltetea chuan min ti a. Mahse, ka laklawh êm avâng chuan, Tûn chiah hi aw," tiin ka kàwi vawm thlûk tûr chu uluk takin ka han tin vêl a, ka vawm fuh ngei ngei tûr a nih laiin Laltetea chuan a ke chuan ka kàwi vawm chu a rawn pêt ta daih mai a. Chutah Laltetea bawk chuan nui vur vur chung hian, "I thiam lo êm mai, vawi khat mah inkâwibah ve tawh suh," tih leh tlânchhiat a rual a. Ka thinrim lutuk chu chapal pawh a inkhingin ka bun hman lo, Laltetea tlânna lamah chuan ka tlân ve nghâl a, râl aṭanga ko vak vak chung chuan, "Laltete, i châk dâwn lo lutuk, ka man tho tho ang che," tiin ka ûm vak vak a, in kan thleng chu a ni dêr mai.

Kut kan sil lai te chuan kan inhâu deuh chhên a, ka û chuan, "He mite pahnih hi engtin nge tûn thleng thlenga in inkawm theih le, Ui leh Kêl thlun pawlh ang mai," a lo ti a. Laltetea chuan ka u chu lo chhâng lêt vatin, "Ih maw û, Merry hi mi fing pangngai leh rilru chhe deuh chu ni se, min kâwm peih tawh teuh lo mai, kan inkawm ngeih êm êm chhan hi chu a ṭhat mâwl tawp vâng hi a nia," nui vur vur chung hian a han ti a. Kei chuan, "Kei lo ṭhian ṭha tia sawi tûr i neih tawp loh kha aw, min chhaih vak vak zêl mai," tiin ka lo tûm khum a. Chaw ei lai pawh chuan kan inkhak kan inkhak a, dawhkan hnuaiah ka ke rahna-ah tak chuan a ke chu a rawn dah ve a. Kei chuan ṭawng lêm lo leh chapal phelh lêm lo chuan Laltetea ke chungah chuan ka ke chu ka nghat a, "Ehe! Nichin khan ui êk ka rap pherh tak, Laltete, i ke-ah ka ti kai palh a nia, insil mai rawh aw," kan ti mai chuh, ani tenchhia tih takah a tak tak emaw tiin a chaw ei lai chu 'Ka puar,' tiin a tho hmak a! Ka û chuan, "Merry, i mâwl thei lutuk, Tete, rawn ei leh rawh, i puar miah lo vang," a ti a. Laltetea chuan, "Ka puar tawh alâwm, a hrim hrimin mi thil ei laia khatiang te lo sawi rêng rêng, ka ei tui thei tawh nâng," a han ti chu ka inthiam lo hnuhnawh leh viau mai.

Laltetea chu ka pa bulah ṭhu-in TV an en dûn a, China-ho khum leh ṭhutthleng vêl siam dân an en a. Kei pawh chuan hmun phiah pah chuan ka lo en ve zeuh zeuh a. Hmun ka phiat zo chu Laltetea bulah chuan ṭhut ve ka va tum a, Laltetea chuan tui min lo ken nghâl mai a tih avâng chuan tui chu ka ken phei nghâl a. Ka ṭhu ve chiah tih chuan TV-a an thil siam a mawi ka ti leh an thiam ka ti lutuk chu, "En teh, Laltete, mihringho themthiamzia hi," ka'n ti chu Laltetea chuan a tui in lai chu a hâk chiang kher mai! "Mihringho han tih, mihring i ni ve lo em ni? 'China-ho han themthiamzia hi,' han tih ve mai âwm," nui vur vur chung chuan min han ti a.

Naktûk hi kan hâw ni a ni tawh si a, ka pa chu a khua a har hle dâwn tih ka hre sa a, ka theih ang tâwka tih hlim hrâm hrâm ka tum a, "Pa, sikul kan chawlh leh hun hunah ka lo zin leh ang aw, nang pawh min hmu tûrin lo zin ve ṭhîn bawk la, kan inhmu khât si, kan inhmuh chhûng lah a rei lo thei si," ka han tih chuan ka pa chu a lung a chhia tih a hmêl aṭang chuan a hriat theih a. "Aw le, aw le, bawihtê, naktûk Sumo chuang tûr in ni si a, va mu hma rawh," min tih hnu pawh chuan ka la mutsan mai thei lo va, a ke te ka han hmehsak leh tê tê phawt a. Chumi hnu chuan mut tum chuan ka khum lam ka pan phei ta a, zân dâr 12 a pelh tawh hnu pawh chuan ka mut a la chhuak thei rêng rêng lo mai a, ka ngaihtuahna chu a vâk thui hle mai a. 'Ka nu leh pa te chu innei leh mai se aw,' ka ti vawng vawng ringawt a, ka nu bula ka awmin ka pa ka ngai a, ka pa bula ka awm lahin ka nu ka ngai leh bawk si! Nu leh pa kâra sei lian ka ṭhiante dinhmun chu ka awt thar ngei mai.

Ka inngaihtuah zankhua chu a ni ber mai, zîng dâr 3 vêlah chuan ka lo muhil ni âwm tak a ni, zîng dâr 6 vêlah chuan ka û hian min lo kai tho a, "Nautê... hei in Sumo tûr a lo thleng ṭêp tawh ang, va inphih fai tawh rawh, Laltetea pawh a inphih fai mêk, tho ve tawh rawh," min lo ti a. Phûr lo zet hian bathroom lam ka pan a, a zawi hian ka zawi hnâp a, ka chauh hmêl êm êm bawk. Laltetea'n, "I dam lo em ni?" min tih pawh chuan ka chhâng lo va, ka hmài ka phih lai te chuan ka mittui hi a lo far a lo far a, ka hmài chu ka phih nawn ka phih nawn a; mahse, ka ṭap a ni tih chu a hriat tho a ni. Ka pa pawh min thlah liam tûrin a lo tho a, "Bawihtê, kha i pocket money tûr," tiin chêng sanghnih min rawn pe a. "Pa, a ngai lo, pawisa chu ka la nei nual mai," ka ti ve nâin ka pa chuan la tûrin min ti lui tlat a, ka lâksak ta tawp a. Kan chuanna tûr Sumo pawh kan kawtah a rawn ding ta rân mai, ka û leh ka pa te chu ka en a, ka khawngaih êm êm a, kei pawh chu ka inkhawngaih êm êm a, ka pa kuahin ka ṭap vak vak ringawt a. Ka û chuan, "Nautê, ka pa ngaih i ti ṭha lo vek dâwn alâwm, dama kan awm te chuan kan lo zin fo dâwn alâwm, lungngai rêng rêng suh," tiin min lo thlamuan a. Ka pa pawh chuan, "Kan la inhmu leh vat dâwn alâwm," tiin min hnêm ve mawlh mawlh a.

Sumo chhûngah chuan kan han ṭhu fel ta tihah chuan ka pa hmêl chu chiang tak chuan ka va en a, ka pa hmêla khawharna leh a mittui tla tûr hmêl kha hai rual a ni lo. Patling a ni a, mi mit hmuhah a mittui tih tlâk a duh ngai lo; mahse, a thinlung chhûngril erawh a ṭap vawng vawng tih ka hre thei si. Lungchhe tak chuan kan inthlah liam thei hrâm a, Laltetea chuan a earphone-ah hla a play a, chu chu min ngaihthlâktîr a. Zân ka mut ṭhat loh vâng ni ngei tûr a ni, ka lo chhîng sek a, mumang ka lo nei a. Chu ka mumangah chuan kan chhûngkua hian TV kan lo en a, ruah hi a lo sûr nasa ang reng hle a, mahse, chhûng kima kan awm avâng chuan kei chu ka lo hlim êm êm a, ka nu mal chungah ka lo mu a, ka pa chuan ka ke chu min lo hmehsak a. Chu veleh chuan ka harh a, ka han hawi kual vêl a, ka mumang lek chu a lo ni si! Ka insûm hman lo, ka mittui chu dan rual lohin a rawn far nghâl zung zung a. Laltetea chuan min hrethiam tih hriat tak hian min kuah a, "A pawi lo, ṭap rawh, tu ma'n an dem lo ang che, ṭap bawrh bawrh mai rawh," a ti a. Laltetea'n chutianga aw nêm tak maia min han hnem leh ngat phei chu ka lung chhiat a zual a, keimah leh keimah chu ka inkhawngaih tak zet a ni.

Khua kan thleng ṭêp tihah chuan ka pa chu ka phone a, ka û-in a lo chhâng a. Ka û chuan, "In awm lo chu a reh hian a reh ruih mai, ka pa pawh a lung a lêng tih a hriat ngawih ngawih," a rawn ti a. Kei chuan, "Hei khaw chhûng kan lût ṭêp a, kan thlen hunah ka rawn be leh ang che u, ka pa kha lo duat rawh u," tiin phone chu ka off rih phawt a. Rei lo tê-ah khaw chhûng chu kan lût nghâl a. Driver chuan 'in inah ṭheuh ka thlah ang che u,' a tih avâng chuan passenger dang ho chu a han thlah leh tê tê phawt a. Kan ding zing lutuk chu Laltetea nên chuan kan lo ning ru hle a, taxi hman tur remchâng kan hmuh avâng chuan Sumo aṭanga chhukin taxi chuan in lam kan pan ta zâwk a. Kan in kan thleng ṭêp tihah chuan kan taxi hman chu a chhe thut mai a, a siam chhûng nghah leh ai chuan ke-a kal kan thlang zâwk a. Laltetea nên chuan ke-in kan thawmhnaw te nên chuan in lam kan pan a, ka kut vawn pah chuan, "I lung a lêng ngawt ang ti raw? Kei paw'n reh ka ti, i pa te ho ka ngai; mahse, lungngai suh aw, kan zin leh vat dâwn nia," tiin min hnêm a. Kan in kawt kan thleng ta, kawtah chuan Ben-a hi a lo ding reng chu niin. Laltetea'n ka kut a vawnna chu a en nghâl a, Laltetea chuan min thlah vat a. "In lo thleng thei ta maw, i û te ho nên kan lo nghâk reng che u alâwm. Mahse, nichin lawk khan i nu chu dâwrah a kal lawk a, a lo kîr leh nghâl ang," tiin Ben-a chuan nui sáng hian min lo ti a. Laltetea chuan eng mah sawi lo chuan an inah min luhsan hmak a. "He pa ṭhîn hi chu aw, Ben, min lo nghahna a rei tawh em? Engtin nge kan lo haw dâwn tih i hriat a?" ka'n ti chu Ben-a chuan, "Hawh, lût phawt ang, nimin khan i nu ka phone a, in chanchin ka zâwt a, i nu-in min hrilh alâwm." Ben-a ṭawng lai chuan ka en reng a, ani hi engtin nge ka tih ang le, ṭhen ngawt lah a ni thei chiah si lo.

Ben-a hi mi fel tak a ni a; mahse, ka rilru put dân hi ka hrethiam bîk lo, a chângin ka duh êm êm hian ka hria a, a chângin Laltetea ka duh zâwkin ka hre leh deuh bawk si, tuilairapin ka awm a ni ber; mahse, Ben-a chu chuti maia ṭhen chu ka tum bîk chuang lo. Ben-a nên kan tîtî nak nak lai chuan ka nu pawh a rawn haw ta a, ka nu chuan, "In lo thlenna a rei tawh em? Laltetea nên in awm lo chu in hi a reh hian a reh ngawih ngawih, khaw nge amah hi an inah a haw phawt em ni?" a rawn ti nghâl bawrh bawrh a. Kei chuan, "A châu ve a ni ang, chaw te a ei duh ang chu, nakinah a rawn lêng ve mai ang," ka tih chuan ka nu chuan, "Hetah chaw chu ka chhum kêp hlawm che u alâwm, chaw kan la ei bîk lo, kan lo nghâk che u alâwm, Laltetea nu-in chawhmeh te a lo lei a, 'nangma'n rawng chu lo bâwl mai rawh,' min ti alâwm, chawhmeh ka'n chhuang lum ang e, ka ril pawh a ṭâm tawh lutuk, nangni pawh in ril a ṭâm tawh ang," tiin chawhmeh ti lum tûr chuan choka lam chu a pan a. Rei lo te hnuah chuan a rawn lêt leh nghâl a, "Ben-a, ti khan lo ṭhu rih mai rawh aw, Laltetea leh a nu chaw ei tûrin ka va ko ang e," tiin ka nu chu a chhuak a.

Reuben-a pawh chu a ding thut a, "Mate, kei pawh ka va haw tawh ang e, tikhan chaw te lo ei rih phawt ula, tlai lamah ka lo lêng leh zâwk dâwn nia," tiin haw mai chu a tum a. Kei pawh chuan, "Immm, tlai lamah chuan kan inhmu dâwn nia aw, Kimkimi te ho pawh an lo lên ka ring, lo lêng leh rawh aw," tiin ṭawngkam ṭha tak chuan ka thlah liam ve mai a. Laltetea te nufa leh ka nu chu an rawn inzui lût ve nghâl bawk a, ka châu deuh bawk nên chaw ei siam pawh chu ka pui ta lêm lo va, ka nu leh Laltetea nu chuan an siam zawh hnu chuan min lo ko a. Chaw kan ei lai chuan ka nu chuan, "In zinna chu eng nge a an?" tiin Laltetea chu a han zâwt a. Laltetea chuan, "A nuam lutuk ringawt, min duat si, ramah te kan kal a, a nuam asin aw! Zîng leh tlaiah Volleyball kan bêng ṭhîn a, ṭhian ka nei ṭan ve chauh tihah kan lo haw daih si a, zin leh vat ka châk, a nuam lutuk ringawt," tiin a lo chhâng vat a. Laltetea nu chuan, "Hetah pawh Volleyball te chu a ben theih reng alâwm; mahse, rama kal chu a hlauhawm rualin a nuam phian ang, kei chu luia kal ka châk, Sangha te man vêl ila a nuam ngawt ang," a lo ti ve bawk a. Chaw ei lai chuan kan zinna chanchin hlîr chu min zâwt a, kan chaw ei lah chu rin ai takin kan ei tui phian leh nghâl a.

Episode 17

Ka nu bulah chuan, "Nu, ka châu lutuk, ka mu dâwn nia, min lo ti harh rih suh aw," ka ti a. Ka room lamah chuan lûtin ka mu nghâl a, Laltetea pawh a mut hahdam ka ring. Ka lo mu tui phian a ni ang, ka han harh meuh chuan tlai lam dâr 2 a lo ni dêr tawh mai a, ka room aṭanga ka chhuah dâwn mêk lai chuan ka nu chuan min lo ko a, Kimkimi leh Zovi an rawn lên thu min lo hrilh a. Chu veleh rang zet hian ka va chhuak a, Kimkimi chuan, "Awi, hmêlchhe nu, kan ngai lutuk che, thil min lo hawn em?" a rawn ti nghâl ringawt a. Zovi pawh chuan, "He nu hi a induh tawp, phone paw'n min lo biak ve ṭhin tûr a nia, thil pawh min rawn hawn ka ring lo," a rawn ti ve leh a. Kei chuan, "Awi, thil hawn tûr eng mah a awm lo, keimah ka lo hawn che u lâwm," tiin an inkârah tak chuan ka han ṭhu a. Kimkimi chuan, "Mimi vêl chhum tûr kan lo keng a, thak tâwkin va chhûm teh, ei ang u," a ti a. Kei chuan, "Zovi chhum kha a tui alâwm, runhmuia thlâk phei kha chuan a tui tawp, Zovi'n chhûm zâwk rawh se," ka tih avâng chuan Zovi pawh chuan min hnial lêm lo chuan a chhûm ve mai a. Kimkimi chuan Ben-a nên kan la ṭhat zêl leh zêl loh min zâwt a, kei chuan kan la ṭhat thu-in ka chhâng a. "Ben-a pawh a rawn lên ka rin nên a lo va'n lang har êm êm," ka tih lai chuan Laltetea a rawn lût thut mai. Kimkimi bulah ṭhuin, "Kimkim, kan zin chhûng khan i lo fing sawt em, nge i ât ngaiin i la â reng?" tiin a rawn fiam nghâl ringawt a. Kimkimi lah lo duai bik lo, "Nang ai thlâwt chuan ka fing, ka chimawm ve lo bawk, i hlei si, in zinna-ah chuan an lo ngei ngawt ang che," tiin a fiam lêt ve bawrh bawrh a. Zovi chuan, "Laltete, lo kal teh, runhmui in nei em? In neih chuan va la rawh, Mimi-ah hian ka thlâk duh a, i ei ve dâwn nia," tiin a rawn au a. Laltetea chuan, "Kan neih leh neih loh ka va'n hre lo, ka va en chhin," tiin an inah chuan a va kal a. Rei lo tê-ah chuan a rawn lêt leh vat a, runhmui tlêm chu a rawn keng a, "Kha, hei chiah hi a awm, a tâwk mai ang ti raw," tiin Zovi chu a han pe a. Zovi chuan, "Lo kal r'u, a ei theih tawh," tiin min lo ko hlawm a, kan pali chuan tui ti tak chuan kan ei ho a. Ben-a a rawn lên ve ka rin nên a lo lang thei rêng rêng lo mai a; mahse, a leh lam takah chuan a ṭha ka ti zâwk. A chhan chu, Laltetea hian a ngaina vak si lo a.

Kan ṭhianzahova kan awm ho lohna a rei tawh bawk nên sawi tûr kan ngah tlâng khawp mai. Zovi leh Kimkimi chuan Ben-a nêna kan chanchin an lo sawi ri leh thut ṭhîn a, Laltetea a awm ve reng bawk si a, a nuam lo ru ang reng hle. Tlai lam dâr 4 a lo ni dêr mai, Kimkimi leh Zovi pawh chuan hâw zai an rêl ta a, kei leh Laltetea chiah kan awm a. Laltetea chuan, "C.O.C khel ila," a ti a. Kei chuan, "Ka peih lo, khelh dân pawh ka thiam lo," tiin ka chhâng a. Ka bulah chuan ngawi reng hian games chu a khel ngar ngar a, kei pawh ngawi rengin TV ka en hle hle a. Naktûk sikul ṭan a ni tawh si a, ka zirlaiah rilru pêk ka ngai a ni tih ka hre chhuak thut a, ka room-ah lehkhabu ka va la a, "Hawh, Tete, lehkha zir zâwk ang," ka'n ti chu, "I mâwl thut thut ṭhîn a nang chu, zir hun pawh a nih loh hi, sikul kan ṭan hunah note thar te min pe ang a, kan zir thei zâwk ang, pâwngpaw zir ngawt ai chuan note fel fai deuh nêna zir kha a hlâwk zâwk," Laltetea chuan a han ti a. A thu sawi chu ngai pawimawh lêm lo chuan kan zir tâwpna aṭang chuan ka zir chhunzawm ve tawp a.

Ka nu bazar pawh a rawn haw ve ta a, a rèi êm êm chhan kha a ṭhiannu a thi tih a lo hriat vâng a lo ni a. Ka nu chuan, "Tete, hei ka ṭhiannu a thi a, zanin chu mitthi inah i nu nên kal kan duh dâwn si a, ka lo haw hmá chu Merry hi lo awmpui rawh aw," a han ti a. Laltetea chuan a lo 'aw' ve mai a, zanriah pawh Laltetea leh a nu chuan kan in lamah an lo ei leh a. Tichuan, mithi in lamah ka nu te pawh an kal nghâl a, thleng ka sil lai te chuan Laltetea chuan, "Hei, awmpuinu, fai deuh khan sil ang che, i sil fai loh vaih chuan i sil ṭha leh vek dâwn a nia," nui vur vur chung chuan min han ti a. Thleng ka sil zawh chuan Laltetea chu ka chûm vak vak a, "Hawh, ramhuai film a chhuak dâwn, min enpui rawh," ka ti a, ngawi reng chuan min enpui ve mai a. "The Ring" tih film kha kan en a, a hlauhawm ang reng. Ramhuai TV aṭanga a lo chhuah lai vêl phei kha chu ka râp leh zual a, Laltetea chu ka sik vak a, "Awi, ka hlau lutuk!" ka ti chhên a. Laltetea chuan a ning deuh ni ngei tûr a ni, "I hlauh chuan en ve lo mai la, 'Awi ka nu, ka hlau,' tiin i mit i hup a, i kut kâr aṭangin i en leh tho si. En rawh, min sik pilh vek dâwn, Xena a chhuah kha, en zâwk ang," tiin Xena chhuahna channel chu a han hmet daih a. Xena film pawh hmuhnawm ka tih tho avâng chuan ngawi rengin ka en ve mai a.

Laltetea TV en tui lai tak chuan, "Tete, sana ka present ang che, i duh em?" ka han ti a. Laltetea chuan min en lêm lo chuan, "Duh e le," a ti ringawt a. Kei chuan, "Mit chhîng rawh," ka han ti a. Laltetea pawh a mit a chhîng ve mai a, chu ve leh a bânah tak chuan ka sehsak a, a râk chiang kher mai. Nui vur vur chung chuan, "Kha, kha, Sana chhuak thar battery ngai lo chi a nih kha," kan ti chu Laltetea chu a sa kher mai. "I va han chhah tak, i sehna hnu a lang kur alâwm hei, a natzia, khawi ka seh ve dâwn che," tiin Laltetea chuan ka kut chu la-in min seh a tum a. Ka lo ṭang nasa bawk nên, "I ṭang nasa êm mai, ka khawngaih mai ang che, ka seh leh lo mai ang che," a han ti ringawt a. Chu veleh kei chuan, "Pen tui rawng mawi chi ka nei asin, ka sehna hnu langah khan Sana lem ka lo ziah sak ang che," ka han ti a. Laltetea chuan a duh lo nasa khawp mai; mahse, ka tih luih tlat avâng chuan a indawh hle hle ta tawp a, khi vur vur chung chuan, "I hlimna te hi a ho thei sia maw," a ti ringawt a.

Laltetea chuan, "Tih tûr a vâng e, khawi i sam ka lo phiarsak ang che," a ti a. Kei lah chu ka lo phûr nasa mai si a, "Yes! Lawk aw, samṭâwnna ka va la ṭeuh ang," tiin ka room-ah chuan ka va lût zawk a, samṭâwnna sîn tê tê chu Laltetea pe-in, "Kha le, min phiarsak tawh rawh le," tiin chhuatah chuan ka ṭhu tawp a. Laltetea chuan sîn tê tê hian ka sam chu min phiarsak a, a phiar thiam reuh phian leh nghâl a. Ka lu miin an khawih hi chuan ka mut a lo chhuak tlat zêl, a phiar rei telh telh a, ka muthlu nasa tulh tulh a. Laltetea chuan min khawngaih deuh a ni ngei ang, "Ṭhutthlengseiah hian mu teh, i muthlu nasa êm mai," a han ti a. Kei pawh chuan, "Nia," tiin mut chhuak deuh chuan ṭhutthlengah chuan ka han mu a. Laltetea chuan ka sam chu min phiarsak chhunzawm leh ta a, ka sam a phiar zawh lai pawh ka hre lo, ka lo muhil nghet tak tak chu lo niin.

"Bawihtê, tho teh, Merry, tho teh, i khumah va mu rawh," tiin ka nu chuan min lo sâwi nawk nawk a. Ka harh chuan Laltetea chu a lo awm tawh lo va. Ka nu chuan, "Nichin lawk khan a hâw a nih kha," a ti a. Kei pawh chuan ka room lam ka pan ve nghâl mai a, ka khum ka thleng chiah ka muhil leh nghâl. Zîng hma takah ka tho a, sikul kal tûrin ka insiam a, ka nu rawngbâwl ka pui bawk a. Laltetea a thawh leh thawh tawh loh ka va en a, a lo la tho lo chu niin. A nu chuan, "Va kai tho rawh, sikul kal in ngai a ni lâwm ni?" min ti a. Laltetea room-ah chuan ka va lût a, "Tho rawh, tho rawh, thatchhe lutuk mai, tho rawh," tiin ka sáwi nawk nawk a, thawh mai tum lo chuan a bawkkhup zawng chuan a han mu leh ta deuh deuh a. Chutah a hnungzâng ṭhutin, "Ka sakawr paṭek, paṭek," tiin a samah ka kêk bawk a. A lo harh chiang kher mai, "Mâwli, mâwl hmuar, min va dîm lo ve," thinrim tâwk hian a ti a. Kei lah chu ka nuih a lo za nasa mai si a, "Sikul kan kal dâwn, tho rawh, chaw ei vat vat la, ka lo sâwm dâwn che nia," ka ti a. Hâw mai chu ka tum a, Laltetea chuan, "Ka taksa hi a sil vek, min lo chûm bawrh bawrh teh, ka hnungzâng vêl hi a rawl ṭhêm ṭhûm mai," a tih avângin rei lo tê chu a hnungzâng chu zawi tê tê chuan ka chûm a. Thâwk leh khatah na tâwkin ka chûm vak a, kan in lamah ka tlân haw daih a. "Almera, i châk dâwn lo chiang lutuk," tiin min lo ûm nghâl a, choka-ah ka biru ka ti chu ka nu chuan ka awmna a lo hrilh a. Choka a rawn pan lai chu ka hmuh avâng chuan tlânchhiat vat chu ka tum a, mahse min lo man leh hman bawk si a, ka chalah chuan min kuk vak vak a. Ka nu chuan, "Nangni pahnih chu, zingkâr kârah engatinge in lo inhauh leh hman a," a han tih chuan Laltetea chuan, "Mi muhil hle hle min rawn kêk vak a nih kha, chuan ka hnungzâng ah na tâwkin min chûm bawk a," a han tih chuan ka nu chuan, "Merry âtzia hi chu aw... hnungzâng ah an inchûm vak vak ngai lo, a hnang thei asin, vawi khat mah chûm tawh rêng rêng suh," tiin ka nu chuan min hau nek a. Laltetea chuan min lo nuih vur vur a, a lei min chhuah khum bawk a, kei chuan ka kut tum ka lo hmuh ve bawk a. Ka nu chuan, "Tikhan inchhiat khum vak vak suh u, sikul kal in ngaih kha, chaw ei ula, sikul kal rawh u, tlai in bânah dâwrah min lo pui dâwn nia," a ti a. Laltetea pawh an in lamah chaw ei tûr chuan a hâw phei ta a, kei pawh chaw ka ei nghâl a.

Chaw ka ei kham hma-in Reuben-a chuan sikul kal tûrin min lo sâwm a. Ka ei tui laklawh si a, lo lût rih tûrin ka ti a, ka puar hnu chuan Laltetea sâwm ve ka tum a; mahse, a lo kal daih tawh a. 'Ngatinge min sâwm lova a kal chu le ka ti rilru a. Ben-a chuan, "In inhâu em ni?" a ti a. Kei chuan, "Hâu lo ve, nichin deuh khan a tho duh lo kha ka chûm vak a, mahse a thin chu a rim kher lo ang," ka ti a. Ben-a nên chuan kawng tluanin kan tîtî char char a, sikul kan thleng har lo hle mai. Kan class thleng min thlah a, ka ṭhiante ho chu an lo kim ṭhap mai, min lo chhaih vak vak leh nghâl a. Reuben-a chuan, "Chhûn chawlhah thil ei ho ang u aw, kawng chhak Restaurant-ah zâwk khan, ei man chu ka tum vek ang, in ṭhian hovin lo kal vek r'u aw..." a tih chuan ka ṭhiante chu an lo phûr nasa khawp mai a. Puipuii chuan, "Kei chu ka ei ṭeuh dâwn a nia, min pêksak leh loh vaih," a ti a, nui vur vur chung chuan Ben-a pawh an class lamah a phei ve ta a. Laltetea ṭhutna lamah chuan ka va phei a, "Eng vangin nge min kalsan daih? Min sâwm ve tûr che alâwm," ka han tih chuan Laltetea chuan, "I bialpa Reuben-a'n a lo sâwm reng che kha, in pahnih ruala lo kal ve kha ka peih hleinêm," aw vîn deuh tak hian min ti a. Kei chuan, "I ho êm mai a, Reuben-a hi mi fel deuh mai a nia, i hriatchian hunah chuan fel i ti ve ngawt ang," tiin ka kalsan ve hmak a.

Class kan lâk lai te chuan Laltetea lam ka han hawi ṭhîn, mahse ani chu vawi khat pawh a lo hawi lo. Ka rilru chu a nuam lo ang reng. Chhûn chawlh a lo ni a, Laltetea chu a ṭhianpa Mapuia nên an chhuak dûn a, biak pawh min be lo. Ben-a te ṭhianho chuan kan class pâwnah min lo nghâk a, kan ṭhianho pawh chuan kan va zâwm ve vat hlawm a. Restaurant kan thlen chuan ei tûr kan order nghâl a, ka thil ei pawh chu a tui tak tak thei lo, ka ṭhiante ho lah chuan nuam an ti phian leh nghâl a. Ka han hawi kual chu Laltetea leh Mapuia ka hmu a, an rual chuan hmeichhe pahnih hi an lo awm ve a, hmeichhe pahnih te pawh chu kan class a mi tho an ni a, mahse kan inkâwm ngai lo va, an hming pawh ka lo hre lo, an bulah chuan Laltetea chu a hlim hmêl khawp mai. Ben-a pawh chuan Laltetea te chu a hmu ve a, "A tu zâwk khi nge a bialnu ni ve?" a rawn ti a. Kei chuan, "Ka hre lo e ahh," tiin ka chhâng a, ka ṭhian ten Laltetea an han hmu ve chu an chhaih leh vak vak ringawt a.

Thil kan ei zawh chuan class lam kan pan tlâng leh vek a, Kimkimi chuan, "Zanin chu Merry te inah riak khâwm ang u," a han ti a. Zovi leh Eli pawh chuan an lo 'aw' ve nghâl a, Sebi leh Puipuii te, Chhani te chu an hman lo va. Kimkimi, Zovi leh Eli te chu an lo riak thei dâwn a, mahse an inah sikul bânah inthlâk tûra haw zuai chu an tum hlawm a. Kei chuan, "Ka nuin 'sikul in bânah dâwrah min lo pui lawk ru,' min ti a, Laltetea nên, in lo kal dâwn chuan kan dâwrah lo kal phawt r'u aw, tichuan kan haw tlâng hlawm ang a, zanriah pawh in lo ei nghâl law law ang a," ka ti a. Zovi chuan, "A pawi miah lo, keimahni hovin rawng chu kan bâwl dâwn nia, ṭhianhova riah khâwm leh chaw ei khâwm hi a lo nuam ber mai, naktûk pawh in in aṭanga sikul kal thei tûrin kan lo insiam lâwk vek ang," tiin a phûr hmêl khawp mai. Sikul kan bân hnu chuan Laltetea chuan, "Dâwrah i nuin lo pêng r'u a tih kha, hâwpui a ngai a ni ang, va kal ang," min ti a. Kei chuan, "I thin a rim hmêl si a, i lo kal peih pawh ka lo ring tawh hleinêm, nih chuan kal ang," tiin kan dâwr lamah chuan kan phei dûn a.

Dâwr kan thlen chuan ka nu chuan, "In lo thlen hun a fuh hle mai, kha pheikhawk ho kha lo rem zung zung rawh u," a lo ti nghâl a, keini pawh chuan kan sikul bag dahin ka nu chu kan pui nghâl a. Pheikhawk kan rem pah chuan, "Tete, chhûna thil i eipui hmeichhe pahnih te kha kan Class-a mi an ni ti raw?" tiin Laltetea chu ka han zâwt ringawt a. Laltetea chuan, "Sam sei zâwk kha Melody a nih kha, sam tâwi zâwk kha Ruatruati a nih kha, kan Class-a mi alâwm an nih. Ruatruati kha ka bialnu atân eng nge i ngaihdân?" tiin min han zâwt lêt a. Kei chuan, "A chhiat vak loh kha, a hrim hrimin i lerh lutuk," ka han ti ringawt a. "Ka lerh loh chu, nang pawh bialpa i neih hi, bialnu nghet ka nei ve tawh dâwn," a ti a, ka chhâng lêt ta lêm lo va. Ka nu chuan, "In va rem chak ve, Chapal rem tûr pawh hi Tete, nangin lo rem rawh aw, Bawihtei'n thawmhnaw hi lo khai ve bawk se," a ti a. Kan pheikhawk rem lai kan han rem zawh chuan ka nu'n tih tûr min hrilh ve ve chu kan chhunzawm nghâl a. Ka nu bulah chuan ka ṭhiante hovin chaw an lo ei tûr thu leh an riah nghâl tûr vêl chu ka hrilh a. Ka nu chuan, "Chutia i ṭhian ten chaw an lo ei dâwn si chuan vawksa rêp ka va lei ang e," tiin a bag nên a chhuak a. Ka ṭhiante pawh an lo thleng ta, min pui nghâl a, kan hna chu ka nu lo lêt hmain kan zo dêr mai. Ka nu a lo lêt leh chuan rem fel tûr eng tham mah a awm tawh lo va, ka nu chuan, "In lamah va haw tawh mai r'u , ei rawng te lo bâwl ula, he lam chu zâwi muangin ka lo ti fel tawh mai ang, hei in ṭhianhova in ei tûrin Apple leh Cake ka rawn lei a, in va ei ho dâwn nia," a ti a. Kan vai chuan kan in lam kan pan ta hlawm a.

In kan thlen chuan kei chuan eng mah ka ti ve peih lo va, Kimkimi pawh chuan, "Rawngbâwl ka thiam lo, Zovi leh Eli hian an thiam lutuk, an pahnihin bâwl hlawm zâwk rawh se," a lo ti ve leh a. Zovi chuan, "A pawi lo, in ei rawng bâwl ka ei duh lo hrim hrim, a tui lo âwm êm mai, tui tâwkin ka'n siam ang e. Eli, nang pawh lo ṭhu mai mai teh," tiin amaha rawngbâwl chu a duh zâwk a. Kimkimi leh Eli, kan pathum chuan TV en chungin kan lo infiam vêl mai mai a, Laltetea a rawn lût a, "Merry, chaw min lo chhum kêp r'u aw, ka nuliani a dam ṭha lo va, ka nuin a va awmpui dâwn a, rawng ka báwl peih lo," a rawn ti a. Kei chuan, "Keima'n rawng ka báwl lo, Zovi choka-ah a awm kha, va hrilh mai rawh. A hrim hrimin chaw i ei tlêm si, chhum kêp kher i ngai mi? Mipa ve si, chaw ei tlêm thei lutuk mai," ka ti a. Laltetea chuan choka lamah kalin Zovi chu a va hrilh a, a rawn lêt leh nghâl a, "Hmeichhe pali in awm a, inpui vek ta che u, Zovi hlîr chu in chêttîr bîk a, hetah nangni ho in lo infiam vêl mai mai a, va pui ve r'u," tiin min rawn hâu vak a. Kimkimi chuan, "Kan peih lo, i duh leh nangma'n pui rawh," ngeiawm deuh hian a han ti a. Laltetea chuan, "Lalṭhakimi hi chuan pasal a hmuh zawh chuan a mak ngawt ang!" a han ti chu Eli nên chuan kan lo nui vak vak a. Chutah Laltetea bawk chuan, "Nangni pahnih pawh kha nui suh u, in hmu zo bîk lo ang," min rawn ti ve nghâl a. Eli chuan, "Zak teh, i va'n zâm lo tak. Zovi zâwkin 'keima'n rawng ka báwl duh,' a tih vâng a nih kha aw," a lo ti vat a. Zovi chuan, "Rawng ka báwl vek tawh a, thleng sil vêl chu an ti ve tawh ang," a rawn ti a. Eli chuan, "Keiin ka sil ang a, Kimkimi'n a tleuh ang," a ti a. Kimkimi lah chuan, "Merry hian min pui ve ang," a rawn ti vat a. Laltetea chuan, "Vai ramah in ṭhian ho hian in luah ho ta ula, in inphût tawn hlawm bawk si a, chaw ei lo hlîrin in awm ka ring," a tih chuan kan ṭhian ho chu kan inen a, kan nui vak vak a.

Zovi eirawng bâwl chu a tuihnaiin a felfai khawp mai. Ka nu a lo hâw ve leh chaw ei kan siam a, ka nu chuan Zovi eirawng bâwl a hmuh chuan mak a tiin fel a ti ngang mai, "Zovi hi chu ka monu atân ka awt khawp mai, a che fel faiin aia upa a zah thiam si, Kimkimi, Merry leh Eli te ho hi chu in chhûngkhur chêtah chuan an lâk tlâk loh, Zovi hi en tawn rawh u," min ti a. Ka ṭhian dangte chuan ka nu thusawi chu an ngai haw lo va, hmangaihna âw zâwk a ni tih a hmêl aṭangin an hria a. Chaw kan han ei ṭan chu Eli chuan Anṭam fê leh a tui hâng chiah a hâwp a, ka nu chuan a zak emaw tiin vawksa chu a suah a. Mahse, Eli chuan, "Eng sa mah ka ei hleinêm, sa hrim hrim chu ka ei lo," a han tih chuan kei chuan, "Ti nge i sawi loh a, ka hre hleinêm, a tui i hâwp tho si a," ka lo ti a. Zovi chuan nui vur vur chungin, "Eli hrawk hi chu a phakar alâwm, sa a ei thei lo a, mahse a tui hâng leh a fê a duh leh tho si! Ngaihtuah duh suh, a ei lo tih ka hriat vângin alâwm artui ka kansak bîk ni," a lo ti vat a. Ka nu chuan, "Khaw nge i artui kan chu? In chhawp si lo a, ei tûr a neih loh êm hi," a han ti a. Zovi chu a nui vur vur a, "Ka thukru lawk a nih kha, Eli, thirbêlah sâwn a awm, va insuah ve mai rawh aw, ka kang ṭeuh mai, ei ṭeuh rawh aw," a ti a. Eli a thawh hma chuan ka tho vat a, Eli artui chu keima'n dawhkanah ka chhawpsak a. Laltetea chuan, "Ti tûr kha lâwm," a lo ti ve vat a.

Episode 18

Chaw kan ei kham chuan pâwnah mei tuahin kan ṭhut hual a, Laltetea chuan, "Mampuia pawh a lo kal dâwn a nia, min lo riahpui dâwn a, Guitar a rawn keng dâwn a, kan zai hlawm dâwn nia," a han ti chu Zovi chuan, "Guitar chu in perh thiam em ni? Zai lama tui pakhat pawh kan awm loh hi," a lo ti vat a. Kimkimi chuan, "Mampuia te chu a zai thiam reuh lutuk, Guitar pawh a perh thiam alâwm, a key vêl kan inzirtîr dâwn nia," a ti a. Rei pawh a ni lo tihah chuan Mampuia chu a lo thleng ve ta a, Eli chuan Kimkimi chu kan ṭhian ho inbiak rûkna bîk ṭawng 'I ki ma kaw' tih ṭawng chuan, "Kimkim, Mampui hi zaitîr rawh aw, chuan Guitar perh chu kan inzirtîr bawk ang a," tiin a sawi a. A sawi dân kha 'Iki ma kaw' tih ṭawng thiam lo tân chuan hriatthiam mai chi a ni bawk si lo, Mampuia chuan, "Het! Het! In English two kha hmang tawh teh s'u, tûnlai hmeichhe ho makzia hi, 'iki ma kaw' tih hlîrin in ṭawng a, ṭawng pangngai hmang ve mai ula," a'n tih chuan Laltetea chuan, "I hrethiam lo em ni? An thu sawi tûr thumal khat an sawi hma apiangin 'iki ma kaw' tih hi an sawi phawt alâwm, chîk mah rawh, i hrethiam ve mai ang," a han tih chuan Mampuia chuan, "Hmeichhe thil tih leh sawi mai mai, ho lutuk, ka chîk peih lo e, a pà lo êm mai," a lo ti vat a. Kimkimi chuan, "Rêl hrep ang u," a lo ti ve vat a. Kei chuan, "Mampui, zai teh, i zai thiam êm kha," ka tih chuan Laltetea chuan, "Hei bottle a awm alâwm, kan ṭhut bial ang a, chuan ka'n ti vir leh ang a, chuta a kawh fuh fuh an zai ang, Guitar an inperh pah bawk ang a," a tih chuan Zovi chuan, "Mampui leh nang bâkin Ṭingṭang in perh thiam hleinêm, engtin nge kan zai mil theih ang a?" a han tih chuan Laltetea chuan, "Chu tak chu alâwm nuihzatthlâk dâwn...," a sawi zawh hma chuan Mampuia chuan, "A ṭha dâwn hle mai a, tel ang u, khawi keima'n ka lo ti vir ang," tiin bottle chu a han ti vir a.

Bottle chuan Eli a kâwk tlat mai! Mampuia chuan Guitar chu Eli a han pe a, Eli chuan a lo la ve mai bawk a, kan kut chu kan lo bêng vak vak a. Eli chuan Guitar perh chuan a han zai ta, a key a hmeh dân a dik lo nuai a, nuih loh tum paw'n a theih loh, kan nui nasa lutuk chu a zai lai chu a ti tâwp hmak a, "A tâwk tawh, ti vir leh tawh rawh u," a ti a. Mampuia chuan bottle chu a han ti vir leh ta a, keima zâwnah a ding ve ta tlat mai! Guitar chu Eli chuan min pe a, Guitar ka perh hma chuan a key âwm ang deuh chuan ka kut chu ka han rem vêl a, ka perh chhin a. A rîk dân a dik lova ka hriat avâng chuan ka han herh ve ngawt a, chutah le, Laltetea chuan, "Het, i perh thiam chuang lo, i duh duh herh ve pawp pawp suh, i ti lài vek ang asin," nui vur vur chung hian min ti a. Kei pawh chu Eli ang tho chuan ka zai uang vak vak a, Guitar pawh chu ka duh dân dân chuan ka perh a, Laltetea tih loh chu an nui vek a. Ka duh tâwk hnu chuan Laltetea chuan, "Kei chu nuihzatthlâk pawh ka ti ve lo, ramhuai lunglêng tâwk râk chiam chiam a ang a, ka râp zâwk," nui vur vur chung hian a han ti a. Kei chuan, "I thiam bîk âwm lo," tiin bottle chu keima'n ka han ti vir a, Mampuia a kâwk tlat mai. Mampuia chu a han zai ve ta a le, a thiam tih bâk sawi tûr a awm lo. A zai zawh chuan kut kan lo bêng vak vak a, bottle chu kan ti vir ve leh a, Laltetea zâwnah a ding ve ta tlat mai. Guitar chu a han perh ṭan a, a han zai ṭan ta, H. Lalṭhakima hla 'Si âr chawngmawi' tih kha a han sa mai chu leh, ka hmul thi a ding uar uar thei! Mampuia ai daihin a lo zai thiam a, mak kan ti tlâng kher mai! Ka nu pawh a lo chhuak a, Laltetea zai chu ngun tak mai hian a lo ngaithla ve a, ka nu pawh chuan thiam a ti ve kher mai.

Laltetea zai zawh chuan ka nu chuan, "Tete, i lo va'n zai thiam êm êm, i lo va inthup thei ve," a lo ti a. Keini ho pawh chuan ka nu thusawi chu kan lo thlâwp chiang kher mai. Laltetea chu ka nu chuan 'zai leh teh,' a tih tlat avângin a hnial ngam lo va, a zai leh ta a; mahse, sap hla a sa tawh a, a aw erawh a mawi zual deuh deuh emaw tih mai tûr hian a zai chu ngaihthlâk a nuam a, a zai lai chuan tu mah kan ṭawng lo, ngawi rengin kan en vung vung ringawt a, a zai zawh chuan kan kut chu uar thei ang berin kan bêng vak vak a. Ka nu bawk chuan, "Idol vêlah tel ve la, i thiam si a, i thleng sang ngawt ang," a han tih chuan Mampuia pawh chuan, "Ṭhianpa hi i lo va'n zai thiam êm êm, sikul vêlah pawh i zai ngai si lo va, i va'n ti uiawm, i thiam si-a aw, zai ve char char tawh teh," a lo ti ve vat a. Ka nu chuan, "In chhûng lamah lo lût r'u, ei tûr ka siam ang che u, Mampuia leh Laltetea ten zai in min âwi ve thung ang a," a han tih chuan Zovi chuan, "Yes, lût ang u, ka zai ve hman lo chiah chiah, ka va'n vânnei êm," a lo ti vat a. Ka nu sawi ang chuan in chhûng lamah kan lût ta hlawm a, ka nu chuan wai wai leh thei tui vêl in tûr min lo chhawp a. Laltetea leh Mampuia te an inzai chhâwk bawk a, nuam kan ti tlâng hlein ka hria. Zân dâr 10 leh a chanve a lo ri dêr mai, ka nu chuan, "Naktûk sikul kal tûr in ni bawk si a, mu hma rawh u," min ti a. Laltetea leh Mampuia te chu Laltetea te in lamah an mu a, keini ṭhian ho chu ka room chhuatah mutna kan phah a, kan mu ta hlawm a. Kan mut pah te chuan Laltetea zai thiam zia vêl ngawt chu kan sawi a, kan muhil thei lawk lo va, kan han tîtî chiam hlawm a, sana kan han en chu dâr 1 a lo ni der tawh mai! 'Tu mah ṭawng tawh loh tûr, muthilh tum ang u,' kan ti a, kan ngawi ṭhap hlawm a; mahse, tu mah chu kan mut a chhuak lo, thâwk leh khatah kan nui rual vek a, kei chuan, "Muthilh tum tak tak ang u," ka ti a, kan muhil vat ta chuang lo va.

Zing dâr 7 a ri tawh ang tihah chuan ka nu chuan min lo kai tho va, ka pa-in min lo call chu niin. Ka tho vat a, ka pa chuan, "Bawihte, i û nên inbe r'u aw," min ti a. Ka û chuan, "Vawiin lamah rawn kal kan tum a, ka nu kha rawn koh kan tum a, Palai tûr te ho nên kan lo kal dâwn a nia, ka nu rilru lo hmin tum ve rawh aw," min tih chuan ka lâwm lutuk hi sawi ngaihna pawh ka hre lo. Ka ṭhiante ka hrilh vat a, anni pawh chuan min lawmpui tak zet a ni. Ka nu leh pa an inneih leh chuan a nuam dâwn êm asin, chhûngkaw pangngai tak kan ni ve tawh dâwn a nia, tiin ka ngaihtuah a, ka hlim tak zet a ni. Choka lamah ka nu chuan eirawng a lo bâwl mêk a, engtin nge ka han sawi ṭan ang le, ka inngaihtuah hmasa tê tê a, ka zâm lutuk chu ka che sual nawk nawk a. Ka nu chuan, "I pa chuan eng nge a rawn sawi a?" min ti a. Kei chuan Palai rawn tirh an tum thu leh vawiin lama an lo kal tûr thu ka hrilh bâkah ka thiam ang tâwk chuan ka pa nên innei leh tûr chuan ka han thlêm vêl chiam a. Ka pa nên an inṭhen chhûnga kan unau kan tuar dân vêl te chu ka thiam ang tâwk chuan ka han hrilh ve chiam a. Ka nu chuan min chhâng lêm lo va, kan unau vâng tal pawh chuan ka pa nên chuan an inneih leh ngei chu ka ring tlat a, ka hlim ru êm em a ni. Ka pa leh ka û u te an lo kal dâwn si a, sikul kal loh mai chu ka tum a, mahse ka nu chuan, "Sikul kal loh ngawt a ṭha lo, i pa te ho chu tlaiah bâk an lo thleng dâwn lo," min tih avângin ka ṭhiante rual chuan sikul lam chu ka pan ve ta zâwk a. Class kan lâk lai te pawh chuan ka rilruah lehkha rêng a lang lo, ka rilru-in ka nu leh pa, ka unau te hlîr ka ngaihtuah a. Ka ṭhian dangte zawng ai chuan Laltetea chuan min lawmpui leh zual a, a chhan chu ani hian ka pa ka ngaih ṭhinzia min hriatpui tlat a ni. Chhûn chawlhah pawh Reuben-a bulah awm lo chuan Laltetea ho nên kan Class-ah ṭhuin kan chhûngkaw chanchin vêl ngawt chu kan sawi a. Laltetea lo hlauh ber chu ka nu leh pate an inneih leh chuan ka pa te khaw lamah kan chho daih ang a, kan inhmuh theih loh kha a lo hlau ru êm êm a. Kei chuan, "Hetah kan awm ka ring," ka lo ti vat a.

Sikul bân thuai thuai chu ka châk a, sana chu ka en deuh chhen a. Laltetea lah chuan, "Insûm rawh, insûm rawh," min lo ti ve sek a. A tâwp a tâwpah chuan dâr 3 a lo ni ve ta, ka phûr lutuk chu Laltetea chu hawsan mai ka tum a. Laltetea chuan ka bag-ah tak chuan min pawt a, "I mak chawng chawng thei lutuk, min nghâk ve ta che," a ti a. "Ka hmanhmawh teh rêng nên, hmanhmawh rawh," tiin ka lo tur ve sek bawk a. Ka kal dân pawh ni dang zawng aiin ka kal chak a, Laltetea chuan, "Ni tin ti hian awm la chu, ka ûmna-ah che ka chau thei ngawt ang," a ti ringawt a. In ka thlen leh ka pa te lo thlen a inrual a, ka pa chuan, "Kan thleng rual chiah a nih hi," a lo ti vat a. Kei chuan ka pa chu ka kuah vat a, ka nu pawh chu ka kuah a, ka nu chuan, "Laltetea nên khan an thawmhnaw ho hi lo khaipui rawh u," a lo ti a. Phûr zet hian ka û bag rit zet chu in chhûng lamah ka chawi lût a, Laltetea nên kan inen ṭhîn, ka hlim lutuk chu a ni pawh chuan min lo hlimpui ve êm êm a. Thingpui te an in zawh hnu chuan, ka pa ten an lo hruai la pavalai ve tak pakhat hian thu a sawi ṭan ta a. Palai rawn kal chu mi pathum an ni a, an indin chhâwk a, kan unau chanchin te an sawi chiam a, ka nu pawh chuan ka pa nên inneih leh chu a rem tih thu a sawi chhuak ve ta a. Ka hlim lutuk chu Laltetea chu ka kuah chiam ringawt a.

Kan Palai te ho te, Laltetea te chhûngkua leh ka pa te ho nên chuan zanriah kan ei tlâng hlawm a, kan chaw ei pawh a tui tlâng khawp mai. Ka lo khi leh vur vur ṭhîn a, ka û chuan, "Bawihtei hian nuam a lo ti ber a ni hi," a lo ti vat a. Chaw kan ei kham chuan ka pa te lo hruai Palai ho chuan khaw lamah ka nu chu ka pa ruala chho ve rih tûrin an ti a. Ka nu chuan sikul lam kha min ngaihtuahpui a, chawlh ringawt kha a phal lo va, ka û-in min lo awmpui mai se a ti a, ni hnih khat hnuah he lamah lo chhuk leh zâwk chu an tum ta a. Kei pawh chuan ka nute ruala chhoh chu ka ngên buai duh lêm ta lo va. Ka nu chuan a kal hma chuan pawisa te min pe a, ka û hnênah chawhmeh leina vêl pawh a dah a, tichuan kan Palai te ho nên chuan ka pa te khaw lam chu an pan ta a.

Ka û leh Laltetea te nên chauh chuan kan inah kan awm ta a, ka û chuan ka sam min phiarsak a, ka muthilh lai pawh ka lo hre leh pek lo. A tûk ka han harh chu Laltetea pawh kan inah a lo riak chu niin, ka û chuan, "Nizânah C.O.C kan khêl tlaivâr alâwm, a thiam phian leh nghâl," a han tih chuan kei chuan, "Ânu-in games khelh a phal em ni? Thlêng min siltîr chuan ânu te lo haw hunah ka hrilh ang," ka han ti chu ka û chuan, "I ngam chuan i sawi dâwn nia, ka vaw khawp ang che i sawi chuan," min ti a. Kei chuan, "Thlêng min siltîr lo la, ka sawi lo a ni mai," ka'n ti leh hrâm a. Zîng chaw kan ei kham chiah tihah chuan Reuben-a chuan sikul kal tûrin min lo sâwm a. Laltetea ka sâwm tel ve a, kan pathum chuan sikul lam chu kan pan tlâng a, a nuam lo duh ang reng. Ben-a nên kan thingphunna hmun kan thlen chuan Ben-a chuan, "A lo ṭhang ve tawh hle mai a ti raw, kan kut a nung dûn hle mai," a han ti a. Laltetea chuan, "Nakinah min hmuh loh hunah ka pháwi daih teh ang," a lo ti fiam a. Ben-a a ṭawng hma chuan ka chhâng lêt vat a,"Thingkûng tihduhdah loh tur, i lo phàwi vaih chuan i châk lo ang," ka tih chuan Ben-a pawh chuan a chhâng lêt ta lêm lo va. Class kan thlen chuan ka ṭhiante chuan ka nu leh pa chanchin chu min lo zâwt nghâl a, kei chuan phûr zet hian ka nu leh pa inneih leh thu chu ka hrilh vêl a, "Zanin pawh lo riak leh ula," tiin ka sâwm leh hlawm a. An rem ti vek a, zanin chu wai wai thak tâwka chhum kan tum hlawm a.

Class kan lâk laklawh lai chuan Kimkimi rilṭâm lutuk chuan a chaw pài chu a ei ru a ei ru a, kei pawh chuan ka eipui zeuh zeuh a, a tui phian leh nghâl a. A rûk tê chuan Kimkimi chaw pài chu kan ei zo vek a, Zovi leh Eli te pawh chuan chaw an lo pài ve reng chu lo niin, Zovi chuan a chaw pài chu min lo pe a, "Kha, hei Eli hian min lo pài kêp reng a, ka chaw pài hi Kimkimi nên khan ei leh r'u," tiin min pe a. Kan Miss a lo hawi loh kâr tê tê-in kan ei ru a, Kimkimi nên chuan kan inen ṭhîn, kan innuih leh vak vak a. Chaw ka ei rûk lai tak chu Laltetea chuan min lo hmu fuh a, Miss auh tum ni âwm fahran hian a kâ chu a han âng ang vêl a. Ka hlauthâwng deuh chu ka chaw ei lai chu ka hâk a, ka khuh vak vak a, Zovi chuan tui min lo pe a. Laltetea lam ka hawi leh chu lehkhabu hian a hmài a lo khuh a, a lo nui char char chu lo niin. Ka lam a lo hawi leh chuan ka kut tum ka lo hmuh vat a.

Class kan bân hnu chuan ka ṭhiante chuan an inthlâk phawt zawha lo kal an tum thu an sawi hlawm a, kei leh Laltetea chu hâw mai kan tum lai chuan Ben-a chuan min lo nghâk reng chu niin, "Ka thlah duh che a," a han tih chuan Laltetea chuan, "Mampuia ka'n sâwm lawk, in duh leh min lo nghâk ula, in hmanhmawh chuan min lo kalsan mai r'u aw," a ti a. Kei chuan, "Zâwi muangin kan lo va kal ang e, lo hmanhmawh ula," ka ti a. Ben-a ve thung chuan, "Kan lo nghâk zâwk ang che," a tih tlat avâng chuan kan nghâk a, Mampuia leh Laltetea chu rei lo tê hnuah an lo phei ve nghâl a. Laltetea chuan Mampuia chu, "Lo riak leh la, Merry ṭhiante ho pawh an lo riak leh dâwn a nia, Guitar rawn keng leh la, kan zai ho leh hlawm ang a," a tih chuan Mampuia pawh chuan a lo 'aw' ve mai bawk a. Mampuia chuan Ben-a chu 'Lo kal ve la,' tiin a han sâwm chhâwng leh a. Ben-a pawh chuan, "Ka lo lêng ve dâwn nia, a nih chuan," a ti awlsam êt leh nghal. Mampuia'n min pênsan hnu chuan Laltetea leh Ben-a, kan pathum chuan kan in lam kan pan a, kan in a lang thei tawh maw tihah chuan Ben-a chuan, "Zânah ka rawn lêng dâwn tho si a, he lai thleng hi ka lo thlah mai ang che aw," a han tih chuan Laltetea chuan, "Nia, i chhoh lehna tûr a hla mai mai, ta ṭang hian lêt tawh mai rawh," nui vur vur chung hian a han ti a. Ben-a chuan, "Nangni pahnih hi in lo in sual ang e aw, kal kawngah te khan in va inhâu leh ang e," nui vur vur chung chuan a lo ti ve bawk a. Laltetea chuan rang zet hian, "Ka lo duat ngawt ang, hlauthawng suh," a ti leh hrâm a. Ben-a a kal liam chiah maw tihah chuan, "Tu nge in thleng hmasa sa sa," tiin a tlân thut a. Kei pawh chuan rang zet hian ka ûm nghâl a, thingzungah ka inpal a, ka tlûkna lamah ka khûp chu lungah ka insawh palh a. Laltetea chuan ka tlu tih a hmuh chuan rang zet hian a lo lêt leh vat a, ka khûp chu a thi nasa ang reng, mittui tling pûr chuan, "Nangmah vâng vek a nih hi, ti hi chuan ka khûpah ser a awm reng tawh dâwn a nih hi," ka'n ti phei chu Laltetea chu a inthiam lo ngei mai. Eng hnim emaw ni hi a va la a, a tui a sâwr a, ka khûp thi nasa lutuk chu a zia ta deuh a, kan in thleng min pua a. Ka û chuan ka khûpa hnawih tûr damdawi a lo la vat a, damdawi min hnawih lai chuan a thîp ka ti lutuk chu ka mittui chu a lo tling pur a, Laltetea lah a lo inthiam lo telh telh bawk si. Ka û chuan, "Khûpa ser awm te mai mai chu mihring zia alâwm, i naupan laia i khûpa ser a awm lo kha a mak zâwk ngawt alâwm," min ti a. Kei chu ka ngawi reng a, ngawi reng chuan ka room lamah ka chho a.

Episode 19

Ka room-ah chuan ka tawm tlat a, ka û min koh vak vak pawh ka chhâng lo a. Laltetea chu ka room-ah a rawn lût a, "Hei i ei tûr tui deuh deuh ka va lei ṭeuh che a nia," tiin ei tûr leh in tûr a lei ho min pe a, a lo lei tam ang reng, man to tak tak vek a ni leh nghâl a. Laltetea bawk chuan, "Tikhan min ngaidam tawh em?" a han tih chuan kei pawh chuan, "Ka ngaidam hrâm mai ang che, i insêng nasa bawk si a," tiin a thil lo ken chu ka ei mial mial a, a tui phian leh nghâl. Ka û ka ko a, Laltetea pawh chu ei ve tûrin ka ti a, kan pathum chuan kan ei ho a. Ka thinrim a reh tawh maw tihah chuan Laltetea chuan, "Ei tûr ka lo hawn ho hi maw, Dada dâwrah i hmingin a bâ-in ka la alâwm, naktûkah rûl rawh aw," min ti chiah mai chu ka thil ei lai chu ka chhâk chhuak leh vat a, "I va'n zâm lo tak, min lei ve êm êm emaw ka ti a, ka rûl âwm lo, pawisa ka nei rêng rêng lo," vîn zet hian ka ti a. Chutah nui vur vur chung hian, "Ka tih der che a nih kha, keima pawisain alâwm ka lei, thlamuang deuh khan ei rawh," min ti a. Kei chuan, "A hnuah min ṭhîng miah suh ang che, "tiin kan ei leh hrâm a.

Ka ṭhiante pawh an lo thleng ta a, ka û chuan Zovi chu a nêl nghâl hle mai, eirawng te an bâwl dûn a, an inkâwm ngeih nghâl êm êm mai a ni. Ka û hian chawhmeh bai hi a thiam êm êm a, chutiang bawkin Zovi pawhin. Eirawng bâwl thiam ve ve-in an han bâwl dûn chu, kan chawhmeh ho pawh a tui hmêl hlawm khawp mai. Ka û te chawhmeh bai rim chu Laltetea nu (Nu Chhuani) chuan a lo hria a, a rawn lût vat a, "In chawhmeh rim a va tui ve, ka rawn insuah ve dâwn," a rawn ti a. Ka û chuan, "Chaw ka chhum ṭeuh mai, ka nu leh pa an awm chuang lo va, hetah ei ho vek ang u," a tih chuan Nu Chhuani chuan, "Kei paw'n Vawksa ka chhûm alâwm. Tete, chaw bêl leh vawksa bêl kha he lamah lo chawi phei rawh, hetah chaw kan ei ang," tiin Laltetea kawta ball khalh lai chu a han ko vak vak a. Laltetea lah chuan, "Merry kha tîr ve mai la, ka laklawh," a lo ti awlsam êt leh nghâl a. Nu Chhuani chuan, "In ṭhian ho khan a nih leh va cháwi mai teh u, Laltetea tirh harzia hi chu aw..." a ti a.

Kan chhuah pah chuan kan ṭhian ho chuan Laltetea ball chu kan pêtsak kan pêtsak a, Laltetea thinrim chuan, "Mi mâwl pathum, kal vat teh u, inbual hma ka thlan ka ti tla duh a nia," vîn tâwk hian min lo ti a, kan pawisa lo tlâng kher mai. Nu Chhuani vawksa chhum pawh a tui hmêl khawp mai, kan ril a ṭâm tlâng tawh bawk a, chaw ei kan siam nghâl a, kan siam ṭan tihah chuan Laltetea inbual zo pawh a lo lût ve nghâl a. Kan chaw ei dawhkan chu a khat ṭha chiang kher mai, kan chêp lek lek zâwk a ni. Chawhmeh an siam thiam hlawm bawk a, kan chaw ei pawh a tui tlâng kher mai.

Chaw kan ei kham hnu chuan ka û chuan, "Zovi chuan ei rawng bâwl min pui vek tawh a, in ṭhian pathum khan thlêng va sil ve tawh rawh u," min ti a. Kei chuan, "Ka khûp ka tih nat hi, thlêng engtin nge ka sil theih ang a," ka'n tih chuan ka û chuan, "I khûpin i sil dâwn hleinêm, i kutin alâwm i sil dâwn, va sil mai mai teh," min tih chuan ka ṭhiante pahnih Eli leh Kimkimi chuan, "Keimahni'n kan lo sil mai ang, Merry te chu thlêng sil dâwnin chhuanlam a siam ve ziah alâwm," nui vur vur chung hian min ti a. Nia, thlêng sil ber kher hi chu hna zawng zawng zînga ka peih loh ber a ni.

Zân dâr 7 a ri ṭêp tihah chuan Ben-a pawh a rawn lang ve ta, ka lo be vat a, a hnu rei lo tê-ah Mampuia pawh a rawn thleng ve nghâl a. Kan kawtah mei kan chhêm leh a, ka û ho chuan mei chu kan ṭhut bial a, Mampuia chu a zai hmasa ber a. A zai zawh chuan Ben-a chu guitar a pe a, "Kha, i zai ve hun," a han ti ringawt a. Ben-a chu a zai duh pawh ka ring lo va, "Eng hla nge ka sak dâwn, thlang rawh?" min ti a. Kei chuan, "Ka hre lo, i duh duh sa rawh," ka lo ti a. Ben-a chuan Sap hla a sa a, ka rin loh lam daih a lo ni! Ben-a pawh hi a lo zai thiam kher mai, a aw chu a thám deuh bawk si a, ngaihthlâk a nuam kher mai. Ka ṭhiante pawh chuan mak an lo ti a ni ang, an meng phâwk nasa. A zai zawh chuan Laltetea chuan a lo fak hmasa ber a, "I va zai thiam ve," a lo ti chiam a. Keini ho pawh chuan kan lo fak ve bawk a, Laltetea chuan, "A mi mala zai ai chuan a huhovin zai tawh ang u, Vanlalsailova te lâr vanglai a ni bawk a, an hla hi sa ang u, 'Hmêlṭha' tih kha sa ang u aw," a han tih chuan kan lo 'aw' vek a. Kan vai chuan kan zai ho a, a nuam phian mai. Laltetea leh Ben-a pawh an innèl hmêl tawh viau, a rûk chuan ka lâwm hle mai.

Kan ṭhian dang te ho chuan Ben-a nên chuan thei tui in tûr lei tûrin min tîr a, chutia keini kher min tirh chhan chu kan pahniha min thlah fâl an duh vâng a ni tih ka hrethiam nghâl a. Ben-a chu ka zui ve mai a, ka khûp intuam bûr a hmuh chuan, "I ke i ti nâ elaw! Hawh, ka lo pua ang che," a ti a. Dâwr thleng min pua a, dâwr nghâktunu chuan min lo nuih vur vur a. Ben-a chuan ka tui tih zâwng hlîr a lei a, a lei hnem ang reng. Thil kan lei zawh chuan min puak leh a tum a, ka inthlahrung tawh ang reng a, a chhan chu ka rit ve ang reng si a. "Ka kal thei alâwm, i châu lutuk palh ang," ka tih chuan Ben-a chuan, "A nih leh ka kut hi vuan la, kal i harsat deuh a nih leh ka paw leh mai ang che aw," a ti a.

Ben-a chuan ka kut chu nghet tak hian a vuan a, kei chuan, "I lo zai thiam hle mai a, min zaisak leh thei ang em?" ka han tih chuan Ben-a chu a zai nghâl a, a zai pah te chuan min en deuh sek a, ka lo lai ang reng. Kan thingphunna hmun kan thleng a, Ben-a chuan a zai lai chu a ti tâwp a, "Kan thingphun hi a ṭhang lian ve zêl a nih hi, kum 6 vêl liam leh se chuan a lian ve tawh ngawt ang," a han ti a. Kei pawh chuan, "He lai hmun ka thlen apiang hian ka hre chhuak ṭhîn che a, nang pâw'n min hriat chhuah fo ka ring," ka han tih chuan Ben-a chuan, "He kan thinphun hi nakinah chuan thingkûng puitling a lo tling ve ang a, chumi hun a lo thlen hunah pawh inṭhen lo ang aw," tiin ka chalah chuan a han fâwp a. Chhân dân tûr pawh ka thiam lo, ka lo nui ringawt a. "Kan rei tawh êm mai, haw tawh ang," tiin Ben-a chu ka kai a.

In kan thleng chu ka ṭhian te ho chuan min lo chhaih leh chiam a. Mampuia chuan, "Ben-a leh Merry tân ka rawn zai tawh ang e aw," tiin 'Ka hmangaihna che,' tih hla chu a han sa ngei ah. Ben-a nên kan inen a, kan lâi dûn ang reng. Laltetea lam ka han hawi chu a lei min lo chhuah khum a, kei chuan ka kut tum ka lo hmuh ve vat a. Thil te kan ei a, sana kan han en chu zân dâr 11 a lo ni dêr mai. Ka û chuan, "Naktûk sikul kal leh tûr in ni hlawm si a, mut lam hnaih hlawm tawh ila," a han tih chuan Ben-a pawh chuan, "A lo tlai tawh êm a nih hi, kei pawh ka hâw ve tawh ang e, tui deuhin lo mu r'u aw," tiin hâw a tum a. Ka ṭhiante chuan, "Kawngkapui thleng te chu va thlah ve la," min ti a. Ben-a ve thung chuan, "A ngai lo, i ke a nat kha, a pawi lo thlah ka ngai lo ve, mangṭha mai u le," tiin a hâw nghâl a. Ka û chuan, "Zei lo thei si a," min ti a. Kei chuan, "Min hrethiam tho alâwm," tiin ka lo chhâng ve vat a. Kan ṭhian ho chuan ka room chhuatah bawk chuan kan mu leh a, kan tîtî leh phawt a, kan muthilh meuh chuan dâr 2 vêl a ni tawh ngei ang.

Zîng ka harh chu ka bula mu Zovi chu a lo awm tawh lo va, Kimkimi te kai thovin, 'Zovi hi a haw em ni?' tiin ka zâwt a. Anni chuan an hriat loh thu-in min chhâng a. Ka tho chhuak a, choka ka han lût chu ka û leh Zovi chuan eirawng an lo bâwl dûn chu lo niin, ka û chuan, "Thawh lah hi i hre si lova maw, i ṭhiannu Zovi te chu zing hma tâwkah a lo tho a, chaw a lo chhûm thlap asin," tiin min han khak nghâl ringawt a. Ka chhâng buai peih lêm lo va, "Zovi chu i fel ṭhîn e, i inthlahrung deuh a ni lo maw? Kan in te chu in in ang chiahin ngai rawh," ka ti a. Zovi ve thung chuan, "Inthlahrung lo ve, mahni in anga ka ngaih vângin alâwm ka chêt ve reng ni, mi dang inah te chuan ka peih teuh lo mai," a lo ti ve thung a. Chaw kan ei kham chuan Sikul lam panin kan ṭhian ho chuan kan kal dial dial hlawm a, sikul kan thleng ṭêp tihah chuan Laltetea ka sâwm theihnghilh tih ka hre chhuak a, lêt leh tûrin hun a awm tawh si lo. Mampuia kha an inah a riak tho a, an lo kal dûn mai ang; mahse, min hâu leh dâwn nih hi ka tih rilrûk mawlh mawlh lai chuan sikul ṭan dâr a lo ri nghâl a. Kan in-line tê tê phawt a, Principal-in thu a sawi lai tak chuan Laltetea leh Mampuia chu an lo thleng a. Sir Vala chuan, "Sikul tlai ho kha he lamah lo intlar zêl r'u le," tiin a lo ko hlawm a. Laltetea leh mi dang sikul tlai ho zawng chu Zirtîrtu ho Office an tih faitir hlawm a. Principal-in thu a sawi zawh hnu chuan kan class ṭheuhah kan lût hlawm a. Mizo class kan nei hmasa ber dâwn emaw kan tih laiin English Teacher zâwk a lo lût a, a hnu lawkah Laltetea leh Mampuia te pawh an lo lût ve nghâl a, ka inthiam lo ru hle. Laltetea chuan, "Nangmah vang," tiin a lo phun a lo phun a. "Ka tih palh," ka ti a; mahse, ka hmui phun chu a hrethiam lo nge, a kut tum chu min hmuh leh tho a.

Class lâk lai chuan Kimkimi chu a muthlu reng a, ka tih harh paw'n a harh hlei thei lo, kan nuih ru char char a. Kan zirtirtu a chhuah hnu chuan Kimkimi chuan a chal sama sampui awm ho chu pawhsak tûrin min ti a, ka pawhsak ve mai a. Kimkimi lah chutia a sam ka khawih chu a mut a chhuak telh telh a, dawhkan a bawh tawp a, a muhil chu a ni dêr mai. Kei pawh chuan a sampui chu ka pawhsak zêl a, hriat loh kârin ka lo pawt hnem hman hle a, Zovi chuan, "Mawli, a sam i pawt káwng vek dâwn alâwm le, kha... chhîp sam tih tûr mumal pawh a neih tawh loh kha," tiin Kimkimi chu a han ti harh a. Kimkimi chuan a chhîp chu a han khawih chuan 'A káwng hawk mai,' tiin min en vung vung a, "Mâwli, ti êm êm hian min pawhsak rawh ka ti em ni?" a tih chuan kei chuan, "I indawh hle hle si a, kei lahin thil dang daih ka lo ngaihtuah alâwm, a hrim hrimin i sampui a tam ve hrim hrim a nih kha," ka han tih chuan Kimkimi chuan, "A ṭo leh vat mai ang, a nuam êm alâwm, ka lo muhil tui tawp a," nui vur vur chung hian a ti a. Eli lah chuan, "Chhîp kawlh' tiin kan ko tawh ang che," a lo ti ve bawk nên, a rûk tak chuan ka inthiam lo ru ang reng.

Kan Miss Muani pa a thih avângin chawhnu lam chu sikul kan châwl a, mahse Ben-a te section lam chu an châwl ve lo va. Ka ṭhiante nên pawh chuan, "Vawiin chu mahni in lamah ṭheuh haw ang u aw, naktuk lamah kan riak khâwm leh hlawm dâwn nia," tiin kan inthlah liam hlawm a, Laltetea nên kan hâw dûn a, kawng tluan chuan Laltetea chu a phun a, kei lah chuan awlsam zet hian, "Sikul kan kal dâwn khan kan tîtî pah bawk si a, ka lo theihnghilh daih che alâwm," ka han ti phei chu a thinrim ngei mai. Keiin ka sawm loh che&a i thinrim ṭhinzia kha aw, 'Ka theihnghilh che alâwm' han ti ve ngat che ila chuan, ka sam hi min pawh kawlhsak vekin ania ka rin ni," a han tih chuan Kimkimi sampui ka pawhsak vêl chungchâng chu ka han hrilh a, a nuih za lutuk chu a thinrim a reh hmak a, "Kimkimi pawh a mâwl, a ni aiin nang i mâwl leh chhâwng a," ngeiawm zet hian min han ti kher a.

In kan thleng ṭêp tawh tihah chuan kan in aṭang chuan ka nu chuan, "Lo tlân vat vat r'u," tiin a lo au a. Kei chuan, "Ehe! Ânu te an lo hâw tawh a nih hi," tiin ka tlân nghâl a; mahse, ka khûp a nat avâng chuan ka tlân chak thei lo va, Laltetea pawh an inah lût hmasa lo chuan kan inah a lo lût ve phawt a. Ka nu chuan, "Sikul in tlân bo nge in bâng hma?" min lo ti nghâl a. Laltetea chuan, "Kan Miss pa a thi a, chawhnu kan châwl a," tiin a lo chhâng vat a. Kei chuan, "In lo hâw dâwn tih in sawi lâwk si lo va, thil te min lo hawn lo em ni?" tiin ka titâu nghâl ringawt a. Ka nu chuan, "Kawngah sêrthlum leh theihai an lo zuar a, chu chu kan lo hawn che u, va ei r'u," min ti a. Laltetea chuan sêrthlum chu a duh zâwng tak a nih avâng chuan a ei nghâl mai a, kei chuan, "Pawisa min pe la, thil ka va inlei zâwk ang," ka'n ti leh hrâm a. Ka nu chuan chêng sawmnga min pe a, inthlâk lêm lo chuan thil lei tûr chuan keimahin ka kal nghâl a, thil ka lei zo ka haw tûr chu Ben-a te sikul bâng nên kan intâwk a, Ben-a'n min hmuh ve leh chuan a lo tlân nghâl a, min thlah hâw a tum nghâl a. Kei pawh chuan ka lo hnial lêm lo va, kan in thleng min thlah a. Tukverh aṭangin ka pa chuan min lo hmu dûn a, Ben-a chu kan in chhûngah lo lût lêm lo chuan a hâw nghâl a.

Ka pa chuan Ben-a chu eng ang mi nge a nih tih te min zâwt nghâl a. Ka pa chuan, "Ngaihzâwng in neih dâwn pawhin in mi hriat chian ngei ngaihzâwn tûr, mipa chu an mizia an thup thiam tih hriat kar tûr, kei chuan ngaihzâwng i nei ve dâwn rau rau a nih chuan Laltetea nên hian inngaizâwng ula ṭha ka ti ania, ani hi kan mi hriat chian a ni a, tûna i bialpa hi chu a sual e kan tihna chu a ni miah lo; mahse, kan hriat chian ngei kawppui tûr atân chuan an ṭha." A duh tâwk ve tawh dâwn emaw tih laiin a thu sawi chu a chhunzawm leh a, "Lehkha zir ṭhulh phah nân te in hmang palh ang tih a hlauhawm, lehkha i thiam thei si a, i nu nên kan beiseina che pawh a sang a, min tih beidawn loh kan beisei a nia," a han ti leh hrâm a.

Ka pa thu sawi chu ngawi rengin ka ngaithla a, a sawi zawh hnu chuan chhâng lêm lo chuan room lamah ka luhsan a. Rei fê ka room-a ka awm hnu chuan choka lamah tui in tûrin ka chhukthla a. Ka û chuan, "Merry, hei nghapih hi lo kang rawh aw, dâwrah ka va kal lawk ang, thil dang siam ngai eng mah a awm tawh lo," a ti a. A sawi zawh chuan a kal nghâl a, nghapih chu ka kang nghâl a, chi telh tûr emaw tiin ka lo telh ringawt pek a. Zanriah kan ei laiin ka û-in nghapih a han ei chu, a al ti lutuk chu "Ngapih-ah hian chi i thlâk em ni?" min ti a. Kei chuan, "An telh ṭhîn emaw ka lo ti mai asin," ka han ti chu ka chhûngte nuih a za kher mai. Ka nu chuan, "Nghapih chu a al sa hrim hrim a, chi al a ngai tawh hleinêm," a han ti chu kei pawh ka nuih a zain ka inthiam lo hle.

Chaw kan ei kham hnu chuan ka room-ah lût nghâlin lekha ka zir a, ka lo zir tui deuh a ni ngei ang, sana ka han en chu zân dâr 9 a lo ni dêr tawh mai. Tukverh hawngin ka han hawi kual vêl a, Laltetea ka hmu a, a room tukverh bulah chuan meizial a lo zu mêk a, min hmuh ve leh min chhiat khum vak vak a. Ka ngei lutuk chu ka kut tum ka hmuh ve nghâl a, tukverh ka khar hmak a, ka zirlai bu te khung felin ka mu nghâl a. Mut pah chuan ka diary-ah vawiin hun ka hman dân vêl ka ziak tê tê phawt a, ka ziah zawh hmain Laltetea chu ka room-ah a lo lût thut a, a zirlai bu nên a lo kal a, "Lehkha zir dûn ang," a rawn ti a. Kei chuan, "Ka zir peih tawh lo, ka mu duh tawh, hei diary-ah thil ka ziak mêk, ka zawh ve leh ka mu dâwn," ka ti a. Laltetea chuan, "I diary-ah hian ka hming hmuh tûr a awm ṭeuhin ka ring," a han ti nghâl ringawt a. Kei chuan, "I hming ka ziak ve rêng rêng lo," ka tih pah chuan ka diary chu ka khup nghâl hmak a. Laltetea bawk chuan, "Ka hria, ka hming i ziah tamzia te chu, hei tûna ka awm dân te pawh hi ziak rawh," tih pah chuan a han inla-sek vêl a. Kei chuan, "I chhe êm mai, haw teh, ka mu duh," nui vur vur chung hian ka han ti a. Haw mai lo chuan, "I diary i ziah dân tûr ka hrilh che alâwm, ziak ngei ngei ang che. Kan vêng pa hmelṭha Laltetea chuan ka chalah penin min mangṭha a," a sawi zawh rual chuan min pen nghâl a, a tlânchhe nghâl a. Ka room kawngkhâr bulah dingin, "Tichuan, rang zetin a tlân hâw nghâl a, tiin lo ziak rawh aw," a ti a. He pa âtzia hi chu aw, tiin ka nui ringawt a. Laltetea chu rawn lêt lehin, "Merry, i kekawrte rawng ka hria," a rawn ti leh hrâm a. "Tihian i diary-ah khan ziak nghâl rawh aw," tiin a chhuak leh nghâl a. Ka diary-ah chuan ka ziak lo ang ka ti nâ chu ka nuih a za lutuk a, nakina chhiar leh atân tiin Laltetea thu sawi dân leh a awm dân vêl chu ka ziak thlap a. Amah ngeiin chhiar se 'ka thu a va'n awi êm êm' min ti ngei ang le. Ka diary ka ziah zawh hnu chuan current ka off a, chuan ka mu nghâl hmak a.

Zîng dâr 7 vêlah chuan ka pa hian min lo kai tho a, "Bawihte, tho tawh rawh, sikul kal i ngaih kha, vawiin chu in school thleng ka thlah ang che," min ti a. Phur zet hian ka tho a, choka lamah tlân nghâlin ka hmài ka phih vat vat a, ka nu leh ka û ten chaw ei an lo siam mêk a, ka nu hnênah chuan, "Nu, nang pâw'n sikul thleng min lo thlah ve, ka pa paw'n min thlah a tum a, in pahnihin min thlah ula," ka ti a. Ka nu chuan, "Dâwr hawn ka duh si a, in tlai palh ang, chaw ei kham ve leh i pa inthlahtîr zâwk rawh. E, chuan Laltetea kha tûn aṭanga lo insiam lâwk tûrin va hrilh rawh, i kalsan leh chuan a phun reng mai ang," a ti a. Laltetea te in lam pan ka tum lai tak chuan Laltetea chu a lo chhuak a, "Min lo sâwm i tum em ni? Kei chu ka hman tawh," Laltetea chuan a ti a. Kei chuan, "Chaw i ei tawh maw? I va'n tho hma âwm êm êm?" ka han tih chuan Laltetea chuan, "Tho hma nâng aw, chaw pawh ka ei lo, chhûnah restaurant-ah ka inhnawh puar mai ang," a ti chu ka nu'n a lo hria a. "Laltete, chaw ei loh a ṭha ngai lo, rawn lût rawh u, tlêm tal ei hrâm hrâm zêl tûr, in ei peih loh paw'n ei lui hrâm hrâm rawh u," tiin min lo ko a. Laltetea pawh chuan kan inah chuan chaw a lo ei ve nghâl a, mahse a ei tam lo. Kei lah chu ka chaw ei a tui phian leh nghâl a, ka û chuan, "In tlai dâwn, ei vat vat rawh," min lo ti sek a. Ka kham hnu chuan ka insiam sawk sawk a, ka pa hovin sikul lam chu kan pan ta a. Sikul gate kan thlen hma deuh chuan ka ṭhiante ho nên kan intâwk a, ka ṭhiante chuan, "A pa te a inthlahtîr bîk, a va'n naupang chhia tak," tiin min lo fiam nghâl a. Ka pa lah chuan, "A la nautê lutuk, mlMerry chu," a rawn la ti zui! Ka ṭhiante chuan, "Naute lian chi tih hlîrin kan ko tawh ang che," tiin min chhaih vak vak a. Tûm bûr chungin class-ah ka luhsan hlawm a.

Sikul ṭan dâr a lo ri ve nghâl a, class-ah kan ṭhu ṭhap a. Miss Mapuii leh Miss Angaihi te an rawn lût a, hmeichhe hovin make up kan hman leh hman loh an rawn check a, powder kan inhnawih leh hnawih loh hriat nân puan dum te hian kan hmai an lo hru dîat dîat a. Kan class hmeichheho chu powder inhnawih an lo tam hle mai, a ṭhen chuan eyebrow te an lo inhnawih a, Miss chuan pâwna tui leh sahbawn an dah chuan a lo phih faitîr zêl a, keini ṭhian ho leh hmeichhe tlêm tê tih loh chu an hmài an phihtîr hlawm vek a, keini ṭhian ho chuan make up hi kan ngaina vak lo. Kimkimi'n lipgloss a lo pài ṭhîn a; mahse hei hi chu kan Miss te'n an phal chi, a fîm a ni a, hei hi kan ṭhianhovin kan inhnawih tawp ṭhîn, a bâk make up vêl kan hmang ve lo hlauh a, kan vânneih phah a ni. Kan Miss te an kal hnuah chuan kan class hmeichheho hmai an phihtîrho chuan an lehkhabu kâra powder an dah rûk chu an inhnawih ṭha sup sup hlawm a, kan ṭhianho nuih a za ngei mai. Dârthlalang pâi ru pâwl an awm bawk, a ṭhen lahin lipstick an lo pài ru bawk, kan bag check hlawm se chuan an mansak vek hlawm ngei âwm si a. Mampuia chuan, "Ka hêk dâwn che u," a han ti hlawm a, anni lah an zâm dêr si lo, "I duh leh sawi rawh," an lo ti hmak hlawm a.

Sir RPa a rawn lût a, Sir RPa chuan, "Night Hostel kan hawng dâwn a, a lût duh in awm chuan ka hnênah emaw in Miss Angaihi bulah in sawi dâwn nia. Night Fee pawh thla khatah ₹ 2,000/- chauh a ni a, in nu leh pa te lo râwn ula, luh vek in tum dâwn nia," a ti a. Class a la chhunzawm nghâl a, kan ṭhianho chuan lehkha kan inpe ru ka inpe ru hlawm a, kan ṭhianho chuan Night Hostel-a awm chu kan duh vek hlawm a. Kan chhûngte paw'n min phalsak vek kan ring bawk a; mahse, kan chhûngte hrilh hmasa lo chuan kan inziak lût rih lo va. Class lâk lai te chuan Kimkimi nên kan inbe ru char char a, "Kan ṭhian hovin kan riak tlâng thei zêl tawh dâwn a nia, bâkah min vil reng dâwn a, lehkha pawh kan zir ngawrh zâwk dâwn a, a ṭha e, lût vek ang u aw," Kimkimi chuan a han ti a.

School kan bân ve leh chhûngte bulah Night Hostel-a awm chu kan dîl ṭheuh hlawm a, vânneihthlâk takin kan chhûngte chuan min phalsak vek a. Naktûk zân aṭanga luh tûr a ni a, phone-in ka ṭhiante ho ka be kual a, kan ṭhian ho chuan kan phûr tlâng khawp mai. Laltetea chu a nu-in a phal ve lo va, a chhan chu ṭhiante ho nên a awm khâwm chuan lehkha a zir theih ṭhin loh vâng a ni. Laltetea Hostel lût ve thei lo tûr chuan tlêm chuan min ti lungngai deuh a; mahse, ama tâna ṭha tûr zâwk a ni si a, ka sâwm lui duh lêm lo va. Mahse, mak deuh mai chu Ben-a zâwk chuan kan Hostel-a lo luh ve chu a tum a, kan Teacher te a dîl a, an lo phal bawk nên a lo luh ve hmêl ta khawp mai.

Episode 20

Zîng dâr 6 vêlah thovin Laltetea ka va kai tho a, Hostel-a ka awm tûr chu a huphurh ru ang reng hle a, 'Inah zir dûn mai ila,' a tih lai te chuan a hmêl chu a nguai hle a, ka rilru a ti nuam lo ang reng. Kan teacher te ka lo hrilh laklawh tawh bawk si nên, Hostel-a luh leh loh chu remin ka hre bawk si lo va, Laltetea chu lunghnûr deuh mah se kan tâna ṭha tûr a ni bawk si a. Hostel-ah chuan lût ve hrim hrim phawt ang tiin rilru ka siam fel a. "Chaw ei vat vat la, lo insiam rawh, School kan tlai ang e," ka tih chuan Laltetea chu a tho ve nghâl mai a; mahse, a hlim lo tih a hmêl leh a chêt dân vêl aṭang chuan a hriat theih vek a ni, rilru chu a ti nuam lo ve khawp mai. Chaw kan ei kham hnu chuan School lam kan pan a, Laltetea chu ni dang ang lo takin a ngáwichàwi hle a, ka biak paw'n a rûl tâwk chauhin min chhâng a. Kan class kan thlen ve leh a ṭhutna-ah a ṭhu nghâl hmak a, vawi khat pawh ka lam a rawn hawi lêt lo. Kimkimi chuan, "In inhâu em ni? In hmêl a va dang ve vawiin chu," min ti a. Hostel-a a luh ve theih loh tûr thu ka hrilh chuan Kimkimi pawh chuan nuam lo a ti ve ang reng. Chhûn chawlhah pawh Laltetea chu Mampuia nên an kal hrang daih a, School ṭan dâr a rîk hnu fê-ah class-ah an lo lût ve chauh a, min pumpelh ni berin ka hria. School bân a lo hun a, mahse, ka tel lova hâw chu a duh bîk lo ni ngei tûr a ni, "Hâw ila," tiin ka bag chu min khaisak a, kan class pâwnah chuan Ben-a hian min lo nghâk reng chu niin. Ben-a chuan, "Thlah che ka tum a, ka lo nghâk reng che lâwm," a lo ti a. Chutia Ben-a'n a tih tâk si-ah chuan Laltetea chuan ka bag chu Ben-a a pe a, "Ben-a nên in ni dâwn tho bawk a, kei chu Mampuia bulah ka lêng kàwi lawk dâwn a, lo va hâw mai r'u," tiin min kalsan daih a, rilru chu a nuam lo duh ang reng. Ben-a nên chuan muangchalâng hian kan in lam kan pan a, Ben-a chuan, "Night Hostel khatah kan lût tawh dâwn a nia, ni tin zan tin kan inhmu thei tawh dâwn a, ti hi chuan a hma zawng aiin kan inhnaih zual dâwn a nih hi ti raw," a han ti a. Ni e, Ben-a nên kan inhnaih telh telh ang a; mahse, Laltetea ve thung nên chuan kan inhlat telh telh dâwna hriatna ka nei a, ka hlim thei lo a ni. Engtin paw'n lo inhâu ṭhîn mah ila, ka ṭhian ṭha ber kha a ni tlat alâwm, ka ngai pawimawh lo thei lo a ni. Ben-a chuan kan in thleng min thlah a, 'Zânah Hostel-ah inhmu ang aw,' tiin kan inthlah a. Ka pa chuan Ben-a chu a lo hmu hman a, mahse eng mah chu a sawi chuang lo. A hmêlah chuan min duhpui lo tih a lang reng a; mahse, ka hre lo der tawp a.

Zanriah kan ei kham hnu chuan ka puanthuah vêl chu Laltetea chuan motor-ah min dahpui a, ka nu leh pa ten Hostel thleng min lo thlah a. Laltetea chuan min thlah pawh a duh ve lo, Hostel kan thlen chuan ka ṭhiante an lo awm deuh vek tawh a, mahse Ben-a erawh a lo la thleng ve lo. Ka thaw huai a, a chhan chu ka pa'n a hmuh chuan a ngaih kàwi ka hlau a ni. Ka nu leh pa te chu an hâw nghâl a, keini pawh kan mutna tûr khum vêl kan rem fel hnu chuan lehkha zir tûrin in hnuai lamah kan chhuk nghâl a. Ben-a pawh a lo thleng ve nghâl a, school a nih loh avângin mipa leh hmeichhia kan ṭhu dûn thei a, Ben-a nên kan ṭhu dûn a, Kimkimi leh Patea, Eli leh Zovi, Sebi leh Puipuii an ṭhu dûn a. Chhani erawh Hostel-ah a lo lût ve lo va, kan ṭhian ho kim ila a nawm dâwn nên tiin Chhani hming chu kan lam sek hlawm a. Sir RPa'n ṭawngṭaina a neih zawhin lehkha zir kan ṭan nghâl a, Sir RPa Private Night Hostel-a kan luh avâng chuan amah tih loh chu min viltu an awm lo va, Zirlai inthlahdah deuh tân chuan duhthusâm a ni ngei ang. Mahse, Hostel-a lût ho hi kan zirlai kan ngai pawimawh tlâng vek a, sum sên kan duh lo tlâng a ni ngei ang. Zân khatna aṭangin kan zir ngawrh nghâl hle a, Ben-a pawh ka rin ai daihin lehkha zir a lo taima, mahse Sir RPa'n min en loh apiangin ka kut a lo vuan a, chutia ka kut a vawn lai pawh chuan ka hmêl a en chuang lo va, a lehkha zirlai ngawt chu a en a. A hriatthiam loh apiang Sir RPa a zâwt a, Sir chuan rilru pe deuhin a zir tih a hriat avâng chuan a fak hle a, "Mi dang min zawh tûr nei in awm lo em ni?" a han ti a. Patea rawn ding chhuakin, "Sir, Chemistry Chapter 8 hi ka hrethiam chiah lo va," a rawn ti a. Sir chuan, "Khawi lai tak kha nge i hriatthiam loh lai?" a han tih chuan Patea chuan, "Chapter 8 pumpui hian ka hrethiam lo," a han ti mai chu, nui lo hi kan awm lo. A chhan chu vawiin Chemistry class-ah khan kan zir bawk si a, a pumpuia han hriatthiam loh kha chu nuihzatthlâk lamah a kal lo thei lo va. Mahse, Sir RPa chuan uluk takin a hrilhfiah a, a tâwpah chuan a hrethiam ve ta nge nge a. Sir RPa chuan, "Miin an hriatthiam loh an sawi rêng rêngin tu mah lo nui tawh suh u, an zak ang a, an thiam loh reng pawh kha in nuih leh an hlauh vângin hrethiam âwm ang deuhin ngawi rengin an awm ang a, kum tâwp exam-ah an fail phah thei asin. Tu mahin nuih suh u, a thiam fâl deuh pawh in awm ang, zirlai thiam thei lo deuh pawh in awm ang, inang khat vekin kan en che u a, duhsak bîk kan nei lo. In hriatthiam loh min zâwt hreh lo ula, zawhna mâwlmang deuh in lo zawh pawhin lo innuih tawh suh u," a han ti a. A nui zîngah ka tel ve bawk si a, ka inthiam lo ru ang reng.

Zân dâr 9 a lo ri ta a, Sir RPa nupui Miss Hlimpuii chuan kan ei tûr vêl min siamsakte chu a rawn sem a, tui kan ti tlâng hle. Kan ei zawh ve leh kan zir zawm leh nghâl char char a, zân dâr 11 mut hun a ni a, kan mut hmain kan hmài te kan phih tê tê hlawm a, hmeichheho chu in chungah kan mu a, mipaho chu in hnuai lamah an mu thung a. Khuma kan mut fel meuh chuan zân dâr 12 a lo ri ṭêp ta mai, current bill a tam loh nân light an off vek a. Kan muhil ṭan dâwn tihah chuan Puipuii chuan, "Chu! in hre ve em, phun ser ser ri chu?" a han ti a. Keini chuan kan hre si lo va, Puipuii pawh chuan, "Ka hre sual a ni ang, mu leh tawh ang u," a tih avâng chuan ka mu leh nghâl mai a. Rei pawh kan mut hmain Zovi chu a rawn ràk leh thut avâng chuan kan harh leh vek a, kan Miss chuan light a on a. Zovi chuan, "Ka ke-ah hian min rawn seh thut a, a na reuh lutuk," a han ti a. Miss chuan, "Sazu a ni ang, in hi luah loh a a awmna a rei tawh bawk si a, Sazu a nih dâwn chu, light ka on ang a, a zia mai ang," a ti a. Light on chuan ka mu leh ta a, zîng lam dâr 3 vêlah chuan mipaho chu an rawn chho a, Sir RPa chuan, "Tu nge in hnuai lamah lo chhuk che u?" a rawn ti a. Miss chuan, "Tu mah an lo chhuk lo, kan mu vek alâwm," a ti a. Sir RPa chuan, "Hmeichhe phun ser ser rî ka hre reng alâwm, hmeichhia leh mipa a hrangin kan muttîr che u a, zân tlaiah a rûka lo inhmuh phal a ni lo a nia, in chhûng ten min ring ngam a, kan kutah an dah che u a, kan mualphona tûrin eng thil mah ti suh ang che u," a han ti leh hrâm a. Miss chuan, "Tu mah an lo chhuk lo tak tak alâwm, ka muhil thei lo va, ka meng reng alâwm," a han tih chuan Sir RPa pawh chuan, "A va'n mak êm êm! Mipaho khan in hre ve lo em ni, hmeichhe phun ser ser rî kha?" a han tih chuan mipaho chuan an lu an lo thing a, tu ma'n an lo hre ve lo a nih hmêl. Miss chuan, "Kan mut ṭan tirh khan Puipuii hian khatiang phun rî chu 'ka hria,' a tih tak kha," a han ti chu hmeichhe lam pang chu tlêm chuan kan hlau ve deuh a. "Thlahrâng a ni hrim hrim ang," Patea chuan nui vur vur chung hian a lo ti a. Miss chuan, "Âwihawm loh loh, hmeichhe lam hi an dâwih bawk si a, khatiang thu kha chu sawi suh u," a ti a. Sir RPa chuan, "Tu mah in muhîl thei tawh tak tak chuang lo vang, inphih fai ula, lehkha rei lo tê kan zir leh hlawm dâwn nia," a ti a. Kan inphih fai sawk sawk hlawm a, lehkha zir tûr chuan in hnuai lamah kan chhuk hlawm a; mahse, tu ma'n zirlaiah rilru kan pe thei lo. Nizân thil thleng vel neuh neuh chu kan sawi hlawm a, mak kan ti tlâng hle.

Zîng dâr 6 a rîk ve leh Sir RPa chuan, "Dâr 6 a ri tawh a, inkhung fel tawh r'u le, School in tlai palh ang, hâw tawh mai r'u, va lêng kàwi lo ula," a ti a. Kan vai chuan hâw tûrin kan insiam nghâl a, kan hâw kawngah chuan Ben-a'n ka kut chu a vuan reng a, kan ṭhiante ho chuan min chhaih leh ka hlau a, "Ben, inkài lovin kal ila, min chhaih leh ang," ka'n ti ringawt a. Mahse, Reuben-a chuan, "A ho lutuk, kan inngaizâwng tih an hre vek tho alâwm. Hostel awm chu a manhla hle mai, zîng ka thawh ve leh i hmêl ka hmu thei nghâl a. Tûkin phei kha chu i hmài phih hma ngatin nih kha ka hmuh che, i hmai phih hmá hmêl a ṭha zâwkin ka hria, i tho phâng hmêl kha a cute," tiin a nui vur vur a. Kei chuan, "I ho êm mai, lehkha zir ṭhat loh phah nân hman a chi miah lo ang, kan awm tlân paw'n," ka han ti leh hrâm a. Zovi chuan, "Nizân thil thleng vêl kha kei chu ka ngaih a ṭha lo e, kan Hostel hi a hrâng deuh a ni lo maw? Hei thlanmual kan hnaih si a, kan Hostel chhak lam lah thlawhna ṭumna hmun ni bawk si, a hnim si a. Ngaihtuah chian phei chuan a hrâng a nih paw'n a âwm ka ti," a tih chuan Reuben-a chuan, "Sir RPa khan a hre sual mai mai a ni ang," tiin a lo chhâng lêt vat a. "Mahse, Puipuii paw'n a hre ve tho si a," Kimkimi chuan a lo ti ve a.

Puipui chuan, "A mak lutuk! Hmeichhe âw ngei chu a ni a, a ṭawng rî chu ka hria a; mahse, a thusawi eng mah ka hre lo. Hei, a rûk tê-a thil kan sawi ang hian a ṭawng a," a han ti a. Kimkimi chuan, "Kei chu thlahrâng a nih ka ring, ka hlau reuh e, Hostel-a riah leh pawh ka ngam chiah tawh lo," a lo ti bawk a. Ben-a chuan nui vur vur chung hian, "Hlau s'u, ramhuai emaw thla tih vêl hi chu a awm tak tak hleinêm, hlau s'u," a han tih pawh chuan ka ṭhiante ho chu an rilru a nuam chiah chuang lo va. Keimah tak hi chuan ka hlau lêm lo. Ben-a chuan kan inthleng min thlah a tum a, mahse 'School kal i tlai palh ang,' tiin kawng pêng aṭangin keimahin ka kal hrang a. Mahni-a han kal tâkah chuan Laltetea ka ngaihtuah chhuak nghâl a, nizân lamah te engtin nge a lo awm ve ang le tih te ka ngaihtuah neuh neuh a. Kan inah pawh chuan lût hmasa lo chuan Laltetea te inah ka lût hmasa a. Laltetea pawh a lo tho tawh a, min hmuh ve leh chuan a hlim êm êm a, "I va'n lo haw har êm êm," tiin min hnek fiam nghâl bawrh bawrh a. Kei chuan, "Tikhan min lo hnek nghâl suh, ka ril a ṭâm a nia," ka'n ti chu, Nu Chhuani chuan, "Hei, chaw ei ka siam mêk alâwm, hetah ei ve nghâl mai rawh," a ti a, kei pawh chuan ka lo 'aw' ve nghâl mai a. Kawngkapui aṭang chuan ka nu chu ka âu a, ka nu chu tukverhah a lo dâk a, "Nu, hetah chaw ka ei nghâl dâwn a nia aw," ka'n ti a. Ka nu chuan, "Rawn hâw hmasak ve âwm hi a nia, aw, ei vat vat r'u aw, School in tlai ang e," tiin min lo chhâng lêt a. Chaw kan ei lai chuan nizân lama kan Hostel-a thil thleng vêl chu Nu Chhuani leh Laltetea chu ka hrilh ve hlawm a. Laltetea chuan, "Thla a ni chiang mai, Hostel-ah kal tawh miah suh, i dâwih si, thlahrâng a nih chiah chu," a lo ti nghâl ringawt a. Kei chuan, "Âwihawm loh êm mai, Hostel-ah lût suh se min tih vângin kha ti khan min tih ṭhaih mai mai a nih kha, ka hlau chuang lo," tiin ka chhâng lêt vat a. Nu Chhuani pawh chuan, "Thla tih vêl a awm tak tak lo," a lo ti ve bawk a. Chaw kan ei kham chuan tih felpui ka tum a, mahse Nu Chhuani chuan, "School in tlai ang, va insiam mai rawh," min tih avâng chuan kan inah ka haw nghâl a. In ka thlen ve leh ka room-ah ka chho nghâl a, ka insiam nghâl char char a. Ka insiam zo in hnuai lama ka zu chhuk chu ka pa chuan, "Bawihtê, nizân i awm lo chu i nu nên kan mu thei rêng rêng hleinêm, i awm loh chuan in hi a ruak lutuk a, kan khua a har lutuk a, i lo hâw hun kan nghâkhlel lutuk alâwm," a lo ti a. Kei chuan, "Pa, min lo ngai em ni?" tiin ka kuah a. Ka nu chuan, "A ti ve mai mai a nih kha, TV a en char char reng alâwm, keima'n ka ngai zâwk che," a rawn ti ve a. Kei chuan, "Min ngai ve ve a nih kha, a nih chuan pocket money tûr min pe ve ve ula, min ngaih manah," ka han ti a. Ka pa chuan, "Ehe! Kan ngaih manah che pawisa min ṭhîng dâwn a maw!" tiin a nui vur vur a. A Wallet aṭang chuan chêng 200 a lo phawrh a, min pe a. Ka nu ka dîl leh a; mahse ka nu chuan, "I pa pêk che kha a tâwk reng alâwm," a ti a. Ka pa chuan, "Pe leh la a ni mai lâwm," a tih avâng chuan ka nu chuan chêng 100 min pe hrâm a. "Mi fate chuan chêng 50 chiah te an pài ṭhîn, nang hi chu i pâi hi a tam thei lutuk, khâwl ila chuan thla khatah chuan chêng tam fê a ni tawh ang, in zirtîrtute hlawh ai paw'n a tam mai thei," tiin a han âng ve deuh hlek a. Ka pa chuan a lo khap nghâl a. "Ka tlai dâwn nia, ka kal dâwn," tiin ka pa chu ka kuah a. Ka nu lam hawi chuan, "Ânu chu chêng 100 chiah min pe a, ka kuah ve dâwn lo che," ka ti a, ka tlân chhuak nghâl a. Laltetea ka sâwm a, School lam kan pan nghâl a.

School kan thlen chuan Puipuii leh Kimkimi chauh an lo la thleng a, Zovi leh Eli, Chhani te ho an la thleng ve rih lo va. Puipuii chuan, "Vawiin hi ka û pasal neih ni a ni a, kei chu chawlh ka dîl dâwn a, ka dîl kêp ang che u aw, vawiin chu ka û pasal neihnaah min ṭawiâwm ve r'u," a ti a. Laltetea chu a lo phûr khawp mai a, "Kei pawh chawlh min dîl kêp rawh aw, in chhûng hnài deuh angin min sawi la," a lo ti nghâl vat a. Kan Class Master bulah kan kal a, chawlh chu kan dîl a, Puipuii chuan kan ṭhian ho tân pawh chuan a dîl nghâl a, min phalsak ve kher pawh ka rin loh nên, min lo phalsak a, kan lâwm kher mai. Kan School gate pâwn lamah chuan kan ṭhian dangte School lo la thleng lo ho chu kan nghâk a, rei pawh kan nghah hmain an lo thleng ve vat a, chawlh kan dîl kêp thu leh Puipuii û pasal neihnaah kan kal tûr thu kan han hrilh chu an phûr hlawm khawp mai. Puipuii chuan, "Va inthlâk vek ula, dâr 12-ah lo thlen vek tum r'u aw," tiin min hawsan nghâl a, kan ṭhian dang te pawh chu an in lamah ṭheuh inthlâk tûr chuan an hâw leh nghâl vek a. Kei leh Laltetea chu ka nu dâwr lamah kan phei phawt a, ka nu bulah chuan, "Nu, Puipuii û-in pasal a nei dâwn a, kan kal ve dâwn a, hâk tûr ka la dâwn a nia aw," ka ti a. Ka nu chuan, "Kawrfual thleng thar a awm asin," tiin min lo pe a, ka ha chhin a, ka inhmeh tho mai, ka nu chuan Laltetea chu kamis vâr a pe ve bawk a. In lamah kan hâw nghâl a, kan inah innghah khâwm kan tih avângin kan insiam fel vek tawh hnu pawh chuan kan ṭhian dangte chu kan nghâk leh tê tê phawt a. Dâr 11:30 vêlah an lo thleng a, ka ṭhiante chuan kekawr vek an ha a, kei kawr fual lo hâk bîk chu ka zak a, ka inthlâk leh a. Zovi chuan, "Dân hnihna-in an innei a, Biak In-ah an inkutsuih dâwn chuang lo va, keini ho chu choka lamah che tam ila, kan ṭangkai zâwk ang," a ti a. Kimkimi chuan, "Thlêng sil tûrin School kan châwl a ni ringawt dâwn asin, hawh u, thla te kan la vak vak ang a, vawiin chu in-la free ve ang u," a lo ti ve thung a. Kimkimi thu sawi chu kan thlâwp tlâng zâwk a nih hmêl, tichuan, Puipuii te in lam chu kan pan ta a, a hmun kan thlen chuan mi an lo tam tawh ang reng. Puipuii kan zawng nghâl a, kan hmu mai lo va, inneihna hall an siamah chuan lûtin a hnung ber tlarah chuan kan nghâk tawp a, dâr 1 a rîk chuan mi dang ho pawh chu hall-ah chuan an lo lût sup sup hlawm a. Puipuii pawh a lo lût a, Kimkimi leh Eli chuan Puipuii chu an lo pawt pêng vat a, "Kan bulah ṭhu ve rawh," an ti a. Puipuii chuan, "Mi mâwlho, ka u pasal neihna a nih hi, tlar hma lamah ka ṭhu dâwn, tihian lo ṭhu rih mai r'u," a han tih pawh chuan Kimkimi leh Eli chuan an phal chuang lo va, a bân leh lam ve ve-ah chuan an chelh tlat a. Puipuii chuan, "In û te pasal an neih ve hunah in hre ve khawp ang," a ti a. Nui vur vur chung hian Kimkimi chuan, "Kan sâwm ve dâwn lo che, sa i heh hmêl si, kan huphurh lâwk che," a han ti chu kan nui vek a. Thu sawi neuh neuh an awm reng chu kan ning ru khawp mai, a tâwp a tâwpah chuan mo leh moneitu an lo lût ve ta a. Mo kawr ka hmuh chuan, "A va'n mawi êm êm," ka ti a. Laltetea chuan, "Kan inneih ve hunah hei aia mo kawr mawi zâwk i ha dâwn lâwm," min lo ti fiam nghâl a. Chhâng lêt lêm lo chuan mo kawr ngawt chu kan en a, a mawi kan ti lutuk chu kan ṭhian ho chuan kan mit kan khap mang lo. Puipuii te hi an khawsa thei ang reng a, a û te inneihna pawh hi an ti pui khawp mai.

Inneih hunserh a zawh hnu chuan kan ṭhianho chuan mo leh moneitu te thla kan lâkpui ve a. "Chaw dawh an la tam si a, lêng kual phawt ang u," Puipuii chuan a ti a. Kan ṭhianho chuan Puipuii te in chhak lam hmun fâl deuhah chuan thla te kan la vak vak hlawm a. Laltetea chu thla latu-ah kan hmang zêl a, a ning ru hle ang. Dâr 3:30 vêlah chaw dawh tûrin kan chhuk hlawm a, chaw kan ei lai te chu Chhani chuan thla a lo la char char a, nuam kan ti tlâng hle. Mahse, Night Hostel-a kal leh kan ngaih avângin kan awm khaw muang lo va, chaw kan ei zawh veleh kan in lamah kan haw phawt a, ka ṭhiante chuan an inah haw leh phawt chu an peih tawh lo nên, "Zanin chu i zirlaibu kan hmang ve mai ang," an ti a. Dâr 5 vêlah Hostel-a thleng hman tûrin kan kal nghâl a.

Episode 21

Hostel kan thlen chuan hmeichhia pali kan hmêl hriat ngai pawh ni lo hi kan ṭhutna-ah an lo ṭhu a. Sir RPa hnênah thil awmzia kan zâwt a, Sir RPa chuan, "School dang naupang an nih hi, an nu leh pa te'n kan Hostel-a lo awm ve min dîl a, kan lo phalsak ta mai a nih hi," a tih chuan keiniho chuan engtin mah ti lêm lo chuan ṭhutna âwl dangah chuan kan ṭhu ve mai a. Mahse, an pali chuan ngeiawm deuh deuh chuan Kimkimi chanchin chu an sawi a, Kimkimi chuan engtin mah a chhâng lêm lo va, keini paw'n ngawih kan chuh rih a. Ben-a leh mi dang ho pawh an lo thleng ve ta a, Ben-a a lo thlen veleh an zînga pakhat Lucy chuan, "Reuben, hetah i lût ve elaw?" a lo ti vat a. Reuben-a pawh chuan, "Hetah eng nge in rawn tih, in rawn lût ve tihna em ni?" a ti a. Lucy bawk chuan, "In Class Teacher pawh a ni si lo va, hetah i lût daih si a, a mak e!" tiin Reuben-a chu inti ta neih deuh hian a rawn be vêl a. Ben-a chuan, "Hei ka bialnu a lût si a, kei pawh ka lo lût ve a nih hi," tiin ka bulah a lo ṭhu a. Chu veleh chuan an pali chuan an inmelh hrek hrek hlawm a, an phun ru sep sep a, min rêl tih hre tho mah ila ka chhâng buai peih hlawm lo va, lehkha ka zirsan hmak a. Reuben-a chuan, "An pali hian kan vêng mi an ni a," a tih chuan Kimkimi chuan, "An chapo hmêl hlawm e, kan thlen tirh aṭang khan min melh rum nghâl maw le!" a rawn ti a. Ben-a chuan, "An khawsa thei ve deuh hlawm a, an chapo ve deuh mai thei; mahse, engah mah ngai duh s'u," a ti a. Keini pawh chuan kan zirlai chu kan zir chhunzawm leh nghâl mai a, Maths subject ka zir a, ka hriatthiam loh lai te Sir RPa ka zâwt zêl a, bel deuha thiam ka duh avângin ka zâwt ve deuh sek a. Ka ṭhutna lama ka lêt leh tûr chu Lucy ṭhiante zînga pakhat chuan, "Hriatthiam har i ti deuh em ni, ka lo zirtîr dâwn che em mi?" dêusawh deuh chuan min rawn ti a. Chhâng lêt lêm lo chuan Ben-a bulah chuan ka ṭhu leh nghâl mai a; mahse, Ben-a zâwk chuan, "Lalhruai, 'Ka zirtîr ang che,' i ti em ni? In ṭhian pali thiam zawng zawng belh khawm ai paw'n Merry thiam a tam zâwk daih ang, an Class-a thiam ber a nih hi," tiin fiamthu ti tak deuh hian a chhâng lêt hlawm a. Kimkimi te, Zovi te ho chuan an lo nuih vak vak hlawm a, an thinrim hmêl khawp mai.

Dâr 9-ah thil eiin kan châwl a, Lucy ṭhiante zînga mi Cindy chuan Kimkimi ke-ah chuan a thingpui in bân chu a leih lui tih hriat tak hian a leih a, chutih pah chuan, "Awi, ka tihpalh lutuk, a sa em?" a ti a. Zovi chuan, "I tihpalh a nih loh kha aw, i leih lui a nih kha," tiin Cindy chu a han man deuh sawk a. Chu veleh a ṭhian pathumte chuan Zovi chu an rawn ti buai nghâl a, "Tu nge ni-a i inhriat a, i inchei dân a ṭhing si, Cindy'n ka tih palh a tih mawlh mawlh kha," tiin Lucy chuan Zovi chu a rawn din chilh a. Ka tho vat a, "Intibuai s'u, Sir RPa te an lo chhuk ṭêp ang, kan intihbuai chuan kan vaiin min hnawt chhuak thei a nia," tiin Zovi chu a ṭhutna lamah ka lêttîr a. Lucy bulah chuan va kîr lehin, "Inla huai vak su aw, nangni ai hian kan huai thei a nia," ka va ti leh ngat a. Zovi chu a lâwm ngang a ni ang, 'high-five' min lo pe vat a. Sir RPa a lo chhuk tâkah chuan kan zir chhunzawm leh mai a, anni pawh an zirlai an zir ve hle hle mai a. Dâr 11 a rîk chuan mu tûrin in chung lamah kan chho va, kan puan phah ho chu chhuatah a lo awm vek a. Lucy chuan, "Keini khumah kan mu mai ang aw, saw lam khum âwl saw in duh leh in zawm mai dâwn nia," zâm miah lo chuan min ti a. Zovi chuan, "Rawn lût thar in nih hi, in va zâm lo ve, kan mutna ngaiah kan mu dâwn," tiin an âwngphah ho chu a hlîmsak hlawm a, chhuatah a dahsak ve hmiah a. Lucy chuan, "I va zâm lo ve," tih pahin Zovi samah chuan a rawn kêk nghâl a. Kei chuan Lucy chu bawh betin ka khawih ve nghâl bawrh bawrh a, Puipuii leh Eli te chuan min lo ṭhelh an tum a. Kimkimi chu a zung a, kan buaina vêl pawh hre lêm lo chuan kan insual lai a hmuh chuan, "Eli, ṭhelh suh u, vaw zâwk rawh u," tiin a duh duh a rawn kêk ve nghâl bawrh bawrh a. Kan Miss a rawn lût thut a, kan vaiin kan tâwp nghâl a. Miss chuan kan buaina bul min zâwt a, Zovi chuan a hrilh a. Miss chuan Lucy te ho chu a hâu a, keini ho pawh chu min hâu tho a. "In insual manah ka hrem dâwn che u, insual ho zawng kha choka lamah sâwn lehkha in zir khaw muang ang, dâr 1 thleng," Miss chuan a han ti a. Keini ho chuan kan bag la-in choka lam kan pan nghâl mai a, anni chu an rawn kal vat lo a, Miss chuan a rawn kalpui hlawm a. Lucy chu ka bulah a ṭhuttîr a, Zovi bulah Cindy a ṭhuttîr bawk a. Kan ṭhian dangte ho chu min ṭhelhtu chauh an nih avângin a hrem tel ve hlawm lo va. Zovi, kei, Kimkimi leh Cindy leh Lucy te chu a kâr thlâkin min ṭhuttir a. Dâr 1 a rîk hma chu mu lo tûrin min hrilh hlawm a. Miss chuan min mutsan leh nghâl avâng chuan lehkha pawh zir lêm lo chuan kan ṭhu vêl mai mai a. Lucy chuan, "Ka va zung lawk," tiin bathroom-ah a va lût a, rei lo tê-ah chuan a rawn tlân lût nghâl a, "Tu nge light lo off zawk zawk kha? Hmeichhe âw chiang deuhin ka hria, Zovi, nangmah i ni ti raw?" a rawn ti nghâl ringawt a. Keini ho chuan tu ma'n kan ṭhutna kan thawhsan loh thu-in kan chhâng a, min ring chuang lo va. Mahse, a ṭhiannu Cindy chuan, "Tu mah an rawn kal lo tak tak alâwm," a tih tâkah chuan Lucy chuan, "A nih, bathroom aṭanga âw ka hriat kha tu nge ni si ang?" mak tih hmêl zet hian a rawn ti a.

Kimkimi chuan, "Nizânah pawh phun ser ser rî Sir RPa leh Puipuii ten an hre tawh bawk si a, kan Hostel hi a hrâng a ni hrim hrim ang," a han ti chiah mai chu Lucy chuan, "A hrâng maw!" tiin min rawn ṭhut tawp a. Kei chuan, "Tho teh, in dâwih êm mai!" ka ti a. Lucy pawh inthiam loh hmêl zet hian a tho ve nghâl vat a. Kimkimi chuan, "Ka zun a chhuak, min zui r'u," a tih avâng chuan Zovi nên chuan kan zui ve mai a. Lucy leh Cindy chuan an hlau a ni ngei ang, bathroom lamah chuan min rawn zui ve ringawt a. Keini pawh chuan kan lo be chhe lêm lo va, kan zun zawh hnu chuan choka lamah kan lêt tlâng leh vek a. Kimkimi chuan Mimi a rawn phawrh a, Zovi paw'n Kurkure leh thil dang ei tûr a neih ho a lo phawrh a. Lucy pawh chuan an ei tûr neih ho a lo phawrh ve a, "Bâwl vek ila, ei ang u," a ti a, kan ei ho vek a, kan inngeih leh phian hlawm a. Chutia thil kan ei mawlh mawlh lai chuan bathroom kawngkhâr chu a rawn ri thut a, kan phu lutuk chu kan râk vak a. Miss pawh a rawn kal nghâl a, Miss chuan, "Thli-in a chhêm mai mai a ni ang, va mu tawh mai r'u, zân dangah inhâu tawh suh ang che u," a tih avâng chuan kan vai chuan kan mu nghâl a, mahse, kan muhil mai lo va. Kimkimi leh Zovi chu a rûkin an inbe char char a.

Phone ka pài tih ka hre chhuak thut a, ka bag aṭang chuan phone chu la chhuakin FB ka khawih vêl mai mai a. Kimkimi leh Zovi paw'n phone an pài a, kan pathum chuan kan online a. Kimkimi chuan, "He pa hi a hmelṭha ti raw, min lo inbox a," a tih chuan kei pawh chuan, "Kha pa khan hei, kei pawh min lo inbox alâwm," tiin message chu ka hmuh a. Kimkimi chuan, "A va'n lerh reuh êm êm, hawh ṭawngkam inang chiahin reply ang, 'Lerh reuh êm mai mu hmak rawh,' ti ve ve ang," a ti a. Kimkimi sawi ang chuan ka reply ve nghâl a, a reh hmak a. Kimkimi nên chuan a rûkin kan nui vur vur a. Inbox ka han check leh chu Laltetea hian min lo text a, "I va meng rei ve," min rawn ti a. Kei pawh chuan ṭha tê tê-in ka reply zêl a, kan in-text tui deuh nge maw ni sana ka han en chu zîng dâr 3 a lo ri ṭêp a! Laltetea chu ka mangṭha a, phone ka dah chiah chu ka muhîl zui ve nghâl a. Mahse, rei pawh ka muhîl hman lo tihah chuan Miss chu a rawn âu chhuak thut a, light kan on vat a. 'Eng nge thil awmzia?' ti-a kan zawh chuan Miss chuan, "Ka mumang a chhe deuh mai mai alâwm, mu leh rawh u," tiin a mu leh nghâl a. Rilru chu a nuam lo ṭan ang reng, mahse eng mah sawi lêm lo chuan kan mu leh nghâl mai a. Kan Hostel thil thleng neuh neuh chu tihpalh thil thu chu a ni vek lo tih chu a chiang telh telh hian kan hria a, thla a awm ve tlata hriatna chu tu mai pawh chuan kan nei vek a, thinthiin tu mah kan mu lo.

Zîng dâr 4 vêlah Sir RPa chuan kan mutna room kawngkhar chu a rawn kik chiam a, Miss chuan a va hawn a. Sir RPa chuan, "Vawiin chu sawrkar chawlh a ni hrim hrim a, sikul in kal dâwn chuang lo va, in haw har deuh mai dâwn nia aw. In Miss-in thingpui lo lum se, nangni chu lehkha zir tûrin in hnuai lamah lo chhuk nghâl mai r'u aw," a rawn ti a. Keini ho pawh kan chhuk nghâl mai a, hmai pawh kan phih lêm lo va. A vawt ang reng, kawrlum ka keng si lo va, lehkha kan zir lai te chuan vawt ka tihzia chu ka hmêl aṭangin a hriat ni ngei tûr a ni, Reuben-a chuan a kawrlum phelhin min hâktîr a, vawt ka tih êm avâng chuan a kawr min hâktîr chu ka lo ha ṭha ve mai a. Reuben-a chuan a note bu-ah chuan, 'Merry, ka hmangaih che,' tih hi a ziak a, min hmuh a, ka nui vur vur ringawt a. Reuben-a bawk chuan 'min chhâng ve la,' tih hi ziakin min hmuh leh a. Kei chuan a note bu-ah bawk chuan, 'Ka sawi dâwn lo, haha,' tih chu ka ziak ve bawk a. Sir RPa chuan min rawn ko thut a, min hâu dâwn emaw tiin ka lo hlauthâwng hman hle; mahse, Sir RPa chuan Reuben-a nên Miss thingpui va lâkpui tûrin min ti a.

Miss pui tûr chuan in chung lamah Reuben-a nên chuan kan chho a, Miss chuan a lo siam zo diam tawh chu lo niin. Miss chuan, "Nangni pahnih hi in inngaihzâwnna a rei tawh em?" tiin min han zâwt teh tawng a. Ka zak lutuk chuan, "Kan inngaizâwng lo rêng rêng," tiin ka chhâng a. Mahse, Miss chuan, "In inngaizâwng tih ka hre vek alâwm," a tih tlat si avâng chuan mipa zâwk na nâ nâ chu a lo huaisen deuh ni ngei tûr a ni, Reuben-a chuan, "Immm, Miss. Kan inngaizâwng alâwm, kan inngaihzâwnna pawh a rei ve leh deuh tawh, mahse Miss, lehkha zir loh phah nân kan hmang lo a nia aw," a ti a. Miss pawh chuan, "Zirlai nih vânga ngaihzâwng neih loh tûr tih dân a awm hleinêm; mahse, zirlai ṭhulh phah khawpa ngaihzâwng te ngaihsak erawh a ṭha chuang lo a nia, hre reng rawh u. Zirlai tân chuan in zirlai bâka thil pawimawh a awm tûr a ni lo," a han ti leh a. Ben-a nên chuan kan inen a, kei chu ka lo lai ang reng, in hnuai lamah thingpui chu kan keng thla a, keini pawh kan in nghâl a. Thingpui kan in zawh hnuah pawh hâw nghâl mai lovin lehkha kan zir leh nghâl char char a, dâr 7:30-ah Sir RPa chuan 'a haw theih tawh e,' a tih avâng chuan hâw tûrin kan insiam nghâl a. Reuben-a chuan, "Tûkin chu ka thlah hman lo vang che, ka nî te inah kal kâwi ka ngai a," a tih avâng chuan ka ṭhiante rualin ka hâw ve mai a. Kan in kawng pêng step-ah tak chuan Laltetea chu a lo ṭhu reng a, min hmuh ve leh chuan, "I lo hâw har lutuk a, zîngkâr aṭangin hetah hian ka awm tawh, ka lo nghâk char char che alâwm," a lo ti a. Kei lah chuan, "Min ngai a ni maw, a nih chuan min paw rawh, ka ke a na tawh teh mai a nia aw," pangchang deuh hian ka han ti a. Laltetea pawh chuan min paw ve nghâl mai a, "Nizân chu i room tukverh ka en char char a, ka lung a lêng reuh lutuk maw le. I room tukverhah i lo dâk leh mai tûr ang hian ka ngaihtuah a, lehkha pawh ka zir thei lo," a han tih chuan ka khawngaih reuh lutuk a, "Ka awm loh chuan nuam lo i ti em ni?" ka tih chuan Laltetea chuan, "Nuam nâng aw...kei aia mâwl tu mah an awm tawh si lo va, ka khua a har alâwm," a han ti kher a. Kei chuan, "Nang aiin ka mâwl lo, min chhuktîr rawh, mâwl hi min ti ve ziah mai," tiin Laltetea puak chu duh tawh lovin keimahin chak tâwkin ka kal a. Laltetea chuan min lo ûm a, ka ding duh bîk lo va. Laltetea chu a ding thut a, "Hei hi lo en ve teh, a va'n mak e!" a tih chuan ka hawi lêt a. "Rûl, rûl," tih chûl pah chuan rang zet hian a rawn tlân a, kei pawh chu ka tlân ve nghâl a. "Rûl maw i hmuh," tiin ka theih tâwpa chak chuan ka tlân a. In kan han thleng chu Laltetea chuan, "Tih der," tiin a nui vak vak a. Kei chuan, "Nichin khan rûl i hmu lo a, min lo tih der mai mai maw?" thaw huam huam chung hian ka han ti a. Laltetea chuan, "Ni chiah e maw le, eng rûl nge tah khan awm se i tih, i mâwl ka tih khan i duh lo vêl a, kha kha lâwm i mâwlna," tiin min nuih vak vak a. Ka thinrim lutuk chu an inah ka lût a, novin tui ka va suak a, Laltetea pâwna ṭhu hle hle lai chu ka leih pawp a, a phu chiang kher mai! Amah chauh huh chu a duh bîk lo a ni ngei ang, an in chhûngah lûtin tui chu a va suak ve nghâl a. Tuiin min leih a tum ve tih ka hriat sa avâng chuan kan in lamah rang zet hian ka tlân nghâl a; mahse, Laltetea chuan min rawn ûm tho a, kan in kawngkhar ka thleng chiah tihah chuan min leih a tum a, kei ka lo lût hman si, ka nu hmun phiat zo bawlhhlawh paih tûra lo chhuak zâwk chu a leih palh ta zâwk a. Ka nu chuan, "Laltete, ka vaw dâwn che," tih leh hmunphiah nên ûm a rual nghâl a, Laltetea pawh a insawi fiah hman lo, ka nu chuan a rem lai lai a a vaw tawp tawp a, mahse nâ chuan a vaw chuang lo. Kei chuan ka lo nuih vak vak a, Laltetea chuan, "Nangmah vâng vek a nih kha," tiin a kut tum min lo hmuh a, ka hlau dêr si lo va.

Zing chaw kan ei kham hnu chuan Laltetea chuan, "Vawiin chu min bazarpui rawh aw, ka nu'n pawisa chêng 3,000 min pe a," tiin bazarpuiah min rawn sâwm a. Kei chuan, "Thil min lei ve dâwn chuan ka zui ang che," ka tih avâng chuan Laltetea pawh chuan, "Ka lei ve ang che," a ti ve mai bawk a. Ka insiam thuak thuak a, Laltetea nên chuan Bazarpui lamah kan chhuk a, thil lei lêm lo chuan dâwr tinah chuan kan lût kual sek a, Laltetea duh zâwng rêng rêng kan hmu thei lo, ka ril ṭâm tawh lutuk chu, 'Thil ei phawt ang,' ka ti a. Elfa Restaurant-ah chuan Pizza kan order a, kan nghah chhûng chuan thla te kan inla vak vak a. Pizza chu an lo peih thuai a, ka ril a ṭâm tawh bawk a, ka rin aiin ka ei hnem a. Laltetea chuan, "Ei lam hi chu i thei ve ngawt mai," min tih chuan kei chuan, "Ei thei lo ila buai tûr in tam êm mai," tiin ka han chhâng lêt nghâl a, Laltetea chuan min chhân lêt dân tûr a hre tawh lo ni ngei tûr a ni, a nui ringawt a.

Thil kan ei zawh hnu chuan Laltetea chuan lehkhabu dâwrah min hruai a, "Diary ka lei ang che, chuan ka chanchin hlîr i ziak dâwn nia," tiin diary nalh deuh, a kalhna awm chu min thlansak a. Ka duh zâwng tak a lo ni bawk nên, thil to lutuk a ni lo bawk nên, "Min leisak dâwn chuan a pawi hleinem," tiin diary chu ka la a. Dâwr nghâktu chuan, "Chahbi kha a hnungah kan bel kha aw," a rawn ti vat a. Kei chuan, "Diary chahbi-a kalh theih ka nei tawh bawk a, ka duh duh ka ziak tawh ang. Laltete, misual deuh chhuahin ka chhuah dâwn che nia aw, ka diary-ah chuan," ka han tih chuan Laltetea chuan, "Kum 2 hnuah heta i ziah ho hi kan chhiar dûn dâwn nia aw, sual deuh a min ziak a nih chuan he diary hi ka paihsak daih ang che," a ti a. Kei lah chuan, "Ka chhiartîr dâwn lo che," ka lo ti hmak a. Dâwr nghâktu lah chuan min lo nuih char char a. Laltetea chuan, "Dâwr nghâktu saw'n min nuih char char a nia, hawh kal tawh ang," tiin ka bânah kaiin min chhuahpui a, kan veng lama haw tûr chuan motor lo chuan a ngaihna a awm lo va, ke-a kal nân chuan a hla mah mah. Taxi kan châng a, an ding thei mai lo va. Laltetea chuan, "Rickshow pawh ko tawh mai rawh, taxi-ho an ding duh lo êm mai," a tih avâng chuan rickshow lo tlân leh hmasa ber chu ka châng a. Mahse, Rickshow leh Taxi a rualin an rawn tlân tlat mai, ka hmuh ve leh chuan, "Rickshow" ka han ti a, Taxi pawh a ding, Rickshow pawh a ding a. Laltetea chuan, "Rickshow chu a khawi zâwk hi?" tiin min lo nuih vak vak a. Kei chu Taxi lamah zâwk chuan ka lût a, Laltetea nuih za lutuk chu min rawn zui vat nachâng pawh hre lo chuan a nui chiam a. Kei chuan, "Kan hnunga Rickshow hian lo haw mai rawh," ka han ti chiah chu Taxi-ah chuan rang zet hian a rawn lût a. "Keini chu kan hausa bîk e, Rickshow-in kan hâw dâwn bîk bîk a nia," tiin a nui chhunzawm char char a. Kei pawh chu ka nui ve tawp ringawt a, 'ka nu dâwrah i duh zâwng a awm leh awm loh en ve rêng rêng ila,' ka tih avâng chuan kan dâwr lamah kan tlân tlang nghâl a.

Episode 22

Kan dâwr kan thlen chuan ka nu chu a lo buai ang reng a, min hmu chiah chu, "Min pui nghâl teh u," a lo ti nghâl a. Ka nu chu ṭhu khaw muang lo chuan kan pui nghâl char char a, kan buai zualpui a reh hnu chuan ka nu chuan, "Eng nge in rawn tih dâwn?" a ti a. Kei chuan LalteteaT-shirt tûr kan zawn thu ka hrilh chuan ka nu chuan, "Hei a rawn thleng chiah, i va'n vânnei tak, pakhat mah ka la hralh lo, i duh duh thlang rawh," a ti a. T-shirt ho chu a rawn phawrh sup sup a, mawi ka tih deuh apiang 'hei chu ka tâ tûr,' ka ti zêl a. Laltetea paw'n a duh zâwng tak a tâwp a tâwpah chuan a hmu ve ta a. Pahnih a thlang a, keiin pali ka thlang a. Ka nu chuan, "Dah ṭhen rawh," min ti a. "Mahse, mipa t-shirt hi ka duh alâwm" ka ti tlat a. Ka nu pawh chuan a phal lo peih ta lêm lo va, mipa pheikhawk mawi deuh mai chu Laltetea chuan a en a, "A nalh e, la daih rawh," ka lo ti vat a. Mahse, a man chu a lo tam ang reng a, ka nu chuan, "I duh chuan la rawh, i nu hnênah ka lo sawipui dâwn che nia, hlawh a lâk hun hunah min pe thei reng alâwm, nangni leh keini kârah a hlêp awm lovin ka pe dâwn che nia," a tih avâng chuan Laltetea chuan a bun chhin a, a lo inhmeh phian a, a bun tâwk chiah chiah leh nghâl a. Ka nu chuan, "Kha chiah a awm tawh, la rawh," a lo ti ve vat a. Laltetea pawh chuan a duh zâwng tak a nih avâng chuan a nu hrilh hmasa lêm lo chuan a la tawp a, ka nu chu chêng 2,000 a pe a, "A bâk chu ka nu'n a pe mai ang che," a ti a. Ka nu chuan, "T-shirt hi ka lâkna chiah chiahin ka pe ang che," a ti a. Kei chuan Laltetea t-shirt chu mawi ka ti reuh lutuk a, ka nu hnênah a dang a la awm leh awm loh ka zâwt a, ka nu chuan rawng inang a awm lo a tih avâng chuan Laltetea hnênah chuan, "I t-shirt hi ka ha ve dâwn," ka ti a. Laltetea chuan, "Nichina i lâk rawng kha a nalh tho kha, nakinah kan inhâk thleng dâwn nia," a lo ti ve nghâl vat a. Ka nu chuan tlai chawhmeh vêl a va lei zuai a, "Inah va hâwn nghâl rawh u," min ti a. Laltetea nên chuan kein kan hâw a, kal kawngah chuan ice cream te kan lei a, nuam kan ti dûn khawp mai.

Chhûn lamah thil ka ei hnem avâng chuan zanriah ka ei thei lo va, mahse ka pa'n, "Chaw ei loh ngawt ai chuan tlêm tal ei rawh," min ti tlat si a, an lungawi nân bâr hnih khat chu ka han bâr a, ka ei lui thei ngang lo, 'Ka puar tawh,' tiin Night Hostel-a kal tûrin ka insiam nghâl a. Laltetea chuan, "Ka thlah ang che," a ti a. Ka ṭhiante nên kan innghah khâwmna ṭhin hmun thleng min thlah a, Hostel pêng kan thlenin Reuben-a kan tâwk ve leh a. Reuben-a hovin Hostel lam kan pan ho a, Reuben-a chuan, "Hostel a awm hi chu a ṭha ngawt mai, ni tin zan tin kan inhmu thei a, lehkha kan zir dûn thei zêl bawk si a, a ni tèl hian ka duh telh telh chein ka hria, nang ni tin kan inhmu si a, min ning nge min duh ve telh telh zâwk?" tiin min han zâwt a. Kei chuan, "Ka hre lo e a, ka nin che pawh ka hre lo," tiin ka nui vur vur ringawt a. Reuben-a chuan, "I zei lo lutuk hi lâwm i duhawm êm êmna chu," tiin ka kut a rawn vuan a. Kan ṭhiante chu kan hmaah an kal a, keini a hnungah, Reuben-a chuan, "Vawiin lam eng nge i tih?" tiin min zâwt a. Kei chuan Laltetea nên kan bazar thu ka hrilh a. Reuben-a chuan, "Kei leh Laltetea-ah hian duh thlang dâwn ta la, tu nge i thlan zâwk ang? Tûnah min chhân kher a ngai lo a nia, keimah min thlan zâwk theih nân ka theih tâwp ka chhuah dâwn alâwm. Nang paw'n i thinlung hei ai hian min hawn ve la, ka bialnu i ni reng chung hian mi hrang daih hi a châng chuan i ang ṭhîn a, a chhan pawh Laltetea vâng a ni tih ka hria. Mahse, ka hre lo der ṭhîn, kan inkâr hi hei aia thûk zâwk a nih theih nân ka theih tâwp ka chhuah ve a ni tih min hriatsak rawh aw, ti hian ka bulah awm reng la," a han ti a. Ka rilru chu a nuam lo ang reng a, a chhan chu Reuben-a hian ka rin aiin min lo duh niin ka hria a, chuan mi ṭha tak a ni pawhin ka hria. Reuben-a ka khawngaih rualin ka ṭhian ṭha ber Laltetea ka ngaihthah thei bîk si lo, an pahnihah duh thlan ngai ta se tu nge ka thlan ang le. Rei pawh inngaihtuah buai ngai lovin Laltetea ka thlan ngei ka ring a, chu chuan ka rilru a ti buai zual a, keimah chu sual ka intiin Reuben-a chu ka khawngaih êm êm a. Reuben-a hmêl ka en a, inṭhen tûr anga ka inngaihtuahin ka ngai ngam leh chiah bawk si lo, ka rilru hi a buai a ni.

Hostel kan thlen chuan lehkha kan zir nghâl a, lehkhabu en reng chung chuan thil dang daih ka ngaihtuah a. Reuben-a thu sawi khan ka rilru a ti buai a ni, amah tê chu ka en leh vung vung ringawt a. Reuben-a hi mi fel tak a nih bâkah a hmêl a ṭhain a luck êm êm a, chuta kâra kei ve tehlul min han duh hi chu lâwm tûr ka ni lâwm ni. Ka hmuh hmasak ber ni te kha ka ngaihtuah a, kha mi ni-a ka thinphu rî rinzia mawlh kha. Reuben-a tih loh ka vawi khat hmuhnaa ka duh hi ka la tawng ngai lo va, ka tawn leh theih pawh ka in ring lo. Reuben-a lehkha zir mawlh mawlh lai chu a kutah ka va vuan thut a, chutia keimah zâwkin a kut ka han vuan ve ta chu a lâwm hle ni tûr a ni, a lo nui sáng a. Ka kut chu nghet tak mai hian a lo vuan a, "Lehkha zir rawh," nui chung hian min ti a. Kei chuan ka lu ka thing a, amah ngawt chu ka en a. Reubena chuan, "Min en lai," tiin a nui vur vur a, a lai hmêl chu a ṭha tih piah lam hi a ni. Zân dâr 9 a nihin thil kan ei a, kan ei zawhah lehkha kan zir leh a, mahse zanin chu ka rilru-ah lehkha rêng a lang lo, thil ngaihtuah ka ngah êm a ni. Reuben-a ṭhatna lai hlîr chu ka ngaihtuah a, hmeichhe dang ngaizâwng tûra ka han dah chhin hian ka thîk nghâl êm êm ringawt a. Kan school mipa zînga luck ber bialnu ka ni a, hmeichhia tam tak hian keimah nih an châk a, chutah kei hian ti nge ka thinlung zawng zawnga ka rilru ka pêk loh bîk ang le, a ṭhatna hian chu chu a phu hliah hliah a ni. Dawhkanah chuan, "Ben-a love Merry,' tih chu ka ziak a, Reuben-a ka hmuh a, nui vur vur chung hian, "Zanin chu i awm dân hi a danglam e, min duh hiam hiam lutuk a, ka ngaih i ti ṭha lo zâwk," min han ti a. Kei pawh chuan, "Nia, zanin hi keimah kha ka ang lo," tiin ka nui ve ringawt a.

Zân dâr 11 vêlah mu tûrin kan room lamah hmeichheho chu kan chho a, zun pahin kan hmài te kan han phih thuak thuak hlawm a. Keini ṭhianho chu kan mu nghâl a, Cindy chu bathroom-ah a la awm ni ngei tûr a ni, a rawn râk vak a, kan va tlân nghâl a, ṭap pûr chung hian "Thlahrâng ka hmu," tiin a ṭap nghâl zawih zawih a. Kan Miss hova kan han buaipui pawh chuan a zia hlei thei lo va, a khûr zawih zawih a, "Thlahrâng," tiin a rawn ṭap leh vak ṭhîn a. Sir RPa tih ngaihna hre lo chuan a chhûngte a phone ringawt a, a chhûngte chuan in lamah an hawpui ringawt a, keini ho chuan mak kan tiin kan rilru chu a nuam lo tlâng ang reng. Miss chuan, "A hmuh sual mai mai a ni ang," tiin min thlamuan mah se, ka ṭhian dangte chu an hlau hle tih an hmêl leh an chêtzia aṭang chuan a hriat a. Mahse kei chuan hlauh nachâng ka hre lo nge Cindy thusawi 'thlahrâng ka hmu' a tih kha ka âwih chiah lo nge tih pawh ka hre thiam lo, keimahah hian hlauhna pakhat mah ka nei lo va, fiah ka châk zek zek zâwk a. Ramhuai film ka en te hian ka hlau thei lutuk, mahse, zanin chu enge ka hriat pawh ka hrethiam bîk lo, ka huaisen sawt hian ka inhria.

Ka ṭhiante an mut vek hnu chuan zung tûrin bathroom-ah ka kal a, ka zung zo room-a ka lût leh tûr chu dawhkanah hian meizial leh lighter hi a lo awm a. Ka zu châk tlat a, Miss a mu tawh tho bawk nên bathlar lamah chuan meizial chu ka zu ru a. Reuben-a leh Laltetea chungchâng te ka ngaihtuah mai mai a, chutia ka awm hle hle lai chuan tu emaw hian min thâwk khum se chutiang ang vêl chu niin ka hria, thli a thaw si lo va, mahse engtin emaw tak hian a rawn vawt thut a. Mahse, ka hlau lêm chuang lo, Miss aw ka hriat avângin ka meizial zûk lai chu ka paih a. Miss chuan l, "I la meng elaw? I hlau ve na nge? Ka ril a ṭâm tlat, thingpui ka lum ang a, in ang aw," a ti a. Miss chuan thingpui a siam zawh chuan biscuit nên kan hmeh a, Miss chu tîtî pui a lo nuam phian a, ka nêl nghâl hle, ani pawh chuan a student ang ni lovin a ṭhian ṭha deuh ang hian min kâwm ve bawkin ka hria.

Miss nên kan thingpui inna no vêl chu ka sil nghâl a, Miss chuan tukverh bulah meizial a zu a. Ka va phei chuan Miss chuan, "Ka kut ka sil ang a, kan mu dâwn nia," a ti a. Kut sil tum chuan a phei a, a rawn lêt leh thut a, "Merry, tukverh kha lo khar," a sawi zawh hma chuan, "Saw saw eng nge!" tiin a râk vak mai a. Kei chuan tukverh lam chu ka en ve vat a, kan chhak lawk hnim bulah chuan hmeichhe pakhat hi kan hmu a. Chutia hmeichhia thim thamah mahni chauha awm ngam chu mihring pangngai a nih kan ring lo ve ve a, bâkah a chezia hrim hrim chu a râpawm tih piah lam a ni. Miss nên chuan kan râk vak a, mi dangho pawh an rawn phei vek a. Sir RPa leh mipa dang ho pawh an rawn chho vek a, thil awmzia Miss chuan a sawi a, tukverh lam kan han en leh chuan kan hmu tawh miah lo va. Sir RPa chuan, "En fiah a ngai a nih chu," tiin mipaho chu light kengin an va kal a, eng mah an hmu mai lo. Mahse, thil rim chhe deuh hi an hria a, chu lamah chuan an kal zêl a, hnimbuk kârah chuan hmeichhe ruang chhe tawh tak mai hi an hmu a. Chu veleh Sir RPa te chu an rawn lêt vat a, thaw huam huam chung hian Sir RPa chuan, "Police phone vat a ngai, ruang kan hmu a," a rawn ti chiah mai chu kan hlauvin kan phu chiang kher mai. Miss chuan police a phone vat a, police-ho rawn thlen hma chu kan mangang tlâng vek a, hmeichhia leh mipa pawh kan awm hrang lêm lo, kan hlau lutuk chu kan awm khâwm vek a. Reuben-a chuan, "Hlau miah suh, ka awm hi," a tih chuan ka thla a ti muang sawt a; mahse, mak ka tiin ka tha chu a khur reng a. Ruang an hmuh kha tu ruang nge ni ang le? 'Cindy khan dâwt a sawi lo a ni maw, he nu thla hi a hmu a ni ngei ang,' tiin ka inngaihtuah rauh rauh a. Puipuii phei chuan, "Kei chu Hostel aṭang in ka chhuak dâwn, a hlauhawm êm mai, ka awm duh tawh lo," a ti phawng a. Kimkimi leh Eli pawh chuan Hostel aṭanga chhuah chu an duh ve nghâl a. Kei tak pawh chuan awm reina chi-ah ka ngai tawh lo va, awm lui ta rêng rêng pawh ni ila, rilru nuamin kan awm thei dâwn chuang lo va, kan ṭhianhova Hostel chhuahsan chu a finthlâk berin kan hria a. Mahse, Sir RPa te nupa mitmei kan vêng hle, eng mah chu kan sawi rih lo va. Mahse, Miss zawk chuan, "Hostel tûr dang zawn a ngai a nih hi, tiang chuan lehkha kan zir thei nâng, a hlauhawm êm mai," a rawn ti hlawl a. Hmeichheho chuan Miss thu chu kan lo tuihnih vat a, "Nia, insawn mai ang u, kan hlau tawh, ruang hi kan hmelhriat te an ni lo ang maw?" kan han ti a. Sir RPa chuan, "A thim bâkah a hmêl pawh a hriat chian vak theih loh, kan khawih ngam lo hrim hrim, police-ho lo thlen hma chu ti khan awm rih rawh se," a ti a. Patea chuan, "Sir, he nu hi miin an that a ni hrim hrim ang," a lo ti mai chu Kimkimi hlau lutuk chu Reubena a lo inpawmtîr ringawt a. Ka nuih za si ka khawngaih bawk si chu ka'n nuih ringawt a. Ben-a pawh chuan, "Hlau suh u," tiin a lo hnêm ve vat a. Kimkimi zak lutuk chu a tho nghâl vat a, Sir RPa pawh chuan, "Hetia a ruang hnim kâra an thuhrûk dânah hian thih dân pangngai taka thi chu a ni lo tih a hriat nghâl mai, miin an that a ni ang," a rawn ti ve vat a. Kan hlau lutuk chu awm ngaihna rêng rêng kan hre lo, Police-ho lah an rawn thleng har bawk si, Kimkimi leh Puipuii te phei chu an ṭap ringawt a, Miss chuan a thiam ang tâwkin a lo hnêm hlawm a.

Police-ho an rawn thlen chuan Sir RPa chuan thil awmzia te a han hrilh tê tê phawt a, police-ho chuan ruang chu thla te an han la tê tê phawt a, a ruang an lâk lai te chuan kan hlau lutuk chu kan tha hi a khûr zawih zawih a, mipaho pawh chuan an râp hle tih hai rual a ni lo. Ruang chu post-mortem tûrin an phur phei nghâl a. Sana ka'n en meuh chuan zîng lam dâr 7 a lo ri ṭêp tawh a, Sir chuan, "Hostel dang kan zawng rih phawt mai ang, zanin aṭang chuan hetah kan riak tawh rih lo vang, va haw tawh rawh u, in chhûngte nên in puanthuah vêl chu tlaiah in rawn la dâwn nia," a ti a. Keiniho pawh chu awm khawmuang lo chuan kan haw nghâl a, Reuben-a chuan min kuah tlat a, ka hlauhzia chu sawi kher lo mah ila a hrethiam ve ni ngei tûr a ni, min hnem nân thil dang min sawipui char char a. Mahse, kei chuan thil dang rêng rêng ka ngaihtuah thei lo, kha nu kha tu nge a nih ang le tih ngawt chu ka ngaihtuah a, tu nge that ang le, tih nên rilru a ti buai tak zet a ni. Kan in kawng pêng kan thlen chuan Laltetea hi kan hmu a, Reuben-a pawh chuan, "Laltetea'n a lo hmuak tho che a, kei chu ka va haw tawh nge aw," tiin min hâwsan a. Laltetea chuan, "Ti nge i hmêl chu? I mit kha a bui vek a nia," min ti nghâl a. Kei chuan thil thleng vêl chu ka han hrilh a, Laltetea pawh chuan mak a ti ve ngang mai. "I hlau hle dâwn a nih chu, lo kal rawh inah haw phawt ang," tiin ka kut a vuan a, ka kut lah chu a la khûr reng a, a vawt êm êm mai bawk a. Laltetea chuan, "Hlau rêng rêng suh, police an awm alâwm, a thih chhan leh a thattute pawh an chhui chhuak vat mai ang," a ti a. Hostel kan hlat tawh vâng leh Laltetea bula ka awm vâng pawh a ni mai thei, ka hlauhna pawh tlêmin a zia deuh.

In kan thlen chuan ka pa chuan engkim a lo hre tawh chu lo niin, ka haw har lutuk chu an ngaih a lo ṭha lo ni ngei tûr a ni, Sir RPa an lo phone a, Sir RPa chuan thil awmzia te a lo hrilh a, nichin lawk khan an lo haw, a lo ti a ni âwm a. Ka pa chuan, "Tlaiah i puanthuah vêl pawh kan va la dâwn nia, chaw ei la, i mu dâwn nia, vawiin chu sikul pawh kal duh suh," min ti a. Laltetea pawh chuan, "Kei pawh vawiin chu sikul kal ka peih lo, vawiin chu kan châwl mai dâwn nia," a lo ti ve vat a. Ka nu chuan chaw min siam a, chaw ka han ei tûr chu ruang rim chhe zet kha ka hnârah a châm reng a, ka insûm hman lo ka luak nghâl bawrh bawrh a, "Ka ei thei thlâwt lo," tiin ka kut ka sil a, ka pa bulah rei lo tê ka ṭhu a. Ka nu chuan, "I châu a nih kha, nizân in mu si lo va, i room-ah va mu rawh," min ti a. Kei chuan keimaha ka awm ngam rih loh thu ka sawi a, ka nu chuan, "Tete, a mut chhûng chu va vêng ve lawk mai teh a, hei a pa nên Office dâwr kan ngai si a," a ti a. Laltetea pawh chuan, "Merry chu ka lo awmpui mai ang, va kal r'u, ei tûr tui deuh min lo hawn r'u aw," a ti a. Kei chuan, "Room-ah ka mu peih lo, hetah ka mu mai ang," ka ti a, ṭhutthlengah chuan ka mu tawp a. Ka pa chuan puan min lo sintîr a, ka muthilh lai pawh ka lo hre lo, ka chau hle ni tûr a ni.

Bathroom-ah hian ka lo insil a, sahbawnin hmai ka phih a, tui herh hâw ka tum a, tui rêng rêng a lo chhuak thei lo va, ka mit lah a thîp tawh si, "Kimkim, tui min lo pe teh," tiin ka lo au vak vak a. Mahse tui chu amahin a lo hâw ve leh mai a, ka hmai ka phih nghâl a, mahse ka hmai ka phihna tui chu thisenah a rawn chang thut a, ka phu lutuk chu ka ṭhiante bulah ka tlân a, choka ka thlen hma chiah chuan hmeichhe sam sei deuh hi ka hmaah a rawn ding thut a. Chutah ka phu lutuk chu ka au chhuak a, Laltetea chuan, "Mumang i nei a ni maw, hlau suh," tiin min kuah a. Kei chuan, "Kha nu kha a ni chiang mai," khûr zawih zawih chung hian ka ti a. Laltetea chuan, "Hlau suh, mangchhia i mang mai mai a nih kha," tiin min lo hnêm ve char char bawk a, ka hlauhna erawh a tih ziaawm phah lêm chuang lo va. Ka mumangah leh zêl pawh lo hmuh chu tiin ka harh hnu pawh chuan ka ngaihtuah zui char char a. Laltetea chuan, "Eng mah ngaihtuah suh, hetah mu leh la, i sam ka lo phiarsak leh ang che, chuan i muhil leh dâwn nia," min ti a. Kei pawh chu ka mu ve leh nghâl mai a, ka sam min phiarsak pah chuan Laltetea chu a zai pah bawk a, Laltetea'n aw thûm mawi lutuk maia min han awih tâkah chuan rei lo tê-ah ka lo muhil leh nghâl a, mahse mumang eng mah ka nei tawh lo. Thi ang dêra ka muthilh hnu chuan ka nu ṭawng rî ka hria a, ka mit ka han men chuan ka nu chuan Laltete chu a lo hâu fiam a, "Laltetea mut duhzia hi, Merry lo vêng rawh aw kan ti a, amah zâwk a lo mu tui êm êm a," tiin a nui vak vak a. Kei chuan, "Ânu chu min ti harh daih alâwm, ka mut tui tui nên," ka tih chuan ka pa chuan, "Bawihte, cake leh thei tui kan lo hâwn a, ei phawt ula i mu leh dâwn nia," min ti a. Ka nu chuan cake chu thlêngah a rawn chhawp a, Laltetea nên kan ei dûn a. Laltetea chuan mangchhia ka man thu vêl te chu a hrilh hlawm a. Ka nu chuan, "A loh theih loh, keini paw'n hmu ve ila chuan kan mang a chhe ve khawp ang, chuvang alâwm lo vêng rawh kan tih che, nang lah chhuatah i lo mu ringawt a, enge i hriat?" a han tih chuan Laltetea chuan, "Ka awm mai mai bîk hleinêm, a muthilh theih nân a sam te ka phiarsak a, ka zai bawk a, min hâu peih ve hrim hrim," a han tih chuan ka pa chuan, "I zaisak maw, eng hla nge i saksak a? Han zai leh chhin teh," a lo ti fiam vat a. Laltetea chuan, "Ka zai duh tawh lo," nui vur vur chung hian a ti a. Ka nu chuan rang zet hian, "Laltetea hi maw, a zai thiam lutuk asin, hmân zânah an ṭhianhovin an zai a, a zai thiam tak tak a nia aw, Idol-ah te tel ve se kan lo ti char char alâwm," a lo ti ve vat a. Ka pa chuan, "Chutiang taka a zai thiam a nih te chuan min zaisak ve se ka hre ve châk alâwm le," a tih lawm lawm pawh chuan Laltetea chu a zai duh chuang lo va. 'Ka lai,' a ti tlat a. Kei chuan, "Guitar a awm reng kha va la rawh, ka mut theih nân min zaisak a ngai alâwm," ka tih tlat avâng chuan an inah guitar chu a va la a. Kei chu ka pa mal khamin ka mu a, Laltetea chuan guitar chu a han perh ri hmasa tê tê a, 'Ainawni' tih hla chu a rawn sa ṭan ta a, ka mit ka chhîng nghâl a. Laltetea zai chuan min thlawhtîr dêr dêr hian ka hria, ka pa pawh chuan thiam a ti hle a ni ang ngawi rengin a ngaithla a. Ka muhil ṭêp tihah chuan ka pa ṭawng rî chuan min ti harh leh a, "Kha Tetea chu i lo va'n zai thiam êm êm ve, hla dang han sa leh teh," a ti a. Laltetea chuan sap hla chu a han sa leh ta a, ka mut a chhuak ngang a ni ang ka lo muhil leh veng veng a.

Episode 23

Ka han harh meuh chuan tlai lam dâr 5 a lo ri ṭêp tawh a, Laltetea pawh kan inah a lo la awm a, ka nu chuan tui a lo thiartîr chu lo niin. Ka nu chuan, "Hei tui a lo haw a, tuizêm a khat vek tawh si a, in chhûngah pawh thiar khah vek a ngai, Tetea hi lo pui nghâl teh," min ti a. Ka nu chuan bêlpuiah leh ṭin ruak zawng zawngah min dahtîr vek a. Laltetea chuan, "I nu hi tui a duh thawh bawk a, ka dah khahsak vek ang che u," tiin thingpui inna no zawng zawngah leh cooker ruak zawng zawngah te, tui lumna bêlah nên lam a dah khat vek a. Ka nuih za lutuk chu eng mah pawh ti thei lo chuan ka nui char char ringawt a, ka nu choka-ah a rawn lût chu eng mah pawh sawi thei lo chuan a nui ve tawp ringawt a, "Laltete, thingpui inna no-ah te dah rawh ka ti che mi, cooker-ah pawh in lo dah vek a nih hi, in va han â dûn tak, paih vek r'u," min ti a. Laltetea chuan, "Merry tihtîr ve tawh," tiin an in lamah a tlânchhe daih a. Ka nu chuan a va ûm nghâl a, ka nu leh Laltetea chu an rawn lût leh a, ka nu chuan, "Blanket hi su rawh u, in money tûr ka pe ang che u, in sûk zawhah," a ti a. Laltetea chuan, "Merry bula insûk te chu a phakar thei si, ka va'n peih lo tak," a ti a. Kei chuan, "Nang fê, i phakar si, i chimawm si," ka lo ti ve vat a. Ka nu chuan, "Inhnialna hun a awm lo, tui a tâwp hman ang e, va insu vat vat r'u," min ti a. Laltetea nên chuan blanket chu kan han chîl ṭan a, vawi hnih khat vêl ka chîl a, ka chawl zêl a. Laltetea chuan, "I phakar lutuk, ka tha chauh ring suh," min ti a. Kei chuan, "Nangmah vângin ka tlûkna kha hei a rawn nâ alâwm, ka khûp hi a na lutuk," ka han tih chuan Laltetea chuan ka chalah min pen a, "Kha te chu chhuanlam duh suh, a rei tawh êm mai a," min ti a. Kei chuan, "Mumang chhia te ka nei ve êm êm a, min ngaihsak lo hlawm lutuk mai," ka han ti leh a. Laltetea chuan, "Lalno, êm êm a che, mang chhiat vânga hna inthawhtîr loh thu a awm ngai lo," tiin a nui vur vur a. Kei chuan chîlpui pawh chu ka tum lêm lo va, a khât tâwkin ka pui ve zeuh zeuh ringawt. Laltetea ning tawh lutuk chuan, "Va ṭhu hle hle zâwk teh, min ti buai mai mai," a ti a. Kei chuan hnial lêm lo chuan, "Yes, fai deuh khan lo su rawh aw," tiin bathroom aṭang chuan ka chhuak nghâl a.

Laltetea'n blanket a sûk sa chu pâwnah rawn zâr a tum a, ka nu chuan, "Va pui ve ta che," min ti a. Kei pawh chuan puih chu ka tum sa hrim hrim a, blanket chu ka zârpui a, Laltetea chuan tûm bûr chung hian, "A ngai tawh lo aw, a harsat lai zawng min thawhtîr a," tiin ka puih chu a duh lo ve tlat a. Ka nu chuan pawisa chêng 500 hi a rawn keng a, "Kha 250 ve ve-in in insem dâwn nia," a ti a. Laltetea chuan, "Keimah chiahin ka chîl alâwm, Merry chu a lo ṭhu mai mai alâwm, pawisa hi keima'n ka hmang vek dâwn," tiin pawisa chu a la a, a tlânchhe daih a. Kei chuan ka chuhpui peih lêm lo va, in chhûngah lûtin TV ka en mai mai a. Laltetea chu a rawn lût leh a, dâwrah thil a va lei ni âwm tak a ni, Chocolate hi min pe ve a, "Kha kha i phû tâwk a ni," min ti a. Kei chuan ngawi rengin ka la a, ka ei nghâl a. Laltetea chuan, "I thatchhiatzia hi chu aw, tu nge nupuiah nei duh ang che," min ti a. Kei chuan, "Min nei duh hi an tam lutuk, lungngai suh, min neitu tûr ka hmuh loh leh nangmah i awm tho alâwm," ka han ti fiam chu a lâwm zâwk emaw tih theih tûr hian, "Nia, ka awm reng alâwm ti raw..," tiin a nui vur vur a.

Tlai dâr 4 vêlah ka pa leh Laltetea chuan Hostel-a ka puanthuah vêl chu an va la a, ka nu leh ka û te nên eirawng kan bâwl a. Nu Chhuani chuan kan chawhmeh bai rim chu tui a ti deuh a ni ang, "In chawhmeh bai rim tuizia chu, kan in aṭang paw'n a rim ka hria alâwm le," a rawn ti a. Ka nu chuan, "He lamah chaw rawn ei ve r'u, Tetea leh kan pa pawh Merry puan thuah lain Hostel lamah an kal a, an rawn haw hunah chaw chu kan ei nghâl dâwn nia," a ti a. Nu Chhuani chuan Laltetea chawhmeh duh ber Sangha lian chi a chhum chu kan in lamah a rawn keng phei a, "Tetea hi chu Sangha a awm loh chuan chaw ei hi a peih vak ṭhîn lo va," nu Chhuani chuan a han ti a. Ka nu chuan chawhmeh eng eng emaw a siam belh nual a, tlai dâr 5 pelh hretah ka pa leh Laltetea chu an rawn haw a, an ril a ṭâm hmêl êm êm zui, chaw ei kan siam nghâl a. Chaw kan ei lai chuan Laltetea chuan ka ke chu a rawn rap sek a, min en lêm lo chuan a chaw ei lai chu a ei chhunzawm mial mial a, ngawi rengin ka ke dahna ka sawn a, rah min rawn tum leh chu ka ke a rap fuh mai ta si lo chu dawhkan hnuai a bih zeuh a, a nu chuan a lo hmu ni ngei tûr a ni, "Tete, chaw ei lai laiin lo ninhlei suh, ei hle hle rawh," tiin a rawn hâu a, kei chuan ka lo nuih vak a. Ka nu lah chuan, "He mite pahnih lah hi an awm dun lah hian an inhnial loh leh an inti buai reng a, an awm dun loh leh an inngai tho si a," a sawi zawh rual chuan nu Chhuani chuan, "Merry Hostel awm kâr te khan Tetea hi ka khawngaih asin aw, a room-ah a tawm tlat a, Merry room lam a en vung vung ringawt a, Hostel-ah ka luhtîr ve mai dâwn maw ni ka ti hman alâwm," a ti a. Laltetea chuan, "Merry ka ngai rêng rêng lo," tiin a chaw ei lai chu a thawhsan hmak a, a zak ve deuh a ni ngei ang.

Chaw kan ei kham hnu chuan ka pa chuan thei tui vêl lei tûrin min tîr a, Laltetea'n min zui a. Laltetea chuan, "Thil ka zâwt ang che aw, dik takin min chhâng dâwn nia," a ti a, a hmêl aṭang chuan a thutak hle tih a hriat a. Kei chuan, "Aw, sawi la," ka lo ti ve vat a. "Ben-a nên khan in la ṭha reng em? Chuan ani kha i duh tak tak em?" tiin Laltetea chuan min han zâwt a, ka chhâng lawk thei lo. Rei fê ka inngaihtuah hnu chuan, "Aw, kan la ṭha zêl e, Ben-a hi mi fel tak a ni a, duh loh chhan tûr ka nei hleinêm," tiin ka chhâng a. Laltetea chuan, "A ṭhat chu, ka thawveng hawk mai,va bulah i hlim a nih chuan a lâwmawm lutuk," a han ti a. Kei chuan, "I thin a rim em? Reuben-a hi i la ngai sual reng em?" ka han ti a. "Ngai sual hran lo ve, mahse mipa hi chu kan inthup thei a, hmeichheho ang hian kan lang tlang ve pawp pawp lêm lovva,vkan mizia phei chu kan thup thei lutuk a, fimkhur tluk a awm lo a nia. I hlim hi ka duh a, Reuben-a'n a ti hlim che a nih chuan a ṭha lutuk," Laltetea chuan a han ti a. Kei chuan, "Ka ke a nâ, min paw rawh," ka han ti a. Laltetea chuan, "Bialpa i neih reng kha aw, i bialpa inpuaktîr rawh," tiin min nuih vur vur a. Kei chuan, "Khatiang zawng khan maw kan intih dâwn a," tiin ka hnek vak vak a, dâwr kan thlen lai pawh ka lo hre lo va. Laltetea chuan, "Hei dâwr kan thlen tawh hi, lei vat vat rawh, haw vat vata lehkha zir ka duh," a han ti a.

Thil kan lei zawh hnu chuan kan hâw nghâl a, kalkawngah chuan Laltetea nên chuan kan zirlai chungchâng kan sawi dûn char char a. Hostel tharah luh leh ka tum deuh thu te ka hrilh pawh chuan 'lut tawh suh,' tia min khap ka rin nên, min khap miah lo a, "A ṭha alâwm," tih ringawtin min chhâng a, ka ngaih chu a ti ṭha lo ang reng. Kan kawt kan thlen chuan, "Lehkha zir ka duh si a, ka lo lût kher tawh lo mai ang aw," tiin Laltetea chu an inah a lût nghâl a. Ka thil lei vêl ka pa ka pe a, ka room-ah ka lût nghâl a, ka Diary-ah vawiin ka hun hman dân vêl ka ziak a, ka ziah zawhah ka mu nghâl a, mahse thil ngaihtuah ka ngah êm avângin ka muhil lawk thei lo va. Reuben-a leh Laltetea chu ka han khaikhin vêl a, an pahnih ka han bûk chhin chuan Laltetea bûk chu a rit zâwk; mahse, ani chuan a ṭhian ang chauhin min en a, hmeichhia angin min en paw'n ka hre lo, min duh ve ni se chuan mipa zawk a ni a, min hrilh tawh ka ring. Kei chuan a lakah rilru dang pu mah ila ka hrilh ngam si lo a, min huat phah loh paw'n kan inṭhian ṭhatna a chhiat ka hlau si. Reuben-a hian tihtakzetin min duh a, kei paw'n a rilru tih nat ka duh bîk lo. Zân dâr 12 a pelh hnu pawh chuan ka la chhîng thei lo, eng eng emaw ngaihtuah chuan ka meng reng a, ka muthilh lai pawh ka lo hre lo va. Zîng dâr 6 vêlah ka pa chuan min lo kai tho a, "Bazarah anṭam va lei lawk rawh," min ti a. Hmai pawh phih hmasa lêm lo chuan bazarah chuan ka kal nghâl a, zân ka mut ṭhat loh vâng chuan ka ni huih a, ka harh fîm hlei thei lo a ni ber mai.

Chaw kan ei kham ve leh sikul kal tûrin ka insiam nghâl a. Laltetea chuan min lo sâwm a, kan kal rual a, mahse ni dang ang lovin a ṭawng tlêm ang reng hle a, class kan thlen pawh chuan a ṭhutna lamah a kal nghâl a. Kimkimi chuan, "In inhâu leh em ni?" a rawn ti vat a. Kei chuan, "Kan inhauh âwm pawh ka hre lo," tiin ka bag chu ka han dah thla a. Laltetea lam ka hawi a, ka lam rêng a rawn hawi lo. Kan ṭhianho chuan kan Hostel hrâng chanchin te kha kan han sawi khâwm leh nak nak a, keimah ang thovin an mumang a lo chhe ve tho a ni âwm a, ka mumang ka han hrilh hlawm chu 'kei pawh ka mumangah ka hmu,' an lo ti sup sup a. Kan hlau êm a, kan ngaihtuah deuh reng bawk nên kan mangphan ve deuh a ni ngei ang.

Class lâk lai chuan Laltetea lam ka hawi ṭhîn, ka lam rêng a rawn hawi lo. Zirlaiah rilru pêk ka tum tehrêng nên, Laltetea lam ka hawi leh zeuh zeuh ṭhin a. Ka lu chu ka thing a, zirlaibu chu uluk tâwk hian ka en a, ka en ngai ka en reng vâng nge maw ni, ka lo muthlu a. Sir Jacob-a class a la ni kher zui, ka muthlu lai chu min lo hmu fuh a, ka beng bulah, "Ṭhu ṭha rawh," tiin ring zet hian a rawn ti a, ka phu chiang kher mai. Kimkimi pawh chu a lo muthlu ve tho a, Sir Jacob-a chuan, "In ṭhian dûnin in muthlu char char ringawt a, ka class-ah in awm peih loh chuan ka rawn luh hmain lo chhuak tawh r'u," min ti a, kan zak kher mai. Sir Jacob-a hi chu kan zirtîrtute zîngah chuan tawhkhirh ber a ni a, kan ngaina vak ngai lo hrim hrim a. Mi fel deuh leh lehkha thiam thei lo deuh leh thiam thei deuh pawh min hauh dân a inang vek a, mi han duhsak bîk pawh a nei ngai miah lo. Kawng leh lamah chuan a ṭhatna pawh a awm ve tho a, mahse ngainat chu a har ve khawp mai.

Chhûn chawlhah chuan Reuben-a leh a ṭhiante an rawn kal a, "Thil ei ang u," an rawn ti a. Kan ṭhian ho chuan kan zui ve nghâl mai a, Laltetea ka han zawng ru ṭhîn, hmuh tûr rêng rêng a awm lo. Khaw nge a kal ang aw ka ti rilru char char a. Reuben-a chuan min ngaihtuah hmêl zet hian, "I dam loh hmêl, i ṭha em?" min han ti a. Kei chuan ka ṭhat thu bâkin ka chhâng lo va, kan thil ei lai chuan Sir RPa a rawn kal ve a, Sir RPa chuan, "Hostel luah tûr kan hmu tawh a, zanin aṭangin luh duh chuan a theih aw, School dang chu ka luhtîr tawh lo vang, buaina a tam mai mai. Zanin chu in lo luh paw'n lehkha kan zir nghâl thei lo vang, Hostel tûr kha miin an luah lohna a rei ve tho si a, kan tih fai ve deuh chu a ngai dâwn a," a ti a. Reuben-a chuan, "A pawi hleinêm, zaninah kan lo lût vek dâwn nia. Sir, hei ka ṭhiante pawh hian rawn luh ve an duh a, i phal ka ring a ka lo sawm ve hlawm ringawt a," a lo ti ve vat a. Sir RPa pawh chuan a lo remtihsak nghâl mai a, Sir RPa kal hnu chuan kan ṭhianho chu kan han inrâwn hmasa tê tê a, zanina luh chu ṭhain kan hre tlâng a, Reuben-a te ṭhianho pawh an rawn lût ve vek dâwn a, Hostel tih fai leh siam rem ngai deuh a awm paw'n hmeichhe lam chu min âwl deuh kan ring a, zanina luh vek chu kan rêl thlu ta a.

School kan bân veleh ka puanthuah vêl ka siam a, ka chhûngte ka hrilh a. Ka pa chuan, "Hostel hrâng a nih tawh lêm loh chuan a pawi hleinêm, lehkha pawh i zir ṭha thei zâwk ang," min ti a. Laltetea hrilh ve rêng rêng a ṭhain ka hria a, an inah va kalin ka va hrilh a. Laltetea chuan, "A ṭha alâwm, nang Hostel aṭangin i zir ang a, kei ka room aṭangin, pakhatna nih kan inchuh ang, tûn ṭum chu pakhatna nih ka tum dâwn," a ti ve tlat a. Kei pawh chuan min chona chu ka lo pawm vat a, "Mahse, eng nge kan inthâp ang, pakhatna ni lo zâwk zâwkin enge kan châwi dâwn?" ka han ti a. Laltetea chuan, "Sana sangkhat man kan in-present dâwn nia," a ti a, ka phûr ru ang reng.

Ka pa chuan kan Hostel tharah chuan min thlah a, ka ṭhiante ho pawh chu an lo kim deuh ṭhap tawh a. Ka pa chu rei pawh awm khaw muang lêm lo chuan a hâw leh nghâl a. Sir RPa chuan, "Rei lo tê châwl hahdam ula, kan ti fai ṭan dâwn nia," a ti a. Kan ṭhianho zîngah hian Reuben-a ṭhianpa Johntea hian star a nei tih Reuben-a'n min hrilh ru tawh a, mahse tu ber nge a star tih kan hre lo. Zovi chu bialpa a nei a, Kimkimi hi a cute a, Kimkimi hi a star a nih kan ring vek a, mahse Eli pawh a nih kan ring ve tho. Reuben-a te ṭhianho leh ka ṭhiante ho chu kan innêl ṭan hle a, Hostel kan tih fai lai te chuan Kimkimi leh Johntea chu an inbe zeuh zeuh a, thil an rem dûn vêl bawk a. Zovi nên chuan kan inmitmei a, 'a ni chiang mai,' kan ti a, mahse rei lo te hnuah Johntea chu Eli bulah kalin Eli thil tihfai lai chu a va pui leh bawk si! Ngaihdân siam a va'n har, a rûkin kan nui char char a, Sir RPa chuan, "Nang chhuat lo nâwt la," min tih chuan rang zet hian Reuben-a chuan, "Keima'n ka lo nâwt zâwk ang, a bâl reuh si a hmeichhe tih chi a ni lo," a lo ti vat a. Sir RPa pawh chuan thil a hrethiam ve ni ngei tûr a ni, "Ben-a, heti lam zâwng hian maw ṭan i lâk dâwn a, nih leh kha nangma'n nâwt rawh le," tiin nui vur vur chung hian chhuat nawhna chu a rawn pe a, a ṭhiante ho chuan kut an lo bêng dur dur a. Ka inthlahrung deuh nên, "Keima'n ka lo nâwt zâwk ang," ka ti a. Mahse Reuben-a chuan, "Lo ṭhu mai mai rawh, min chhaih chhan te chu min awh vang mai mai alâwm, a ho lutuk," tiin chhuat chu a han nâwt ṭan ta a, a ṭhianpa Jacob-a chu nawhpui tûrin a sâwm a. Jacob-a lah chuan, "Thaibâwih ho nawh chi alâwm, nawt mai mai rawh," a lo ti hmak bawk si a. Ka ṭhiante ho chuan, "Kan khawngaih ang che'ng a, kan nawhpui hrâm mai ang che," an ti a, an nawhpui tâkah chuan rei lo tê-ah an zo nghâl a. Kei chuan kan mutna tûr vêl ka lo siam a, kan ṭhianho chuan tu puanthuah bîk tih awm lo chuan kan inṭâwm vek a. Kimkimi bula mut hi a châng chuan a ninawm ṭhîn, min khân ziah a, a châng phei chuan a ti lui ṭhîn ni hian ka hre ṭhîn. Zovi bulah a mut chuan a khân ve ngai miah si lo a, min ti lui deuh hian ka hria a, zan khat phei chu 'min khân tawh suh,' tiin ka ti harh a, a rûkin a nui char char tih ka hre reng si a. Zanin chu Eli bulah mut ka tum a, Eli puan leh ka puan chu hmun khatah ka dah a, mutna ka siam zawh hnu chuan ka ṭhiante bulah ka va kal leh a, an che rang hlawm khawp mai, an lo ti fel deuh vek tawh a, tih tûr vak pawh a lo awm tawh lo. Kimkimi bulah chuan ṭhut ka tum lai tak chuan Reuben-a chuan, "Thil lei lawk ang," tiin min hruai chhuak daih a.

Reuben-a chuan, "Sir RPa ka dîl vek tawh, a phal alâwm, 'rei s'u,' min ti a," a tih chuan ka ngaih a ngam sawt a, an lo ngaih kawih kha ka hlau ru deuh a. Hostel piahah chuan dâwr a awm a, Reuben-a chuan zan lai rilṭâm huna ei tûr vêl min leisak bâkah a ṭhiante ho leh ka ṭhiante ho ei tûr pawh a lei kêp vek a, a lei hnem si a kan bâwr ang reng. Hostel lama kan lêt leh lamah chuan kan tîtî phei char char a, Hostel thlen nân chuan step chho kal leh hret a ngai a, step chhoh ṭanna kan thleng chiah tihah chuan Ben-a chu a ding thut a, kei chu step-ah chuan ka chho hman a. Mahse, min koh avâng chuan ka hawi lêt a, Ben-a chuan min rawn hnaih a, min kuah tum ang deuh hian a awm a, min kiss a tum a ni hrim hrim ang tiin ka mit ka lo chhîng tawp a, mahse ka rin loh lam daihin Ben-a chuan ka thil khai lai chu min chhuh a, "Khawi keima'n ka lo khaisak ang che," a han ti a. Min kiss a tum emaw tiin ka lo in-ready ve tawh teh rêng nên, ka zak chem chem mai. A rûk chuan ka nui vur vur a, ka insûm zo lo chu ka nui chhuak tawp a. Bena chuan hrilhhai tak hian, "Enge i nuih vak vak a, enge i ngaihtuah?" min han ti phei chu ka nuih a za leh zual a. Ben-a tukkhumah tak chuan ka bêng ringawt a, ka nuih lah chu a za telh telh bawk, step-ah chuan ka ṭhu tawp a, ka nui zawm char char a. Ben-a hrilhhai lutuk chu a nui ve tawp ringawt a, eng mah a hre ve lo chung pawha a han nui vêl ka hmuh phei chuan ka nuih chu a za leh zual a, ka nui leh vak vak a. Ben-a chuan, "Miin an rawn dâwi thut che emaw ni le," tiin a nui ve vur vur a. Ka lu ka thing a, 'Ehemm...' tiin ka hrawk vêl te chu ka han thian vêl a, mahse ka la nui khur char char a. Ben-a chuan, "Nui rawh, insûm rêng rêng suh," min tih chuan ka nuih za lutuk pawh chu a reh ta deuh a, "Hawh, kal tawh ang," tiin thawh ka han tum chu Ben-a chuan min kiss thut a. Nuih chu khawi lamah, ka phu zawk a, min kiss rei deuh phei se chu ka nam sawn duh mai thei a ni, mahse a ding nghâl a, a kut min pe a, "Hawh, kal tawh ang," min ti a. Ka tho ve nghâl a, kan kal pah chuan Ben-a chuan, "Tinge nichin khan i nuih vak vak a?" min ti a. Kei chuan, "I nuih a za ve tho ang aw, ka hrilh lo mai ang che, ka zak," ka ti a. Mahse, 'sawi rawh,' min ti sek a, "Kha step kan chhoh ṭan lai vêla min koha ka lo hawi lêt khan maw, min kiss dâwn emaw ka ti a, ka mit ka lo chhîng a, mahse ka thil khai min chhâwk i lo tum vâng lek kha a lo ni si a, chu vâng alâwm ka nuih char char," ka han ti chu a nuih a za ve kher mai. "I va'n cute e aw," tiin a nui vur vur a. "Ka zak ve tho a nia, nui suh, i ṭhiante i hrilh vaih i châk lo ang," ka ti a. Ben-a nuihza insûm tih hriat tak chuan, "I duhawmzia hi, ka ṭhiante maw, hrilh dâwn lo e, hawh in-kiss ṭha leh lawk mai ila," tiin min fiam zui nghâl a. Kei chuan, "Ka duh lo," tiin ka tlânsan a. Hostel pâwnah chuan Kimkimi leh Eli hi an lo awm a, Kimkimi chuan, "In lo inchhaih kual zêl vâng a nih hi, in rei kan tih êm êm," min lo ti vat a. Kei chuan, "Kal teh," tiin in chhûng lamah ka luhsan daih a.

Reuben-a leh Kimkimi te ho pawh chu an rawn lût ve nghâl a, Ben-a thil lei ho chu 'ei tlâng ang u,' kan ti a. Sir RPa te nupa pawh chuan, "Zanin chu lehkha zir lo mai ang u aw, intihlim ve phawt teh u, zanin chauh chu," a han ti chu mipa ho lâwm lutuk chu kut an bêng dur dur a. Sir RPa chuan Guitar chu a han perh a, a han zai vêl a. Miss chuan, "I thiam lo êm mai, naupangho kha zaitîr zâwk rawh," a lo ti hmanhmawh a. Sir RPa chuan l, "Ka zai thiam ka ti hleinêm, ka zai ve a ni mai alâwm, thil an ei chhûng chu ka zai char char dâwn," a han ti chiah mai chu nui lo hi kan awm lo. Kan thil lei ho kha kan bâwl a, thei tui kan lei tel bawk a, dawhkanah kan chhawp tawp a, kan vai chuan kan ei ho a. In tûr chu kei chu Bena'n a hranin a tui chi min lei a, chu chu ka in a. Bena nên chuan kan inen leh zeuh zeuh ṭhin, a nui khi vur vur reng a, 'nichin thil vêl kha a ngaihtuah a ni hrim hrim,' tiin ka zak ru ang reng. Kimkimi chuan phone a lo pài, Fb aṭanga biak thinlai deuh a lo nei chu niin, an in-text dân vêl te min hrilh a, thlalâk min han entîr a. Kei chuan, "Fake a ni lo ang maw, a hmêl a ṭha êm mai," ka ti a. Kimkimi pawh chuan ka sawi tâkah chuan, "Fake a ni hrim hrim ang, i account aṭangin bâwl chhin la," min ti a. Ka phone chu ka pe a, "I duh duh dânin nangma'n bâwl mai rawh," ka ti a. Eli nên chuan an be char char a.

Chu pa chu fake a nih ngei chuan mi fimkhur tak a ni ngei ang, a awmna hmun a sawi te engkim mai chu Kimkimi a hrilh ang thlap chuan a sawi zêl a, thlahpawlh a ni tiin a insawi a, ka phone Eli leh Kimkimi ten an khawih lai mêk chuan Ben-a chuan, "I phone ka lo hmang lawk ang," min ti a. Eli chuan a pe a, Fb message vel chu a lo check chu niin, Kimkimi te bâwl a ni tih hre si lo chu, "Tinge tihian mipa dang i biak?" tiin a thinrim hman ang reng a. Kimkimi te chuan, "Fake a nih leh nih loh fiah kan duh a, Merry account aṭangin kan be lawk a nih kha," an ti a. Mahse, a rilru chu a nuam zân lo tih a hmêl aṭang chuan ka hre thei a, kei chuan engtin vak mah ka insawifiah chuang lo va. Kimkimi leh Eli te zâwk chuan Ben-a thinrim an hlau a, an lo insawifiah chiam zâwk a, a tâwp a tâwpah chuan Ben-a pawh a nui ve thei ta, ka thaw huai mai. Sir RPa chuan Guitar chu Ben-a a rawn pe a, "Nang han zai hmasa phawt teh," a rawn ti a, Ben-a chuan a hnial ngam si lo va, Guitar perh pah chuan a han zai ta a. A zai thiam si a, hmeichhe dang ho pawh chuan mit la sawn lêk lo hian an thlir ṭhup mai a. Ben-a chuan a zai pah chuan min lo en leh ṭhîn a, chu chu a ṭhiante chuan 'ehem' tiin kut an lo bêng leh vak vak zêl a. Sir RPa pawh chu a bâng bîk lo, nuam tho si zak deuh hian ka awm a ni ber mai. Hmeichhe ṭhenkhat Ben-a star-tute chuan min ngei zualin ka hria, min en hrek hrek a, thil an inhrilh ru sep sep a. Puipuii chuan chûng hmeichheho hriat tûr ngei chuan, "Mi rêl hrât deuhho hi chu an hmùi pân vek se ka ti," a han ti chiah mai chu an ngawi chiang kher mai! Ka nuih chu a lo za zâwk a. Ben-a zai zawhah mi dang dang an zai ve leh a, dâr 11 a rîkin Sir RPa chuan, "Mu tawh r'u" a ti a. Mipaho room dangah an mu a, hmeichheho pawh kan mutna tûr hmunah ṭheuh kan kal a, kan han intih fel meuh chuan dâr 12 a lo ri dêr tawh mai, ka châu deuh a ni ngei ang ka muhil nghâl a.

Episode 24

Laltetea chu pakhatna nih tumin ṭan a la na hle ni ngei tûr a ni, lehkha ngawr ngawr a zir a, rawn lên pawh a tum lo. School-ah pawh chuan kan inbe khât telh telh a, in lamah ni se an ina ka va kal te a nih loh chuan hmuh tûr a awm mang ngai tawh lo va, a inthlâk danglam tawh tak zet a ni. Laltetea'n min hlat ta lutuk chu nuam lo ka tiin kim lo riau hian ka inhria a, mahse rilru phir deuh a awm ai chuan hetia min hlat hi a ṭha zâwk mai thei a ni tih te'n ka inngaihtuah a. Mahse, hlim erawh ka hlim lo a ni, a hlim bîk pawh ka ring chuang lo. Ngaihzâwng a nei ve ang a, a bialnu hian min kawm a phal lo a ni hrim hrim ang tih te'n ka ngaihtuah a, mahse chu chu a nih ka ring leh chiah bawk si lo va. A inthlâk danglam dân êm êm chu ka chhûngte pawh chuan mak an ti a, a nu ngei pawh chuan mak a ti a, kan inhauh leh hauh loh min rawn zâwt hial a. Tu pawh mai chu min ti mangang zâwk, thla a liam zêl a, exam te a han hun leh ta a, kan exam ṭan tirh aṭangin Laltetea chuan min be leh ṭan a, mahse a hma ang êm êm kha chuan min la hnaih chuang lo. Exam-naah pakhatna a nih tûr thu chu min hrilh nawn sek ringawt a, tichuan kan exam result chu a han chhuak ta a, Laltetea sawi ang ngei chuan pakhatna chu a ni ngei a, kei chu pahnihna ka ni. Laltetea pakhatna a nih ka rin sa avâng chuan Sana ka lei lâwk a, ka pe a. Ani pawh chuan Sana min lo leisak ve tho chu niin, min pe a, ka bun nghâl a, ka inhmeh phian a, ṭha tê têin kan awm tawh ang chu ka tih laiin min be ṭha êm êm chuang lo, min la hlat reng tho a. Ina kan haw rual paw'n a rûl tâwk lek hian min chhâng a, ka thinin a tuar ta lo. Laltetea samah chuan ka kêk a, "I inla ngêng ve em ni? Tinge rilru hah deuhin min siam?" ka ti a. Ka kêk bawk a, ka bêng bawk a, ka ṭap vak vak a. Laltetea chuan, "Khawlai a nih hi, duh tâwk rawh, ṭap tawh suh, miin ka vêl che emaw an ti ang asin!" a tih pawh chuan ka la ṭap char char a. "Ka tih der mai mai che a nih kha, tikhan ka awm tawh lo vang," min ti a. Ṭap pûr chung chuan, "A nih, ṭha deuh deuhin min be tawh ang em? Kan inah pawh i lo lên ṭhat duh tawh loh kha," tiin ka ṭap leh ta vak vak a.

Miin min en hrek hrek avâng chuan Laltetea chu a zak ni ngei tûr a ni, min thlêm phawt lo chuan min kai tawp a, hmanhmawh deuh hian min hawpui a. Kan in kan thlen hnu pawh chuan ka la ṭap char char a,ka nu chuan, "Nautê, engti zia nge i ṭah tâk vak vak mai?" min lo ti vat a, ka pa pawh a lo mangang hman hle tih ka hria. Kei chuan, "Laltetea'n min kâwm ve duh lo a nih kha, ka biak luih ṭâng ṭâng paw'n a rûl tâwk lek lek chiahin min chhâng a nih kha, inah pawh a rawn lên tawh ngai loh hi," tiin ṭap lawm lawm chung chuan ka han sawi a. Ka pa nuih za insûm tih hriat tak hian, "Tete, eng vangin nge i lo kawm ve duh loh?" tiin Laltetea chu a hâu der vak vak a. Laltetea nuih za bawk si mangang bawk si chuan, "Aw, ka kawm ṭha tawh ang che, in inah pawh ka lo lêng ziah tawh ang, ṭap tawh suh," min ti ringawt a. Ka nu chuan thu tak deuh hian, "Merry sawi pawh hi a dik ve tho asin, tinge tûnlai hi Tete, i mizia hi a inthlâk êm êm a, a hma zawnga kan ina awm tam zâwk ṭhîn kha i ni a, hâw rawh tih mawlh mawlh paw'n i hâw duh ngai lo zâwk kha a ni a, tinge tûnlai hi hetia i inthlâk danglam tak viau ni? Merry chang i ti hrilhhai hleinêm, keini te, i nu te ho pawh min ti mangang vek alâwm, ṭha deuh khan awm tawh r'u," min ti a. Ka nuin chutia a han hauh ve tâkah chuan ka bâng ve thei ta hrâm a. Laltetea chuan, "Ka kawm loh i hlau êm mai, ka tlâwmngai ang a, ka kâwm leh hrâm mai ang che," nui vur vur chung hian a han ti a. Ka pa nên chuan an nui ru deuh chhên a, kei thinrim rilru na laklawh tawh lah chuan min nuih tiin ka ti tau zui a. Ka pa leh Laltetea chuan min thlêm leh ngar ngar a, a tâwp a tâwpah chuan min thlêm thei ta hrâm a.

Laltetea nên chuan kan inkâr chu a hma ang khan a pangngai leh ta a, kan inah pawh a rawn lêng leh tlut tlut tawh a. Ben-a nên pawh kan la inṭhen chuang lo va, kan inkâr a la ṭha reng a ni. Kan ṭhiante ho chuan kan inṭhen theih tawh pawh an ring lo va, kan inhmeh an tiin kan la inneih ngei an ring vek a; mahse, pasala han neih chu ka la ngaihtuah chhin rih lo hrim hrim a, ka la naupang â si a, pasal neih pawh ka la hun lo bawk a, ka zirlai chu ṭha taka zir chhunzawm zêl chu ka duh a ni.

Hun te a lo liam ve zêl a, B.A zirlai kan lo ni ve ta dêr mai; mahse, kan ṭhianho kan kim ta lo. Chhani leh Puipuii te an zirna hmun a dang ta; mahse, Zovi, Kimkimi leh Eli te ho nên chuan kan la awm khâwm vek a, kan inṭhian ṭhatna chu a zual ve zêl ni hian ka hre ṭhîn. Laltetea pawh kan zirna hmunah tho a zir ve bawk a, kan la inkâwm ve reng a ni; mahse, bialnu a nei tawh a, a hma ang êm êm kha chuan kan inzui tluk tluk tawh lo. B.A zirlai han nih ve tâkah chuan ka inngai upa ve sawt pawh a ni mahnâ, chhûngte phal lo chungin ka tuina lam ka buaipui ve ta fo va. Ka zirlaiah rilru zawng zawng ka pe thei ta bîk lo va, mi dang aia ṭha filawr nih ka tlin ta dêr lo, ka nu chuan min hauh phah fo va, mahse ka ngai pawimawh lêm lo. Music chu ka tuichilh a ni ber mai, Ben-a chuan guitar perh mai bâkah keyboard tum dân te min zirtîr a, kan pahnih chuan kan zai dûn fo ṭhîn a, a nuam ka ti. Music ka play hian ka hah a damin ka inrintâwk phah sawt ṭhîn, keyboard erawh ka la thiam nâl lo va, nâl taka ka play ve theih nân Ben-a chuan min zirtîr ve reng bawk a, eng tik ni-ah emaw chuan amah angin keyboard thiam tak ka la nih ve ka ring ṭhîn.

Laltetea bialnu hi hmelṭha deuh mai a ni a, mahse mi fel tak zawng a ni lo. Ṭha deuh hian min be ṭhîn mah se a mit meng leh chêt dân vêlah hian min ngeih zân lo a ni tih ka hre thei. Laltetea bula ka awm ve apiang hian a lo thinrim ve ziah a, kan inkawm loh nân a hruai hrang daih zêl. Laltetea te inah lah ni se a lo kal ngun bawk si, Laltetea nu paw'n a duhpui chiah lo a nih hmêl, a lo be ṭha teh chiam ngai lo. Kei ve thung chu Reuben-a chhûng te'n min duatin min duh êm êm a, min fak der fo ṭhîn. An ina ka lên ve chhunah te hian chaw ei nghâl tûrin min ti ziah a, mahse han ei tak tak chu ka ngam ngai lo. Laltetea bialnu fing phakar lutuk vâng chuan Laltetea nên kan inhauh phah ta fo mai. Ka ṭhiante Kimkimi, Eli leh Zovi te chuan min lo ngeipui thei khawp mai, Eli phei chuan vuak hrep mai ka duh tawh a ti hial a, kei chuan ka khap hrâm hrâm a, a châng chuan keimah zâwk hian vuak ka châk lutuk hi ka insûm hman lo lek lek ṭhîn. Laltetea lah hian hmeichhe buaina tiin a inrawlh duh lo ve ziah leh nghâl a, ka thinrim pawh hi a âwm lutuk tlat. Ani nên an intawn hma daih tawh khan kan inkâwm tawh a, ani hian min khûm thei lo hrim hrim ka ti ve tlat a ni.

Kan ṭhianhovin kan bazar a, V'day te a hnai tawh si a tiin kan bialpa te present tûr thil vêl kan han lei lâwk ve e kan ti a, kan leina dâwrah chuan Laltetea bialnu hi a lo awm ve a. Kimkimi chuan, "Laltetea present i leisak dâwn te a nih chuan Merry hi zâwt rawh, Laltetea hre chiang bertu a nih hi," mei nei deuh hian a han ti ve kher a, ka lâwm ru ang reng. Laltetea bialnu lah lo zâm bîk lo, "Ṭhian ringawt an ni a, keiin ka hriat ang êm êm hian a hre bîk nâng," a lo ti ve ngat a. Ka chhâng lêm lo nâin ka la na ang reng. Thil kan lei zo kan chhuak tûr chu dâwr neitunu chuan, "I thil lâk rûk kha min lo pe rawh," min ti thut ta mai! Chhân dân tûr ka hre mai lo va, "Ka pi, eng mah kan la lo," ka ti a. Mahse, "Khawi i bag kha," tiin ka bag chu a bun ruak a, an Teddy Bear tê reuh tê mawi deuh mai hi ka bag-ah chuan a lo awm ringawt a nih chu maw le! Mak ka ti lutuk chu insawifiah dân tûr pawh ka hre mai lo va, "Ka pi, hei hi ka lâk a ni lo, engtin nge ka bag-ah a lo awm theih ka hre lo hrim hrim," ka tih pawh chuan min ring thei tlat lo mai a, ṭawngkam na deuh deuh chuan min hâu hrep a, dâwra awmho zawng zawng chuan min en vek a, ka zak lutuk chu ka mittui a parawl vek a. Ka thinrim lutuk chuan, "Ka pi, heti ang Teddy Bear man tlâwm lutuk leina nei lo khawpa rethei kan ni lo, a man i chhiar lêt thumin ka lo lei ang," ka ti a. A thinrim zual deuh emaw tih theih tûr hian ring deuh deuh hian, "I zak thei lo hle mai," min ti vak vak a, Laltetea bialnu lam ka han hawi chu min lo nuih a. Chu veleh kei chuan, "Nangmah hi a ni, ka bag-a he thil lo dah rutu chu, nichin khan i lo dah hman a ni maw, i va zei ve, rûk i ru ṭhang hle a ni maw, ka bag-a i dah lai pawh ka hre miah hleinêm! CCTV a awm em han check teh," dâwr nghâktunu hnênah chuan ka han ti a. CCTV an neih loh thu min hrilh a, dâwr nghaktunu chuan, "Amah hian alâwm thil i la ru tih min hrilh," a han ti ngat phei chu amah ngei hian ka bag-ah a lo dah a ni tih ka chiang ta a. Kan han intibuai chiam a, mahse dâwr neitunu chuan min ring ve ta deuh a ni ang, "Tikhan kal mai r'u," min ti a, kan ṭhianho chuan kan chhuak ta a.

Class kan bân veleh Laltetea bialnu chu ka lo ko hrang a, a lo kal duh mai lo va, ka pawt lui a, ka thinrim lutuk insûm zo lo chuan a hmaiah ka bêng a, min chhang lo va. Mahse, Laltetea chuan min lo hmu a, "Merry, tinge i ben ringawt?" min ti a. Kei chuan, "He nu vang hian rûkru-ah min puh asin, ka bag-ah thil a lo dah ru a," ka tih chuan Laltetea chuan, "A dah lo vang, mi dang pawh an ni thei, i rilru a chhe êm mai, i thil hriat chian lohah mi dang puh ringawt suh," min ti nghâl ringawt a. Ka thinrimin ka rilru a na zual kher mai, têt tê aṭanga ka kawm tawh, min hre chiang bertu-in chutia min han ti ta mai chu ka rilru a na tak zet a ni. "Laltete, i va mak ve! Kum kha leh chen kan inkâwm tawh a, rûk ka rûk i hre ngai em ni? A nih leh rilru chhia ka pu ngai em ni? I hre ve khawp ang, vawi khat mah ka kâwm duh tawh lo che, kan inṭhian ṭhatna hi he nu vâng hian tâwp rawh se," tiin ka tlânsan daih a. Reuben-a chu ṭap chung chuan ka kuah a, Ben-a chuan, "Hmun dangah lêng thawveng ang aw," tiin a Bike chuan min lênpui ta daih a. Hmun nuam deuhah min hruai a, mahse ka ṭap bâng thei lo, hâw pawh ka duh lo va, rei fê chutah chuan kan awm a, "Hmun dangah kal ang," a ti a, ka zui ve mai a. Dâwrah thil te kan ei a, ka haw chu zân dâr 8 a lo ni dêr tawh mai, ka pa chuan eng mah min zâwt hmasa lo chuan min hâu nghal ringawt a. Reuben-a chu a mawhpuh nghâl ringawt a, ṭawngkam na deuh deuh chuan min hâu a, ka room-ah ka tlân lût thut a, ka thawmhnaw pahnih vêl ka ak chhuak a, kan in aṭang chuan ka tlân chhuak nghâl daih a. Ka nu leh pa te chuan min ko lawm lawm mah se ka chhâng duh lo va, ka tlân lui zêl a, kan in ka hlat tâwk tawh maw tihah Ben-a chu ka phone a, a la tlân thui vak lo a ni ngei ang, ka phone hnu rei vak lovah a rawn thleng nghâl a. Kan inphur leh nghâl a, Ben-a chuan thil awmzia vêl min zâwt a, mahse ka chhâng duh lo va, ka hâw duh lo tih ringawt ka hrilh a. Ben-a chuan, "A nih thil ka zâwt ang che aw," min ti a. Zungbun hi min pe a, "Min nei duh ang em?" a ti thut ta ma! Chhân dân tûr mai ka hre lo va, Ben-a chuan, "Zungbun hi ka nu min pêk a ni a, i nupui tûr hnênah i la pe dâwn a nia, min ti a. Kei chuan inneih hi a ṭha tawh maiin ka hria, kan inzui rei ve tawh bawk alâwm ti raw? Kan inneih hnuah kan zirlaite chu kan chhunzawm thei reng alâwm," a han ti leh a. Ka thinrim rilru chuan Bena sâwmna chu ka pawm tawp mai a, tichuan, Bena te in lamah kan kal a, Ben-a chhûngte chuan thil awmzia an hriat chuan, "A chhungte'n an pawt hrang palh ang che u, zanin chu i nutei te inah va riak rih rawh u," an ti a. Min lo hâu hrep dâwn emaw ka tih laiin a lâwm ber berah chuan an ṭang a, ka chhungte'n min hruai kîr leh mai chu an hlau a, min hmuh mai loh nân Ben-a nutei te inah kan phei a. Ben-a nutei te nupa pawh chuan min lo duatin min lo lawmpui êm êm a, ka inthlahrung ang reng zâwk a. Zîng lam dâr 2 a rîk tawh hnu pawh chuan ka la muhil thei lo va, Ben-a chuan, "Min nei hi i inchhîr em?" min ti a. Kei chuan, "Ka inchhîr lo va; mahse, ka hlau," ka ti a. Ben-a chuan min kuah chung chuan, "Hlau rêng rêng suh, i bulah ka awm tlat dâwn alâwm, muhil tawh rawh le," min ti a. Mahse, muthilh chu a har a ni. Laltetea ṭawngkam te kha ka ngaihtuah lêt a, ka rilru a na thar a, ka ṭap ru ka ṭap ru a, Reuben-a nên kan inneih thu hi hre ta se engtin nge a awm ve ang le tih te ka ngaihtuah a, chhîn khat pawh ka chhîng thei lo. Mahse, zîng dâr 5 rîk dâwnah ka lo muhîl ve ni ngei tûr a ni, Bena'n min lo kaih thawh meuh chuan zîng dâr 9 a lo ni tawh a, chaw ei a lo hun dêr tawh mai. Ka tho vat a, Ben-a nutei chu chaw ei ka siampui nghâl a, chaw kan ei lai te chuan Ben-a nutei chuan, "Vawiinah Lunglei lamah zin kan lo tum lâwk tawh si a, hetah hian lo awm char char r'u aw, Merry chhûngte inhmuhtîr miah lo ula, palai te kan tîr phawt ang a, min rem hnuah chauh in inhmuhtîr dâwn nia," a ti a. Chutia pasal han neih tak tak chu ka inchhîr ka ti dâwn nge ka nu leh pa te chu ka ngaiin ka ṭhiante ho chu ka thlahlelh ngawih ngawih hian ka hria, kan in te kha ka va'n ngai tak. Ka chhûngte chu an mangang ve ngawt ang tiin ka inngaihtuah ru char char a; mahse, Ben-a hi a fel êm a, ka rilru a lo hrethiam zêl a, min hnêm tlei leh thei zêl a, ka tân han hawi kîr leh ngam chi a ni tawh lo, a chhûngte ho lah an fel êm êm vek a l, min duat lo rêng an awm lo.

Zân dâr 7 vêlah chuan kawngkhar chu a ri ta vak vak mai. Ben-a chuan a va hawng a, Laltetea hi a lo ni a, min hmuh veleh ka bâna min kaiin min chhuahpui a tum nghâl a. Mahse, Ben-a chuan a lo dang vat a, an insual buai chiam a, kei chuan ka theih ang tâwkin ka lo ṭhelh ve a. Reuben-a chuan, "Kan innei tawh a, a lo hâw tawh dâwn lo," a ti hmak a. Laltetea chu a ṭhingṭhi tawp a, "Merry, a hma khan ka hrilh ngam ngai lo che a, a chhan chu min huat ka hlauh vâng a ni, Class 9 kan nih lai aṭang daih tawh khan ka duh tawh che asin, theihnghilh che ka tum vângin ka kâwm lo lui fo che a nih kha, nimin piaha ka thil sawi vâng te khan ka inchhîr lutuk asin, lo hâw lêt leh hrâm rawh," tiin a ṭap tawp a. Kei chuan, "Tinge a hmain min duh thu min hrilh ngai loh, mawla? I va mâwl ve, mahni hmasialpa," tiin ka bêng a, ka ṭap ve ringawt a. "Mahse, tûnah chuan Ben-a nên kan innei tawh alâwm, ka lo hâw thei tawh lo," ka ti a. Laltetea chuan, "I lo hâw dâwn lo tak tak maw?" a ti nawn leh a. Kei chuan, "Ka lo hâw thei lo," tih bawk chuan ka chhâng leh ta a. Thinrim tak chuan min chhuahsan ta a, a chhuah hnu chuan ka ṭap vak vak a. Ben-a chuan mih kuah a, "A pawi lo, ṭap vak vak rawh; mahse, min kal san suh aw," a ti a. Nghet tak hian min kuah a, a khât tâwkin "Min kalsan suh aw," a ti deuh chhên a. Laltetea khan min lo duh ve reng a nih chuan tinge a hma khan min lo hrilh loh le, thil engkim hi a danglam mai tûr tiin ka inngaihtuah a. A nih loh paw'n ka huaisenna zawng zawng nên khan Laltetea ka duh thu lo hrilh ila, tûn dinhmun hi kan thleng lo tûr tiin ka ngaihtuah a, ka rilru na lutuk chu ka sawi chhuak thiam lo zâwk. Reuben-a ka en a, ka khawngaih bawk si, ka dinhmun ka han ngaihtuah leh a, keimah leh keimah chu ka inkhawngaih êm êm a, engtin nge Laltetea kha a awm ve tâk ang tiin ka ngaihtuah a, ka ṭap bâng thei lo. Zân ka han muhil te hi ka mumangah Laltetea nên kan infiam lai ngawt kha ka lo hmu a, zanlai ka ṭhangharh te hian ka khua a harin mal ngawih ngawih ang hian ka inhria a, Laltetea ka ngai êm êm a, kan naupan lai hunte kha ka ngaihtuah chhuak a, ka mittui nên zân hun hi ka hmang ṭhîn a ni ber mai.

Reuben-a chhûngte chuan duat theih tâwp hian min duat a, ka chhûngte paw'n rei tak chu an duh lo thei ta bîk lo va, min sawi rem ta nge nge a. Dân khatnaa innei ni lo mah ila, kan inneihna chu kan chhûngte ve ve chuan an duh uluk a, a ropui thei ang berin min inneih ṭhattîr ta a, ka ṭhiante ho pawh an kim ṭha ngang mai. Chutia hmanhmawh rum ruma kan han inru ta mai chu ka rai lâwk emaw ti tâwk an lo awm a, Kimkimi te ho pawh chuan min fiam phah chiam a. Kan inneih ni chuan Laltetea pawh hi a lo tel ve a, min bia a, chibai min bûk a. Reuben-a dârah bêngin duhsakna te a hlân a, ka insûm zo lo chu ka mittui a tla ṭêp a ni. Laltetea chuan min kuah tawp a, Reuben-a hnênah chuan, "Ka ṭhian ṭha ber hi lo duat rawh aw," tiin kan inneihna hall aṭang chuan hmanhmawh tak hian a chhuak nghâl a. Laltetea nu pawh chuan, "Mate, a va mak ngai ve!" tiin mittui nên min kuah a. "Mitthi vuinaa kal ang mai, ṭap suh u," ka nu chuan a lo ti vat a. Reuben-a chuan min hrethiam zêl a, ka la naupang tih pawh a hai lo, ka nihna ang chuan min pawm a, min hmangaih reng tûr thu min hrilh nawn fo bawk a. A kiangah ka dam chhûng hun chu ka hman a ngai ta, Laltetea leh ka chhûngte tel lo hian ka hlim kumkhua ang em? Laltetea be lo hian eng tik thleng nge ka awm theih ang? Nupui nei ve ta se, engti ang chiahin nge ka rilru a nat ve ang tih te ka ngaihtuah a, kan inneihnaah pawh hlim hmêl put chu a har a ni. Reuben-a chan aṭangin ka han thlîr ve thung a, ka inhua-in Reuben-a chu ka khawngaih leh bawk si. Min ring êm êm a, min duatin min hmangaih êm êm reng a, engtin nge ka tihnat phal bîk ang ni. Mahse, 'mahse' tih leh fo a ngai ṭhîn. Laltetea mawlh kha engtin nge a awm ve tâk ang le, zânah ka room lam hawiin amah chauh te'n a lo ṭap vawng vawng ṭhîn ang a, tu-in nge lo hnêm ta ang le? Class a kal dâwnin tu rualin nge a kal tâk ang, tu rualin nge a haw ang a, a khawhar chânga hnêmtu a nei tawh âwm si lo. Kan nun hluiah khan kîr leh ka va'n châk tak em! Laltetea'n min kiss zânah te khan kîr leh thei ila aw, khang hun lai khan keimah zâwk tal hian ka duh thu kam khat tal lo hrilh chu ni ila, tar kun thlenga ka bula awm tûr zâwk chu amah a ni âwm si a; mahse, a tu ve ve mah chuan kan duh thu kan lo inhrilh si lo va, kan lei taksa chu a hran a ngai ta, hriat rengna chauh chu kan chan tâwk a lo ni ta si.

Reuben-a nên kan inneih hnu chuan kei chu class ka bânsan rih a, a chhan chu Laltetea leh ka ṭhiante hmuh ka ngam lo va, lunglêng taka awm ka duh loh vâng a ni. Reuben-a erawh class a kal chhunzawm reng a, keiin in lamah rawng te ka lo bâwl ve ṭhîn, mahse kan nula te an fel êm a, eng vak mah hah lutukin ka thawk ngai lo. Ben-a class kal hlân chuan kan room-ah keimahin guitar ka perh a, ka zai vak zêl, a nih loh paw'n ka nu dâwrah ka lêng ṭhîn a, ka nuin Laltetea chanchin min hrilh a tum te hian rang zet hian ka pawt chat a, thu dang daih ka sawipui ṭhîn. A chanchin ka hriat loh pawh hian ka ngai êm êm tawh a, ka hriat leh zêl phei chuan ka tuar zovin ka inring lo.

Episode 25

Hun a lo liam ve zêl a, Reuben-a nên kum hnih lai kan lo innei ve ta, Laltetea erawh Serchhip lamah a awm a, a zir zawm zêl nge a châwl ta ka hre lo, ka ngaihven lo lui tawp a ni. Zân khat chu ka nu chu a damsam vak lo va, damdawi inah a awm a, ka pa chuan, "A ngaih vâng chein a châu deuh a ni ang, lo riah pui la," min tih avâng chuan Reuben-a tel lo chuan ka nu riahpui tûr chuan ka kal a, chutia in danga ka han riahsan ta chu Ben-a khawhar lutuk chuan ka Diary chu a lo chhiar chu niin, zîng ka haw kan room-a ka han lût chu khuma ṭhuin Ben-a chuan ka Diary chu a lo chhiar mêk chu niin, ka phu chiang kher mai! Min hmuh ve leh chuan ka nu chu a ṭhat tawh leh tawh loh min zâwt hmasa phawt a, chhân pawh ka chhâng lo. "Kha kha ka Diary a ni lo'm ni?" ka ti tawp ringawt a. Reuben-a chuan, "A nih hi, hei nizân aṭangin mu miah lovin ka chhiar a nih hi, a ngaihnawm khawp mai. Nang leh Laltetea love story chu, chuan kei hi i tân eng nge ka nih ve? Thinlung takin min lo hmangaih ve ngai miah lo a ni maw? Khatih chhûng zawng khan ka bulah i awm a, kan hlim dûn viau emaw ka tih lai pawh khan i thinlung chu Laltetea bulah a lo awm reng a ni maw?" a ti a. A thinrim lutuk chuan ka room-a bungrua kan dah a hmuh remchân apiang chu a ti chhia a, "Ti hi chuan kan hlim dûn thei dâwn chuang lo, inṭhen mai ang," a ti a. Kei chuan eng mah sawi tûr ka nei lo, ka thawmhnaw ka siam a, chhuah chu ka tum a. Ka chhuah dâwn chuan Ben-a bulah chuan, "I chhûngte chu i lo hrilhfiah mai dâwn nia aw," ka ti a, ka chhuak nghâl a. Kawngkapui ka pêl chiah tihah Ben-a chuan min lo ûm leh a, mittui tla zawih zawih chung hian, "Engtin nge ti mai khan i kal theih? Min lo hmangaih ngai lo tak tak em ni? 'Ka hmangaih che' tiin dâwt thu pawh i sawi thei lo em ni? I sawi apiang ka âwih ang, mahse inṭhen lo vang, inṭhen hi ka duh lo," tiin min kuah a. Kei pawh ka ṭap a, "Ben, min ngaidam rawh," ka ti ringawt a. Ben-a chu mipa mah ni se a rilru a lo no tak zet a ni, min hmangaih êm vâng pawh a ni mahnâ, naupang ang maiin a ṭap a, kalsan lo tûr chuan min ngên lawm lawm a, kei pawh chuan kal luih ka tum bîk lo va, kan pahnih chuan kan hâw dûn leh ta a. In chhûng kan han lût chu Ben-a Pa chuan thil awmzia min zâwt a, mahse kei chu ka ngawi reng a, Ben-a zâwk chuan, "Nizân a awm lo kha ka lung a lêng si a, zu tlêm ka in a, chu chu kan inhauh phah a," a ti zaih a. A chhûngte chuan Reuben-a zâwk chu an hauh rawn chiam a, a rûk chuan ka lo inthiam lo lutuk a, Reuben-a mitah pawh chuan ka en ngam lo a ni.

Reuben-a chu ka thinlung zawng zawnga hmangaih ka tum ta a, ngaihsak theih tâwpin ka ngaihsak a; mahse, min hlat deuh ta tlata hriatna hi ka nei a. A châng phei chuan chaw ei hunah pawh a lo hâw lo va, dâwt min hrilh zeuh zeuh a chîng ṭan a, zu rim a rawn nam hâw fo ta mai. A phone check ka tum a, mahse password a lo dah thlap chu niin. Ka ringhlel a, a awm dân chu thla hnih chhûng ka chîk a, ka ngaih a ṭha thei ta ngang lo va. Reuben-a chu ka zui ru ta a, keimah nên a kan kal fona restaurant-ah khan hmeichhe pakhat nên an inhmu a, chu nu chuan Ben-a chu a kuah vêl a. Ben-a chuan chuti teh chiam chuan a ngaihsak lo va, thil a eisan mai mai a. Kei chuan ngawi reng chuan min hmuh lohna hmun aṭang chuan ka thlîr reng a, thil an ei zawh chuan Ben-a car-ah an chuang dûn a. Taxi chuan ka ûm zui zêl a, hmeichhenu dâwr ni ngei tûrah chuan an inzui lût leh a, ka zui lût ve nghâl a. Mahse, Ben-a leh chu nu chu an lo bo daih mai, dâwr nghâktu hnênah chuan, "Nichina lo lûtte kha i hriat zâwng an ni em?" tiin ka han zâwt a. Chu nu chuan, "Kan pi leh a bialpa an nih kha, eng nge ni ta? Ṭanpui theihna che ka nei em?" tiin min han chhâng chu mak ka tiin ka thinrim tak zet a, mahse mi dâwra buaina siam ka duh loh avângin inah ngawi rengin ka hâw leh ta zâwk a. Ben-a lo hâw hun chu ka nghâk tawp a, zân dâr 7 a ni tawh a, Ben-a chuan call a chhâng thei bawk si lo, ka thin chu a rim tawh tak zet a ni.

Zân dâr 8 pelh hnu chuan Reuben-a chu a lo haw ve ta, zu rim a rawn nam leh nghâl a, "Khaw nge i kal? I lo va hâw tlai ve, tu nên nge zu in in a, i lo ruih hâw leh ni?" ka ti a. Reuben-a chuan ka ṭhianpa birthday a nia, zu in tûrin min sâwm lui tlat a, ka hnar thei lo a ni, bawihtê. Zanin chu min hrethiam hrâm rawh aw," tiin a jacket chu a phelh a, mut mai chu a tum a. Kei chuan a jacket aṭang chuan a phone chu ka phawrh a, "Ka check vek dâwn," ka ti a. Reuben-a chuan a phone chu min rawn chhuh vat a, kei chuan, "Min lo pe rawh, a rûkin ngaihzâwng i nei tih ka hria, vawiinah pawh ka hmu che u," ka ti a. Reuben-a chuan, "Vawiina hmeichhia nên min hmu a nih chuan, ka ṭhiannu hlui class ka kalpui ṭhin bâk a ni lo ang, ngaihzâwng ka nei lo hrim hrim," a la ti ṭalh a. Kei chuan, "A nih i phone kha min pe rawh, a hriat vek mai ang," tiin a phone chu chhuh ka tum leh a. Mahse, Ben-a chuan khumah chuan min nem tlu a, chutia hmeichhe dang vânga min han nem vêl chu ka thinrim a zual êm êm a, ka tuar peih tawh lo êm êm a, "Ka chhuak dâwn," tiin ka thawmhnaw ka insiam a. Ka thawmhnaw pakhat pawh ka dah bâng lo, engkim chu ka khung nghâl vek a. Ka insiam chhûng zawng chuan Ben-a chuan ngaihdam min dîl char char a; mahse, ka hai der lui tlat a. Driver ka ko a, ka chhuahsan lui ta a, kan in kawtah driver ka dintîr a, ka thawmhnaw vêl min dah thlâkpui hnu chuan hâw leh tûrin ka ti a, min hâwsan nghâl a. Ka nu te chu an lo la meng a, TV an chhuah thâwm pawh ka hre thei a, mahse kawngkhâr ka kik lawk ngam lo va, rei fê chu kawngkhâr bulah chuan ka ṭap a, ka nu bawlhhlawh paih tûra lo chhuak chuan min rawn hmu thut si a, a phu chiang kher mai. Ka nu chuan ka pa chu a ko vat a, ka pa pawh hmanhmawh zet hian pâwnah a lo chhuak ve a, ka nu leh pa chu ṭap chung chuan ka kuah a, "Bawihtê, eng nge thil awmzia hi?" an tih pawh chuan ka chhâng lo va, ka ṭap tlawk tlawk mai a ni. Ka pa chuan, "In chhûng lamah i sawi zâwk ang u," tiin ka thawmhnawho chu in chhûng lamah a khai lût a, kan han ṭhu fel a. Ka nu chuan thil awmzia min zâwt leh a, ṭap chung chuan thil awmzia chu ka sawi ta vek a. Ka nu chu a thin a rim hle a, Reuben-a chu phone-a hauh hrep a tum nghâl ringawt a; mahse, ka pa chuan, "Biak a ngai lo, hetah a lo kal a nih leh hmai chhan ngeiah i hâu zâwk dâwn nia. Mate, i rilru a hrehawm dâwn êm mai, eng mah sawi a ngai tawh lo, i la naupang a, i nu leh pate kan la dam alâwm. Vawi khat pasal ṭhen te chu mi fate tih loh dân a ni hleinêm, lungphâng rêng rêng suh. Nun bul i ṭan ṭha leh dâwn alâwm, i duh apiang ti thei tûrin i pa hian ka pui ang che, hlauthâwng rêng rêng suh," tiin ka pa chuan min hnêm char char a. Ka nuin thu min zâwt chhên a, ka ning rru hle. Rilru nat lai a lo ni bawk nên ka chhâng ṭha duh lo va, ka pa chuan, "I room-ah va mu hahdam rawh," min ti a. Ka room hluiah chuan ka lût a, engkim mai chu a lo la pangngai vek a, a khât tâwkin ka nu chuan a lo ti fai ṭhîn a, a bâk chu eng mah an lo khawih danglam lo va, ka naupan lai ang mai kha a la ni.

Ka room chu ka han en kual vêl a, ka thingrem chu ka hawng a. Album hlui tawh tak hi ka hmu hlawl mai, ka en chiang chu Laltetea nên kum 6 kan nih lai vêla kan thlalâk te, kan len deuh hnua kan thlalâk te a lo awm ṭeuh a, ka en zêl a, ka mittui a tla tam telh telh a. 'Ka va'n lo â tak em!' tiin ka âwm chu ka chûm a, ka ṭap vak vak ringawt a. Tukverh chu ka hawng vat a, Laltetea room lam ka en a, light a lo in-off a, hetah a awm lo tih ka hre chhuak thut a, ka lungngaihna chu a zual a, keimah leh keimah chu ka inkhawngaih êm êm a. Tûnah hian Laltetea chu awm se aw ka kuah vawng vawng tûr a nia, tûnah te hian min la ngaihtuah ve ṭhîn ang em le, engtin nge a awm tâk zêl ang le. Ka mittui chuan hul rêng a tum lo, ka room ka luh chiah khan ka nun hluiah ka kîr leh a, chu ka nun hlui chuan Laltetea a ko a, ka ngai êm êm a ni. Zânkhua chuan ka ṭap a, Laltetea ka ngaihtuah tlaivâr a ni ber ang chu, zîng dâr 9 vêlah ka nu chuan chaw ei tûrin min ko a. An rilru a nawm loh ka hlauh avâng chuan chaw ei tûr chuan an bulah chuan ka ṭhu ve a, mahse chaw chu ka ei lui thei ngang lo a ni. Ka pa chuan, "Office-ah kal ngei ngei ka ngai si a, vawiin chu i nu hian dâwr hawng lovin a lo awmpui ang che aw, ka lo haw hunah i duh ber ber chi ei tûr ka lo hawn ṭeuh dâwn che nia," a ti a. Ka nu chuan, "Kimkimi nu ka phone a, Kimkimi te pawh rawn lên an tum alâwm, office kal nuam lo ten i lo ngaihtuah ang tih nia ka hlauh ni, Bawihtei chu lo ngaihtuah suh, a ṭhiante ho nên a bulah kan lo awm tlat dâwn alâwm," a ti a. Ka pa chu chaw a ei khamin office kal tûr chuan a chhuak nghâl a, kei chu ka room-ah ka lût a, ka mu hmak a, ka lo châu deuh a ni ngei ang ka lo muhîl a. Chhûn dâr 12 vêlah Kimkimi hian min lo kai tho a, ka han tho chu Kimkimi te, Zovi te, Eli te ho chu ka bulah an lo awm ṭhap tawh mai, kan inkuah hlawm a, kan inhmu khât hlawm si kan va'n inngai hlawm tak. "Laltetea awm ve se aw," Kimkimi chuan a han ti a. Ka insûm zo lo ka ṭap chhuak tawp a, Zovi leh Kimkimi chuan min kuah a, "A pawi lo, ṭap rawh, ṭap bawrh bawrh rawh, mahnia tuar ai chuan kan awm lai hian ṭap la, i rilrua awm zawng zawng sawi chhuak vek la, i zâng hawk mai ang," tiin Zovi chuan min han hnêm a. Ka ṭhiante ho chu engkim hrilh ka duh a, mahse ka ngam ngang lo a ni, ka ṭap leh ringawt zêl a. Kimkimi chuan, "an inhmu khat hlawm bawk si a, kan tih ṭhin te sawi ang u," a ti a. Eli chuan, "Kei chu make up artist ka ni tawh a," a han ti phawt a. Zovi chuan, "Kei chu ka nu aiawhin Office-ah ka thawk a," a ti ve leh a. Kimkimi chuan, "Kei chu puan ṭhui ka zir mêk a," a ti ve leh a. Kei chuan eng mah ka tih ngai loh thu ka sawi ve nghâl a. Puipuii chuan pasal a lo nei ve tawh a, Chhani chu thawmhnaw designer a lo ni tawh a ni âwm e. Kan lawmpuiin a kut chhuak inbel te pawh kan châk tawh khawp mai.

Ka ṭhiante ka han hmu leh ta chu ka nung thar leh ni ber hian ka inhria; mahse, a hma ang êm êm kha chuan tu mah kan naupang chhia tawh lo va. Mahse, Kimkimi erawh hi zawng a puitling har bîk a nih hi, fiamthu a la duhin a la nàwi reng mai; mahse, chu chuan min ti hlim tak zet a ni. Haw an tum chu ka nu chuan a phal lo nasa mai a, "Chaw in ei ang a, in riak nghâl ang," a ti tlat a. Ka ṭhiante ho pawh chu an phûr tlâng khawp mai, "Kan riah khâwm lohna a rei tawhzia hi," tiin kan hlim tlâng leh ta êm êm a. "Sawi tûr kan ngah hlawm bawk si a, zân khat riah ho ringawt chu kan kham lo mai thei a ni," Zovi chuan a ti hial a. Tlai dâr 3 rîk ṭêpah ka pa a lo haw a, ka pa chuan ei tûr hi a lo hawn ṭeuh a, chu chu kan ṭhianho chuan kan ei a. Ka pa chuan chêng sangnga (5000) hi min pe a, "Bawihtê, i ṭhiante ho nên khan va lêng thaw veng rawh u, motor hi keng ula, in ṭhianho khan va inti hlim rawh u," min ti a. Ka ṭhiante ho chuan, "Kalna tûr ṭha deuh mai ka hria, 3D Cinema en ang u," an ti a, kan ṭhianho chuan 3D en tûr chuan kan kal ho ta a. Kimkimi a dâwih ber mai chuan ramhuai film kher chu en a châk tlat mai a, 3D ngei mai chuan ramhuai film chu kan han en ta chu leh! Kan phu zuk zuk mai! A nuam reuh phian a, ṭhiante bulah nge nge lunglên pawh a lo zia a. Pawisa ka la hmang tlêm si, a hmanna pawh ka hre lo. Ka ṭhiante chuan, "In inṭhen tawh si a, mi thar angin lang tawh rawh," tiin ka sam te chu min cut-tîr a, mahse tâwi lutuk chuan ka cut lo va, ka sam rawng chu ka thlâk bawk a. Eli chu Make-up Artist a lo ni tawh bawk nên an dâwrah min han chei tak tak mai chu ka inhai ṭêp a ni.

Thawmhnaw pawh kan lei nual a, min hâktîr nghâl a, tlai chaw ei dâwnah kan ina kan han hâw chu ka nu chu a lo phu zawk a, "I va inhmeh ve," min lo ti nghâl vat a. Ka pa pawh chuan, "Ti tûr kha alâwm," min lo ti vat a. Eli chuan, "Keima chei ngat a nih hi aw," a han ti a. Ka nu chuan, "Make up lam I thiam tak ti raw khah? Ka hmai hi chaw ei khamah min facial ve rawh aw," a lo ti vat a. Chaw kan ei lai te chuan Kimkimi chuan ramhuai film kan en laia a awm dân vêl chu a han sawi a, ka nu leh pa pawh an nuih a za kher mai. Ka nu leh pate chuan ka nui hmêl an hmu leh ta chu an hlim hle tih ka hre thei. Chaw kan ei kham hnuah ka nu leh Eli te an in-facial a, an hman hnuin kan ṭhianhovin ka room-ah kan awm ho a.

Dâr 8 vêlah chuan Ben-a leh a pa hi an lo kal a, ka nu chuan, "Lo chhuak duh suh aw, i pa nên kan lo be mai ang," a ti a, ka chhuak duh ta lo va. Ben-a chuan ngaihdam te a dîl chiam a, a pa pawh chuan a fapa vâng chuan ka chhûngte chu ngaihdam a lo dîl ve char char bawk a. Mahse, ka pa chuan a lo hnar hâw hlawm a, ka nu chuan Reuben-a chu a lo hâu chiam a ni âwm e. Reuben-a te hâw hnu chuan ka nu chuan an inbiak dân vêl te chu min rawn hrilh leh a, hâw ka tum tawh lo va, ka chhûngte pawh chuan hawtîr min phal tawh lo hle niin a lang. Kimkimi chuan, "Laltetea ṭhianpa Mampuia khan Laltetea chanchin hmân ni khan min hrilh a, mak ka ti lutuk a, dâwt a nih ka ring a," a han tih chuan sawi vat tûrin ka lo ti vat a. Kimkimi chuan, "Miin an sawi dân chuan Laltetea chuan zu a heh tawh lutuk a ni âwm e, a chhûngte pawisa a dîl reng bawk niin an sawi a, Serchhip police-ho paw'n mi kut a thlak peih lutuk vângin lock up-ah an riahtîr fo niin an sawi a; mahse, thu dik a nih chu ka ring lo va," a han tih chuan ka rilru chu a na êm êm a. Keimah vâng em ni le tiin ka indem a, ka inthiam lo tak zet a ni. Mahse, Laltetea han biak hmasak erawh ka ngam lo va, a chhan chu, min lo haw tawh mai thei a, a nih loh paw'n bialnu nghet a lo nei tawh mai thei si a, bâkah kei chuan ka phú tawh lo a ni.

Kan ṭhianho chuan thla te kan la vak vak a, an bulah chuan ka rilru natna chu ka thup hrâm hrâm a, hlim taka awm chu ka tum lui ve tlat a, zân dâr 2 vêl thleng kan tîtî a, kan ṭhianhova han awm tâkah chuan class 9 kan nih lai te kha kan sawi chhuak lo thei lo va. Laltetea hming kan lam zîng khawp mai, ka ṭhiante chuan a rûkin kan lo induh reng a ni tih chu an la hre lo va, hria se engtin nge min ngaih ve ang le. Kan tîtî tui bawk si a, kan muthilh lai pawh ka hre lo. Ka nu chuan dâr 7 vêlah min kai tho a, Zovi chu office kal a ngai si a tiin a hâw nghâl a, Kimkimi leh Eli chuan tûkṭhuan ei nghâl an tum a, kan tho a, ka nu ei rawng bâwl kan pui a. Kan inpuih vâng pawh a ni mahnâ, zîng dâr 8-ah chuan chaw ei kan peih fel dêr tawh mai. Chaw kan ei a, kan ei khamin Eli te dâwrah Eli chu ka zui a, Kimkimi pawh a puan thân chah vêl lo thleng tûr a awm a, chu chu a buaipui a. Nilêngin Eli ka pui a, ka buai vâng pawh a ni mahnâ ka lung a lêng hman lo va, a ṭha phian. Eli zârah make up lam chu tlêm tlêm ka hriat ve phah a, ka lâwm viau mai. Mahse, beautician nih chu kei chuan ka châk lo va, khawi lai hmun reh deuhah emaw ni hian mahni'n awm ila, thawnthu tih vêl ziah mai mai ka châk zâwk a. Kimkimi leh Chhani angin puan ṭhui lam pang ka tui leh chuang bawk si lo va, ka tuina line-ah kal ve tum pawh ni ila, khawi line-ah ber nge ka tui pawh hi ka inhre chiang rih lo.

Kan naupan deuh lai kha chuan Krismas dâwnah Laltetea nên thingkûng kan chei ṭhîn kha a ni a, lo hâw se ka ti ngei mai. Tukverh bulah ṭhuin a room lam chu ka thlîr leh vung vung zêl a, Sunday zîngah pawh ka thawh veleh chhuatah ka ṭhu tawp a, ka Diary-ah thil ka ziak leh tê tê phawt a. Tukverh lam ka han hawi chu ka thil hmuh chuan min ti phu kher mai! Laltetea ka hmu a, ani chuan Rose pâr kuang khat leh chocolate hi min hmuh a, "Ka lo chho dâwn a nia," a ti a. Chu veleh in hnuai lamah rang zet hian ka chhuk nghâl a, step aṭang chuan Laltetea chu ka en vung vung ringawt a, kuah nghâl ka duh a, mahse ka ngam mai lo. A hma thil vêl te ka ngaihtuah a, ka inthiam lo thar a, amah chu ka phú tawh lo niin ka ngai a; mahse, Laltetea chuan min kuah a, ka insûm thei lo chu ka ṭap tawp a, "Tete, pawi ka ti lutuk," tih bâk eng thu mah ka sawi thei lo va. Laltetea chuan, "A pawi lo, a pawi lo, ka hrethiam vek che alâwm," tiin min kuah nghet sauh a. Ka nu ka hmu thut a, ka nu pawh chuan min hrethiam êm êm a, "Kei chu min vêngthâwng duh suh u, Tete, hetah chaw ei nghâl rawh aw," tiin choka lamah min kalsan nghâl a. Laltetea nên chuan ka room-ah kan lût a, ka room chhuatah chuan kan ṭhu dûn mai mai a, sawi tûr tam tak kan nei a; mahse, sawi dân kan thiam lo. A khât tâwkin kan innuih ringawt a, Laltetea chuan, "Mampuia khan in inṭhen thu min lo hrilh a, ka hriat ve leh ka lo hâw nghâl a, ka nu pawh ka rawn hâwsan ringawt alâwm," a ti a. Kei chuan sawi tûr pawh ka hre lo, ka ngawi reng a, Laltetea bawk chuan, "Tûn aṭang chuan ṭhian chauh ni tawh bîk lo ang aw, ka bialnu i ni ve thei tawh ang em?" a han ti a. Kei chuan, "Duh mah ila, ka phú tawh lo che e, nuthlâwi mai ka ni tawh si a," ka han tih chuan Laltetea chuan ka chalah min pen fawk a, "Ka phu lo che te i tih vêl, ka pen hrep mai ang che, tikhan ka bialnu i ni tawh a nia, min chhâng tawhah ka ngai ang," a ti a. Kei pawh chu ka nui a, ka hlimzia chu ka sawi fiah thiam lo zâwk a ni. A hma zawng ai khan Laltetea chu ka hmu hmelṭha a, a hma zawng ai khan ka thlahlel zual niin ka hria. Laltetea chuan min kiss tum ni âwm tak hian a lo kûn hniam a, kei chuan, "Min kiss i tum ve deuh tihna em ni?" nui vur vur chung hian ka han ti a. Laltetea chuan, "Tum ve a nih hi, i va'n mâwl tak, mit chhîng mai mai rawh," a ti a. Kei chuan, "Ka ha ka la nâwt hleinêm," tiin bathroom-ah hmanhmawh zet hian ka luhsan nghâl a. Ka ha chu rang zet hian ka nâwt sawk sawk a, Laltetea bulah chuan ka va ṭhu leh a. Ka nu chuan, "L chhuk r'u, chaw ei ka siam fel tawh a nia," a lo ti a. Laltetea chuan, "Ka ril a ṭâm êm mai, chaw ei khamah kan in-kiss zâwk dâwn nia aw," nui vur vur chung chuan a han ti a. Kei chuan, "I va'n chimawm tak," ka ti a, ka bêng vêl a. Laltetea chuan, "Hawh, choka thleng ka pua ang che," a ti a, min paw nghâl a. Ka nu leh ka pa chuan, "In va la naupang chhia e aw, in puitling ve deuh tawh ang chu ti a, in la ngai reng mai," min lo ti vat a. Ka nu ai mah chuan ka pa chu a lo lâwm zâwk a.

Chaw kan ei lai te chuan kan tîtî ho char char a. Ka hlim ta hle mai, ka nun paw'n ngai a awh leh ṭan dâwn niin ka hria a, ka chaw ei pawh a tui sawtin ka hria. Chaw kan ei kham hnu chuan Laltetea te in chu kan ti fai dûn a, kan inchhaih pah reng bawk a, kan hlim dûn hle. Laltetea chuan, "Lêng ang," a ti a. Mawi hnai takin ka inchei a, Laltetea Bike chuan kan lêng a, Bike-a kan tlân kual lai chuan Laltetea chu nghet tak hian ka kuah a, ka mit ka chhîng a, thlifîm thaw heuh heuh chuan min chhêm a, ngaihtuahna a fîm duh hle mai. Nun hi ti tak hian a lo nuam thei a ni maw ka ti hial a. Laltetea chuan thingkûng tam tak awmna hmunah min hruai a, puan kan phah a, ei tûr kan kenho chu kan ei pah bawk a, kan puar ta maw tihah kan mu tawp a, vân lam kan thlîr a. Laltetea chuan zungbun hi min buntîr thut a, "Hei hi a hma aṭangin ka lei tawh a; mahse, ka pe ngam ngai lo che a, ti hi chuan ka tâ i ni tawh a nia aw, ka chhûngte emaw i chhûngte emaw paw'n kan inkawp hi rem ti lo mah se, inṭhen tawh miah lo ang aw, eng thil pawh thleng se min kalsan tawh suh aw, tûna ka bulah i awm ang hian kumkhuain ka bulah awm reng rawh aw," a ti a. Kei pawh chuan ka rilru chu ka sawi chhuak ve ta vek a, kalsan leh chu ka ngaihtuah tawh lo hrim hrim a ni, chân nawn leh ai chuan thih pawh ka thlang tawh zâwk a ni. Boruak a thiangin hawi vêl a nuam hle mai, Laltetea chuan min kiss thut a, kei paw'n ka chhâng lêt ve vat a. Kan naupan deuh laia kan in-kiss dân nên kha chuan a inthlau tawh khawp mai, kan inen a, kan nui leh vur vur ṭhîn. Kan ṭhiante'n kan chanchin hi hre ve se min lawmpui ve ngawtin ka ring a; mahse, mak chu an tih hle ka ring.

Laltetea nên chuan tlai dâr 4 thleng kan lêng a, chaw ei hun vêlah chauh kan hâw a, ka nu chuan min hauh ahnêkin a lo lâwm zâwk êm êm a, ka inchei dân chu, "A mawi tâwk lo, nalh deuha inchei tûr che alâwm," te min lo ti mai mai a. Engtiang paw'n lo inchei mah ila, Laltetea mitah chuan ka ngai reng tho, a hma ang khan ka nihna ang ang hian min hmangaih a ni. Ka lo khi leh vur vur ṭhîn a, ka chhûngte nuih chu a za ṭhîn hle. Laltetea pawh kan inah chaw a rawn ei leh a, chaw kan ei khamin ka nu Christmas Tree rawn lei chu kan chei ho va, Laltetea nên chuan kan in bul vêla thingkûng te chu kan chei bawk a, light kan han on chu a va'n mawi kher êm!

Episode 26

Kimkimi, Zovi leh Eli te chu kan inah an rawn lêng a, rin loh deuh maia Laltetea an han hmu thut mai chu mak an tiin an lâwm ve hle a. Chu aia mak an tih tûr thil chu Laltetea chuan a hrilh hlawm a, chu chu kan inngaihzâwn thu chu a ni, mak an ti lutuk chu Laltetea'n a tih der hlawm emaw an ti hman hial a; mahse, kei chuan thu dik a nih thuin ka chhâng hlawm a. Mak an ti lutuk chu min lawmpui hmêl pawh an pu thei lo va, mahse ka dem hran hlawm lo, a âwm ve bawk a ni. Ka ṭhiante awm ve reng lai pawh chuan Laltetea chuan min kuah deuh reng mai a, Kimkimi nuih chu a lo za lutuk a, "Tiang êm êm a induh si chu in lo va inthup thei zâwk ve," a ti hial a. Laltetea lah chuan, "Kan inkhêk alâwm," a ti ham ham a. Eli lah chuan a rûkin thla min lo lâk ve sek leh nghâl a. Zovi chuan, "Kei chu in inngaizâwng hi âwm ka ti lutuk, ti khawp khan in lo inzui rei tawh a nia, inṭhianṭhatna aṭang hian alâwm hmangaihna a pian ṭhin," a ti a. Laltetea nên chuan kan inen a, kan lung chu a awiin kan innuih vur vur a. Kimkimi chuan, "In tenawm e a, ka zo lo che u," tiin bottle ruak chuan ka lu-ah tak chuan min vua a. Laltetea chuan, "Nâ a ti ang asin! Nu-i, a na em?" min han ti kher a. Kimkimi a tih luihna mah ni se a nuamin a nuihzatthlâk ang reng. Ka ṭhiante ho chuan, "Hawh u, Krismas dâwn a nih tawh hi, vêng tinah kal ila, an kâwn chei dân vêl i va en ho teh ang u, kan bialpa te ṭheuh kan sâwm ang a," an ti a. Laltetea chuan zân rei deuhah a mawi leh zual a tih avâng chuan zanriah kan ei tê tê phawt a, ka ṭhiante ho chuan an bialpa te ṭheuh chu an sâwm a. Bike nei vek an nih vâng chuan tu mah phurh kual an ngai lo va, a kawp tê tê chuan kan inphur hlawm a. Laltetea chu nghet tak hian ka kuah a, kan tlân pah chuan kawng chung vêl an chei dân te chu ka hmu thei a, mawi ka tiin hmuh nuam ka ti hle mai. Kum dang zawng aiin tûn ṭum Krismas vuakvêt hi a nuamin a hlimawm zâwk a ni. A chhan chu Laltetea bialnu ka nih tawh vâng pawh a ni mahnâ, tûn ang reng hian hlim reng tawh ila ka ti ngei mai. Laltetea nên chuan tu ma'n min ṭhen hrang tawh lo se tih hi ka ṭawngṭaina a ni.

Laltetea nu chuan a lo hâw tûr thu phone-in Laltetea chu a rawn hrilh a. Laltetea chu in ka tih faipui a, Laltetea nu Nu Chhuani chu ka hmu châk tho nâin ka hmu hreh ru ang reng hle a. Reuben-a nên kan inneih ni khan keimah vângin a mittui a tla kha a nia, min hua ang nge a hma ang khan min la duat reng dâwn le. Mi fel tak leh rilru thianghlim tak a ni a, min huat kher chu ka ring chiah lo a, mahse a fapa neih chhun a duat êm êm hi kei nuthlawi ve mai tân hi chuan a phal tawh dâwn em ni? Laltetea nên kan inngaihzâwn thu hi Laltetea chuan a lo hrilh vek tawh a; mahse, eng mah a sawi loh vâng tak hian ka ngaih a ti ṭha lo va, hmai chhanah ngei Laltetea kalsan tûrin min hrilh a tum a ni thei ang em tih te ka ngaihtuah a, ka rilru a hah tak zet a ni. Laltetea chuan, "Ka nuin pawm lo eng ang mah se ka kalsan dâwn lo che," a ti ve tlat a. Min kalsan ngai dâwn loh vânga ka lâwm rualin ka hlauthâwng a, an nufa inkâr ti khitu ka nih ka hlau ta ber a ni. An in kan tih fai zawh hnu chuan ei tûr te kan lo siam sa thlap a, Nu Chhuani lo thlen hun tûr chu kan nghâk tawp mai a ni.

Nu Chhuani hmuh chu ka huphurh ru ang reng hle a, ka rilru hria ni âwm tak hian Laltetea chuan min kuah chung chuan, "Ka chhûngte chuan eng pawh lo sawi mah se ka kalsan ngai lo ang che, nang pawh danglam suh aw," min ti a. Chhân dân tûr pawh ka hre mai lo va, ka kuah leh ringawt a. Motor rî kan hria a, Nu Chhuani a lo thleng ta, ka thinphu pawh a rang ṭan ta khawp mai! Mahse, ka rin loh lam deuhin Nu Chhuani chuan min hmuh ve leh chuan, "Awi, Merry, i dam maw? Ka ngai lutuk che," tiin min lo kuah nghâl a. Ka phu chiang kher mai, ka hamhaih vek a, sawi tûr ber pawh hre lo chuan ka ding khawng ringawt a. Nu Chhuani chuan, "Chaw ei min siam nghâl mai teh a, ka ril a ṭâm êm mai," a ti a, rang zet chuan ka siam nghâl a, ka che sual nawk nawk a. Laltetea chuan min nuih vur vur chung chuan, "Mo interview chu i va zâm ve," min lo ti ngat phei chu ka nuih a za bawk si, ka zâm bawk si chu a hrehawm ru ang reng hle. Nu Chhuani lah chuan chaw a ei mawlh mawlh lai pawh chuan min be bawrh bawrh a, a hmaa min duat ang tho khan min duat a. Laltetea thlang lova Reuben-a ka neih zâwk vâng khan min haw âwm tak a nih tehlul nên ti nge hetia ṭha tak leh duat taka min la biak reng chu ni ka hrethiam lovin ka ngaih a ṭha lo ru ang reng hle zâwk a. Nu Chhuani chuan Laltetea chu thil lei tûrin a tîr a, kei chu eina seng ka ngaih avângin ka zui lo va. Laltetea chhuah hnu chuan Nu Chhuani chuan, "Reuben-a nên in chanchin te kan lo hria a, pawi ka ti khawp mai. Hei hi nia a hma paw'n Tetea paw'n mipa chu kan mizia kan thup thiam a, fimkhur rawh aw, a lo tih fo che kha. Hei hi a hlauh vang a nia a hma paw'n a hrilh fo che ni," a han tih chuan ka zak ru hle. Mahse, Nu Chhuani bawk chuan, "Lungngai lo la, hei kan awm alâwm, engkimah kan pui thei che alâwm. Laltetea nên in inkâr pawh ka hre tawh a, thlamuang deuh khan inkawp rawh u, in pahniha in hlim dun hi alâwm kan duh ber. Nang phei chu ka fanu ang maia ka en che i ni a, ka mo pawh ni la hei aia nasa hi chuan ka duat belh thei tawh chuang lo ang che. Tûnah pawh hian a hma ang tho khan ka la duat reng che a, i pasal hlui vâng khan ka haw rêng rêng lo che a nia; mahse, Tetea hi duat hle la, chu chu ka duh chu a ni mai," a han tih chuan ka lâwm lutuk chu ka mittui a tla ringawt a. Nu Chhuani chuan, "He nau hi chu aw a, i upat ve tawh teh rêng nên, ṭap suh, Tetea a lo haw chuan ka hau che emaw a ti ang asin, bâng teh," min ti a. Kei chuan, "Ka nu Chhuani chu i fel êm alâwm, ka inthiam lo lutuk a, ka ṭap a nih hi," ka ti ringawt a. Nu Chhuani'n min thlêm mêk lai chuan Laltetea a lo lût thut a, ka ṭap tih a hmuh ve leh a nu a en nghâl a, "Ti nge, Merry hi?" a ti nghâl a. Nu Chhuani lah chuan, "Thlêng a thlauh keh a, ka hlap a nih kha," nui vur vur chung hian a han ti a. Laltetea nuih chu a za thei chuang lo, "Ti nge i ṭah? Ka nu nên in lo inhâu em ni?" tiin Nu Chhuani hriat loh tûr chuan zâwi tê hian min zâwt a. Kei chuan, "Hâu lo ve, nangmah nên kan inkawp hi min phalsak a, chu bâkah min duat êm a, ka inthiam lo vek alâwm, min hâu bawrh bawrh se ka tân a nuam zâwk tûr a nia, ka inthiam loh dân pawh a nêp deuh tûr a nia," ka han tih chuan Laltetea chuan, "I va ho e aw, chuvâng mai maia lo ṭah, min ti hlau hman alâwm, bâkah ka nu te chuan a duh theih êm che kha, a hmaa nangmah tho i la ni alâwm. Pasal ṭhen tawh vâng mai maia a duh tawh lohna chhan tûr che a awm hleinêm. Ka luhlulzia a hre chiang a, min rem tihsak lo ngam lo hrim hrim, tihian min inṭhentîr tum lo se ka fel zâwk daih dâwn a, min inṭhentîr chu a tum ngai lo ang, hlauthâwng miah suh," a ti a. Min kuah a tum a; mahse, Nu Chhuani a lo kal thut avâng chuan ka nam sawn a. Nu Chhuani chuan, "A hmaa in awm dân ang kha chuan in awm tawh lo a nih hi, a hma te kha chuan Ui leh Kêl thlun pawlh ang mai khan in inti buai reng a, in inhâu ve ziah bawk a; tûnah chuan in inngeih ta khawp mai," nui vur vur chung hian a han ti a. Laltetea nên chuan kan inen a, kan nui ve tawp ringawt a.

Zâna tui taka ka muthilh lai chuan ka mang lamah luiah Laltetea nên kan lo kal a. Sangha hi chu luiah chuan mak tak mai hian a lo tam khawp mai a, kut lâwnga man mai theih chuan sangha lian ṭha tak tak mai chu an rawn lang siau siau a, man tûr ber pawh ka hre lo hial a, nuam ka tiin sangha chu ka lo hlimpui êm êm a. Ka harh thut chu eng nge maw a awmzia ni ang le tiin ka ngaihtuah zui nak nak a. Sangha chu ka ngaihtuah reng a, ka ei châk ta tlat mai a nih chu, a hma zawnga sangha ei duh ngai miah lo khan tûnah ti nge maw ka ei châk tlat ni, a mak ve khawp mai! Sana ka han en a, zîng dâr 3 vêl chauh a la ni si a, muthilh leh tumin ka chhîng a; mahse, ka mithlaah chuan sangha hlîr ka hmu a. Ka ril a ṭâmin sangha chu ka ei châk ta êm êm mai a nih chu. Ka tho va, chokaah ei tûr ka va dap a, cake vêl a lo awm a, thei tui nên ka ei a, ka ei zawh chuan ka va mu ṭha leh a. Rei fê chu ka muhîl thei lo va, hla te ka ngaithla mai mai a zîng dâr 5 rîk dâwn vêlah ka muhîl a.

Ka han harh meuh chuan zîng dâr 9 a lo ni dêr tawh mai, khum aṭanga ka thawh chhuah ve leh tukverh lamah hawiin Laltetea room lam ka en nghâl a. Laltetea chuan a tukverh dârthlalangah chuan lehkha a lo bel a, chu lehkhaah chuan lian tâwk hian Love lem hi a lo inziak a, a hnuaiah 'Morning' tih a lo inziak bawk a. Laltetea zei lutuk chu ka hlimpui khawp mai, a lo chhuah hun ka nghâk a; mahse, a lo chhuak mai lo va, a room tukverh chu ka en reng ringawt a. Kei pawh chuan ka tukverh dârthlalangah bel ve ila, Laltetea lo hmuh atân tiin lehkha phêk ka pawt thla a, tah chuan love lem lian tâwk hian ka ziak ve a, a hnuaiah 'Laltete' tih ka ziak bawk a. Mahse, tukverha châr behna tûr ka lo nei hauh lo mai, ka nu te room lamah emaw choka vêlah chuan a awm ka ring a; mahse, ka va zawn kârin Laltetea'n ka room tukverh lam a lo en hman ka hlau si. Tui ka ti huh deuh a, tichuan tukverhah chuan ka bel ve tawp mai a. Laltetea lah chu a lo chhuak har phian leh nghâl a, ka lehkha bel ve lah chu a tla thla deuh reng leh nghâl a, ka chelh tawp a. Laltetea tukverh lam ka han hawi leh chu Laltetea chuan a bân a lo vai a, ka thil ziah a hmuh chuan a lâwm hmêl khawp mai. Ka nu chuan 'chaw ei a hun tawh a nia,' tiin min lo ko a, ka kal dâwnah Laltetea chu ka bye bye phawt a, choka lamah ka chhuk nghâl a. Ka nu chuan wai wai hi min lo chhumsak a, artui leh Tomato hi a lo kan pawlh bawk a, chu chu ni danga ka duh ber ṭhin a ni; mahse, ei ka han tum chu ka ei thei tlat lo. A rim ka ti thei lovin ka luak a pawt tlat a, ka ei lui thei ngang lo, ka nu chuan ka dam lo emaw tiin ka ṭhat leh ṭhat loh min zâwt nghâl a, ka dam ṭha vek si a. Ka nu chuan mangan hmêl tak hian min enin, "I rai no te hi a ni lo maw?" min han tih chuan ka inngaihtuah vung vung a, ka thi neih hun ka han chhût a, thi thla hnih vêl ka nei tawh lo tih ka hre chhuak a. Ka room-ah ka tlân chho vat a, tih dân tûr ka hre mai lo va, ka phone chu a lo ri a. Eli hian min lo call a, Eli hnênah chuan rai leh rai loh test-na tûr min lo leisak teh ka ti ringawt a, ani paw'n thil awmzia a hre nghâl a, 'ka rawn kal vat ang,' a ti a. Eli lo thlen hma chu ka awm hle hle thei lo, ka tei ka tei ringawt a, ka mangang lutuk chu tih tûr ber pawh ka hre lo va, ka lo rai thut a nih chuan Laltetea hi ka kalsan a ngai âwm si a tih te ka ngaihtuah a, ka mangang ṭan ta khawp mai.

Dâr 11 vêlah Eli chu a lo thleng a, thil dang pawh sawi hmasa lo chuan, "Min lo lei em?" ka ti nghâl a. Eli chuan, "Kha..." tiin a lo phawrh nghâl a. Zun test dân chu ka thiam si lo a, Eli nên chuan a kâwra thil inziak aṭang chuan tih dân tûr kan han en hmasa tê tê phawt a, line hniha a lo inrîn chuan kan rai tihna a ni a, line khat chauh chu rai lo tihna a nih dâwn hi kan ti a. Bathroom-ah chuan ka lût a, ka va test chu line hnihin a lo inrîn ta tlat mai! Ka hamhaih lutuk chu bathroom-ah chuan rei fê ka awm a, Eli ngaih ṭha lo chuan min rawn ko vak vak a, bathroom aṭang chuan ṭap chungin ka chhuak a. Ka thil ken chu Eli ka hmuh a, Eli chuan, "Awi, a va'n mak êm aw!" tiin min kuah nghâl a, sawi tûr pawh kan hre lo, ka ṭap vak vak ringawt a. Eli chuan a thiam ang tâwk tâwk chuan min hnêm ve bawk a. Laltetea a rawn lût thut a, ka mittui chu ka hru vat a; mahse, ka mit aṭang chuan ka ṭap tih a hre thei a. Thil awmzia Eli chu a zâwt a, Eli chuan, "In pahnihin lo sawi dûn r'u," tiin min chhuahsan a. Laltetea chuan, "Zîng kha chuan i mood a fuh teh rêng nên tinge i lo ṭah leh tâk a? I nu ten an lo hâu che em ni?" min ti a. Ka lu chu ka thing a, "Laltete, engtin nge kan tih dâwn?" tiin ka ṭap ringawt a. Ka in-test-na chu ka hmuh a, a tîrah chuan a hrethiam mai lo va, rei lo te hnu chuan, "Hei hi rai leh rai loh test-na kha a ni lâwm ni? I rai tihna em ni hei hi?" a tih chuan ka ṭap ringawt a, ka chhâng thei lo. Laltetea chuan min kuah a, "A pawi lo, ṭap suh, a pawi rêng rêng lo, kan chhûngte pawh eng mah hrilh a ngai lo. Lo mangang lo la, keima'n engkim ka lo ti fel vek mai ang, i chhungte'n an hre tawh em le?" a ti a. Kei chuan Eli chauhvin a hriat thu ka hrilh a. Laltetea chuan, "I rai tih hi ka chhûngte emaw i chhûngte emaw pawhin hre rih lo se a ṭha ang, innei tawp mai ang, chuan engkim hi a ṭha vek mai ang. I rai vâng mai hian ka kalsan dâwn lo che. Reuben-a pawh hrilh a ngai lo, nautê pa chu keimah ka ni tûr a ni," a ti ringawt a. Sawi tûr pawh ka hre lo, ka ngawi reng a. Laltetea chuan, "Zaninah inru tawp mai ila, pawisa khâwl sa ka nei nual tho a, Lunglei lamah tlân mai ila," a ti a. Kei chuan chu chu thil ṭha ber a niin ka hre thei lo va, tlân dûn ta ila ka nautê hi Laltetea faah tu paw'n an ngai mai dâwn a; mahse, chu chu inbumna a ni tlat si a. Ka chhia leh ṭha hriatna hian chu chu thil ṭha ber a ni lo a ti ve tlat bawk si. Engtin nge Laltetea chhûngte ka bum theih ang, thu dik an hriat chhuah leh si chuan engtin nge min ngaih ang, nautê tih tlâk chu ka ngaihtuah chhin lo hrim hrim. Laltetea paw'n a phal lo, kan pahnih fa angin kan enkawl ang a ti ve tlat a; mahse, ka rai thu hi ka chhûngte leh a chhûngte hrilh phawt a ṭhain ka hria a, chumi hnua kan inneih an phal chuan ka nei ang che ka ti a. Laltetea chuan ka rai thu a chhûngte hrilh chu a hreh hmêlin a huphurh hmêl tak zet a ni.

Eli chu room-ah a rawn lût ve a, "I hrilh em ni?" min ti a. Laltetea chuan, "Eli, zaninah kan inru mai dâwn asin. Kan chhûngte bulah eng mah lo sawi chhuak suh aw, tihian thla hnih vêl kan va awm bo ang a, kan rawn haw leh hunah chuan engkim a fel vek tawh mai ang," a ti a. Eli chu a lo lâwm khawp mai a, "Ni e, eng mah ka lo sawi lo ang. Hei pawisa sanghnih ka nei a, hei hi in va hmang ve dâwn nia. Kimkimi leh Zovi pawh hrilh ve ila, pawisa pawh kan neih ang ang in hmang dâwn nia," a ti a. Laltetea chuan, "Pawisa khâwl sa singhnih vêl ka nei reng, pawisaah kha chuan buaina a awm lo. Lunglei-ah ka ṭhianpa a awm a, chu chu phone-in ka bia ang a, ka ṭhianpa inah rei lo tê kan awm ang a, chumi hnu chuan in luah tûr te kan zawng ang a, pawisa chu kan indaih loh tâk leh a ṭûl ṭûl ka thawk mai ang," a ti a. Eli chu a nui vur vur a, "I va'n romantic tak, Korean film-ah tiang hi ka en tawh," a han ti ngei ah. Laltetea chuan, "Lo insiam rawh, zânah a rûkin kan chhuak dawn nia, petrol ka va thun ang a, thil ṭûl dangte ka va buaipui ang, lo insiam rawh aw, i thawmhnaw kha ken tam vak a ngai lo nia aw, Lunglei-ah i mamawh tûr chu kan lei mai ang, hâk hnih khat bâk ken a ngai lo," a ti a. Tlân dûn tûr chuan Laltetea chuan rilru a siam fel hmak tawh a; mahse, kei chu ka rilru a buai a, tih tûr pawh ka hre lo. Engtin nge ka tih dâwn tiin ka chal ka dawm ringawt a. Eli chuan, "Ti khawp hian Laltetea hian a hmangaih che a, i tân tuar pawh a huam a, nang paw'n a sawi ang hian ti ve mai la, eng mah ka sawi chhuak dâwn lo va, tihian in tlân dûn ang a, in lo hâw leh hunah chuan in chhûngte paw'n eng mah an sawi buai tawh lo vang," a lo ti ve bawk a. Eli hnênah chuan, "Keimah ni la, engtin nge i tih ang? Laltetea hi ngawi rengin i zui thei bîk dâwn em ni? Inthiam lohna tel miah lovin i nei thei bîk dawn em ni?" ka han tih chuan Eli chuan min kuah a, "Eng pawh chu ni se, tûn ṭum chauh chu i hma sial ve mai rawh, Laltetea berin 'a pawi lo' a tih phawt ahnu, tûn ṭum chauh chu nangma hlimna tûr chauh ngaihtuah rawh," min ti a, ka rilru chu a buai zual sauh zâwk a. Laltetea chu a lo phei leh a, ei tûr min lo ken ṭeuh a, "Eli nên khan lo ei rawh u, petrol chu ka va thun phawt ang e, lo insiam rawh aw," min ti leh a. "Mahse..." ka'n tih chiah chu Laltetea chuan ka sawi zawh hma hma chuan, "Mahse tih tih hun pawh a ni lo, thu i va'n âwih lo ve, ka sawi ang hian awm ve mai mai rawh, zanin aṭang chuan ka bialnu ni lovin ka nupui i ni tawh dâwn a nia, eh eh," tiin a nui vur vur a. Eli pawh chu a lo nui ve nghâl bawk a. Kei chuan, "Mi rilru hah lai laiin, nui suh," ka ti a. Laltetea chuan, "Kei chu ka lâwm zâwk, tihian kan inneih hun kan pawt hnaih phah bâkah nautê kan nei nghâl dâwn chu a nia, ka puitling sawtin ka inhria. Pa ka nih tawh dâwn vâng pawh a ni mai thei," tiin hlim hmêl taka a han ti leh ngat phei chu ka rilru a khawihin ka lung a ti chhe hial zâwk a. Laltetea ka phù lohzia ka hre chiang leh sawt a, keimah chu ka insit telh telh a ni ber mai. "Petrol ka la dâwn nia," tiin a chhuak nghâl a. Eli nên chuan thil ei pahin tih dân tûr vêl kan sawi a; mahse, ka inthiam thei mawlh lo a ni. Engtiang paw'n ngaihtuah mah ila, mi pangngai rilru pu tân chuan thil tih chi a ni lo tih ka hai lo. Thu dik hrilh vek hlawm ta ila, Laltetea ka neih hi Nu Chhuani hian a la phal dâwn em ni, a rem tih ka ring thei lo.

Laltetea lo lêt leh hmain ka rilru siam fel ka tum a; mahse, engtiang zâwng paw'n ngaihtuah ila, Laltetea nên tlân dun chu rem thei hian ka hre ngang lo a ni. Mahse, Laltetea ṭhen leh tûr anga ka indah chhin chuan tlân dun chu ka duh leh tho bawk si. Ka rilru a va'n buai si êm! Engtin nge ka tih ang le tiin ka chal dawmin ka ṭhu tawp ringawt a. Eli chuan ka thawmhnaw ṭhenkhat a hâi a, ka bag-ah chuan a hnawh lût pawp pawp a, kei lah chu ngawi rengin ka ṭhu tawp a. Eli chuan, "Eng mah ngaihtuah suh, thil i ngaihtuah thui lutuk a, i rilru a buai a nih kha. Laltetea sawi ang zêlin awm la i hlim a ni mai, in tlân dun hian in tân kawng a ti awlsam zâwk. I hma chauh sial rawh, mi dang ngaihtuah hun a nih loh hi," a lo ti ve ngar ngar a. Reuben-a nên kan inṭhenna kum khat êm pawh a la liam si lo va, Laltetea han neih leh nghâl mai pawh chu engtin nge miin min hmuh ang ni tih te pawh ka ngaihtuah a; mahse, chu zawng ai chuan Laltetea nu mawlh hi a ni, ani ber kher han bum hi chu ka ngam ngang lo a ni. A tâwp a tâwpah chuan ka rilru ka siam fel thei ta. Ka phone chu ka han en a, missed call a lo tam khawp mai. Tu dang ni lovin Reuben-a lo niin, call back pawh ka tum chuang lo va; mahse, a message erawh ka chhiar a, "Merry, nang lo chu tu mah hi ka hmangaih ngai lo asin, ka inthlâk danglam ta emaw i lo ti palh hlauh ang e, inthlâk danglam chu kei ni lovin nangmah i ni. Kha tia school kan kal dun lai aṭang khan ka hmangaih chein nang lo chu hmeichhe dang ka melh ngai lo, nang pawh ka tân i rinawm reng ṭhîn angin ka ngai a; mahse, i diary ka chhiar chiah aṭang khan hun kha leh chen i lo hmangaih leh i lo ngaihtuah reng ṭhin chu kei ni lovin Laltetea a ni tih ka hre chhuak ta a. Khami ni aṭang khan hlim ni rêng ka nei tawh lo. Ka bula i mut hle hle lai paw'n ka ngaih a ṭha chuang lo, a chhan chu Laltetea i la ngaihtuah reng ang em tiin ka rilru a buai fo ṭhîn. Fa kan neih hnuah chuan thinlung takin min la hmangaih ve ngei ka ring ṭhîn; mahse, i hlim lo hmêl kha ka hai ngai lo, chu chuan ka bei a ti dawngin ka hlim thei ngai lo. Zâna kuah che ka tum apiangin leh lam min hawisan hmak zel a nih kha, mipa ve tho ka ni a, ka thinrimin ka rilru a na ve tho asin. Kha hmeichhia, ka bialnu emaw i tih nên khan vawi khat pawh kan che sual lo. Ka thaw pik lutukin han chhuahpui ve zawk ṭhîn mah ila, ka rilru zawng zawnga ka hmangaih leh ka ngaihtuah chu nang ka nupui chauh i ni. Ka dik lo tih hre mah ila, ka dik lohna bul chu nangmah i ni tih min hriatsak hrâm la, khawngaihin bul i ṭan ṭha leh teh ang, kan inngaidam tawn ang a, hriatthiamna nên nupa hlim tak kan la nih theih hi kei chuan ka ring tlat a ni. Ka lo nghâk reng ang che, ka hmangaih che," tiin message a lo hnutchhiah a. A message ka chhiar zawh rual chuan ka inngaihtuah lêt a, ni e, Reuben-a thil sawi hi a dik a ni, engkim hi keimah vâng vek a ni; mahse, ka thiam loh pawh lo ni ta rêng rêng se engtin nge Reuben-a bulah ka lêt leh theih tawh ang ni, ti khawp hian Laltetea nên kan inhmangaih si a, engtin nge ka kalsan theih tawh ang ni. A hma khan ka lo ti sual tawh a, mahse tûnah chuan tu rilru mah hi ka tih nat belh duh tawh lo a ni.

Reuben-a chu ka khawngaih thar êm êm a, ka tân a inpêkzia leh min hmangaih ṭhinzia pawh ka hai lo; mahse, a hnêna lêt leh erawh ka tum tawh lo bur. Laltetea lo thlen hunah ṭha takin kan chhûngte bulah ka rai thu hi hrilh mai chu ka duh ta a, kan nih nih kan ni tawh mai ang tiin ka inti paukhauh lui a. Eng pawh ka chungah lo thleng se ka nautê vâng hian ka inti chak tûr a ni ka ti a, chu chuan chakna thahrui leh beiseina min pe a, ka thawven phah sawt hian ka hria. Ka thutlûkna avâng hian Laltetea chu a thin a rim ngei dâwn a; mahse, thil ṭha ber ka tiin ka inhria a, ka inchhîr pawh ka ring hek lo. Ka room-a ka tawm char char avâng chuan ka chhûngte ngaih a ṭha lo ni ngei tûr a ni, ka nu a rawn lût a, "Nautê, i dam lo em ni? Dâwr hawn ka tum a, mahse ka ngaih i ti ṭha tlat lo va, cake leh thei tui ka lo pe ang che u aw, Eli nên ei dûn r'u aw, Eli pawh a rawn lêng vang vang a nia, eng mah eitîr loh chu, ei tûr ka lo pe ang che u aw," a ti a. Eli chuan, "Nichin khan Laltetea'n ei tûr a rawn keng ṭeuh alâwm, kan ei a, ka ril a ṭâm lo kei chu, Merry hian a duh ka ring," a ti a. Kei chuan, "Ka la puar êm mai nu, ka ṭha vek, min ngaihtuah suh, nizân ka meng rei deuh va, ka châu a nih hi," ka ti ringawt a. Ka nu pawh chuan min chhuahsan ve nghâl mai a. Eli chu a nuin chawhmeh lei hâw tûra a tih avâng chuan a haw hma a ngai a. Min hawsan hma chuan Zovi leh Kimkimi chu a phone a, min awmpui tûrin a hrilh a. Zovi leh Kimkimi pawh chuan an lo kal nghâl tûr thu an lo hrilh ve bawk a. Ka ṭhiante hi chu ka tân hian an va ṭha êm, ka mamawh hunah hian min kalsan ngai lo, anni ang ṭhian ṭha ka nei hi ka lâwm tak zet a ni. Kimkimi leh Zovi ten lo kal an tum tâk siah chuan Eli chuan min hawsan ve ta a, keimah chuan ka awm a, ngaihtuah ka ngah êm avâng chuan ka lu chu rit sawt hian ka hria a.

Episode 27

Laltetea pawh chu rin aiin a lo lêt har a, Kimkimi leh Zovi te an rawn thleng hmasa zâwk a. Zovi chuan, "Eli'n thil awmzia min lo hrilh a, Laltetea thu ang chuan awm mai rawh, hei in tlân dun dâwn tâkin kan ti a, kekawrtê leh bra thar kan lo leisak che a," a han ti chu ka nui lo thei lo. "Mi rilru hah hah nên, mâwl muk," tiin ka thawmhnaw chuan ka vawm a. Kimkimi lah chuan, "Inru mai rawh u, in awm bo rih vang vang ang a, in chhûngte paw'n thla hnih thum vêlah chuan an hrethiam vek mai ang che u, i rilru kha ti buai duh rêng rêng suh. A neitu tûr ber che Laltetea berin a pawi tih loh phawt te chuan mi dang ngaih dân te chu pawisa miah suh. Hlim dun hi in phû lutuk tlat," a lo ti ve bawk a. Mahse, engtiang paw'n sawi mah se ka rilru ka lo siam fel tawh a, Laltetea hi a chhûngte rem ti lo chung chuan neih luih ka tum lo bur, mi chhûngkua ti buaitu nih chu ka hlau ta ber mai a ni. Ka ṭhiante chuan an theih tâwp chuan min fuih a, Laltetea chu ka tâna ruat a nih ngei an ring a, kan tlân dun theih nân tiin an pawisa neih ang ang chu min pe a. Zovi chuan chêng 3000 min pe a. Kimkimi chuan, "Pawisa khâwl sa ka lo nei mai si lo va, tlai ka hâw pahin bâ ka dîl hlawm ang a, ka dahsak leh mai ang," tiin chêng 4500 chu min pe a. Ka nuih a za bawk si ka lâwm bawk si, "In va'n fel hlawm êm aw," tiin ka kuah hlawm a. Mahse, Laltetea chu zui ka tum loh thu ka hrilh a, an pawisa min pêk ho pawh chu ka pe lêt hlawm a. Anni chuan â min ti hle a, "Nakinah i inchhîr lo ang maw? Tûn hi Laltetea nên in awm dun theihna hun remchâng a nih hi, bawh pelh mai i tum em ni?" Zovi chuan a han ti a. "Ni e, in sawi dik viau nâin thil dik a ni si lo va, keimah chauh ka ni tawh lo va, nautê ka pum chhûngah a awm tawh a, he ka nautê vâng hian ka inti chak dâwn alâwm. Eng pawh ka chungah lo thleng mah se nautê vâng hian ka tuar chhuah theih ka inring tlat," ka tih chuan ka ṭhiante chuan, "I lo puitling ta hle mai," tiin min kuah a. "Eng pawh lo thleng se i tân kan awm reng ang," min ti a, chu chuan ka thla a ti muang tak zet a ni. "Nangni ang ṭhian ṭha ka nei che u hi ka lâwm tak zet a ni, nangni awm lo ula chu engtin nge ka awm dâwn ni," tiin ka ṭhian rinawm êm êm Kimkimi leh Zovi te chu ka kuah a. Kimkimi lah chu a lo ṭap hmanhmawh a, "Ka khawngaih che u alâwm, in hlim ve dâwn chauh emaw tih laiin harsatna in tâwk bîk reng a, Pathian remruat dân hi ka hrethiam lo," a ti a. Ni e, Pathian remruat dân hi a mak tak zet a ni; mahse, sawi theih kan nei si lo va. Laltetea chhûngte rem tih hma chuan tihian ka lo nghâk reng mai ang, eng tik niah emaw chuan an la phal ve mahnâ tiin beiseina ka insiam chawp tawp mai a ni.

Zovi leh Kimkimi te chuan kan inah zanriah an ei nghâl a, Laltetea lo hâw hun min nghahpui a. Chhûna petrol la tûra a kal kha zân dâr 6-ah pawh a lo la hâw lo cheu a, ka ngaih chu a ti ṭha lo ang reng hle. Ka phone a, mahse a phone a in-off tlat bawk si. Reuben-a chuan min lo call chhên a, kan in bulah a awm thu min hrilh a, ka chhuah hma loh chu a awm tûr thu min hrilh a. Hmai chhana ṭha taka hnar chu ṭha zâwkin ka hria a, Reuben-a hmu tûr chuan ka chhuak a, ka chhûngte bulah chuan Reuben-a ka hmuh tûr thu pawh ka hrilh lêm lo va. Reuben-a'n min hmuh ve leh chuan min kuah nghâl a, kei chuan ka nam sawn nghâl a, "Ben, tihian awm tawh suh, kan inṭhen tawh a. Ka haw miah lo che, ka dem bawk lo che; mahse, kan inṭhen hi kan pahnih tân a ṭha zâwk a ni, kan hlim dûn rei dâwn chuang lo va. Nang paw'n min theihnghilh tawh la, bul ṭan ṭha zâwk rawh," ka ti a. Reuben-a chuan, "Dam chhûnga inṭhen tûr anga ka inngaihtuah chhin ringawt pawh hian hrehawm ka ti lutuk hi awm ngaihna pawh ka hre lo, vawi khat tal min ngai ve ngai miah lo tihna em ni? Kha leh chen kan chêng dûn a, min hmangaihna chhe tê tal i nei lo em ni? Min hmangaih lo mah la a pawi lo, ka bulah awm la chu chu ka tân a tâwk. Ka theih tâwp ka chhuah ang a, min hmangaih theih nân engkim tih ka huam, inṭhen hi ka duh lo, awm ngaihna pawh ka hre lo," a ti a. Ni e, thu dik a sawi ngei pawh ka ring, a hmêl te chu a dâwl dângin chaw a ei ṭha lo tih a hriat theih nghâl a, a mit meng a dul êm êm leh nghâl a. Ka khawngaih ru viau mai; mahse, eng ang paw'n khawngaih mah ila, Laltetea ka hmangaihna hi thil dang zawng ai hian a chak zâwk a ni.

Reuben-a chuan ka thusawi a pawm duh tlat lo, palai rawn tirh leh a tum thu a la sawi ta cheu mai. "Ka thusawi i ngai pawimawh chuang lo," tiin in chhûnga luhsan ka tum chu ka bânah min chelh a, min kuah a tum a. Laltetea chuan min lo hmu a, Reuben-a hnênah chuan, "Merry kha thlah vat rawh, in inṭhen tawh a, lo ti buai tawh suh. Merry nên hian kan innei vat dâwn a, hetia a bula hmuh fo che pawh hi ka duh lo, Merry chuan a theihnghilh tawh che, ka nupui a ni vat dâwn a, i lo tih buai loh a ṭha ang," a rawn ti nghâl buan buan mai a. Reuben-a chuan Laltetea chu a rawn hnek tawp a, ka phu chiang kher mai. Laltetea pawh chuan a hnek lêt ve nghâl a, an pahnih chuan ṭhelh ka tum nâa chu ka ṭhelh thei ngang lo. An insual thâwm chu ka chhûngte'n an lo hria a ni ngei ang, ka nu chuan, "Engtizia nge, tute nge insual?" a rawn ti a. Laltetea leh Reuben-a te a han hmu chiah chu ani pawh chuan ṭhelh a tum ve nghâl a. Nu Chhuani pawh a rawn chhuak ve nghâl a, ka pa, Kimkimi leh Zovi te ho pawh chu an rawn chhuak vek a. Ka pa chuan a hâu va, ka pa chu an zah ve ve bawk a, an pahnih chuan an insual lai chu an ti tawp nghâl a. Laltetea chu ka man bet vat a, Kimkimi leh Zovi pawh chuan Reuben-a chu an lo chelh ve bawk a. Ka pa chuan, "In chhûngah lo lût vek rawh u, Ben-a pawh lo lût rawh, thil sawi fel a ngai a nih hi," a ti a. Ka pa thu chu zâwmin kan inah chuan kan vai chuan kan lût hlawm a. Kan ṭhut kim vek hnuah chuan ka pa chuan, "Ben-a pawh i inchhîr tak zet tih kan hria, palai pawh vawi tam i lo tîr tawh a, i chhûngte hmai pawh ka zah viau nâa chu, innei leh pawh ni ula in hlim dâwn chuang lova kan hriat avângin Merry pawh kan lo hâwtîr lo a ni a; mahse kan tân chuan fapa i la ni reng dâwn tho tih hre hmasa la. Chutih rual chuan hei Merry leh Laltetea te hi tûnah hian an inkawp tawh si a, an pahniha tih buai hi keini chuan kan tum lo hrim hrim a, nang paw'n i hriatthiam a ngai a ni. Keini chuan kan fanu hlimna tûr a nih phawt chuan tu pawh nei se pawi kan ti lo, Laltetea phei hi chu a naupan lai aṭang tawha fapa ang maia kan lo duat leh kan ina khawsa a ni a, Merry tân duhpui loh chi ziazâng a ni lo va, nangmah kan duh loh vâng êm êm che a ni lo a nia; mahse, hei Merry berin a duh chu keini a nu leh pa te hi chuan a duh dân kan zahsak mai zâwk a ni a. Nang pawhin tibuai lovin an pahnih hian duhsakna te pawh i hlan a ngai zâwk a ni. Thil harsa tak a ni ang tih pawh ka hriatthiampui che a; mahse, mi te pawh an inṭhen ve ṭhîn tho va, hun a liam chuan tuar dân te pawh an thiam ve mai zêl a nia. Keini chuan kan fapa angin kan la ngai reng dâwn tho che a nia," tiin ka pa chuan Reuben-a chu zaidam tak chuan a hrilh a. An insualnaa an hliam vêl chu ka pa chuan inti fai tûrin a hrilh a, ka nu chuan Reuben-a hmai khem vêl chu lapua-a lo hrûksak a tum a. Mahse, Reubena chuan, "Ka va hâw zâwk mai ang e," tiin a chhuak nghâl daih a. Ka lo khawngaih ang reng, a inhliam nasa ve ang reng si a, ka rilru chu a ti nuam lo viau mai. Laltetea pawh a hmai leh a khûp vêl a lo inhliam ve tho chu niin, Nu Chhuani chuan a damdawi te a hnawihsak a, kei chu eng mah pawh ka ngaihtuah thei lo. Reuben-a kha ka khawngaih zâwk mah a, tikhan a hâw chuan a chhûngte ngaih chu a ṭha lo duh khawp ang le. Chhûngte a nei fel êm a, kan inneih chhûng zawng khan a tu te mai pawh khan min duatin min hmangaih êm êm a, ka zahin an rilru tih nat ka duh ngai lo. Reuben-a hliam vêl an hmuh hun chuan min ngei ve ngawtin ka ring, min haw mah se kei chuan ka dem rêng rêng lo. Laltetea chuan ka nu leh pa te awm lai reng chuan, "A lo kal leh chuan ka khawi leh tho ang," a ti a. Ka pa chuan, "A ṭûl lo, thil hi ṭha tê tê hian a sawi theih, tharum thawh kher hi a ngai lo. Reuben-a lam aṭangin thlîr ve ta che u, ani hi a tuartu a ni ve tho tih hria ula, a chungah ṭhat chhuah zâwk rawh u. Nangni pahnih hi engtia awm zêl nge in tum?" a tih chuan Laltetea chuan a nu chu a han en hmasa tê tê phawt a, chumi hnuah, "Kei chu Merry tel lo hian ka awm thei lo, eng dinhmunah pawh awm se neih ngei ka tum ang, kan pahnih hian min ṭhen hran in tum ka ring lo va, in tum paw'n kan inṭhen dâwn chuang lo. Ka zah loh vâng che u ni lovin, Merry hi chân nawn ka duh lo, a tel lova awm hrehawmzia ka hre chiang a, khatiang nun hrehawm lutuk hmachhawn leh tûr kha chuan nangni pâwn min phal bîk ka ring lo. Khawngaihin min ring ngam ula, Merry nên hian min inneihtîr mai rawh u, in rem tihna ngeia inneih hi kan duh a; mahse, in rem ti lo a nih paw'n kei chuan kalsan ka tum chuang lo. In rem tihna tel lova neih a ṭûl a nih paw'n ka hreh dâwn chuang lo va, khawngaihin min inneihtîr mai rawh u," a ti a. Ka nu leh pa te chu an ngawi tawp ringawt a, Nu Chhuani chuan, "Ni e, han inzui rei ve deuh phawt ula, in innei lo ang tih pawh kan sawi rih loh hi. Merry pawh pasal ṭhen hlim hlawl a la ni a, tûnah thawt thawt innei ta ula ṭhenawm khawvêng te paw'n min dem luai luai dâwn asin. Tihian kum khat vêl chu inzui rih phawt ula, in la innei êm êm ang," a ti a. Laltetea chuan, "Kum khat dang nghah leh chu ka thei lo, tûn thla ral hma ngei ngeia inneih hi ka duh," a ti chiah mai chu ka pa chuan, "Tûn thla thawt thawta inneih te chu i nu pawh a zahawm alâwm, i nu thusawi kha a dik khawp mai. Ben-a leh Merry te inṭhenna pawh a la rei lo ve êm bawk a ni, i nu thu kha ngaichâng ula, keini chu hmeichhe lam kan nih angin i nu rem tih hun hun kha a ni mai," a rawn ti ve vat a.

Nu Chhuani chuan, "Tete, ka thil sawi ngai hi min sawi nawntîr reng suh. In innei lo vang pawh kan ti lo, hun hi liam ve deuh phawt rawh se. In inhmu thei reng dâwn tho alâwm, bâkah hei in khat ang maiah kan awm a, in lunglêng hman lo hrim hrim, êm êm lutuk a che! Tihian awm rih ula, in innei êm êm ang," a ti a. Kei chu a rûk tak chuan ka lo zak ru êm êm a, Laltetea'n tûn thla khera inneih a tih chhan chu ka nautê pâi vâng a ni tih ka hre si a. Rei lo têah an hre chhuak vat âwm si a, engtin nge an ngaih ang le? Kan inneih hi an la phal cheu dâwn em ni? Kei chuan an phal chu ka ring chiah lo va, Laltetea paw'n a rin loh vâng chuan ka dul lan hma ngei ngeia inneih chu a tum tlat a. Ka rilru a buaiin Nu Chhuani chu en pawh ka en ṭha ngam lo, a rûk chuan ka inthiam lo ru tak zet a ni. Nu Chhuani chuan, "Hâw phawt mai teh ang," a ti a. Laltetea chuan, "Nakinah ka lo hâw ve mai ang," a ti a, Nu Chhuani chuan a ha5wsan a. Ka nu leh pa te pawh ngawi rengin Tv an en a, Laltetea leh ka ṭhiante nên chuan ka room-ah kan lût a. Kimkimi chuan, "Engtin nge ni dâwn? Laltetea nu kha in inru lui a nih ngat chuan a thin chu a rim hle dâwn a nih kha maw le," a ti a. Zovi chuan, "A fel si a, thu dik hrilh tlang mai ula, an phal loh leh in inru zâwk mai dâwn maw ni le," a lo ti ve vat bawk a. Laltetea chuan, "Chutiang a ngai lo, zanin chu hei kan tlai tawh laklawh si a, naktûk lamah Lunglei lamah chuan kan kal mai dâwn nia. Engtin nge kum khat chu kan nghah theih ang?" a ti a. Kei chuan, "Tete, kan chhûngte bulah hian ka rai thu hi hrilh tawp mai ang, dâwt sawi ka duh lo, hemi hnu pawha kan inneih an phal a nih chuan ka nei êm êm ang che, dâwt hmanga i chhûngte mo nih ka duh hleinêm. Min ngaihtuah lutuk lo la, thil hi dik taka tih i tum zâwk teh ang," ka ti chu Laltetea chuan, "Zanin pawh kha Reuben-a kha i hmu lo em ni? Tûn thlengin a lo la beisei che hi i pa lah khan zaidam deuhin thu te a lo hrilh chiam leh nghâl a. I rai thu hi Reuben-a te lamin hre ta se an lâwm dân tûr chu, bâkah i chhûngte paw'n Ben-a an duat si a, an hâwtîr leh lo ang che tih a sawi theih hleinêm. Nautê hi engti kawng zâwng paw'n ka fa anga ka ngaih bâkah i rai tih ka hriat ve leh khan Pa ka ni tûrah ka lo inngai hmiah tawh," a ti tlat bawk si a. "Kal teh, mi rilru hah i ti zual," tiin ka nam fiam a. Laltetea lah chuan, "Ka hâw tawh dâwn lo, tihian ka lo luh khung che ni mai rawh se. Ka mut a chhuak tawh, ka hâw peih tawh lo, ka muhîl dâwn a nia," a ti ringawt a, ka khumah chuan a la mu ta deuh deuh a. Nui chung chuan, "Tho rawh, i muhîl tak tak ang e aw, tho rawh, chaw pawh i la ei lo a ni lâwm ni? Lo kal rawh, chaw ei ang, kei pawh ka ril a ṭâm," ka tih chuan Laltetea chuan, "Chaw eiah min lo nghâk thlap a ni maw? Nupui fel tak i nih dâwn hi a, rilṭâm a i awm ten kan nautê khan a tuar dâwn asin. Hawh, chaw chu va ei ila," a ti a, choka lam a pan nghâl a. Zui nghâl lêm lo chuan ka ṭhiante nên chuan kan nui vur vur a, nui chung chuan, "A inla patling nghâl êm êm ringawt a, kan siam laiin a tel ve tawp si lo va," ka han ti chu Kimkimi nuih za lutuk chuan, "Laltetea ka hrilh dâwn," a ti nghâl ringawt a. Kei chuan, "I ngam chuan hrilh teh, i châk lo ang," ka ti a, choka lamah ka kalsan a. Choka ka thleng chu Laltetea chuan chaw ei a lo siam thlap tawh chu niin, "Nu-i, lo ṭhu rawh," min han ti ngei ah. Nui vur vur chung chuan, "Khatia inkoh kha ka duh miah lo a nia, ka zah zâwng tak. Duat deuha min koh i duh paw'n 'Bawihtê' tih emaw 'Bawihi' tih te a tâwk reng alâwm, 'Nu-i' tih emaw 'Duh tak' intih vêl hi ka zak tlat," ka han ti chu Laltetea chuan fianin ka chalah min kuk a, "Ka thu thu a ni mai kha kha chu, ka duh duh dânin ka ko ang che. Ka duh leh 'Nu-i' ka ti che ang a, ka duh leh 'Mi a.com' ti paw'n ka ko che angba, i thu tawh lo êm mai," a ti a, a nui vur vur a. Chaw min khawrh ṭeuh a, ka ei thei tak tak chuang si lo va, ani chu a chaw ei a tui phian a. Chaw kan ei lai te chuan ei châk ka neih leh neih loh min zâwt a. Sangha ka ei châk ang reng a, mahse ka thil ei ngai loh han ei thut kha ka zak deuh tlat a, eng mah ei châk ka neih loh thu ka sawi ringawt a.

Laltetea'n chaw a ei lai chuan a bulah ṭhuin a chaw ei lai chu ka en reng a, chawhmeh eng vak mah pawh kan siam si lo a, a ei tui phian leh nghâl a. "I va'n ei tui êm êm, kei chu chaw pawh ka duh lo," ka han ti a. Laltetea chuan, "Ka ṭhianpa nupui pawh rai no a haw lutuk a, a thin a chhe bawk si, an ina lên pawh ka peih tawh ngai hleinêm. An nu thinchhe lutuk kha maw hmuh a hrehawm zâwk, tiang khan i awm ve ang em le? Eng emaw hlekah hian a mipa zâwk si hi kut min thlâk reng mai ang a," nui vur vur chung hian a han ti a. Kei lah chuan ka lo fiam lêt vat a, "I ṭhianpa nupui chu a thin a chhe ringawt a, a lâwmawm a nih chu. Kei chu ka thin a rim reng dâwn, ka ti tâu reng bawk ang a," ka han ti mai chu Laltetea chu a mangan hmel khawp mai. "Chutiang chuan awm suh aw, nautê a hrisêl lo ang, engtin paw'n lo thinchhe mah la thla kaw chhûng chu ka tuar thei mai ang, mi pâwn an theih chuan ka theih lohna chhan tûr a awm bîk lo," a han ti leh ringawt a. Kei lah chuan, "Inneih pawh kan la inneih loh hi, ṭawng ṭawng lo khan chaw kha ei vat vat mai teh, ka mut a chhuak tawh, ka chau," ka ti chiah chu a chaw thlêng a seng nghâl hmak a. "Ka puar tawh, ka lo seng mai ang, va mu rawh, kei pawh ka lo chho ve nghâl ang," a ti a. "Ka lo seng law law mai ang, a har hleinêm," ka tih pawh chuan amah chuan min tih khalh zung zung a, ka lo ṭhu hle hle a, a tih fel zawhin ka room lamah kan chho nghâl a. Ka pa chuan, "Mu har s'u aw, Kimkimi leh Zovi te kha zânah an ril a ṭâm chuan ei tûr i nuin a dah ṭeuh tih kha lo hrilh hlawm rawh aw, an lo inthlahrung palh ang tih a hlauhawm," a ti a. Laltetea lah chuan, "An inthlahrung teuh lo mai, kei ai hian an inti thu tawh zâwk," a ti a, ka pa chuan chhâng lêt lêm lo chuan a nui ringawt a. Ka room chhohna step chu Laltetea chuan, "Hei chu siam ṭhat a ngai a nih hi, a nih loh paw'n i nu te nên i room inthleng ula a ṭha ang, a chho reuh êm mai. Sep hi a tê bawk si a, i tlûk palh a hlauhawm," a ti a. Ka nuih chu a lo za lutuk a, mahse chuti taka min ngaihsak ta chu nuam ka tiin min duat reng se pawh ka ti, ka room kan thleng chu Kimkimi chuan an mutna tûr a lo siam fel diam tawh a. "Kimkim, in bulah ka lo mu ve dâwn," ka ti a, rang zet hian, "An bulah i mu lo ang, nautê hian a chhûn hlawm palh ang, an â ve ropui si, a bîkin Kimkimi phei hi chu a chhah leh zual," a ti mai chu Kimkimi chuan, "Laltete, i zak lo êm mai, nang ai chuan ka fing zâwk daih, mi fingin ka fing an ti ngai lo, i â fê zâwk, mi lah hi i perh ve ziah leh nghâl a," tiin a lo chhâng lêt ve vat a. Laltetea lah ngawi mai mai duh bîk lo, "Kha maw, mi fingin ka fing an ti ngai lo i ti zo chiah a, ka fing zâwk i ti nghâl a, i âtzia hi sawi belh ngai lo hian i lo sawi chhuak zawt zawt ṭhîn zâwk a," nui vur vur chung hian a la ti hrâm a. Zovi nên chuan kan lo nui vur vur a, Zovi chuan, "Laltetea leh Kimkimi hi innei ta se an inhnial reng âwm si a, pakhat zâwk zâwk chu an thih mai i ring ve em?" min ti a. Kimkimi chuan, "E... Laltetea nên innei ta ila chuan maw, thlêng thlâwk thei kan ngah ngawt ang," a rawn ti vat a. Laltetea pawh chuan, "Ngawi teh, thlêng chauh a thlâwk lo ang, fian thlâwk thei te, no thlâwk thei te kan ngah dâwn êm mai, a chi loh," nui vur vur chung hian a lo ti ve nghâl a. Kan pali chuan kan infiam kan infiam a, kan hlim tlâng ang reng. Mahse, a rûk tak chuan Reuben-a kha ka ngaihtuah a, in a thlen tawh leh tawh loh mawlh ka ngaihven a, a hmai a khem nasa si a, inah hâw lovin zu a in kàwi leh palh ang tih te ka ngaihtuah a, ka ngaih chu a ṭha lo ru ang reng. Mahse, Laltetea mitmei ka vên avângin eng mah ka sawi chhuak lo va, an bulah chuan hlim âwm tak chuan ka nui a, ka rilru hria se Laltetea thin chu a rim ve mai thei a ni.

Kimkimi leh Zovi chu chhuatah an mu a, Laltetea chuan ka ke min hmehsak pah chuan kan naupan deuh laia ka chêt chhiatna te a sawi chhuak a, ka ṭhiante chuan an hlimpui phian leh nghâl a. Zovi chuan a rûka min duh ṭan dân vêl a zâwt a, Laltetea chuan, "Merry hian, ka nu a pum a nâ a, damdawi leinaah min zui rawh a ti a, ka zui a. Kan hâw lamah kan kawtah hian min kiss ringawt a, khata ṭang khan a nia a rûka ka star," a han ti chiah chu kei chuan a samah ka kêk nghâl a, "Laltete, i va'n daw thei tak, nangmah a nih kha. Ka nu a pum a nâ i ti a, dâwt sawia min ko chhuaktu, uiin min ûm hrep leh nghâl a, i daw thei êm mai, keima'n ka kiss hmasa lo che," ka ti a. Laltetea chuan, "Kut thawh kher zêl suh, tûnah pawh ti hian kut min thlâk ṭan tawh a nia, nautê hi thla 5 vêl a nih meuh chuan ka sam hi a tla kawlh vek tawh ang," a ti a. Kei chuan, "Ka rai no vâng pawh a ni lo, dâwt i sawi vâng a nih kha," ka ti a. Kimkimi chuan, "Chu, in lo in-kiss chiang a ni maw? Merry hi i va'n nêp tak, min hrilh ve âwm hi i ni a, in lo inzêp thei hle mai. Mipa leh hmeichhia ang paw'n in lo inen lo emaw kan tih laiin, awi kei chu a mak ka ti tawp! Merry pa bula Laltetea'n in fanu hi min neihtîr mai rawh u a tih lai te khan ka tha a lo khûr ru nasa, tiang êm êm khan in lo inhmangaih ang tih ngaihna rêng rêng kan lo hre hleinêm, Zovi nên mak kan lo ti tawp a," a han ti chu Laltetea chuan thu tak hmêl zet hian, "Nia ti raw, hmangaihna hi chu inṭhian ṭhatna aṭanga piang a ni an lo tih ṭhin hi a lo dik khawp mai, bâkah, Merry hi chu a mizia hi a ṭha êm a, a ṭha mâwl tawp a, hei hi ka duhna chhan a nia, ka bâwl ka bâwl thei dâwn a," a han ti kher a. Kei chuan, "Ka muhîl duh, va hâw tawh mai teh, i nuin i hâw har chuan a hâu ang che," ka ti a. Mahse, Laltetea chuan, "I muthilh hnuah ka hâw ang," a ti tlat a. Thawnthu min chhiarsak a, Kimkimi te, Zovi te ho nên chuan kan ngaithla ṭhap a, ka mut chu a chhuak ṭan a, ka chhîng deuh sek tawh a. Laltetea chuan a lo chhiar chhunzawm zêl a, ka lo muthilhsan chu niin. Zân laiah ka han harh chu Laltetea a lo awm tawh lo va, ka lo muhîl daih a ni maw tiin Laltetea room tukverh lam ka en a, light a la ti êng a, a la muhîl lo êm ni le tiin phone-a biak tumin ka phone chu ka la kâng zawk a; mahse, ka tih buai palh ka hlauh avângin ka call ta lêm lo va. Khumah chuan ka let ka let a, muthilh leh chu a har ang reng. Thil ka ngaihtuah neuh neuh a, Reuben-a mawlh kha ni ka ngaihtuah chu, ka inthiam loh rualin ka khawngaih êm êm a. In a thleng tawh ang em le, tûnah eng nge a tih mêk ang le tih te ka ngaihtuah a, kan nun hlui te ka ngaihtuah kîr a, ka khawngaih zual sauh a, ka inthiam lohna pawh a hma zawng aiin a nasa zâwk. Muthilh leh ka tum tak ngial pawh chuan ka chhîng lui thei ngang lo, ka tlaivâr chu a ni dêr mai. Zîng dâr nga vêlah ka tho a, tu mah an la harh lo va, thâwm dîm takin ka tho a, kan kawt vêlah ka tei ka tei a. A hnuah kan school hluiah kal ka châk deuh thut a, keimah chuan ka kal a, kan school thlen hmaa Reuben-a nêna kan thingphun kha ka hmu a, kan phun lai te kha ka mitthla a, ka rilru chu a ti na ang reng. Kan thingphun bulah chuan ka ṭhu a, ka nun hlui ka ngaihtuah kîr a, eng tik lai aṭang khan nge maw ka nun hi a lo dik loh tâk ni, ti nge maw ka nun hi ngîl taka a kal ve mai theih loh le. Reuben-a a lo lang a, a rûkin ka duh êm êm a; mahse Laltetea ka hmangaih zâwk bawk si. Laltetea khan min duh thu lo sawi ve mai se, a nih loh paw'n keimah hian lo sawi chhuak zâwk mai ila, tûn ang dinhmunah hian kan ding awm si lo a, kan nun hluiah khan lêt leh thei ila Reuben-a rilru ka tih nat loh nân engkim hi ka siam ṭha mai tûr; mahse, khua a tlai zo tawh si. Laltetea kalsana Reuben-a kut vawn leh chu ka ngai ngam si lo, keimah hi lo awm lo ila tu mah an na lo mai tûr tih te ka ngaihtuah rum rum a.

Episode 28

Zîng dâr 8 vêlah ka hâw a, kan kawtah chuan Laltetea hi a lo awm a, min hmuh ve leh, "Eng nge i tih? I chhûngte i hrilh bawk si lo a, kan ngaihtuah hman che alâwm," min lo ti vat a. Kei chuan, "Boruak thianghlim hîp ka duh a, ka tei kual vêl mai mai alâwm," ka ti a. Laltetea chuan, "Hawh, lût ila, Zovi'n waiwai a chhumsak che a nia," a ti a. Kei chuan, "Ka ei theih pawh ka va'n ring lo," ka ti a. Mahse, Laltetea chuan ei rawh min tih tlat avâng leh Zovi'n hah taka min lo chhumsak ve a nih bawk si avângin 'ka ei duh lo' han tih tawp kha chu ka inthlahrung bawk si a. Ka nu pawh a lo tho tawh a, mahse ka pa chu a lo la tho ve lo a, ka nu leh Zovi te chuan rawng an lo bâwl a. Zovi chuan, "Kha, wai wai hi ei rawh," min ti a. Kei chuan, "Ka lâwm lutuk aw, ka'n ei ṭeuh ang e," tiin ei ka'n tum chu a rim ka ti thei dêr lo mai, ka uak vak vak a, ka ei lui thei ngang lo. Ka nu chuan, "Nang hi nimin pawh khan tihian i awm tawh, a va mak ve, thi i nei tawh em? I rai no luak chhuak te hi a ni lo maw?" min ti nghâl a. Ka hamhaih vek a, sawi tûr pawh ka hre lo. Laltetea chuan, "Aw, Merry hi a rai a, nimin khan kan hre ve chiah, chuvâng chu a nia inneih vat vat ka duh chhan," a rawn ti vat a. Kei chu eng mah ka sawi lo va, ngawih ka chuh tlat a. Ka nu bawk chuan, "Reuben-a khan a hre ve em? I chhûngte'n hria se an rem ti kher dâwn em ni? Hrilh loh chi pawh an ni hleinêm, vawiinah i nu hrilh rawh u, a nih nih kan ni mai ang, hetianga zêp chi pawh a ni hleinêm. Engtia tih nge maw in lo tum rêng rêng ni!" a ti a. Laltetea bawk chuan, "Nizân khan Lunglei lamah tlân dun kan tum a; mahse, Reuben-a nên khan kan insual buai leh si a, zân a tlai tawh bawk nên kan ṭhulh rih a, kei chu ka rilru a la pangngai reng a. Merry hi ka la îai chuang lo va, nautê pawh hi ka fa angin ka pawm nghâl a, ka chhûngte'n eng pawh lo sawi se kalsan ka tum chuang lo," a ti a. Ka nu chuan, "I pa ka'n kai tho ang e, ti ringawt hi chuan a ni thei lo, naupai laia damdawi ei chi pawh eng mah a la ei lo tihna a nia, chaw ei khamah doctor kan va râwn dâwn a nia, nautê a ṭha em tih te kan va en dâwn a nia," a ti a. Ka nu chu an room-ah a kal nghâl a, ka pa a hrilh ngei ka ring a, ka thawveng huai zâwkin ka hria. Tihian kan nih nih kan ni tawh mai a ni ang chu, tiin ka rilru ka siam fel hmak a, kei ai chuan Laltetea rilru chu a hah zâwk a, "Engtin nge min tih ang le," a ti char char a. Ka ṭhiante chuan, "Engkim a ṭha vek mai ang, in rilru ti hah duh suh u," tiin min thlamuan a. Mahse, Laltetea chu a ṭhu hle hle thei lo, a tei a tei a, "An va lo chhuak har ve, eng êm êm nge maw an sawi chu le," a ti ringawt a. Nu Chhuani chuan tukverh aṭang chuan Laltetea chu a lo ko a, "Têl a zo va, va lei lawk rawh," a ti a. Laltetea chuan, "Hawh, min lo zui ve rawh," a ti a. Ka peih lo ka tih pawh chuan min pawt lui tlat a, ka zui ta nge nge a. Dâwr kan kal pah te chuan ka nu leh pa thil sawi dân tûr vêl kan lo sawi lâwk vêl a, Laltetea chuan a khât tâwk chuan, "Tlân dûn mai ang," a ti sek a. Kei chuan, "Kan chhûngte kutah dah tawp mai teh ang, a hahthlâk êm mai, chhûngte rilru tih hah hi ka peih tawh lo, kan hlim thei tak tak dâwn chuang lo," ka ti tlat a. Laltetea rilru chu a hah leh zualin ka hria.

Laltetea nên Têl kan lei zawh hnu chuan kei chu kan inah ka lût nghâl a, Laltetea pawh chuan min rawn zui lût nghâl vat a. Ka pa chuan, "Vawiinah Bawihtê, i nu nên doctor va hmu r'u aw, i hrisêlna te a ṭha em, nautê a ṭha em tih te va in-check-tîr rawh aw. Rai laia ei tûr damdawi te in lo inchawhtîr dâwn nia. Tete, nangin i nu hrilh la a ṭha ang, a hma lama a hriat loh zawngin dâwt sawi chan in chang thei tlat a, thil ṭha eng mah a chhuah lo ang," a ti a. Laltetea chuan, "Ni e, ka lo hrilh ang, vawiin chu keima'n Merry chu doctor bulah chuan ka va hruai ang e, duh leh ka pi pawh lo kal ve se, a lo kal hman loh paw'n ka kalpui thei reng a nia, ka mawhphurhna a ni tawh a, ka tih tûr alâwm," a ti a. Ka pa chuan Laltetea rilru puitlin dân leh min hmangaihzia a hre chiang telh telh a, pasal atân min duhpui zual deuh deuh hian ka hria. Ka pa chuan, "I nu chu dâwrah a buai âwm si a, duh leh in pahnihin va kal mai r'u aw, kha Tete, pawisa in mamawh tâkin," tiin chêng 4,000 a pe a. Laltetea chuan a la duh miah lo va, "Keima'n ka nei tho a, a ṭûl ang ang chu kan lo lei nghâl mai ang," a ti a. Ka pain pawisa a pêk luih tak ngial pawh chuan a la duh lo va, ka nu pawh chuan, "In mamawh leh min dîl leh mai r'u aw," a ti ringawt a. Ka nu leh Zovi chuan chaw ei an lo peih diam tawh a, Laltetea pawh kan inah a ei ve nghâl a, chaw kan ei kham ve leh doctor hmu tûrin kan insiam nghâl a. Nu Chhuani chuan kan lêng dûn dâwn emaw a ti a, kan kalna tûr min zâwt lêm lo va. "Lo hâw hma r'u aw," a ti ringawt a, kan kalna tûr min zâwt lo kha ka lâwm ru ang reng. Dr Thangtea bulah kan inentîr a, Dr Thangtea lah chu Reuben-a ṭhianpa kher a lo ni bawk nên ka hlauthâwng ru ang reng. Reuben-a a hrilh ka ring nghâl a; mahse, Laltetea nên kan kal dûn tho a, ngaihdân a siam thiam mai chu ka ring a. Ka hriselna a ṭhat vak loh thu min hrilh a, ka bp a lo hniam viau mai a, mu tam tûr leh rilru hahdam taka awm tûrin min hrilh mawlh mawlh a. "I ei châk apiang ei zêl ang che, thei lam ei tam la, lui lam sa ei tam bawk la," min ti a. Damdawi eng eng emaw min chawh nual a, damdawi pawh chu kan lei nghâl a. Laltetea nên chuan kan bazar kàwi a, sangha lian pui mai hi an lo zuar a, ka ei châk zual sauh a, Laltetea bulah chuan, "Sangha hi lei ang," ka ti a. Ani lah chuan, "Sangha chu i duh ngai bawk si lo a, a rim i haw zual palh ang," a ti tlat a. "Ka ei châk alâwm," ka han ti thut chu mak a tih hmêl hle. A nuih a za bawk si, "A nih chuan lei ṭeuh ang aw," a ti a, Sangha lianpui chu a lei a, ka nu dâwrah kan lut kàwi zuai a, ka nuin Sangha ka ei châk tih a hriat chuan mak a ti ang reng, "A va lâwmawm êm êm, a fing hle dâwn a nih hi Sangha ei tam chu finna alâwm," a ti a. Laltetea lah chuan, "A mak tawp! Keiin Sangha ka duh ber bawk a, min chhûn dâwn hle mai," a ti a. Ka nu nên chuan kan nui ringawt a, Laltetea lah chuan, "Sangha i ei lai ka hmu châk tawh, hâw ila, keima'n rawng ka bâwl vek ang," a ti a. Ka nu pawh nghâk lo chuan kan hâw nghâl a.

In kan thlen chuan Nu Chhuani chuan Laltetea ni a dam ṭhat loh avângin a riahpui tûr thu a rawn sawi a. Laltetea chuan, "Zanin chu ka hrilh leh thei dâwn lo a nih hmêl, pawi lo, naktûkah hrilh law law mai ang aw," a ti a, ka huphurh ru ang reng. Laltetea chuan rawng a bâwl vek a, Kimkim te an lo kal leh ka rin nên zanin chu an lo riak thei dâwn lo a nih hmêl a, a reh leh hle dâwn a nih hi, ka ti rilru a. Ka pa chuan Laltetea chawhmeh siam vêl a rawn enpui chu, "Sangha te ti nge in lo lei duh a, Bawihtei'n a ei thei âwm si lo va, a ei theih tûr sa te lo lei zâwk tûr alâwm," a tih chuan, "Amah ber hian a ei châk a, lei rawh a ti alâwm," nui vur vur chung hian Laltetea chuan a han ti a. Ka pa chuan, "A va ṭha ve, chuti chu a hmin ve leh ei nghâl rawh u aw, i nu chu keima'n ka nghâk mai ang, ei châk laia ei vat kha a ṭha," a ti a. Kei tak pawh chuan ei vat vat chu ka châk a, a hmin har ka ti rilru char char a. Chaw a hmin hnu rei lo têah Sangha pawh a hmin ve nghâl a, ka nu nghah ka duh viau nâa chu ka ei châk tawh ropui si a, ka pa leh Laltetea chuan min khawngaih a ni ngei ang, 'ei rawh' an lo ti ve sek a. Laltetea nên chuan kan ei hmasa a, ka vawi khat eina mah ni se ka ei tuiin tui ka ti khawp mai, "Tinge maw a hma zawng khan ka lo ei duh ngai miah loh le?" ka han tih chuan Laltetea chuan, "I ei tui bawk si a, hmuh i nuam tawp, naktûk zîngah pawh kan lei leh dâwn nia, ei châk dang i la nei em?" a ti a. "Ei châk dang eng mah ka neih pawh ka hre lo," ka ti a. Laltetea en lêm lo chuan Sangha chu ka ei mial mial a, Laltetea chuan chaw pawh a ei ṭha lo, min en reng a, ka lo lai lek lek zâwk.

Chaw kan ei zawhah Laltetea nên TV kan en mai mai a, ka nu pawh a rawn hâw ve nghâl a. Ka nu chuan, "Chaw in lo ei tawh em? Sangha kha i ei châk bawk si a, min lo nghâk ang tih ka hlau lutuk a," a ti nghâl vat a. Kei chuan, "Laltetea nên kan ei alâwm, ka ei ṭeuh mai, ka puar lutuk," ka ti a. Ka nu chuan, "A lâwmawm a nih chu, ei châk dang i la neih chuan sawi hreh miah suh aw, nautê khan i ei châk zâwng i ei loh chuan a tuar thei tih hria la, i ei châk apiang sawi nghâl zêl ang che," min ti a. Ka pa chuan, "Keini pawh ei ve nghâl tûr a ni, ka ril a ṭâm riau," a ti a. An ei dâwn chiah tihah Laltetea nuin a lo call a, Laltetea ni a thih thu a rawn hrilh a. Laltetea chuan, "Ka ni chu chuti lutuka nâ pawh a ni si lo va, a va'n mak êm êm! Ka lo kal ve a ngai ang em?" a ti a. A nu chuan, "Lo kal ve rawh," a ti a. Laltetea chuan, "Ka va lang ve zuai ang a, lo hâw leh ka tum ang a; mahse, tlaivâr pawh a ngai mai thei a, ka lo hrilh leh mai ang che aw," a ti a, a kal nghâl a. Ka nu te pawh kal ve an tum a, chaw an ei sawk sawk a. Mahnia awm chu ka hreh deuh si a, ka û te ho hmun dangah an awm zo vek bawk si, Kimkimi ka phone a, lo riak tûrin ka ti a. Kimkimi chuan Zovi a call ve leh a, Eli pawh a lo hman remchâng a, an pathum chuan an lo riak thei dâwn a, ka lâwm hle. Mahni chauha awm chu a hlauhawm bâkah a khawharthlâk dâwn êm mai. Ka nu leh pa kal hmain Kimkimi a rawn thleng hman a, ka thawveng hawk mai. Kimkimi a lo thlen tâkah chuan tiin ka nu leh pa te pawh Laltetea ni te in lamah chuan an phei ve nghâl a, kei pawh kal ve chu ka duh viau a; mahse, Laltetea hi a ni te ho nên chuti lutukin an inpawh loh bâkah kan inhre vak si lo a, ka chhûngte chuan lo awm hahdam zâwk tûra min tih tlat bawk avângin ka kal ve ta lo va. Kimkimi nên chuan TV kan en mai mai a, zân dâr 8 vêlah Zovi leh Eli pawh an lo thleng a. Eli chuan ei tûr min lo ken ṭeuh a, "Ei vek rawh, nautê hming ka phuah duh a nia," a rawn ti nghâl buan buan a. Kimkimi chuan, "An phuahtîr duh che i ring em ni? Bâkah, i tâwi ve si a, a chhûn palh ang che. Zovi paw'n phuah suh se, a chêr sang vah ang a, a chi loh rêng rêng. Kei hi ka tâwk chiah, ka hmêl ṭhat dân hi chhûn se, ka sân zâwng pawh hi a tâwk chiah a," a ti a, a nui vur vur a. Zovi chuan, "A chhun che chuan Broiler a ang palh ang, a chi loh fê zâwk," a rawn ti ve vat a, ka nuih a za kher mai. Kimkimi chuan mipa ka neih a ring a, Zovi chuan hmeichhia ka neih a ring a, Eli pawhin hmeichhia ka neih a ring ve tho va. Laltetea ve thung chuan mipa nei tûrah min dah tawp a, "Mipa ka duh, a sam pawh ka duh dânin ka cut ang a, khawlai ka lênpui dâwnin ka thawmhnaw nên inang hlîr ka leisak ang," a ti ve bawk a. Mipa ka neih ka ring a; mahse, hmeichhia ka duh ru zâwk mahin ka hria.

Ka ṭhiante ho nên kan tîtî nak nak lai chuan Laltetea chuan min lo call a, a ni ruang thlah tûrin Serchhip lamah a kal a ngaih tûr thu min lo hrilh a, mahse a lo hâw leh nghâl tûr thu a sawi bawk a. Ka lung chu a lo lêng lâwk nghâlin ka hria. Zân dâr 11 rîk dâwnah ka nu leh pa te an lo hâw a, ka nu chuan, "Laltetea te nufa chu a ni ruang zuiin Serchhip lamah an kal a ngai dâwn a nih hmêl a, Tetea'n a lo hrilh tawh che em?" min ti a. Kei chuan, "Hrilh e, nichin lawk khan min lo phone a," ka ti a. Ka pa chuan, "Kan zui ve thei si lo va, a zia lo khawp mai," a ti a, an room lamah min luhsan nghâl a. Kimkimi te ho lah chuan l, "Merry hi a lung a lêng nghâl a nih hi maw le, nuih pawh a nui thei tawh lo," min ti nghâl ringawt a. Kan ṭhianho chuan zânkhuain eng eng emaw sawiin ka tîtî chiam hlawm a. Eli chuan ka sam min pawh ngîlsak a, Kimkimi leh Zovi pawh an sam an lo pawt kir ve mial mial bawk a, zîng lam dâr 2-ah pawh kan mut a la chhuak chuang lo. Kan pali chuan kan tlaivâr chu a ni dêr mai!

Zîng ka thawh veleh tukverh aṭangin Laltetea room lam ka thlîr nghâl a, a awm si lo, ka lung chu a lêng nghâl rum rum hian ka hria. Zovi chuan, "Vawiin lam chu Laltetea a awm si lo va, lo riak ve tawh la," a ti a. Ka chhân hmain Kimkimi chuan, "A ngai lo, hetah riak khâwm leh mai ang u, a nuam zâwk, bâkah tu ma'n min ti buai lo va, kan bengchhen deuh paw'n min hâu lo va, kan thawveng zâwk," a lo ti vat a. Eli lah chuan, "Merry khan in ṭawng eng mah a ngaihsak lo, a zîngkâr lunglên a nih hi, a harh chiah a, Laltetea a ngai nghâl a, a room lam a en leh vûng tawh saw, biak chi pawh a ni lo," nui vur vur chung hian a ti a. Kei chuan, "Ngaih tûr pawh i nei ve em ni?" ka ti fiamthu a, kan nuih vak vak a. Chaw kan ei kham chuan ka nu dâwrah kan kal a, thawmhnaw thar a rawn thleng a, ka nu a buai sia kan ṭhianho chuan kan pui char char a, ka phone rî pawh ka lo hre lo va. Ka hman veleh ka phone ka han en chu Nu Chhuani missed call hi a lo awm ṭeuh a, ka call lêt vat a. Laltetea'n a lo chhâng a, nichina min lo call-tu pawh kha Nu Chhuani ni lovin Laltetea a lo ni a. Laltetea chuan kâr khat vêl tal Serchhip-a an awm a ngaih tûr thu min hrilh a, ani pawh chuan min ngai hle tawh tih a ṭawngkam aṭang chuan ka hre thei nghâl a. Laltetea chuan, "Damdawi kha ṭha takin lo ei ang che aw," tiin min chah mawlh mawlh a, min hmuh phâk lohna hmunah awm mah se min ngaihsak loh phah chuang lo hi ka lâwm tak zet a ni.

Laltetea a awm loh chuan kan in hi a reh hian a reh ngawih ngawih, a lo hâw hun nghâkhlel takin ni ka vui liam a, ni te hi a tla harin khua te hi a vâr har bîk hian ka hria. Laltetea a kal aṭangin ni ngana a lo ni ta, Laltetea chuan min lo phone a, ka rai thu hi a chhûngte a hrilh tawh thu min hrilh a, Nu Chhuani a thinrim viau ka rin nên, Laltetea chuan eng mah an sawi loh thu a sawi ringawt a. An thusawi min hrilh duh lo a nih ka ring a, ka ngaih chu a ṭha thei ngang lo. Nu Chhuani a lo hâw hunah Laltetea kalsan tûrin min ti thut mai se engtin nge ka awm ang le ka ti rilru nak nak a. Laltetea chuan eng thil pawh lo thleng se ka kalsan ngai lo ang che ti fo mah se, loh theih lohna avângin keimah zâwk hian ka kalsan a ngai mai ang tih te pawh ka hlau ru ṭan hle.

Episode 29

Laltetea te lo hâw ni a ni a, ka hmuh châk rualin ka huphurh ru ang reng, chanchin ṭha lo a lo hawn ka hlau a, Nu Chhuani a lo hâw tel ve bawk si a, engtin tak min ngai ang maw? Min duat viau mah se nuthlâwi fa nei mai tûr hi a mo atân min pawm theih ka ring thei lo a ni. Zân dâr 6 vêlah kan kawtah chuan Sumo a rawn ding ta chat mai, Laltetea te nufa an ni tih ka hre nghâl a, ka va chhuak vat a. Laltetea chuan, "I lo ṭha em? Min ngai lutuk a ni maw, i chêr sawtin ka hria," min lo ti nghâl vat a. Nu Chhuani chu eng mah sawi lo chuan kan inah a lût nghâl a, ka nu chu ṭha takin a bia a, ka nu chuan chaw ei a lo siamsak vat hlawm a. Nu Chhuani leh ka nu te chu an tîtî bawrh bawrh a, mahse kei chu vawi khat pawh min be lo. Laltetea bulah chuan zawi tê hian, "I nu hi a thinrim a nih ka ring," ka ti a. Laltetea lah chuan, "A thinrim paw'n a rim rei thei chuang lo ang, naktukah chuan a fel leh vek mai ang," a ti ringawt a. Eng mah min hrilh ṭha duh si lo a, Laltetea ber hian. Nu Chhuani lah hian min duh loh thu pawh eng mah a sawi rih bawk si lo va, ngaih a ṭha thei rêng rêng lo. Nu Chhuani chuan, "Merry chanchin te ka lo hria a, a zia loh rualin malsâwmnaah ngai ila; mahse, Laltetea hian hna nghet pawh a la nei si lo va, tûn thawt thawta inneihtîr hi kei chuan remin ka la hre thei chuang lo a ni. Merry hi mi fel tak a ni tih chu ka hre tho a; mahse kan chhûngte dangho ngaihdân pawh hi a pawimawh ve tho a, Laltetea pate lam thu te hi han ngaichâng ve phawt mai ila a ṭhat ka ring. Kei chuan duh lo êm êm pawh ka ni chuang lo, kan fapa hi a la naupang si a, pa han nih nghâl ngawt mai chu a kovah mawhphurhna zawng zawng a tla nghâl dâwn si a, a hlen zawh hi ka ring rih lo a ni, a la naupang ve bawk si a. Eng pawh ni se, inneih lam hi chu zâwi muangin kan ngaihtuah dâwn nia, Merry leh Laltetea pawh hmanhmawh lo ula, kan malsâwmna in duh chuan kan rem tih hun in nghâk mai tûr a ni," a ti a. Ka pa chuan, "Ni e, i sawi pawh chu a dik khawp mai, nu thlîrna aṭanga thlîr phei chuan i ngaihdân hi a dik khawp mai, kan dem rêng rêng lo che u a nia. Kan chungah hian in ṭhain kan tân chuan sawisêl bo in ni, kan phû lohzia che u hre tho mah ila kan fate lah hi an inhmangaih tawn êm êm bawk si a. Mahse, nautê a awm tawh si a, keini chuan in thutlûkna ang ang kha kan pawm vek a ni, vui ngam tûr pawh kan ni hleinêm," zaidam tak hian a lo ti lêt ve vat a. Ka nu leh pa, Nu Chhuani te chu TV en pahin an tîtî char char a, Laltetea chuan min kal sawnpui daih a.

Laltetea chuan, "Dik tak chuan ka nu ka hrilh lai khan ka nuliani te ho kha an awm ve a, ka nu tak phei chuan pawi a ti hran miah lo; mahse, ka nuliani te ho khan an hre ve si lo che a, an duh lo nghâl ringawt mai che a, ka nu an fuih reng bawk si a, ka nuin a hmai zah ve hlawm bawk si a. Kha vâng a nih kha, a hranpa takin ka nu hian a duh lo che a ni miah lo a nia, i rilru ti na duh miah suh aw," min ti a. Kei chuan, "I nu rilru tûr chu ka hrethiam lutuk, ka dem rêng rêng lo, a âwm ka ti lutuk ringawt," ka ti a. Laltetea nên chuan kan inhmuh lohna a rei tawh vâng pawh a ni mahnâ, kan inngai tawn êm êm a, ka inkuah deuh chawt a. Zân dâr 11 vêlah Nu Chhuani chuan a lo ko va, Laltetea pawh chuan hnial lêm lo chuan, "Muttui mai aw, phone-in kan inbe dâwn nia," tiin min hâwsan a. In a thlen rualin min lo phone a, eng êm êm nge kan sawi pawh ka hre sêng lo, zîng lam dâr hnih thleng phone-in kan inbia a, ka mut a chhuak ngang a ni ang kan inbiak reng lai chuan ka lo mutsan daih chu niin, ka châu ve deuh a ni ngei ang.

Zîng dâr 7 vêlah Laltetea chuan ka room kawngkhâr a rawn kik vak vak a, ka va hawn veleh, "Ka mumangah bialpa dang eng vânga nei nge i nih?" min rawn ti thut mai. Kei mut kham lo tho phâng nên, ka ngei ang reng, "I mumang mai mai vângin maw hma tâwkah min lo kaih thawh, chutah i rawn pâwr êm êm mai leh nghâl a," ka ti a. Laltetea chuan, "Ka mumang kha a tak a ang lutuk alâwm, ka sawi thiam lo," a han tih phei chuan hnek hrep kha ka châk a; mahse, ka châu bawk si a, ka chhâng buai peih lo va, ka mutsan leh tawp a. Laltetea chu ka khumah chuan a rawn ṭhu ve nghâl a, "I muhîl leh dâwn em ni? A tlai tawh tho si a, chaw ei chhuak ila, an siam tui deuhna ka hria asin," a ti a. Kei chuan ka kuah a, "Ka mut a la chhuak alâwm," ka ti a. Laltetea lah chuan, "Lo mu ve rawh min tihna em ni? Ka lo mu ve dâwn a nia," a ti chiah mai chu ka tho nghâl vat a, "I zak lo e," ka ti ringawt a. Laltetea chuan, "Hawh, inphih fai la, intih thawven pahin chaw chu ei chhuak teh ang, inah ngawt inkhung chu a ṭha lo, nau pâi lai phei chuan intih thawven ve deuh te hi a ngai alâwm," a ti a. Kei pawh chuan hnial lêm lo chuan ka insiam nghâl a, ka nu kan hrilh phawt a, ka nu chuan a lo phal khawp mai a, kan kal chhuak nghâl a. Laltetea chuan a bike khalh dân chu a hma zawng aiin a uluk a, muangchângin a tlân a, ka lo ning zâwk a, "Chak deuhin tlân rawh," ka ti a. Laltetea lah chuan, "Intipalh ta ila nautê khan a tuar ang tih ka hlau alâwm, muangchânga tlân hi a him zâwk, kawng a ṭha êm êm si lo va," a han ti a. Laltetea chu nghet deuh hian ka kuah a, ani lah chu a lo lâwm phian leh nghâl a, "Merry, ka hmangaih che," tiin a au vak vak leh nghâl a. Ka lo zak ru ang reng, miin zu a rui emaw an lo tih ka hlau va, ka khap vat a; mahse, a khât tâwk chuan, "Ka hmangaih che," tiin a âu leh thut ṭhîn a. Kei chuan ka lo bêng vat ṭhîn a, a nuih a za telh telh bawk si. Pangpâr an phun ṭeuhna hmunah rei lo tê kan châwl a, thla te kan la dûn a, ka ril a ṭâm deuh tawh avângin Restaurant lam chu kan pan leh nghâl a. Restaurant kan han thleng chu a lo nuam phian a, ni a hmuh ṭhat bâkah a boruak hrim hrim a zângkhai bîk raih mai a ni. Laltetea chuan Sangha a order nghâl a, kan pahnih chuan kan duh zâwng a lo inan tâkah chuan chaw ei dun pawh a nuam tawh khawp mai. Duhsak takin sangha hlîngte min then faisak vek a, nuam ka ti ang reng. "Ka naupang ṭha leh a ni maw..." ka ti a. Laltetea chuan, "Naupang chhia ang mai hian alâwm i awm ṭhin, thil te lah hi i ngaihtuah thui thei sia maw, ka hmuh phâkah i awm loh hi chuan ka ngaihtuah ngawih ngawih che, i rilru a no ve si a, a rûk hian i ṭap i ṭap ṭhîn ang tih te ka hlau alâwm," a han ti a. Laltetea chu ka bêng chawrh a, "Tiang hian a hma khan min duat tawh tûr che alâwm, school kan kal ṭhin lai kha chuan min chhaih reng zêl a, tihian min ngaihsak ngai miah lo," ka han ti a. Laltetea chuan, "Nia, ka lo â ngawt mai kha tih lai khan, ka duhzia che kha i hrethiam lo ang; mahse, ka la naupang chhia bawk si a, eng mah ka sawi ngam lo va," a han tih chuan a rûk tak hian ka hlim tak zet a ni.

Chaw kan ei kham veleh kan hâw nghâl a, in kan thlen chuan ka pum chu a rawn na deuh chhên a, a chângin a reh a, a chângin a rawn na leh thut ṭhîn a, ka chhûngte ngaih ṭha lo chuan damdawiinah min hruai tawp a. Doctor-te chuan indîm tûrin min lo hrilh mawlh mawlh a, ka taksa a chak si lo va, hahdam taka awm hrâm hrâm tûrin min hrilh châmchi a. Damdawi lei ngaite min hrilh hnuin kan hâw leh nghâl a, in kan thlenin ka mu tawp a. Laltetea chuan min buaipui char char a, zânah pawh rei tak min menpui a. Laltetea chuan ni tin min awmpui ṭhîn a, an in ai mah chuan kan inah chuan a awm tam zâwk tawhin ka ring, a nu ngaihdân pawh a ni lo ṭan hle. Innei lo mah ila hna ṭûla a kal loh chuan nilêngin ka bulah a awm char char ṭhîn, zânah ni se ka muthilh hma chu a hâw duh ngai lo va, a nu mit a kham ta pawh chu a dem awm miah loh. Chiang takin sawi lo mah se ka chungah Nu Chhuani a lung a awi lo tih chu ka hrethiam lutuk. Laltetea pawh ka hâu ve fo va; mahse, a sâwt chuang lo.

Thla a lo liam ve zêl a, ka nau neih thla kan lo thleng ve ta reng mai, nautê hmêl hmuh kan nghâkhlel tlâng tawh hle. Ka nu leh pa ai mah chuan Laltetea hi a lo phûr fâl a, "Mipa ka duh, mipa a ni dâwn chiang lutuk," hi a ti deuh reng mai a, a pian hma hauhin a kawr hâk tûr leh a infiamna tûr thil a lei lâwk ṭeuh leh nghâl a. Ka nu chuan, "Hmeichhia a ni dâwn, lei lâwk vak vak suh," a ti fiam ṭhîn a; mahse, Laltetea chuan dâwra a kal hian mipa naupang thawmhnaw a hmuh tawh chuan a kal pêl hlei thei lo hi a ni ber mai, a rawn lei leh nge nge zêl a. Ka nu leh pa te pawh chuan an khap duh ta lêm lo va; mahse, a nu chu a lâwm teh chiam lo, min be khât telh telh a, min hmuh reng paw'n min biak loh châng a tam ṭan hle. Laltetea ṭhiante ho pawh chuan Laltetea bulah chuan, "Hmangaihna mit hi chu a del ve chiang khawp mai. Engtin nge heti chung pawha i la hmangaih reng chu le!" an lo tih châng te hian Laltetea chuan, "Hmangaihna mit hi a del lo, a del loh vang a nia a ṭhatna ka hmuh bîk," tiin a lo chhâng hlawm ṭhîn a. Ka lâwm rualin ka inthlahrung ru hle ṭhîn.

Ka pum chu zânkhuain a na a, zîng lam dâr 5 vêlah a na ka ti tawh lutuk chu Laltetea ka phone tawp a, a rawn kal nghâl a. Ka chhûngte a kai tho va, damdawiinah kan kal nghâl a, nau neihna room-ah min hruai lût nghâl a, ka vei rei ang reng. Ka châu ṭan tawh hle mai; mahse, san min rawn pe thut a, chuta ka hriat leh chu nautê ṭap thâwm a ni. Nautê chhartu hnênah chuan, "Kutke kimin a piang em?" ka ti hmasa ber a. Ani chuan, "A ṭha vek e, mipa i nei aw," min han ti chu ka lâwm lutuk chu awm ngaihna pawh ka hre lo. Ka nâ zawng zawng chu a reh duak hian ka hria a, nautê chu thei leh thei lo chuan ka en a, ka pawm châk tawh khawp mai; mahse, thisen ka hloh hnem avâng chuan ka châu tak zet a ni. Naupuanin an tuam vat a, pâwna ka chhûngte bulah nautê chu an va hruai a, kei pawh room pangngaiah min sawn vat a, nautê hnute pêk nghâl a ngai a, ka mutnaah an rawn muttîr a. Ka nu chu nautê a hmuh chuan a lâwm lutuk chu a mittui a tla a, "A va'n duhawm êm ve aw..." a ti ngawih ngawih a. Laltetea pawh chuan sawi tûr ber pawh a hre lo, "Mipa a ni dâwn ka tih rêng kha," a lo ti ve vat a. Nautê chu thla a lâksak nghâl a, a lâwm ber berah chuan a ṭang leh nghâl a. Ka bul lawka nau nei ve tho te chuan, "I pasal chu a lâwm hle a ni maw, mipa a ni leh nghâl a, a pa a chhûn êm êm mai leh nghâl a," an han ti chu tlêm chuan ka lo tîm hman a. Mahse, Laltetea chuan, "Kei ber min chhun lohin, a nu a chhun chuan min duh lutuk ang a, a ṭha nang," a han ti fiam daih a, an nui dar dar a. Tu pawh mai chuan min lawmpui niin ka hria, nautê hmêl ngawt chu ka en a, mut pawh ka muhîl thei lo, 'mu hahdam rawh' an tih pawh chuan nautê ngar ngar chu ka en a, ka hlimzia hi ka sawi fiah thiam lo.

Episode 30(Last Episode)

Chhûn dâr 12 vêlah doctor a rawn kal a, doctor chuan kan ṭhat vek thu te min rawn hrilh a, damdawiin aṭanga kan chhuah theih nghâl tûr thu min hrilh nghâl bawk a. Ka nu chuan nautê chu a pawm a, Laltetea chuan min pawm a, ka pa chuan motor a khalh bawk a, kan indaihzai khawp mai. In kan thlen chuan ka û te ho an lo hâw vek chu niin, Kimkimi leh ka ṭhiante ho Zovi leh Eli pawh an lo awm ve bawk a, nautê hmêl hmuh châk chuan an lo phí cheng hlawm a. Ka nu chuan, "Tu ma'n pawm rih suh u, a la sên lutuk a, dim a ngai. Nautê mutna tûr kan siamah khan ka'n mut nghâl ang e," a ti a. Ka û chuan a khuhna chu a hawng chhên a, nautê hmêl chu ṭha a ti ve ngang a ni ang, a khât tâwkin a va en reng a, 'a hmelṭha e' a ti deuh chhên mai a. Laltetea pawh a bàng bîk lo, keimah pawh min ngaihsak ṭha thei lo, nautê bulah chuan a awm deuh chawt a, thla a lâksak char char a, a toys tûr te a lo rem sa vêl a. Ka nu chuan, "Nausênin khatiang an khalh thiam lo," a tih pawh chuan ka nu thu chu a zâwm duh lo va, "Hei hi chu nautê infiamna tûr room-ah ka siam ang," a ti a. Ka nu lah chuan tih luih nuam a ti laklawh tawh a, "A ṭûl lo, pawisa a hek, infiamna tûr room hran siamsak a ngai lo," tiin ka nu chuan Laltetea chu a han runluih deuh kher a. Famthuin Laltetea chuan, "I inren êm mai, keimah ka awm alâwm le. Hna ka thawk ang a, nautê infiamna tûr room chu mawi tâwkin ka cheisak vek ang. Cartoon-ho in ang hian a room hi ka siam dâwn alâwm, a mawi ngawt ang," a han ti phei chu ka nu leh pa nuih a za hle. Nu Chhuani pawh chuan nautê chu a rawn en ve a, a duhawm a ti ve ngang a ni ang, a han pawm kâng a, a en ngawih ngawih a, "Laltetea nausên lai a ang reuh hle mai," a han ti mai chu ka lâwm ang reng. Laltetea pawh a hlimin a nu thu sawi chu a lo tuihnih vat a, "Min chhûn lo thei lo, a nu hian a pâi lai khan min en reng zêl alâwm," a lo ti ve vat a. Nu Chhuani chuan, "Tu nge a hming sa dâwn? A lai hi a thlawn har ang em le? Mi dang fate chu kâr khat hnuah chauh te a thlawn si a," a ti a. Ka pa chuan, "A nu a chhun chuan a lai hrui chu a tla har lo vang," a lo ti ve vat a. Nu Chhuani bawk chuan, "A pu tu hmuh hmasak ber a ni bawk si a, a hming phuah ka duh viau nâ chu ka chuhpui lo mai ang," a ti a. Ka pa chuan, "Ka kian mai dâwn che alâwm, i sak duh phawt chuan," a ti a. Nu Chhuani chuan, "Kei chu a dawtah ka phuah mai ang, a rûkin i lo vui ru lutuk palh ang," a lo ti vat a. Ka pa pawh chuan a kian lui duh bîk tawh lo va, a chhan chu a pian hma aṭang tawhin a hming tûr a lo ngaihtuah sa tawh a, a tu hmuh hmasak ber a lo ni bawk nên a duat ve hle si a, mi dangin a hming an phuah tak tak chu a ngai ngam bîk lo a ni ang.

A lai hrui a thlawn hnuin ka pa chuan Victor tiin a hming chu a sa ta a, kan chhûngkua tu pawh mai chuan Victor-a chu an duatin an hmangaih êm êm a, loh theih loha pâwna an chhuah dâwn te hian ina lo haw vat vat a Victor-a hmuh hlân an nghâkhlel hle ṭhîn.

Victor-a chu zân lamah a mu duh ngai lo va, pangti lum a hre ṭan a, pawm loh chuan a muhîl duh ngai ta tlat lo va. Ka nu te ka pa ten min pawm chhâwk reng thei si lo va, Laltetea nên chuan kan inpawm chhâwk a ni ber mai. Laltetea pawh an inah a riah loh châng a tam ṭan a, nautê thla hnih a nih hma zawng kha chu kan inah a riak deuh chawt a. A nu chuan eng mah sawi lo mah se ṭhenawmho hian an lo sawi duh phian a, Nu Chhuani hnênah an lo sawi deuh chhên a, Nu Chhuani mi mit vêng êm êm chuan Laltetea chu kan ina riak fo lo tûrin a hrilh a; mahse, Laltetea chu nautê hmêl hmu lo chuan a awm thei tawh lo a ni ber mai. Ka thusawi ai chuan nautê chu a ngai pawimawh zâwk tawh a, keimah aiin nautê chu a hmangaih tawh zâwkin ka hria. Ka lâwm rualin a nu ka hmai zah si a, Laltetea chu hâw tûrin ka ti lui fo ṭhîn.

Victor-a pawh thla 6 a lo tling ve ta reng mai, hnute chauh lo pawh nautê chaw a lo ei ve thei ta a. Laltetea chaw pêk chu a duh bîk a, mi dangin kan eitîr chuan a tlei lovin a ṭap a ṭap ṭhîn a, Laltetea chuan an in lamah a hruai ṭhîn a, Nu Chhuani nên an lo hrâi puar ṭhîn. Ni tin deuh thaw chutianga an ina a han hruai tâkah chuan Nu Chhuani pawh chuan Victor-a chu a duatin a ngaihsak ṭan hle a, a hman apiangin a rawn pawm ṭhîn a, an in lamah a hruai a, a nih loh paw'n khaw lai vêlah a lênpui ṭhîn a. Victor-a paw'n a ngaina tawh hle, a hmuh lah hian a ngen ve ni âwm tak hian a bân a lo phar ang a, Nu Chhuani chu a lâwm thei khawp mai. Laltetea lah chuan, "Bawiha hi ṭawng thei vat vat se ka va'n ti tak," a ti chhên a. "Bawiha, i thumal thiam hmasak ber tûr chu maw, 'Âpi, Ânu leh Âpa te hi inneihtîr tawh rawh' tih hi," tiin Victor-a bulah chuan a sawi ṭhîn a, ka û te ho nuih chu a ti za ṭhîn hle.

Victor-a awm hnu hi chuan kan in chhûng hi a nuam sawtin kan mit fûkna ber a lo ni ta. Ka nu paw'n dâwr a khâr phah ta fo mai, a muthilh laiin keima'n dâwr ka va hawng ṭhîn a. Ka pa hi a duh bîk a, kawngkhâr a pelh hrim hrim hi chuan a ṭap nghâl a, a ngên vak vak zêl ṭhîn. Ka pa paw'n a ṭah lai chuan a kalsan duh bîk lo, a hna a ṭhulh phah ve fo ṭhîn. Laltetea pawh ni tin hna a thawk tawh a, Bawihtea kum khat birthday lawmna tûr a intuak ve ngar ngar a, a nu pawh chuan Bawihtea chu a ngaina telh telh a, chhûnah te hian a rawn awm fo ṭhîn. Kei ka chhuah dâwn hian Victor-a hian min ngên ngai miah lo; mahse, Laltetea te, Nu Chhuani leh ka nu leh pa, ka û te ho zawng zawng chu an chhuak tûr hlek hi ṭap chungin a ngên nghâl vat ṭhîn. A inti duhawm thiam êm êm a, naupang dang ang lo takin a fingin thil thiam a ngah ṭan hle, kum khat a tlin hmain duh tâwkin a kal thei tawh a nia! Laltetea'n a infiamna tûr room a siamah chuan a awm tam ber ṭhîn a, infiamna tûr thil tam tak a nei a, chuti chung pawh chuan an rawn leisak ni tin a, Nu Chhuani phei chuan naupang car tê ang chi hi a birthday present atân tiin Lunglei-ah a chahsak a, chhûngkua min suihkhawmtu a ni ka ti lo thei lo. Kimkimi te ho lah chu a nu ang mai hian a ngai a, an lo lên tawh chuan hâw a phal lawk ṭhîn lo va, rei fê an lên phah ṭhîn. Ka û paw'n pasal a nei ve hnai ta, ka û bialpa pawh chu Victor-a chuan a duh nghâl êm êm a, ka û leh a bialpa te pâwn lama an lên chhuah dâwn chuan Bawihtea hi an hruai tel ve fo ṭhîn. Naupang fel tak a ni a, mi duh loh êm êm a nei lo va, tu pawh mai chuan an duat êm êm vek mai a ni. Laltetea lah hi Papa a ti a, an lêng dûn fo ṭhîn. An kawr rawng te lah hi inang kher hâk an tum ṭhîn leh nghâl a, Laltetea hian Victor kawr neih ho ang deuh hlîr kawr a lei ṭhîn a, an chhuah dun dâwn apiangin a inanga hâk a tum ṭhîn. A sam tih dânah pawh kan duh dâna tih kan tum te hian Laltetea hian a lo phal lo va, a duh dânin a sam pawh a cut-sak thlap a, ka nuin a khap pawh hian a ti lui tho ṭhîn. A kum khat birthday lo thleng tûr chu nghâkhlel takin kan thlîr a ni.

Reuben-a te chhûng pawh chuan Victor-a chu an ngai thei êm êm a, an in lama hruai reng an tum ṭhîn. Mahse, Laltetea hian a rem ti vak lo va, amah hi a pa tak angah ngai se a duh a, ka chhûngte pawh chuan Reuben-a te in lama kal tamtîr an phal bîk lêm lo. Reuben-a hian a khât tâwkin a rawn ngaihven ṭhîn a, a toys tûr vêl a rawn kensak ṭhîn a, hetia kan ina a rawn kal châng te pawh hian Laltetea hian awm nuam lo hian a lo siam hmanhmawh ṭhîn a, han khap ve ṭhîn mah ila a thinrim telh telh a, a thîkthu lah a pe chhe telh telh bawk si. Victor-a birthday thlen nân pawh kâr khat chiah a ngai ta, kum khat pawh a tlin hmain thiam thil a ngah ṭan hle, a hrisel ṭhain a harhvâng a, a hlei êm êm mai leh nghal a. Ka pangpâr phun ho hi a pâr a lo lo fai vek ṭhîn a, ka han hauh deuh lah hian ka chhûngte zawng zawng hian keimah zâwk hi min hâu lêt a. A pi eirawng bâwl lai te hian puih ve phêt te hi a tum ṭhîn a, ka chhûngte hian an duatin an ngaihsak a, kei hi chu min duat tho nâin Victor-a pian hnu hi chuan a hma ang khan min duatin min ngaihsak tawh lo va, engkimah Victor an ti zêl tawh mai a ni.

Nu Chhuani'n an inah zanriah a eitîr a, rawn hâw a duh ta miah lo va. Va hruai tûra ka kal chuan min kuah a, hâwpui ka tumin a ṭap char char a, hâwsan lah a duh bawk si lo. Laltetea chuan, "Hetah kan pathuma awm a duh tawh a nih hi, a fing hle mai," a han ti fiam a. Nu Chhuani chuan l, "Kan in a ngaina tawh a, bâkah hmun khata in awm lo hi a hrilhhai ve te pawh a ni ang, a fin tak tak hmain innei vat ula a ṭha ang," a han ti thut mai chu Laltetea nên chuan kan phu chiang kher mai! Kan lâwm bawk si, ka âwih lo zâwk lek lek a. Victor-a hian keini chhûng hi min suihzawm tlat tawh a lo nih dâwn hi. Nu Chhuani chuan awih mut tumin a han pua a, a duh leh si lo va. Laltetea awih chu a duh leh tlat a, Laltetea nên chuan kan kawtah an inawi char char a. Laltetea ka en a, ka nuih a za bawk si, pa nih pawh a lo tlin khawp mai. A tih buai theih teh rêng nên hian, a duat ngaiin a duat reng a, a hmaa a la tih ngai rêng rêng loh pawh a tih ve fo ngai mah se a vui ngai miah lo, a hlimpui zâwk hian ka hre ṭhîn.

Zân dâr 9 vêlah Bawihtea pawh a muhîl a, Nu Chhuani chuan ka nu leh pa te a rawn bia a, "Bawihtea pawh kum khat a lo tling ve ṭêp tawh mai a, naupang fing tak mai a ni a, thil hi a hrethiam zung zung mai bawk si a. Merry leh Laltetea inneih hun pawh hi a hma lama kan ngaihtuah chu a ngai tawh a ni," a han ti a. Ka chhûngte pawh chu an lâwm khawp mai, phûr takin kan inneih tûr chungchâng chu an rêl a, Laltetea pawh a hlim khawp mai. "A tâwp a tâwpah chuan kan innei ve thei dâwn ta a nih hi," tiin a hlim lutuk chu a khi vur vur reng mai a. Ka û chuan, "Tûnah tak hian i hlim bawk si a, i kâ pawh zen ila min seh lo vang a," a lo ti fiam ve char char bawk a.

Naktuk hi Bawihtea birthday a lo ni dâwn ta reng mai! A kum khatna tûr a ni bawk a, lawm ngei ngei kan tum a. Reuben-a'n a birthday lawm nân tiin singkhat a lo pe ve bawk a, Laltetea te nufa lahin Âr vêl an tum vek bawk a, ka nu te'n hall leh cake vêl an buaipui bawk a, an duat rawn bawk a, a birthday lawm an tum dân pawh a hâutak ang reng hle. Kimkimi te lahin a birthday kan lawmna tûr hall an lo chei ve char char bawk a, ka ṭhiante hi zawng an inpe zovin an ṭha ṭhîn khawp mai. Laltetea chuan a birthday-a a hâk tûr kawr vêl pawh a lo ngaihtuah thlap a, kei ai mah chuan a phûr zâwk a, khua vâr vat vat se a ti deuh chhên tawh mai a ni.

Zîng hma takah kan tho vek a, chaw kan ei khamin Laltetea nên Bawihtea nên kan pathumin thla la tûrin ka kal a, poster te kan siamtîr a, tlai lam dâr hnih vêlah hall-ah kan kal a. Kan mi sâwmho pawh an lo kim deuh vek tawh a, present pawh a dawng hnem khawp mai. A birthday cake pawh a lian ṭhain a mawi khawp mai. Laltetea pawh a birthday lawm nân tiin a zai bawk a, kan ṭhenawm naupangho pawh an lâm bawk a, a nuam viau. Birthday kan lâwm zo kan hâw chu a birthday present vel kan hawng a, toys ṭha tak tak leh thawmhnaw a dawng hnem khawp mai. Nu Chhuani chuan, "Naktuk lamah palai kan rawn tîr ang a, in inneih hun tûr pawh a rang lamin tih fel kan tum tawh dâwn a nia," a ti a. Ropui taka inneih chu duh tho mah ila, a ṭûl kherin ka hre lo va, ho têa inneih mai chu ka duh zâwk a. Ka tân phei chuan a vawi hnihna tûr a ni tawh bawk si a, a inthlahrunawm tawh ang reng. Mahse, Laltetea chhûngte lam chuan ropui thei ang ber an duh ve thung a, mipa lam an nih angin an thu hnial a rem si lo va. An duh dân chu zawm hrâm kan tum a, kan inneih ni tûr pawh an ruat fel sa vek a, Laltetea paw'n hna a zawng ve char char bawk a, a lo puitling ve tawh tak zet a nih hi an ti luai luai a. Ni e, kei ai mahin a puitling zâwk a ni.

Bawihtea chu a piin dâwr a nghahpui a, Laltetea nên chuan lên dun kan tum a, Bawihtea hruai ve kan tum nâa chu ka nu chuan, "A muhîl tho si a, in pahnih chauhvin va lêng mai teh u," min ti tlat a. Kan pahnih chuan bike-in kan lêng dun a, a hmaa kan kalna hmunah tho khan kan kal a, boruak a nuamin a thianghlim si a, hawi vêl pawh a nuam khawp mai. Laltetea chuan, "Kan innei ve tak tak dâwn ta chu a ni a, mumang a ang hle mai! Kei chuan ka nupui anga ka ngaihna che rei tawh mah se, mi zawng zawngin ka nupui i ni tih an hre tawh tûr hian min ti hlim tak zet a ni. Inhauh châng a awm lo thei dâwn lo va; mahse, inṭhen ngai lo ang aw," a han ti a. Kei pawh chuan, "Engtik lai paw'n ka tân i awm reng ṭhîn a, ka lâwmin ka zah tak zet che, kan inneih hunah pawh kan lo inhâu a nih paw'n ka tlan miah lo ang, kumkhuain ka hmangaih reng ang che," ka ti ve bawk a. Laltetea chuan pangpâr a hmuh ang ang chu min va thliahsak a, a ṭhingṭhi a, "Merry, dam chhûnga i kawppui tûr atân min pawm thei ang em?" a han ti ngei ah. Kei chuan, "Kum khat vêl ka lo inngaihtuah phawt ang aw," tiin ka fiam a, a pangpâr ken ka lâksak hnuin ka tlânchhe daih a. Laltetea chuan min lo ûm a, "I va'n zei lo tak, ka inlâk romantic ve nên," tiin min man bet a, min kiss thut a. Kei pawh chu ka lo awm ve hle hle a, kan awmna hmunin a zir bawk a, ka kiangah ka hmangaih ber a lo awm bawk nên ka hlimzia chu ka sawi chhuak thiam lo. Ka tâna Laltetea hlutzia sawi fiah tûr hi chuan vân ṭawng hman a ngai ngei ang, vân hnuai ṭawng hi chuan a sawi chhuak zo hian ka ring lo. Hlain ka hmangaihzia hrilh fiah tum pawh ni ila, a thu ka rem sêngin ka ring lo, a thlûk lah ka vuah sên ka ring hek lo. Ka sawi fiah thiam bâk hian ka hmangaih a ni.

KT Rose

Tags: Tunah leh kumkhuain || Mizo Love Story

Mizo Library

Tunah leh kumkhuain || Mizo Love Story

Episode 1

Episode 2

Episode 3

Episode 4

Episode 5

Episode 6

Episode 7

Episode 8

Episode 9

Episode 10

Episode 11

Episode 12

Episode 13

Episode 14

Episode 15

Episode 16

Episode 17

Episode 18

Episode 19

Episode 20

Episode 21

Episode 22

Episode 23

Episode 24

Episode 25

Episode 26

Episode 27

Episode 28

Episode 29

Episode 30(Last Episode)

KT Rose

1 comment

Tunah leh kumkhuain || Mizo Love Story

Episode 1

Episode 2

Episode 3

Episode 4

Episode 5

Episode 6

Episode 7

Episode 8

Episode 9

Episode 10

Episode 11

Episode 12

Episode 13

Episode 14

Episode 15

Episode 16

Episode 17

Episode 18

Episode 19

Episode 20

Episode 21

Episode 22

Episode 23

Episode 24

Episode 25

Episode 26

Episode 27

Episode 28

Episode 29

Episode 30(Last Episode)

KT Rose

Related Posts

1 comment